LATAMANIN xlikalanka katiyatni putum tapaxuwan tawilaputunkgo. Pero kʼuma xaʼawatiya kilhtamaku «lu tuwa nawan» (2 Tim. 3:1). Lhuwa tuku tlawa pi nila napaxuwakgo latamanin, la komo tuku ni xaʼakgstitum, tajatat, ni anan taskujut o niy tiku paxkiyaw. Asta xlakskujnin Dios tlan nataxlajwanikgo chu tsinu tsinu namakgatsankgakgo tapaxuwan. Komo chuna titaxtumaw, ¿tuku natlawayaw xlakata nakgalhiparayaw tapaxuwan?

Xlakata nakgalhtiyaw uma takgalhskinin, pulana talakaskin naʼakgatekgsaw tuku wamputun tapaxuwan chu la tlawakgonit makgapitsi latamanin chuntiya nakgalhikgo tapaxuwan maski titaxtukgo taʼakglhuwit. Alistalh naʼakxilhaw tuku natlawayaw xlakata chuntiya nakgalhiyaw tapaxuwan chu la namaliwakayaw kintapaxuwankan.

Napaxuwaya ni watiya wamputun nalitsina. Kawiliw akgtum liʼakxilhtit. Lataman tiku lhuwa way kuchu max lu lhuwa litsin. Pero akxni nialh kgachi, nialh litsin chu lakapastaka pi chuntiya kgalhi lhuwa taʼakglhuwit. Xtalitsi ni makgapala. Ni xaxlikana tapaxuwan nema xkgalhi (Prov. 14:13).

Tapaxuwan lu tanu tuku wamputun. Tapaxuwan wa nema makgkatsiyaw kkinakujkan akxni kgalhiyaw o wi tuku lu tlan kgalhkgalhiyaw. Kgalhikan tapaxuwan wamputun lu napaxuwayaw maski tlan o nitlan tuku titaxtumaw (1 Tes. 1:6). Chuna, tlan tapaxuwan natawila chatum lataman maski nitlan tuku titaxtuma. Akgtum liʼakxilhtit, apóstoles nitlan kalikatsinika xlakata xlichuwinankgo Cristo, pero Biblia lichuwinan pi «tapanukgolh ktamakxtumit xla makgmapakgsinanin, xpaxuwakgoy mpi lakgchankgolh nalipatikgoy ntamaxana xpalakata xtukuwani Jesús» (Hech. 5:41). Xlikana, ni lipaxuwakgolh xlakata nitlan kalikatsinika, wata xpaxuwakgo xlakata ni makgxtakgkgolh Dios.

Niti talakachin tapaxuwan chu ni kaj akglakgwa katikgalhiw tapaxuwan. ¿Tuku xlakata? Xlakata tapaxuwan na anta makgtanuma ktayat nema masta xʼespíritu santo Dios. Uma espíritu kinkamakgtayayan nakgalhiyaw «xasasti tayat», nema makgtanuma tapaxuwan (Efes. 4:24; Gál. 5:22). Chu akxni kgalhiyaw tapaxuwan tlakg tlan tayaniyaw taʼakglhuwit nema kgalhiyaw kkilatamatkan.

Akxni Jehová tlawalh Katiyatni, xlakaskin pi putum tlan xwa, ni xlakaskin pi xʼanalh tuku nitlan chuna la akxilhaw la uku. Xlikana, maski latamanin tlawakgo tuku nitlan, xla chuntiya kgalhi tapaxuwan. Biblia wan: «Litliwakga chu tapaxuwan anta wi niku xla tawila» (1 Crón. 16:27). Nachuna, xnaku lu lipaxuwa akxni akxilha tuku tlan tlawakgo xlakskujnin (Prov. 27:11).

¿La tlan nastalaniyaw xliʼakxilhtit Jehová? Ni lu nalilakgaputsayaw akxni max nitlan taxtuyacha tuku xlakaskinaw. Ni kamakgatsankgaw tapaxuwan, wata kalilakpuwaw tuku tlan kgalhiyaw la uku chu kakgalhkgalhiw pi alistalh tlan nakitaxtu. *

