Kintlat, John Mills, tamunulh kata 1913 kNueva York, akxni xkgalhi 25 kata. Tala Russell mastalh taʼakgchuwin xla tamunut. Ni makgas titaxtulh kilhtamaku alh latama kʼisla xla Trinidad, anta tatamakgaxtokgli chatum tiku na xlikgalhtawakga Biblia wanikan Constance Farmer. Anta makgtayalh William Brown * xlakata nawili «Foto-Drama de la Creación» asta 1923, akxni tala Brown chu xpuskat kamalakgachaka kʼÁfrica Occidental. Kinatlatni, tiku na xkgalhikgo takgalhkgalhin naʼankgo kʼakgapun, tamakgxtakgkgolh kTrinidad.

Kinatlatni kgalhikgolh kgalhnajatsa kamanan. Xapuxku wanika Rutherford xlakata ama kilhtamaku Rutherford xpulalima Sociedad Watch Tower. Alistalh akit klakachilh 30 xla diciembre kata 1922. Kiwanika Woodworth (maski na xkilimapakuwikan Worth) xlakata Clayton Woodworth, director xla The Golden Age (nema la uku lilakgapaskan revista ¡Despertad!). Kimputumkan kinkamalakgachakan kʼescuela, pero wa tuku tlakg kinkamasiyanikan wa xlakata kintakanajlakan. Kintse lu xkatsini la xkinkalimasiyaniyan Biblia. Chu kintlat lu xlakgati xkinkalitachuwinanan tuku lichuwinan Biblia lhuwa tuku xtlawa xlakata tlan liwana xaklilakapastakwi.

Tuku tlawakgolh lu tlan kitaxtulh. Xlakata kgalhtutu xlakgkgawasan kilaw kʼEscuela de Galaad chu kgalhtutu kinatalan laktsuman akglhuwa kata precursoras litaxtukgolh kTrinidad y Tobago. Xlakata lu tlan xtamasiy chu xliʼakxilhtitkan, kinatlatni kinkamakgtayakgon naktamakgxtakgaw «nak ixchik Dios», chuna la wan Salmo 92:13, SXP. Xtaʼakgpuwantin kinkamakgtayan chuntiya anta naktamakgxtakgaw kxchik Jehová.

 Akxni xlichuwinankan Dios anta xlakkaxwilikan kkinchik. Precursores anta xtamakxtumikgo chu ankgalhin xlichuwinankgo tala George Young, chatum misionero xalak Canadá tiku xkilanit kTrinidad. Nachuna, kinatlatni xatapaxuwan xlichuwinankgo tiku xcompañeros xwankgonit la familia Brown, tiku ama kilhtamaku xlamakgolh kʼÁfrica Occidental. Putum uma kimakgpuwantinilh naklichuwinan Dios akxni kajku akgkaw kata xakkgalhi.

Ama kilhtamaku, kilikgalhtawakgakan lu xkalichuwinan nixaxlikana takanajla, stananin tiku xkgalhiputunkgo tumin chu tuku nitlan xtlawakgo mapakgsinanin. Wa xlakata, kata 1936 tiku xpulalinkgo takanajla wanikgolh mapakgsina xalak Trinidad pi nialh xmastalh talakaskin natamakgpitsi likgalhtawakga xla Watch Tower. Kmatsekgwi, pero chuntiyaku kmaklakaskiw asta akxni sputli. Ktlawaw marchas chu xaklinaw tratados chu letreros. Chu nachuna akxtum xakataʼanaw tiku xʼakgchuwinankgo kʼakgtum putlaw, tiku xalak Tunapuna, lakgamakgat ktlawaw lata niku xwi isla. Putum uma tuku ktitaxtuw kimakgpuwantinilh naktamunu akxni kkgalhilh akgkuchaxan kata.

Putum xliʼakxilhtit kifamilia chu putum tuku ktitaxtulh kimakgpuwantinilh pi na misionero xaklitaxtulh. Uma chuntiyaku xaklilakapastakma kata 1944 akxni kkilalh kʼisla xla Aruba xlakata akxtum naklitachuwinan Dios tala Edmund Cummings. Lu klipaxuwaw akxni kilakgolh kgalhkaw latamanin akxni lakapastakka Cristo kata 1945. Titaxtulh akgtum kata tawi xapulana congregación kʼuma isla.

