¿Niku kilhtsukulh sinagoga?

TACHUWIN sinagoga minacha ktachuwin griego nema kilhchanima «tamakxtumit». Lu tlan uma tukuwani xlakata makgasata kilhtamaku anta ksinagogas xtamakxtumikan xlakata namakglhtinankan tastakyaw chu nakakninanikan Dios kachikinin xla Judea. Ni liwana takatsi xlakata ktatsokgni xaHebreo sinagoga ni lu lichuwinankan. Pero ktachuwin xaGriego wan pi uma niku xtamakxtumikan ay xʼanan kxapulana siglo.

Tiku lu katsinikgo wankgo pi sinagogas xwija akxni israelitas kachilinka kBabilonia. Encyclopaedia Judaica lichuwinan: «Tiku xkachilinkanit ni la xʼankgo kTemplo xlakata xlamakgolh kʼakgtum kachikin niku ni xlakgapasnankgo chu xlakata xmaklakaskinkgo takgoxamixat xlakata tuku xtitaxtumakgolh, lakgachunin xtamakxtumikgo Sábado chu xlikgalhtawakgakgo Tatsokgni». Akxni taxtukgocha niku xkachilinkanit chuntiya tsukukgolh tamakxtumikgo xlakata natlawakgo oración chu nalikgalhtawakgakgo Tatsokgni tsukukgolh malakkikgo sinagogas niku xtamakgxtakgkgo.

Kxapulana siglo, sinagoga lu xlakaskinka litaxtulh xlakata lhuwa tuku anta xtlawakan chu nachuna xtamakxtumikgo judíos tiku xwilakgolh kMediterráneo chu kMedio Oriente chu anta kʼIsrael. Makgalhtawakgena Lee Levine, xla Universidad Hebrea xla Jerusalén wan: «Anta tlan xkgalhtawakgakan, xwayankan, xlakkaxtlawakan taʼakglhuwit, xmakikan tumin xalak kachikin chu xtlawakan tamakxtumit xlakata política». Chu alistalh wampara: «Tuku tlakg xlakaskinka xwanit wa xtamakxtumikgo xlakata xla xtakanajlakan». Wa xlakata ni kaks lilakawanaw pi Jesús ankgalhin xʼan ksinagoga (Mar. 1:21; 6:2; Luc. 4:16). Anta xmasiya, kstakyawanan chu xkamakgpuwantini tiku anta xʼankgo. Akxni xwija congregación xla kstalaninanin Cristo, apóstol Pablo na xlismaninit nalichuwinan Dios ksinagogas. Xlakata lu xlismanikgonit latamanin tiku tlakg xkatsiputunkgo xlakata xtakanajlakan anta xtamakgstokgkgo, tuku pulana xtlawa Pablo akxni xchan kʼakgtum kachikin wa xʼan ksinagoga xlakata nalichuwinan Dios (Hech. 17:1, 2; 18:4).