 Anta kBiblia tekgsaw lhuwa liʼakxilhtit xlakata xlakskujnin Dios tiku chuntiya xkgalhikgo tapaxuwan maski titaxtukgolh taʼakglhuwit. Chatum tiku chuna titaxtulh wa Abrahán. Xla titaxtulh taʼakglhuwit xlakata tuku nitlan xtlawakgonit amakgapitsi latamanin chu milh kilhtamaku katuwa tawi xlatamat (Gén. 12:10-20; 14:8-16; 16:4, 5; 20:1-18; 21:8, 9). Pero nikxni makgatsankgalh tapaxuwan. ¿Tuku xlakata? Xlakata ankgalhin xwi kxtalakapastakni takgalhkgalhin xlakata tlan nalatama putum kilhtamaku kxTamapakgsin Mesías (Gén. 22:15-18; Heb. 11:10). Jesús lichuwinalh: «Wa mintlatkan Abrahán, tipaxuwalh mpi naukxilha nkinkilhtamaku» (Juan 8:56). Akinin tlan nastalaniyaw xliʼakxilhtit Abrahán komo tapaxuwan nalilakapastakaw tuku lu tlan nalipaxuwayaw kkilhtamaku nema aku mima (Rom. 8:21).

Chuna la Abrahán, apóstol Pablo chu Silas kajwatiya xlilakpuwankgo xtamalaknun Dios. Xlakata tliwakga xkgalhikgo xtakanajlakan, chuntiya paxuwakgolh maski tuwa tuku titaxtukgolh. Akgtum kilhtamaku lu tliwakga kalimakgsnokgka kiwi chu katamaknuka kpulachin. Biblia lichuwinan pi «[max itat tsisni], xtlawama xʼoración mPablo, chu Silas, chu xtlinimakgo xkakni Dios» (Hech. 16:23-25). Maski takgalhkgalhin xkamaxki litliwakga, xlipaxuwakgo xlakata wa xlipatinamakgo xtukuwani Cristo. Komo stalaniputunaw xliʼakxilhtitkan, ankgalhin kuenta natlawayaw tuku tlan kitaxtu xlakata nakgalhiniyaw takanajla Dios akxni skujnaniyaw (Filip. 1:12-14).

La uku na kgalhiyaw lhuwa tlan liʼakxilhtit xlakata natalan tiku chuntiya kgalhikgo tapaxuwan maski titaxtukgonit lhuwa taʼakglhuwit. Akgtum liʼakxilhtit, noviembre kata 2013, supertifón Haiyan lu tliwakga titaxtulh kFilipinas. Lakxtlawalh xchikkan liwaka 1,000 familias xla xtatayananin Jehová. Chuna titaxtulh tala tiku wanikan George, xalak kachikin Tacloban. Lichuwinalh: «Natalan chuntiya tapaxuwan wilakgo maski lu tuwa tuku ktitaxtuw. Ni kkatsi tuku nakwan xlakata tapaxuwan nema kmakgkatsiyaw». Komo nalilakpuwanaw putum tuku Jehová tlawanit kimpalakatakan chu napaxtikatsiniyaw, chuntiya napaxuwayaw maski tuwa tuku natitaxtuyaw. ¿Tuku atanu kinkamaxkinitan Jehová xlakata namakgkatsiyaw tapaxuwan?

Tuku tlakg kinkamaxkiyan tapaxuwan wa la talalinaw Jehová. Lakgapasaw Mapakgsina xlikalanka kakilhtamaku. Xla kiDioskan, kinTlatkan chu kiʼamigojkan (Sal. 71:17, 18).

Atanu tuku lipaxuwayaw wa xlakata kgalhiyaw latamat chu tlan lipaxuwayaw (Ecl. 3:12, 13). Nachuna, xlakata wa Jehová tiku tlawalh pi nalakgapasaw, katsiyaw tuku xtalakaskin chu tuku lakaskin natlawayaw (Col. 1:9, 10). Xlakata uma, katsiyaw tuku tlan kinkamamakgkatsiniyan kkilatamatkan chu tuku natlawayaw. Pero lhuwa latamanin ni liwana katsikgo tuku natlawakgo kxlatamatkan. Pablo liwana masiyalh akxni lichuwinalh uma: «Wa ntu ni xati xlakgastapu a ukxilha, chu xtakgan ntu ni a likgaxmata, chu ntu ni a lakgtanuy kxtapuwan nchixku, wa yuma wa ntu lakkaxtlawanikgonit Dios wa nti mpaxkikgoy. Wa mpi wa Dios nti nkinkalimasiyuninitan spiritu santo» (1 Cor. 2:9, 10). Komo nakatsiyaw tuku lakapastaknit natlawa Dios chu xtalakaskin, nakinkamakgtayayan nakgalhiyaw tapaxuwan.