Ni makgas kilhtamaku titaxtulh, klitachuwinalh Dios chatum tiku akxtum xaktaskuja xwanikan Oris Williams. Xla lu xkgalhmakgtaya tuku xmasiyanikanit knixaxlikana takanajla. Pero akxni tsukulh likgalhtawakga Biblia, katsinilh tuku xlikana masiya xTachuwin Dios chu tamunulh 5 xla enero kata 1947. Titaxtulh kilhtamaku, ktamakgaxtokgwi. Papaʼ xla noviembre kata 1950, precursora litaxtulh. Kinchatiykan lu tlan tuku ktitaxtuw.

Kata 1955, kinkawanikan pi nakanaw kʼEscuela de Galaad, wa xlakata kmakgxtakgwi kintaskujutkan, kstaw kinchikkan, tuku xakkgalhiyaw chu kmakgxtakgwi Aruba. Kilhtamaku 29 xla julio kata 1956, kmasputuw clase 27 de Galaad chu kinkamalakgachakan kNigeria.

Titaxtulh kilhtamaku, Oris xlilakpuwan xlakata ama kilhtamaku: «Xʼespíritu Jehová namakgtayayan tuku titaxtuya akxni skujnaniya la misionero. Kinchixku misionero xwamputun, pero akit nichuna xaklakpuwan. Akit xakkgalhiputun kinchik chu kamanan. Pero klakgpalilh kintapuwan akxni kkatsilh pi lu xtalakaskin nalichuwinankan xalakwan xalaksasti. Wa xlakata, akxni kmasputuw Escuela de Galaad, liwana xaklakpuwanit pi nakan lichuwinan Dios la misionera. Akxni ktawakaw kbarco Queen Mary, tala Worth Thornton, kinkawanin pi tlan xkinkakitaxtunin chu kinkawanin pi xakamaw skujaw kBetel. Lu nitlan kmakgkatsilh. Pero ni makgas kilhtamaku titaxtulh klismanilh chu kpaxkilh kintaskujut. Lhuwa tuku kliskujli kBetel. Pero tuku tlakg klakgatilh wa nakamakgamakglhtinan tiku xminkgo kBetel. Lu xakkapaxki latamanin, chu uma taskujut xtlawa pi tlan nakkatachuwinan natalan xalak Nigeria. Tiku xchinkgo xtlakgwankgonit, xtsinksmakgo, xkgalhputimakgo chu xlitsamakgo pokgxni. Lu xaklipaxuwa nakkamakgtaya xlakata nakamaxkikan tuku xmaklakaskinkgo. Putum uma taskujut litaxtu nema makamaxkiyaw Jehová, wa xlakata lu tlan xaklimakgkatsi chu xaklipaxuwa». Putum tuku xaklakgayaw xkinkamakgtayayan nakmatliwakglhaw kintakanajlakan.

Kata 1961, kkatatamakxtumiw kifamilia kTrinidad, tala Brown kinkalitachuwinan tuku lu tlan xtitaxtunit kʼÁfrica. Chu akit kkalitachuwinalh la kstakma xtaskujut Jehová kNigeria. Tala Brown kiʼakgpixtiyalh o kisnatli chu wanilh kintlat: «Johnny, wix nikxni kila kʼÁfrica, pero Woodworth kilalh». Chu kintlat wa: «Chuntiya katlawa Worth, chuntiya katlawa». Taʼakgpuwantin nema kimaxkikgolh tiku tliwakga xkgalhikgo xtakanajlakan kimatliwakglhli xlakata tlakg tlan naktlawa kintaskujut.

 Kata 1962 kgalhilh talakgalhaman nakan clase 37 de Galaad, niku kimasiyanika liwaka akgkaw papaʼ la tlawakan akgtum taskujut. Tala Wilfred Gooch, tiku xlitaxtu superintendente de sucursal kNigeria, kilalh kclase 38 chu malakgachaka kʼInglaterra, chu akit kilakgayawaka xtaskujut. Nachuna ktlawalh la tala Brown, lakalhuwa niku kilalh, uma kimakgtayalh tlakg nakalakgapasa natalan chu nakapaxki. Maski wi tuku xkatsankgani natalan lu xpaxuwakgo chu tlan xmakgkatsikgo, liwana xmasiyakgo pi tumin ni limin tapaxuwan chu atanu tuku nakgalhiya. Maski ni tlakg xkgalhikgo, tlan xtasiya akxni xʼankgo ktamakxtumit xlakata lu tlan xtakaxtayakgo. Lhuwa xchankgo kputlaw akxni xʼankgo klanka tamakxtumit chu na xmaklakaskinkgo bolekajas, * akgtum putlaw nema ni putum xlakchaway. Lakgachunin xlimin tachuwin nema xwan: «Lhuwa slankgat tlan lanka pupunu nalitaxtu».

