Klakachilh kQuebec niku chuwinankan francés, kʼakgtum aktsu kachikin nema tapakgsi kQuebec anta kCanadá. Kinatlatni, Louis chu Zélia, lu xkimpaxkikgo. Kintlat ni lu xchuwinan pero lu xlakgati kgalhtawakga. Akit xaklakgati xaktsokgnan chu xaklakpuwanit pi akxni lankata xakwa periodista xaklitaxtulh.

Akxni xakkgalhi 12 kata, Rodolphe Soucy, tiku xtaskuja kintlat, chu chatum xʼamigo kinkalakgapaxialhnankgon kkinchikkan. Xlakan xtatayananin Jehová xwankgonit. Akit ni lhuwa tuku xakkatsi xlakata xtatayananin Jehová, chu ni lu xakkatsiputun xlakata xtakanajlakan. Pero lu kaks klilakawa pi xlakan lu tlan xlikatsikgo chu la xmaklakaskinkgo Biblia akxni xkinkakgalhtikgoyan. Kinatlatni na lu kaks lilakawankgolh, wa xlakata makgamakglhtinankgolh akgtum takgalhtawakga xalak Biblia.

Uma kilhtamaku, akit xakan kʼakgtum escuela católica. Lakgachunin xakkalitachuwinan kincompañeros tuku xakkatsinima xlakata Biblia. Alistalh, makgalhtawakgenanin tiku sacerdotes xwankgonit katsikgolh uma. Chatum kimakgalhtawakgena ni limaklakaskilh Biblia xlakata nalimasiya komo nitlan tuku xaklichuwinama, wata kilimawakalh pi xaklakatitayanama. Maski lu tuwa kmakgkatsilh tuku ktitaxtulh, lu kimakgtayalh xlakata kkatsilh pi tuku xmasiyakan anta, ni kBiblia xtakilhtiyanit. Kakxilhli pi ni anta kilitawilat xwanit. Wa xlakata, kinatlatni kimaxkikgolh talakaskin pi kʼatanu escuela xakalh.

Chuntiya kilimakgalhtawakgeka Biblia, pero ni lu lakapala kstakma kintakanajla xlakata xakpekuan nakan lichuwinan Dios kʼakgatunu chiki. Tiku xtapakgsikgo kcatólica ni xmastakgo talakaskin naklichuwinanaw Dios. Maurice Duplessis, chatum político xalak Quebec, tatayalh tuku xtlawama católica. Chu uma tlawalh pi lhuwa latamanin xkaputsastalanikgolh chu asta xkawilinikgolh xtatayananin Jehová. Xtalakaskin  pi niti xpekualh xlakata naʼankan lichuwinankan Dios.

Chatum tiku lu kimakgtayalh xlakata nialh lu nakpekuan wa tala John Rae, tiku kilalh kclase 9 xla Escuela Bíblica de Galaad. Maski xla lhuwa tuku xtitaxtunita, lu tlan xlikatsi chu xkamakgtaya amakgapitsin. Ni makglhuwa kintachuwinalh xlakata nakistakyawa pero xliʼakxilhtit lu xkimakgtaya. Xlakata ni lu tlan xchuwinan francés, ankgalhin akxtum xakan talichuwinan Dios chu akit xakmakgtaya nakatachuwinan francés latamanin. Xlakata akxtum xaktala John tlawalh pi xaktatayalh tuku xaxlikana. Ktamunulh 26 xla mayo kata 1951, akgkaw kata alistalh lata xapulana xakkatachuwinanit xtatayananin Jehová.

Kʼaktsu congregación xla Quebec xwilakgolh lhuwa precursores. Xliʼakxilhtitkan kimakgtayalh na precursor xaklitaxtulh. Uma kilhtamaku, kajwatiya Biblia xakmaklakaskinaw akxni xakanaw lichuwinanaw Dios kʼakgatunu chiki. Xlakata ni xakkgalhiyaw likgalhtawakga, xtalakaskin liwana xakmaklakaskiw Biblia. Wa xlakata lu kliskujli nakkatsini textos nema xkimakgtayalh naklichuwinan xaxlikana. Pero lhuwa latamanin ni xlikgalhtawakgaputunkgo Biblia xlakata pusikulan ni xkamaxki talakaskin o komo ni xkgalhikgo tuku xlilakgapaskan imprimátur, nema xtachuna la akgtum permiso xwanit.

Kkata 1952, ktatamakgaxtokgli Simone Patry, chatum tala xalak Quebec tiku ni xmakgxtakga Dios. Kaw latamayaw kMontreal, chu ni takgatsilh akgtum kata kkgalhiw chatum aktsu tsumat, Lise. Maski nialh precursor xakwanit akxni nina xaktamakgaxtokga, Simone chu akit kliskujwi ni lhuwa tuku nakkgalhiyaw xlakata tlakg xakmakgtayanaw kcongregación.

Titaxtulh akgkaw kata akxni klilakpuwampa pi precursor naklitaxtu. Kkata 1962, kkilalh kBetel xla Canadá k’Escuela niku ankgo putum Lakgkgolotsin chu Siervos Ministeriales, nema akgtum papaʼ xmakgapala. Anta, akxtum ktatamakgxtakgli chatum tala tiku wanikan Camille Ouellette. Lu kaks kimalakawanilh la xatapaxuwan xlichuwinan Dios, liwaka xlakata xkgalhi xpuskat chu xkgalhi kamanan. Amacha kilhtamaku, ni lhuwa natalan xalak Quebec precursores xlitaxtukgo xlakata xkgalhikgo xfamiliajkan. Pero wa uma tuku xtlawaputum Camille. Kilhtamaku nema akxtum ktamakgxtakgwi, kimakgpuwantinilh naklilakpuwan la xakwi. Ni lhuwa papaʼ titaxtulh, kakxilhli pi tlan precursor xaklitaxtupa. Makgapitsi lakpuwankgolh pi nitlan tuku xaklaksaknit, pero  ni ktaxlajwanilh, liwana xakkatsi pi Jehová xʼama sikulunatlawa tuku xaktlawama xlakata tlakg xaklichuwinalh xtachuwin.

