1, 2. 1) ¿Tuku lichuwinankgo makgapitsi natalan xlakata kgalhikan tliwakga takanajla? 2) ¿Tuku xlakaskinka takgalhskinin nalichuwinanaw?

CHATUM tala xalak Canadá lichuwinan: «Xlakata tliwakga kintakanajla kimakgapaxuwa chu kimaxki talakaskin naktitaxtutilha kintaʼakglhuwit chali chali». Chatum tala xalak Brasil lichuwinan: «Kimpuskat chu akit lu kpaxuwayaw umakgolh puxamatutu kata lata ktamakgaxtokgnitaw xlakata tliwakga kintakanajlakan». Chu chatum tala xalak Filipinas lichuwinan pi xlakata tliwakga xtakanajla kgalhi takaksni chu tlan katalalin putum natalan.

² Chuna la akxilhaw, komo tliwakga nakgalhiyaw kintakanajlakan lhuwa tuku tlan nakinkakitaxtuniyan. Xlikana, putum akinin lipaxuwaputunaw uma. Wa xlakata, max natakgalhskinaw la tlan tliwakga nakgalhiyaw kintakanajlakan. Nalichuwinanaw xlakata uma. Pero pulana talakaskin liwana naʼakgatekgsaw tuku masiya Biblia xlakata tiku tliwakga kgalhi xtakanajla. Kʼuma artículo, nalichuwinanaw akgtutu takgalhskinin nema lu xlakaskinka. Pulana, ¿tuku kilhchanima tliwakga nakgalhiya mintakanajla? Xlipulaktiy, ¿tuku liʼakxilhtit nakinkamakgtayayan tlakg tliwakga nakgalhiyaw kintakanajlakan? Chu xlipulaktutu, ¿la nakinkamakgtayayan nakgalhiyaw  uma takanajla komo naliskujaw nakgalhiyaw «xtalakapastakni Cristo»?

3. Chuna la wan Biblia, ¿tuku litalakgpali tiku kaj nkatiwaj chixku chu tiku tliwakga xtakanajla?

³ Apóstol Pablo lichuwinalh tuku litalakgpali «chatum chixku tiku tliwakga xtakanajla» chu tiku kaj «nkatiwaj chixku» (kalikgalhtawakga 1 Corintios 2:14-16). Lichuwinalh pi tiku kaj «nkatiwaj chixku» ni makglhtinan tuku «xtalulokgtat kspiritu Dios, sampi takgwiti mpuwan yuma; na ni la akgatekgsa». Pero chixku tiku «tliwakga xtakanajla» lakputsanani putum tuku natlawa chu kgalhi «xtalakapastakni Cristo». Wa xlakata, Pablo kinkawanin pi tliwakga kakgalhiw kintakanajlakan. ¿Tuku atanu litalakgpali umakgolh chatiy latamanin?

4, 5. ¿Tuku tayat kgalhi tiku kaj nkatiwaj chixku?

⁴ Pulana kalichuwinaw la lakpuwan tiku kaj nkatiwaj chixku. Kajwatiya xʼakstu lilakgaputsakan xlakata kgalhi talakapastakni tuku xalak kakilhtamaku, nema Pablo limapakuwi «spiritu wa ntu asta [la uku] skujma kxnakukan lakgachixkuwimakgananin» (Efes. 2:2). Uma espíritu tlawa pi lhuwa latamanin nachuna nalikatsikgo la amakgapitsin. Wa tlawakgo tuku tlan akxilhkgo chu ni liskujkgo xlakata nakgalhakgaxmatkgo xlimapakgsin Dios. Tuku tlakg lilakgaputsa tiku kaj nkatiwaj chixku wa xlakata la nalichuwinankan chu tuku lhuwa kgalhiputun o natataya limapakgsin nema lakpuwan pi chuna xlilat nalikatsinikan.

