ARTÍCULO NEMA NATALIKGALHTAWAKGA 6
Ni namakgxtakgaw Dios
«¡Asta nakni xaʼakgstitum naklatama!» (JOB 27:5).
TAKILHTLIN sjj 34 Ni kmakgxtakgan, nakkgalhakgaxmatan
TUKU NATALICHUWINAN *
1. ¿La limasiyakgolh kgalhtutu xtatayananin Jehová tiku kalichuwinan uma párrafo pi ni makgxtakgkgo Jehová?
KALILAKPUWAW uma pulaktutu li’akxilhtit. Chatum tsumat tiku wi k’escuela chu xmakgalhtawakgena wan pi putum alumnos namakgtlawakgo paskua xlakata nixaxlikana takanajla. Xla katsi pi uma paskua ni lakgati Dios, wa xlakata lakatsuku wan pi ni katimakgtlawalh. Chatum kgawasa lichuwinama Dios chu katsi pi kchiki nema lakgchan anta kxchik chatum xcompañero xalak escuela tiku kalikgalhkgamanan xtatayananin Jehová. Maski maxanan an chu tlakga malakcha. Chatum xatlat wi anta kxtaskujut chu xmalana wani pi wi tuku natlawa nema nitlan. Maski katsi pi namakgatsankga xtaskujut, liwana wani pi xla ni lixkajni likatsi chu kgalhakgaxmata limapakgsin xlakata Dios chuna kaskini xlakskujnin (Rom. 13:1-4; Heb. 13:18).
2. ¿Tuku takgalhskinin nakgalhtiyaw chu tuku xlakata?
2 ¿Tuku tayat lakpuwana wix pi limasiyakgolh uma kgalhtutu xtatayananin Jehová? Max pulaklhuwa tuku tlan nawanaw, chuna la ni pekuankgolh chu ni akgskgawinankgolh. Pero wi pulaktum nema lu xlakaskinka chu kamakgpuwantinilh chuna nalikatsikgo: ni makgxtakgnankan. Putum liskujkgolh xlakata ni namakgatsankgananikgo Jehová chu nakgalhakgaxmatkgo xlimapakgsin. Xlikana pi Jehová lu tlan kaʼakxilhli. Akinin nachuna lakaskinaw pi kinTlatkan xalak akgapun tlan nakinkaʼakxilhan. Wa xlakata, kakgalhtiw umakgolh takgalhskinin: ¿Tuku kilhchanima ni makgxtakgnankan? ¿Tuku xlakata xlakaskinka chuna nalikatsiyaw? ¿Chu la tlan natatliwakglhaw xlakata ni namakgxtakgnanaw kʼuma xakatuwa kakilhtamaku?
TUKU KILHCHANIMA NI NAMAKGXTAKGNANAW
3. 1) ¿Tuku kilhchanima ni namakgxtakgnanaw? 2) ¿Tuku liʼakxilhtit nakinkamakgtayayan naʼakgatekgsaw tuku kilhchanima ni namakgxtakgnanaw?
3 Ni makgxtakgnankan kilhchanima napaxkiyaw chu kaj xman wa nakakninaniyaw Jehová chu natlawayaw tuku xla lakgati. Anta kBiblia tachuwin xahebreo nema matitaxtikan tachuwin «ni makgxtakgnankan», limaklakaskinkan xlakata tuku nema xatakgatsin o nema ni tatatla. Akgtum liʼakxilhtit, Limapakgsin xlichuwinan pi israelitas xmakamaxkikgo Jehová tantum animal, nema ni xtatatla (Lev. 22:21, 22). * Xlakskujnin Dios nila xmakamastakgolh tantum animal nema ni xkgalhi xtantun, xtakgen o xlakgastapu, o komo xtatatla. Xpalakata Jehová lu xlakaskinka xwanit pi tantum animal xatakgatsin xwa chu ni xtatatlalh (Mal. 1:6-9). ¿Tuku xlakata lakaskin pi putum tuku namaxkiyaw xatakgatsin xliwanat? Liʼakxilhtit nema nalichuwinanaw nakinkamakgtayayan naʼakgatekgsaw. Akxni wi tuku tamawayaw la akgtum fruta, ni lakaskinaw pi xamaklhukun nakinkamaxkikanan o ni xatakgatsin. Lakaskinaw pi xatlan nawan chu xatakgatsin. Nachuna, tapaxkit nema kgalhiniyaw chu ni makgxtakgaw Jehová chuna xliwanat. Xla lakaskin pi xatakgatsin xliwanat chu ni namakgxtakgaw.