¡Lu xlikana uma tachuwin! Maski kaj aktsu tuku natlawa chatum lataman; chu tuku natlawayaw lanka xtapalh litaxtu. Kata 1974, Nigeria litaxtulh xliʼakgtiy país, niku na takgatsilh 100,000 tiku lichuwinankgo Dios. Xlikana pi xkachikin Jehová lu kstakma.

Ama kata tsukulh guerra kNigeria chu makgapalalh lata kata 1967 asta 1970. Natalan tiku xwilakgolh xakilhtutu kgalhtuchokgo Níger, klakatsu kBiafra, akglhuwa papaʼ nila kkamakgtayaw. Pero nila chuna xaktamakgxtakgaw, xtalakaskin nakkaliniyaw taway xaʼespiritual. Chuna la klichuwinalh xapulana, makglhuwa kpatakutwi kgalhtuchokgo, chu xaklipawanaw chu xaktlawaniyaw oración Jehová.

Lu klakapastaka ama tuku ktitaxtuw. Lhuwa tuku nitlan xʼanan, tajatat chu soldados tiku xkgalhikgo likan lakapala xmaklakaskinkgo. Akxni xakpatakutaw, kalipekua xakwiliyaw kilatamatkan. Tuwa xwanit nakalakatsalakan soldados, tiku nitlan xkinkalakpuwanikgoyan. Pero tuku tlakg xkinkamakgapekuanan wa akxni xaktitaxtuyaw lakatsu niku xlamakgnimaka. Akgtum tsisni, kpatakutli kgalhtuchokgo xla Asaba chu kchalh kʼOnitsha chu kalh kʼEnugu xlakata nakkamakgpuwantini lakgkgolotsin. Chu atanu kilhtamaku kalh kamatliwakglha lakgkgolotsin kʼAba, niku ni xmastakan talakaskin nawiliya makgskgot katsisni. Anta kPort Harcourt, lakapala klimakgasputuw oración tamakxtumit xlakata soldados xtalakatsuwimakgolh.

Amakgolh tamakxtumit lu xlakaskinka xwanit nakamalakapastakakan natalan pi Jehová lu xkapaxki chu nakakuentajtlawa, chu xlakata nakamaxkikan tastakyaw xlakata ni namakgtanukgo kʼguerra chu makxtum natawilakgo. Natalan xalak Nigeria ni makgxtakgkgolh Jehová chu tayanikgolh tuku nitlan xtitaxtumakgolh. Limasiyakgolh tapaxkit maski xʼanan lhuwa tasitsi chu makxtum tawilakgolh. Lu lanka talakgalhaman pi anta xakkatawi akxni titaxtukgolh uma taputsastalanit.

Kata 1969, tala Milton Henschel wa tiku pulalilh lanka tamakxtumit nema xwanikan «Paz en la Tierra» kʼEstadio xla Yankees (Nueva York). Akit kmakgtayalh chu lhuwa tuku kkatsinilh. Uma tuku ktitaxtulh lu kimakgtayalh xlakata kata 1970 tlawaparaka lanka tamakxtumit nema xwanikan «Hombres de Buena Voluntad» kLagos (Nigeria). Ktlawaw uma tamakxtumit akxni aku ksputnit guerra kgantaxtulh xlakata Jehová kinkasikulunatlawan. Kilakgolh liwaka 121,128 latamanin chu matitaxtika kpulakkutujun tachuwin. Natalan Knorr chu Henschel, chu amakgapitsi tiku minkgolh kʼavión xalak Estados Unidos chu Inglaterra, akxilhkgolh pi tamunuka 3,775 chuna la xtamunukanit kPentecostés kata 33. Ama kilhtamaku lu kkgalhilh taskujut. Lu xtalhuwima tiku xlichuwinankgo Dios.

Liwaka puxamakaw kata klatamalh kNigeria lakgachunin kskujli la superintendente viajante chu la superintendente de zona kʼÁfrica Occidental. Misioneros xpatikatsininankgo akxni xmakglhtinankgo takgpuwatin chu la xkalilakgaputsakan chatunu chatunu. Akit lu xaklipaxuwa pi xakkawani pi ankgalhin xkalakapastakkan. Uma taskujut kimasiyanilh pi natalan tamaklakaskin nakalilakgaputsakan chatunu chatunu xlakata tlan  naskujnanikgo Jehová chu xlakata tliwakga chu makxtum natawila xkachikin.