⁵ Tiku kaj nkatiwaj chixku tlawa «xtatlawaputu ntiyatliwa» (Gál. 5:19-21). Xapulana carta nema Pablo kamalakgachanilh congregación xalak Corinto, lichuwinan atanu tayat nema kgalhikgo umakgolh latamanin: makgtanukgo niku ni xlimakgtanutkan, kamapitsikgo latamanin, tlawakgo pi naʼanan tasitsi, lalinkgo kpumapakgsin, ni maxkikgo kakni mapakgsinanin chu xlakaskinka akxilhkgo nawayankgo chu nakgotnankgo. Nachuna, ni liskujkgo xlakata natayanikgo tuku nitlan tlawaputunkgo (Prov. 7:21, 22). Judas lichuwinalh pi makgapitsi latamanin nialh xkgalhikgolh takanajla (Jud. 18, 19).

6. ¿Tuku tayat kgalhi tiku tliwakga xtakanajla?

⁶ Chixku tiku tliwakga xtakanajla lu tanu tayat kgalhi. Lu lilakgaputsa la talalin Dios chu stalaniputun xliʼakxilhtit (Efes. 5:1). Uma kilhchanima pi liskuja xlakata nachuna nalakpuwan la lakpuwan Jehová. Lu xlikana kanajla pi Dios lama. Ankgalhin kgalhakgaxmata xlimapakgsin (Sal. 119:33; 143:10). Liskuja xlakata nakgalhi «xtatlaw espíritu» chu ni wa «xtatlawaputu ntiyatliwa» (Gál. 5:22, 23). Kalichuwinaw akgtum liʼakxilhtit xlakata tlakg tlan naʼakgatekgsaw tuku kilhchanima tliwakga kgalhikan takanajla. Chatum lataman tiku lhuwa limaxtu kilhtamaku xlakata tatlakgni, wankan pi lu lakgati tatlakgni. Nachuna, tiku lhuwa xtapalh liʼakxilha tuku xla Dios wankan pi lhuwa kilhtamaku limaxtu xlakata xtakanajla.

7. ¿Tuku wan Biblia xlakata latamanin tiku tliwakga kgalhikgo xtakanajlakan?

⁷ Jesús lichuwinalh pi tiku tliwakga xtakanajlakan tapaxuwan wilakgolh. Mateo 5:3 lichuwinan: «Xatapaxuwan latamakgo tiku katsikgo pi lakaskinkgo tuku xla Dios, xlakata wa kalakgchan Tamapakgsin kʼakgapun». Chu Romanos 8:6 lichuwinan tuku xlakata xlakaskinka tliwakga nakgalhiyaw kintakanajlakan. Lichuwinan: «Sampi lapi wa lakapastakaw wa ntu xtatlawaputu nkiliwakan, linin nkitaxtuniy; wampi lapi wa lakapastakaw wa ntu lakaskin spiritu, latamat nkitaxtuniy, chu ntatanksni». Komo kuenta natlawayaw kintakanajlakan, natakgalhiyaw takaksni Dios chu akinin nachuna nakgalhiyaw takaksni la uku chu tlan putum kilhtamaku nalatamayaw kkilhtamaku nema aku mima.

8. ¿Tuku xlakata chuntiya naliskujaw xlakata tliwakga nakgalhiyaw kintakanajlakan?

 ⁸ Katuwa tawila kintakanajlakan kʼuma kakilhtamaku niku lamaw. Lamaw kxlakgstipankan latamanin tiku ni lakpuwankgo chuna la Dios, wa xlakata kuenta natlawayaw kintalakapastaknikan. Akxni wi tiku taxlajwani xtakanajla, nialh tapaxuwan tawila chu xtalakapastakni wa litatsama tuku xalak kakilhtamaku. ¿Tuku nakinkamakgtayayan nichuna nakinkaʼakgspulayan? Chu ¿la tlan tlakg tliwakga nakgalhiyaw kintakanajlakan?

9. 1) ¿Tuku nakinkamakgtayayan tliwakga nakgalhiyaw kintakanajlakan? 2) ¿Tiku lu tlan xliʼakxilhtit nakalichuwinanaw?