4. 1) Kalichuwinanti tuku xlakata ni talakaskin ni makglakgalhinanin nawanaw xlakata ni namakgxtakgaw Jehová. 2) Chuna la wan Salmo 103:12-14, ¿tuku ni kinkaskiniyan Jehová?
4 Xlakata katsiyaw pi akinin makglakgalhinanin chu lhuwa tuku nitlan tlawayaw, max nakinkakgalhskinkanan: «¿Talakaskin ni makglakgalhinanin nawanaw xlakata ni namakgxtakgnanaw?». Ni chuna. Kaʼakxilhwi pulaktiy tuku xlakata. Pulana xlakata Jehová ni wa kuenta tlawa kintalakgalhinkan. Anta kxTachuwin kinkawaniyan: «Para wix [kuenta xtlawa] wakg talakgalhin ¿tiku tlan ixtayanilh nak milakatin?» (Sal. 130:3, SXP). Xla katsi pi akinin makglakgalhinanin chu kinkatapatiyan (Sal. 86:5). Xlipulaktiy, Jehová katsi tuku matlaniyaw chu ni kintikaskinin tuku nila tlawayaw (kalikgalhtawakga Salmo 103:12-14). Wa xlakata, ¿la tlan xatakgatsin nawanaw o ni namakgxtakgaw Jehová?
5. ¿Tuku xlakata wa tapaxkit nakinkamakgtayayan xlakata ni namakgxtakgnanaw?
5 Xlakata ni namakgxtakgnanaw talakaskin nakgalhiyaw tapaxkit. Tapaxkit chu ni namakgxtakgaw Jehová kinTlatkan xalak akgapun xatakgatsin xliwanat. Komo tapaxkit nema kgalhiniyaw chuntiya tliwakga natawila maski lhuwa tuku natitaxtuyaw, uma kilhchanima pi ni makgxtakgaw (1 Crón. 28:9; Mat. 22:37). Amakgtum kalichuwinamparaw kgalhtutu xtatayananin Jehová tiku lichuwinaw kxapulana párrafo. Katsiyaw pi tsumat ni xʼakstu akgtlakgwantawilaputun, kgawasa ni tamamaxaniputun akxni nalichuwinan Dios chu xatlat ni makgatsankgaputun xtaskujut. Pero ¿tuku xlakata chuna tlawakgo? Xlakata katsikgo pi xlimapakgsin Dios xaʼakgstitum chu tuku tlakg xlakaskinka wa namakgapaxuwakgo xTlatkan xalak akgapun. Tapaxkit nema kgalhinikgo Jehová kamatlawi pi wa pulana nawilikgo tuku lakpuwan Jehová akxni wi tuku tlawaputunkgo. Chuna nalimasiyakgo pi ni makgxtakgnankgo.
TUKU XLAKATA XLAKASKINKA NI NAMAKGXTAKGNANAW
6. 1) ¿Tuku xlakata xlakaskinka pi kinchatunukan ni namakgxtakgnanaw? 2) ¿La limasiyakgolh Adán chu Eva pi xmakgxtakgnankgo?