Kaʼakxilhwi amakgapitsi tuku tlawanit Jehová xlakata xkachikin. Tlawanit pi tlan nakinkatapatiyan kintalakgalhinkan (1 Juan 2:12). Chu xlakata xtalakgalhaman kinkamaxkiyan takgalhkgalhin xlakata tlan nalatamayaw kxasasti kakilhtamaku, nema lakatsuwa wi (Rom. 12:12). Nachuna la uku kinkamaxkiyan lhuwa kinatalankan tiku makxtum nakatakakninaniyaw (Sal. 133:1). Chu Biblia liwana kinkawaniyan pi Jehová kuentajtlawa xkachikin xlakata nitu nakatlawani Satanás chu xdemonios (Sal. 91:11). Komo nalilakpuwanaw putum uma tasikulunalin xla Dios, ankgalhin tlakg napaxuwayaw (Filip. 4:4).

¿Tlan namaliwakayaw kintapaxuwankan? Jesús lichuwinalh: «Wa chuna kkalixakgatliman lakimpi lakxtum nakintapaxuwayatit, chu luwa tlanka tapaxuwan nakgalhiyatit» (Juan 15:11). Uma tachuwin kinkamasiyaniyan pi tlan ankgalhin tlakg napaxuwayaw. Tapaxuwan xtachuna la akgtum lhkuyat. Komo lakaskinaw pi lhkuyat tlakg napasa, talakaskin tlakg nawiliniyaw kiwi. Xtachuna la uma, komo lakaskinaw pi tlakg napaxuwayaw, talakaskin pi tlakg nalimastakayaw xʼespíritu Dios. Wa xlakata talakaskin chuntiya naskiniyaw Jehová xʼespíritu chu nalilakpuwanaw Biblia, nema litlawaka espíritu santo (Sal. 1:1, 2; Luc. 11:13).

Apulaktu tuku natlawa pi tlakg namaliwakayaw kintapaxuwankan wa ankgalhin nalilakpuwanaw natlawayaw tuku lakgati Jehová (Sal. 35:27; 112:1). ¿Tuku xlakata chuna wanaw? Xlakata chuna kinkamalakatsukin. Biblia kinkawaniyan: «Kapekuani xaxlikana Dios chu kamaki xlimapakgsin. Xlakata wa tuku xlitlawat chatum chixku» (Ecl. 12:13). Wa xlakata, komo naskujnaniyaw Jehová wa tuku nakinkaliminiyan tapaxuwan. *

Komo nakgalhiyaw tapaxuwan, ni kajwatiya tlan namakgkatsiyaw, wata lhuwa tuku atanu litamakgtayayaw. Akgtum liʼakxilhtit, akxni tapaxuwan skujnaniyaw Jehová maski kgalhiyaw taʼakglhuwit, lu makgapaxuwayaw (Deut. 16:15; 1 Tes. 5:16-18). Nakgalhiyaw xaxlikana tapaxuwan tlawa pi nalakgmakganaw tuku lhuwa nakgalhiputunaw chu kinkamakgpuwantiniyan tlakg naskujnaniyaw Jehová (Mat. 13:44). Komo chuna natlawayaw tlan nakinkakitaxtuniyan chu tlakg nakgalhiyaw tapaxuwan, tlan namakgkatsiyaw chu natlawa pi nakamakgapaxuwayaw amakgapitsin (Hech. 20:35; Filip. 1:3-5).

Nachuna, komo namaliwakayaw kintapaxuwankan, asta max natlawa pi ni lu natatatlayaw. Biblia lichuwinan: «Akgtum naku nema paxuwa mapaksanan» (Prov. 17:22). Chatum makuchina tiku lakputsanan tiku skuja kʼUniversidad xla Nebraska (Estados Unidos) wi tuku lichuwinalh nema tatalakxtumi tuku wan Biblia. Wan: «Komo la uku wix paxuwaya chu makgkatsiya pi nitu tsankganiyan kmilatamat, max alistalh wix ni lu katitatatla».

Chuna la akxilhnitaw, maski lamaw kxakatuwa kakilhtamaku, tlan namakgkatsiyaw xaxlikana tapaxuwan. Wa xlakata talakaskin naskinaw espíritu santo kʼoración, nalikgalhtawakgayaw Biblia chu nalilakpuwanaw. Nachuna, komo tlakg kgalhiputunaw tapaxuwan, talakaskin nalilakpuwanaw tasikulunalin nema kgalhiyaw, nastalaniyaw xliʼakxilhtitkan xlakskujnin Dios tiku tliwakga xtakanajlakan chu naliskujaw natlawayaw xtalakaskin. Chuna tlan namakgkatsiyaw tuku lichuwinan Salmo 64:10: «Lata ti laktankswa, nakamakgapaxawa tu tlawanit Dios, chu wa natalipawan akxni tu natapaxtokga».