⁹ Chuna la laktsu kamanan wi tuku katsinikgo xlakata liʼakxilhtit nema kawilinikgo xnatlatnikan, nachuna akinin tlakg tliwakga nakgalhiyaw kintakanajlakan akxni nastalaniyaw xliʼakxilhtitkan tiku tliwakga kgalhikgo xtakanajlakan. Pero tiku kaj nkatiwaj latamanin kinkamasiyanikgoyan tuku ni kilitlawatkan (1 Cor. 3:1-4). Anta kBiblia tekgsaw pulaktiy liʼakxilhtit xlakata uma chatiy latamanin tiku tliwakga xtakanajla chu tiku ni kgalhi takanajla. Kʼuma artículo, nalichuwinanaw xatlan xliʼakxilhtitkan Jacob, María chu Jesús. Chuna, nakatsiniyaw la tlakg tliwakga nakgalhiyaw kintakanajlakan.

10. ¿La limasiyalh Jacob pi tliwakga xkgalhi xtakanajla?

¹⁰ Pulana kalichuwinaw xliʼakxilhtit Jacob. Lu tuwa tuku titaxtulh kxlatamat chuna la akinin. Chatum xtala xwanikan Esaú tiku xmakgniputun. Nachuna, xputiatlat o xpuwiti xakgskgawiputun chu makglhuwa xtlawaniputun tuku nitlan. Pero Jacob tliwakga xkgalhi xtakanajla maski xlama kxlakgstipankan latamanin tiku nitlan xlikatsikgo. Xkanajla tamalaknun nema Dios tlawanilh Abrahán chu ankgalhin kuentajtlawalh xfamilia, nema lu xlakaskinka xʼama litaxtu kxtalakaskin Dios (Gén. 28:10-15). Xtachuwin chu tuku xtlawa limasiyalh  pi lhuwa xtapalh xliʼakxilha xlimapakgsin chu xtalakaskin Jehová. Akgtum liʼakxilhtit, akxni lakpuwa pi Esaú xʼama talatlawa, tasaskinilh Dios pi xlakgmaxtulh. Wanilh anta kxʼoración: «Wix lichuwinanti: “Xlikana tlan naklikatsiniyan lu xlikana naktlawa pi nalhuwankgo minkamanan la kuku o muntsaya nema wi kpupunu, nema nila putlakgekan la xlilhuwa”» (Gén. 32:6-12). Jacob xlikana limasiyalh kxlatamat pi xkanajla tamalaknun nema Jehová xwaninit chu nema xkawaninit xnatlatni.

11. ¿Tuku likatsiyaw pi María tliwakga xkgalhi xtakanajla?

¹¹ Kaʼakxilhwi xliʼakxilhtit María. ¿Tuku xlakata Jehová laksakli xlakata wa xtse Jesús nalitaxtu? Xlakata tliwakga xkgalhi xtakanajla. Chuna wanaw xlakata katsiyaw takilhtlin nema limalankilh Jehová akxni kalakgapaxialhnalh xparientes Zacarías chu Elisabet (kalikgalhtawakga Lucas 1:46-55). Tuku wa María limasiyalh pi lu xpaxki xTachuwin Dios chu liwana xlakgapasa Tatsokgni xaHebreo (Gén. 30:13; 1 Sam. 2:1-10; Mal. 3:12). Chu akxni tatamakgaxtokgli José, ni kgalhikgolh talakgxtumit asta akxni lakachilh Jesús. Uma kilhchanima pi xchatiykan tlakg xlakaskinka xʼakxilhkgo xtalakaskin Dios nixawa natlawakgo tuku xlakaskinkgolh (Mat. 1:25). Akxni titaxtutilhalh kata, María lu kuenta tlawalh putum tuku tlawalh chu tuku lichuwinalh Jesús. Wa xlakata «xmakiy kxnaku xlipaks yuma nkatuwaj» (Luc. 2:51). Lu xlakaskinka xliʼakxilha xtamalaknun Dios xlakata Mesías. Tlan liwana nastalaniyaw xliʼakxilhtit chu nalilakpuwanaw la pulana nawiliyaw kkilatamatkan xtalakaskin Dios.

12. 1) ¿Tuku watiya tayat kgalhi Jesús chu xTlat? 2) ¿La tlan nastalaniyaw xliʼakxilhtit Jesús? (Kaʼakxilhti xapulana dibujo).