6 ¿Tuku xlakata xlakaskinka pi kinchatunukan ni namakgxtakgnanaw? Xlakata Satanás lakatakima Jehová chu nachuna akinin. Anta kjardín xa’Edén, uma ángel tiku nitlan xtayat litaxtulh Satanás, kilhchanima «Lakatayana». Xla maxkajwanilh stlan xtukuwani Jehová akxni wa pi nitlan mapakgsina chu lixkajni likatsi. Lu nitlan, Adán chu Eva tatayakgolh Satanás chu lakatakikgolh Dios (Gén. 3:1-6). Akxni xlamakgolh kʼEdén, lhuwa tuku xkgalhikgo xlakata tlan xmatliwakglhkgolh tapaxkit nema xkgalhinikgo Jehová. Pero akxni Satanás lakatakinalh, tapaxkit nema xkgalhinikgo Jehová ni xatakgatsin xwanit. Alistalh, kxkilhtamaku Job, tawilapa atanu taʼakglhuwit: ¿Xʼama tawilakgo latamanin tiku xlikana xpaxkikgolh Jehová chu ni xmakgxtakgkgolh? O ¿latamanin xlikana tlan ni makgxtakgnankgo?
7. Chuna la wan Job 1:8-11, ¿la xʼakxilha Jehová pi Job ni xmakgxtakgnan, chu la xʼakxilha Satanás?
7 Job latamalh akxni israelitas xlamakgo kʼEgipto. Ama kilhtamaku ni xʼanan chatum latamanin tiku xlikana ni xmakgxtakgnan chuna la xla. Xlikana, xkgalhi talakgalhin chu tlawalh tuku nitlan chuna la akinin. Pero Dios lu xpaxki xlakata ni xmakgxtakga. Xlikana, max Satanás xlakatakinita Jehová max xwaninit pi latamanin xʼamakgolh makgxtakgkgo. Wa xlakata wanilh pi xʼakxilhli Job. Chuna la xlin xlatamat xlimasiya pi Satanás kaj xaʼakgsanina. Wa xlakata Satanás wanilh pi xmaxkilh talakaskin naputsanani xlakata xlitasiyalh komo ni xmakgxtakgnan. Jehová xlipawan xʼamigo Job, wa xlakata maxkilh talakaskin Satanás pi xputsananilh (kalikgalhtawakga Job 1:8-11).
8. ¿La talatlawalh Satanás Job?
8 Satanás lixkajni likatsi chu makgninan. Makglhtilh Job putum tuku xkgalhi: xtumin, xlakskujnin chu la tlan xlilakgapaskan. Nachuna, makgnilh kgalhkaw xkamanan tiku lu xkapaxki. Alistalh, tlawalh pi xchipalh akgtum xalixkajni tajatat nema litatsamalh tsitsi lata kxtantun asta kxʼakgxakga. Xpuskat lu xlilakgaputsama chu nitlan xlimakgkatsi, asta wanilh pi nitlan xlichuwinalh Dios chu xnilh. Job xniputun, pero nikxni makgxtakgli Dios. Wa xlakata, Satanás atanu tuku liputsananipa. Limaklakaskilh kgalhtutu xʼamigos Job, tiku akglhuwa kilhtamaku lakgapaxialhnankgolh pero ni makgtayakgolh. Wata nitlan tuku wanikgolh chu lixkajni lichuwinankgolh. Wanikgolh pi wa Dios tiku chuna xmapatinima chu xla ni kuenta xtlawa komo xla ni xmakgxtakga. Asta makgatekgsnikgolh pi xla nitlan xlikatsi chu xlakgchan putum tuku xpatima (Job 1:13-22; 2:7-11; 15:4, 5; 22:3-6; 25:4-6).