Xlakata Jehová kinkamakgtayan tlan ktayaniw tajatat chu taʼakglhuwit nema makgxtakgli guerra. Ankgalhin kakxilhwi xtasikulunalin. Oris lichuwinalh:

«Kinchatiykan makglhuwa kinkachipan xkgoyalonkgat (paludismo). Akgtum kilhtamaku, Worth nialh xchuwinan akxni chalh kʼhospital. Kiwanika pi max nialh xʼama tatlani, pero tatlanilh. Akxni lakgawa, litachuwinalh xlakata xTamapakgsin Dios chatum enfermero tiku xwanikan Nwambiwe. Alistalh, kilakgapaxialhnamparaw xlakata chuntiya naklitachuwinanaw tuku xalak Biblia. Makgamakglhtinalh tuku xaxlikana chu kgolotsin litaxtulh kʼAba. Akit na kkamakgtayalh lhuwa latamanin, asta musulmanes chu na kskujnin Jehová litaxtukgolh. Lu klipaxuwaw pi kkalakgapaswi chu kkapaxkiw natalan xalak Nigeria, xtalismaninkan chu xtachuwinkan».

Uma wi tuku na kinkamasiyanin: xlakata tlan nakinkakitaxtuniyan kintaskujutkan kʼatanu país, talakaskin nakapaxkiyaw natalan maski tanu xtalismaninkan.

Kata 1987, kinkalakgpalinikan kintaskujutkan. Akxni xakwilaw kBetel kinkawanikan pi nakinkamalakgachakanan kʼisla caribeña xla Santa Lucía xlakata naklichuwinanaw Dios. Anta kʼÁfrica, lakchixkuwin xtatamakgaxtokgkgo lhuwa lakpuskatin, pero kSanta Lucía xlatatawilakgo pero ni xtamakgaxtokgkgo. Pero xlitliwakga xTachuwin Dios kamakgpuwantinilh tiku xakkamakgalhtawakgeyaw pi xtlawakgolh talakgpalit kxlatamatkan.

Chuna la titaxtutilhalh kata, kilitliwakgakan tsukulh taxlajwani. Wa xlakata, Lakgkgolotsin tiku Pulalinkgo xtatayananin Jehová kinkawanin pi xakaw kBrooklyn (Nueva York) kata 2005. Kata 2015, Oris nilh, nila wankan la tamakgkatsi akxni chuna titaxtukan. Chuntiya kmaxki tapaxtikatsinit Jehová xlakata Oris. Lu tlan makgtayana litaxtulh chu lu xapaxkina puskat xwanit. Lu kpaxkilh xliputum kinaku xlakata liwaka 68 kata lata xakmakgaxtokgaw. Katsiniw pi xlakata naʼanan tapaxuwan ktamakgaxtokgat chu kcongregación xlakaskinka nakamaxkiyaw kakni tiku kgalhikgo limapakgsin, ankgalhin natapatinanaw, nataktujuyaw chu nalimasiyayaw tayat nema masta espíritu.

Akxni ktaxlajwaniw o kinkatlawanikan tuku nitlan, xakskiniyaw xtamakgtay Jehová xlakata nasikulunatlawa tuku xaktlawayaw. Xla chuntiya lakgpalilh kintayatkan, chu xakakxilhaw pi tlakg tlan xkinkakitaxtuniyan. Chu tuku tlakg xatlan aku namin (Is. 60:17; 2 Cor. 13:11).

Anta kTrinidad y Tobago, Jehová sikulunatlawalh taskujut nema tlawakgolh kinatlatni chu makgapitsi natalan. Chuna la makatsininanka la uku wilakgolh 9,892 tiku na makgtanukgolh kxaxlikana takanajla. Anta kʼAruba, lhuwa natalan kamakgpuwantinikgolh xapulana congregación niku kmakgtayanalh. La uku uma isla kgalhi akgkutati congregaciones. Anta kNigeria, takgatsinita 381,398 tiku lichuwinankgo Dios. Chu kʼisla xla Santa Lucía takgatsinita 783 latamanin tiku tatayakgo xTamapakgsin Jehová.

Kgalhiya liwaka 90 kata. Salmo 92:14 wan pi tiku wilakgolh kxchik Jehová «maski lakgkgoluna, natamasta tawakat» chu «lakgtliwekge talamanaj nawan, la akgtum xtakni kiwi». Lu kpaxtikatsininan xlakata la kskujnanilh Jehová. Xliʼakxilhtit kifamilia nema kmakglhtinalh kimakgpuwantinilh nakskujnani Jehová putum kilhtamaku. Xlakata xtapaxkit nema ni makgxtakgnan, Jehová kimaxkinit talakaskin naktawila kxchik (Sal. 92:13).