¹² Kalichuwinaw xlakata Jesús. Wa tiku tlakg tliwakga kgalhi xtakanajla tiku latamanit unu kKatiyatni. Putum kxlatamat chu la kskujnanima Dios, limasiyalh pi xlakgati kstalani xliʼakxilhtit xTlat, Jehová. Chuna la xlakpuwan, tuku xmakgkatsi chu tuku xtlawa limasiyalh pi ankgalhin pulana xwili kxlatamat xlimapakgsin chu xtalakaskin Jehová (Juan 8:29; 14:9; 15:10). Akgtum liʼakxilhtit, katamalakxtumiw tuku wa Isaías xlakata xtalakgalhaman Dios chu tuku tsokgli Marcos xlakata tuku xmakgkatsi Jesús (kalikgalhtawakga Isaías 63:9 chu Marcos 6:34). ¿Chuna likatsiyaw la Jesús chu ankgalhin kalakgalhamanaw tiku lakaskinkgo tamakgtay? ¿Xlakaskinka liʼakxilhaw nalichuwinanaw chu namasiyayaw tamakatsinin xla Tamapakgsin chuna la tlawalh Jesús? (Luc. 4:43). Komo chuna natlawayaw, nalimasiyayaw pi tliwakga kgalhiyaw kintakanajlakan.

13, 14. 1) ¿Tuku lu tlan liʼakxilhtit kinkawilinikgoyan tiku la uku tliwakga kgalhikgo xtakanajlakan chuna la Cristo? 2) Kalichuwinanti akgtum liʼakxilhtit.

¹³ La uku kilhtamaku lhuwa tiku nachuna liskujkgonit xlakata nakgalhikgo tayat chuna la xla Cristo. Umakgolh latamanin tiku tliwakga xtakanajlakan xatapaxuwan lichuwinankgo Dios, tlan kamakgamakglhtinankgo amakgapitsin chu kgalhikgo atanu lakwan tayat. Chuna la akinin, liskujkgo xlakata ni natlawakgo tuku nitlan chu chuna tlan nakgalhikgo lakwan tayat. Chatum tala puskat xalak Brasil wanikan Rachel lichuwinan: «Xapulana lu xaklakgati xaklhakganan chuna la latamanin xalak kakilhtamaku. Wa xlakata kilhakgat ni lu tlan xtasiya. Pero akxni kkatsinilh tuku xaxlikana, kkatsinilh pi lu xlakaskinka nakliskuja xlakata tliwakga nakkgalhi kintakanajla. Lu tuwa kmakgkatsilh naklakgpali kilatamat, pero tlakg kpaxuwalh chu la uku ktekgsnit tuku tlan kimamakgkatsini kkilatamat».

¹⁴ Chatum tala xalak Filipinas wanikan Reylene tanu taʼakglhuwit nema xkgalhi. Maski xtatayana Jehová xwanit, pero kaj watiya xlilakgaputsa nakgalhi tlan takgalhtawakga chu akgtum tlan taskujut xlakata wi tuku nalitaxtu  kxlatamat. Lichuwinan: «Chuna la xtitaxtutilha kilhtamaku nialh lu xlakaskinka xakliʼakxilha komo tlakg xakskujnanilh Dios. Pero tunkun kkatsilh pi wi tuku tlakg xlakaskinka xkitsankgama kkilatamat nixawa kintaskujut. Wa xlakata pulana kwilipa kkilatamat xtaskujut Jehová». Lata ama kilhtamaku Reylene lu tlan liʼakxilhtit litaxtu kimpalakatakan xlakata lu kgalhini takanajla xtamalaknun Jehová nema lichuwinan Mateo 6:33, 34. Xla liwana katsi pi Jehová nakuentajtlawa. Max anta kkincongregaciónkan wilakgolh natalan tiku nachuna titaxtukgolh. Akxni akxilhaw la stalanikgo xliʼakxilhtit Cristo, ¿ni xlikana pi nachuna tlawaputunaw? (1 Cor. 11:1; 2 Tes. 3:7).

15, 16. 1) ¿Tuku talakaskin xlakata nachuna nalitaxtuyaw la Cristo? 2) ¿La tlan nakatsiniyaw chuna la lakpuwan Jesús?