9. Maski lhuwa tuku nitlan titaxtulh, ¿tuku ni tlawalh Job?
9 ¿Tuku tlawalh Job xlakata putum tuku nitlan titaxtulh? Komo xkgalhi talakgalhin, wa xlakata sitsilh chu kakilhnilh nixaxlikana xʼamigos chu wa tuku alistalh katsilh pi ni chuna xliwanat xwanit. Kgalhmakgtayalh tuku xla xpalakata chu ni wa tuku xla Dios (Job 6:3; 13:4, 5; 32:2; 34:5). Pero maski lu nitlan tuku xlama nikxni makgxtakgli Jehová. Ni kanajlalh tuku xwanimakgo nixaxlikana xʼamigos. Chu wa: «¡Ni kakilakpuwanika pi akit nakkawaniyan pi xaʼakgstitum wixin! ¡Asta nakni xaʼakgstitum naklatama!» (Job 27:5). Uma xlakaskinka tachuwin limasiyalh pi ni xʼama makgxtakga Dios maski xlalh tuku nitlan. Nikxni taxlajwanilh chu akinin tlan nachuna natlawayaw.
10. ¿La makgtanumaw kinchatunukan tuku lichuwinalh Satanás xpalakata Job?
10 ¿La makgtanumaw kinchatunukan tuku lichuwinalh Satanás xpalakata Job? Xla lichuwinan pi ni xlikana paxkiyaw Jehová, pi nialh katiskujnaniw xlakata kaj nalakgmaxtuyaw kilatamatkan chu pi akinin makgxtakgnanaw (Job 2:4, 5; Rev. 12:10). ¿La kinkamamakgkatsiniyan uma? ¿Nixlikana pi nitlan limakgkatsiyaw? Pero kalilakpuwaw uma: Jehová lu kinkalipawanan, wa xlakata maxki talakaskin Satanás pi nakinkaputsananiyan xlakata nalimasiyayaw pi ni makgxtakgaw chu pi Satanás chatum akgsanina. Nachuna Dios kinkamalaknuniyan pi nakinkamakgtayayan (Heb. 13:6). ¡Lanka talakgalhaman kgalhiyaw xlakata kinkalipawanan Mapakgsina xlikalanka Katiyatni! ¿Akxilhaw tuku xlakata xlakaskinka ni namakgxtakgnanaw? Xlakata chuna limasiyayaw pi Satanás kaj xaʼakgsanina chu chuna kgalhmakgtayayaw xtukuwani chu la mapakgsinan kinTlatkan xalak akgapun. Wa xlakata, ¿la tlan natatliwakglhaw xlakata ni namakgxtakgnanaw?
TUKU NATLAWAYAW LA UKU XLAKATA NI NAMAKGXTAKGNANAW
11. ¿Tuku tlan nakatsiniyaw xlakata Job?
11 Satanás tlakg maliwakanit la katalatlawama xlakskujnin Dios la uku «xaʼawatiya kilhtamaku» (2 Tim. 3:1). Wa xlakata, ¿la tlan namatliwakglhaw la uku xlakata ni namakgxtakgnanaw? Chuntiya nakinkamakgtayayan xliʼakxilhtit Job. Akxni nina xmakgapatinankan xlimasiyanita pi ni xmakgxtakgnan. Kaʼakxilhwi pulaktutu tuku tlawalh chu la tlan nastalaniyaw xli’akxilhtit.
¿La natlawayaw xlakata namatliwakglhaw ni namakgxtakgnanaw? (Kaʼakxilhti párrafo 12). *
12. 1) Chuna la wan Job 26:7, 8, 14, ¿tuku tlawalh pi Job xmaxkilh kakni Jehová? 2) ¿Tuku nakinkamakgtayayan akinin namaxkiyaw kakni Dios?