¹⁵ ¿La tlan nastalaniyaw xliʼakxilhtit Cristo? Biblia kinkawaniyan anta 1 Corintios 2:16 pi kilikgalhitkan «xtalakapastakni Cristo». Chu kRomanos 15:5 lichuwinan pi watiya «ntalakapastakni nalakgalhiniyatit lantla xtalakaskin nCristo Jesús». Wa xlakata, komo chuna litaxtuputunaw la Cristo talakaskin nalakgapasaw tuku tayat kgalhi, tuku lakpuwan chu la likatsi. Tuku xla tlakg xlilakgaputsa wa la xtalalin Dios. Komo chuna nawanaw la Jesús tlakg natalakatsuwiniyaw Jehová. Wa xlakata lu xlakaskinka nakatsiniyaw la lakpuwan Jesús.

¹⁶ ¿Tuku nakinkamakgtayayan tlan chuna natlawayaw? Kstalaninanin Jesús akxilhkgolh akxni tlawalh milagros, mastalh taʼakgchuwin, tlan xkatalalin putum latamanin chu la xlilatama tastakyaw xalak Biblia. Lichuwinankgolh: «Kin nti kmalulokgaw xpalakata xlipaks wa ntu ntlawalh» (Hech. 10:39). Xlikana, akinin nila akxilhaw Jesús. Pero Jehová kinkamaxkinitan tuku lichuwinankgo libro xla Mateo, Marcos, Lucas chu Juan xlakata nakatsiyaw la xlikatsi. Komo nalikgalhtawakgayaw chu nalilakpuwanaw, lhuwa tuku nakatsiniyaw xlakata la lakpuwan Jesús. Chu chuna tlan nastalaniyaw umakgolh tastakyaw: «Kinkapulanin xaliʼakxilhtit, lakimpi nastalaniyatit lantla ntlawanit» chu «na chuna wixin, watiya ntalakapastakna nkakgalhitit» chuna la xla Cristo (1 Ped. 2:21; 4:1).

17. ¿Tuku xlakata kinkamakgtayayan nalakpuwanaw chuna la Jesús?

¹⁷ ¿Tuku xlakata kinkamakgtayayan nalakpuwanaw chuna la Jesús? Xlakata naʼakgatekgsaw, kawiliw akgtum liʼakxilhtit. Komo nawayaw xalakwan liwat nakinkamatliwakglhan. Nachuna komo kaj watiya nalilakpuwanaw xtalakapastakni Cristo nakinkamatliwakglhiniyan kintakanajlakan. Chuna, tsinu tsinu nakatsiniyaw tuku xla xtlawalh komo katuwa xtatakgsli. Chu uma nakinkamakgtayayan nalaksakaw tuku xatlan chu chuna nitu nasakgali kintalakapastaknikan chu namakgapaxuwayaw Dios. Xlikana pi wa uma tuku kilitlawatkan xlakata nastalaniyaw uma tastakyaw: «Nkalilhakganantit nkimPuchinakan Jesucristo» (Rom. 13:14).

18. ¿Tuku katsininitaw kʼuma artículo xlakata tliwakga kgalhikan takanajla?

¹⁸ Kʼuma artículo, lichuwinanitaw tuku kilhchanima tliwakga kgalhikan takanajla. Nachuna lichuwinanitaw la kinkamasiyaniyan xliʼakxilhtitkan latamanin tiku tliwakga xtakanajlakan. Chu katsinitaw la kinkamakgtayayan tlakg tliwakga nakgalhiyaw kintakanajlakan komo nakgalhiyaw «xtalakapastakni Cristo». Pero tsankga makgpitsi tuku nalichuwinanaw xlakata uma. Akgtum liʼakxilhtit, ¿la nakatsiyaw komo tliwakga wi kintakanajlakan?, ¿tuku tlan natlawayaw xlakata tlakg namatliwakglhaw kintakanajlakan? chu ¿la nakinkamakgtayayan kkilatamatkan komo tliwakga nakgalhiyaw kintakanajlakan? Kʼatanu artículo nakinkamakgtayayan nakgalhtiyaw umakgolh takgalhskinin.