12 Matliwakglhi tapaxkit nema xkgalhini Dios akxni akxilhli tuku xtlawanit. Job limaxtulh kilhtamaku xlakata naʼakxilha xtamalakatsukin Jehová (kalikgalhtawakga Job 26:7, 8, 14). Lu kaks lilakawa akxni lilakpuwa Katiyatni, akgapun, puklhni chu jilina, maski xkatsi pi kaj tsinu xlakgapasa tuku Jehová xmalakatsukinit. Nachuna lhuwa xtapalh xliʼakxilha tuku Jehová xmasiyaninit, wa xlakata wa: «Kmakinit mintachuwin» (Job 23:12). Tuku kaks xlilakawan chu tuku xmakgkatsi xpalakata Jehová makgpuwantinilh napaxki chu namakgapaxuwa. Uma matliwakglhi xlakata ni namakgxtakga. Chuna la Job, talakaskin nalimaxtuyaw kilhtamaku xlakata nalilakpuwanaw xtamalakatsukin Jehová. La uku, latamanin lhuwa tuku katsinikgo xlakata tamalakatsukin nixtachuna la kxkilhtamaku Job. Nachuna kgalhiyaw xatakgatsin Biblia, nema nakinkamakgtayayan liwana nalakgapasaw Dios. Putum tuku nakatsiniyaw nakinkamakgtayayan namaxkiyaw kakni Jehová. Chu uma nachuna nakinkamakgtayayan napaxkiyaw, nakgalhakgaxmataw chu nikxni katimakgxtakgwi (Job 28:28).
Xlakata ni namakgxtakgnanaw, talakaskin ni naʼakxilhaw tiku ni lhakganankgonit (Kaʼakxilhti párrafo 13). *
13, 14. 1) Chuna la lichuwinan Job 31:1, ¿niku limasiyalh Job pi xkgalhakgaxmatnan? 2) ¿La tlan nastalaniyaw xliʼakxilhtit?
13 Liskujli xlakata ankgalhin nakgalhakgaxmatnan kxlatamat. Job xkatsi pi xlakata ni namakgxtakgnan xtalakaskin nakgalhakgaxmata Jehová. Akxni kgalhakgaxmatnanaw tatliwakglhaw xlakata ni namakgxtakgnanaw. Job liskujli xlakata nakgalhakgaxmata Dios chali chali. Akgtum liʼakxilhtit, lu kuenta xtlawa xlakata la xkalikatsini lakpuskatin (kalikgalhtawakga Job 31:1). Xlakata xtamakgaxtokgnit, xkatsi pi nitlan tlakg tlan xlikatsinilh atanu puskat nema ni xpuskat xwanit. La uku kilhtamaku, lamaw niku lhuwa anan tuku nakinkamatlawiputunan talakgxtumit xalimaxana. ¿Chuna natlawayaw la Job chu ni tlakg tlan nalikatsiniyaw atanu tiku ni tamakgaxtokgaw? ¿Ni katimastaw talakaskin naʼakxilhaw tiku ni lhakganankgonit? (Mat. 5:28). Komo chali chali liskujaw namachokgoyaw tuku nitlan tlawaputunaw, uma namatliwakglha ni namakgxtakgnanaw.
Xlakata ni namakgxtakgnanaw, talakaskin ni lu nalilakgaputsayaw tumin (Kaʼakxilhti párrafo 14). *
14 Job nachuna kgalhakgaxmatli Jehová xlakata la xʼakxilha tumin. Lichuwinalh pi komo xlipawa xtumin lu nitlan xkitaxtunilh kxlakatin mapakgsinanin (Job 31:24, 25, 28). La uku kilhtamaku niku lamaw lu lakgatikan tumin. Komo nastalaniyaw xtastakyaw Biblia nema kinkamasiyaniyan la naʼakxilhaw tumin nakinkamakgtayayan ni namakgxtakgnanaw (Prov. 30:8, 9; Mat. 6:19-21).
Xlakata ni namakgxtakgnanaw, talakaskin ankgalhin nalilakpuwanaw kintakgalhkgalhinkan(Kaʼakxilhti párrafo 15). *
15. 1) ¿Tuku takgalhkgalhin makgtayalh Job xlakata ni namakgxtakgnan? 2) ¿Tuku xlakata talakaskin nalilakpuwanaw takgalhkgalhin nema Jehová kinkamalaknuniyan?
15 Tlakg xlakaskinka akxilhli pi Dios xʼama sikulunatlawa. Job xlikana xkatsi pi Dios kuenta xtlawa komo xʼama makgxtakga o ni (Job 31:6). Maski lhuwa tuku liputsananika, xlipawan Jehová pi xʼama sikulunatlawa chu max wa uma makgtayalh ni namakgxtakga. Jehová lu tlan limakgkatsilh xpalakata Job chu asta maxkilh akgtum lanka tasikulunalin maski makglakgalhinaku xwanit (Job 42:12-17; Sant. 5:11). Chu kkilhtamaku nema aku mima lhuwa tasikulunalin namakglhtinan. ¿Tuku akinin natlawayaw? ¿Liwana katsiyaw pi Jehová nakinkasikulunatlawayan komo ni namakgxtakgaw? Ni talakgpali kiDioskan (Mal. 3:6). Komo nalakapastakaw pi xla lanka xtapalh liʼakxilha ni namakgxtakgnanaw nakinkamakgtayayan nakgalhkgalhiyaw akgtum tlan latamat kkilhtamaku nema aku mima (1 Tes. 5:8, 9).
16. ¿Tuku talakaskin liwana natlawayaw?
16 Talakaskin liwana nalilakpuwanaw nikxni namakgxtakgnanaw. Max lakgachunin namakgkatsiyaw pi kaj kiʼakstukan chuna tlawaputunaw. Pero ni kaj kiʼakstukan wilaw. Xlikalanka Katiyatni wilakgolh lhuwa millones natalan tiku liskujkgo xlakata ni namakgxtakgkgo Jehová. Nachuna, anta natawilayaw kxlakgstipankan lakchixkuwin chu lakpuskatin xalamakgasa tiku xkgalhikgo xtakanajlakan chu ni makgxtakgnankgolh maski xkamakgniputunkan (Heb. 11:36-38; 12:1). Putum akinin kastalaniw xliʼakxilhtit Job chu nachuna nawanaw la tiwa: «¡Asta nakni xaʼakgstitum naklatama!». Chu xlakata ni namakgxtakgnanaw wa kamalankilh Jehová putum kilhtamaku.
TAKILHTLIN sjj 124 Putum kilhtamaku katataya Dios
^ párr. 5 ¿Tuku kilhchanima ni makgxtakgnankan? ¿Tuku xlakata Jehová xlakaskinka li’akxilha pi xlakskujnin ni namakgxtakgnankgo? ¿Chu tuku xlakata akinin xlakaskinka nalimasiyayaw uma tayat? Uma artículo nakinkamakgtayayan na’akxilhaw tuku takgalhtin masta Biblia. Nachuna nakinkamakgtayayan tlakg namatliwakglhaw uma tayat xlakata chali chali ni namakgxtakgnanaw. Komo chuna natlawayaw lhuwa tasikulunalin namakglhtinanaw.
^ párr. 3 Ktachuwin hebreo, tachuwin nema limaklakaskinkan akxni wankan pi tantum animal ni xtatatla tatalakxtumi tachuwin nema limaklakaskinkan akxni wankan pi chatum lataman ni makgxtakgnan.
^ párr. 50 TUKU TASIYA KDIBUJO: Akxilhaw Job la kamasiyanima makgapitsi xkamanan xtamalakatsukin Jehová.
^ párr. 52 TUKU TASIYA KDIBUJO: Chatum tala lakgmakgan chu ni akxilha tiku ni lhakganankgonit akxni tiku kataskujkgo masiyaniputunkgo.
^ párr. 54 TUKU TASIYA KDIBUJO: Tayani ni tamawa akgtum lanka televisión nema tapalaxla chu ni maklakaskin chu nila xokgo.
^ párr. 56 TUKU TASIYA KDIBUJO: Limaxtu kilhtamaku xlakata natlawa oración chu nalilakpuwan takgalhkgalhin xlakata Paraíso.