Kkata 1964, Simone chu akit kinkalakgayawakan nakskujaw la precursores especiales kQuebec, niku xaklakachinitaw. Anta kmakgtayanaw akglhuwa kata. Uma kilhtamaku, maski chuntiyaku ni xmastakan talakaskin naklichuwinanaw Dios, nialh lu xkinkaputsastalanikanan.

Akgtum sábado kakgotanun, kinchipaka kSainte-Marie, akgtum aktsu kachikin nema lakatsu xwi kQuebec. Chatum policía kililh kpuchiwin chu kintamaknulh kpulachin xlakata xaklichuwinama Dios kʼakgatunu chiki chu ni xkimaxkikanit talakaskin. Alistalh, kilinka kxlakatin chatum juez tiku wanikan Baillargeon, chatum chixku tiku lu makgapekuanan. Kinkgalhskilh tiku xʼama kinkgalhmakgtaya. Akxni kwa pi Glen How, * chatum tala tiku abogado chu lu xlakgapaskan, uma juez tsukulh pekuan chu wa: «Ni, xla ni». Glen How lu xlilakgapaskan pi xkakgalhmakgtayanit lhuwa natalan chu tlan xkitaxtuni. Ni makgas kilhtamaku titaxtulh, tribunal kiwanilh pi nialhtu xkilimawakamaka.

Xlakata ni xmastakan talakaskin naktlawayaw kintaskujutkan kQuebec, lu tuwa xwanit naktekgsaw niku tlan xaktamakxtumiw. Natalan xalak congregación kajwatiya tekgskgolh niku xmakikan putlaw nema ni xkgalhi tuku makatsitsijwi. Xlakata natalan tlan xtsitsijwakgolh akxni lu xlonkgnan, xmaklakaskinkgo akgtum estufa nema xmaklakaskin aceite. Akxni nina xtsuku tamakxtumit, xaktawilayaw lakatsu kʼestufa makgapitsi horas xlakata naktsitsijwanaw chu naklichuwinanaw tuku tlan xaktitaxtunitaw.

Lu kaks malakawaninan la staktilhanit taskujut chuna la titaxtunit kilhtamaku. Kkata 1960, ni lhuwa laktsu congregaciones xʼanan lakatsu kQuebec, kkachikin Côte-Nord chu kʼGaspé. La uku, kʼumakgolh kachikinin wilakgo lhuwa natalan, tiku tamakxtumikgo klakstlan Pukgalhtawakga.

Kkata 1970, Simone chu akit kinkawanikan pi xakliskujwi la superintendentes xla circuito, chu kkata 1973 kinkawanikan pi xakskujwi la superintendentes xla distrito. Umakgolh kata lhuwa tuku kimasiyanikgolh atanu superintendentes viajantes tiku lu tlan xtlawakgo xtaskujutkan, chuna la Laurier Saumur * chu David Splane. * Akxni ksputa lanka tamakxtumit, David chu akit xaklawaniyaw tuku tlan xaktlawaw xlakata tlakg tlan makgalhtawakgananin xaklitaxtuw. Klakapastaka pi akgtum kilhtamaku xla kiwanilh: «Léonce, lu klakgatilh xaʼawatiya mintaʼakgchuwin. Lu tlan xwanit, pero putum tuku lichuwinanti akit xakmaxtulh akgtutu taʼakgchuwin». Akit lu xaklismani pi lhuwa tuku xaklichuwinan, wa xlakata xtalakaskin pi kaj pulaktum tuku xaklichuwinalh.

Pulaktum taskujut nema xtlawakgo superintendentes xla distrito wa pi nakamakgpuwantinikgo  superintendentes xla circuito. Pero lhuwa natalan xalak Quebec xkilakgapaskgo, wa xlakata akxni xakan lakgapaxialhnan superintendente xla circuito, natalan xlakaskinkgo pi akxtum xakalh katalichuwinan Dios. Akit lu xaklakgati akxtum xakkataʼan, pero nialh lhuwa kilhtamaku xaklimaxtu nakmakgpuwantini superintendente xla circuito. Akgtum kilhtamaku chatum superintendente xla circuito xatapaxuwan kimalakapastakalh: «Lu tlan pi limaxtuya kilhtamaku akxtum nakatatawilaya natalan xalak congregación. Pero kalakapastakti pi uma semana akit tanita kilakgapaxialhnana. Akit na kmaklakaskin pi nakimakgpuwantinikan». Uma tuku kiwanilh kimakgtayalh liwana naklakkaxwili tuku naktlawa.

Lu nitlan pero kkata 1976 ktitaxtulh akgtum talakgaputsit. Kimpuskat Simone, tiku lu xakpaxki, lu tatatlalh chu nilh. Tapaxkit nema xkgalhini Jehová chu xlakata nikxni xlakpuwan pi wi tuku namaxkikan tlawalh pi xla lu tlan makgtayana xlitaxtulh. Xlakata wa kliskujli naklichuwinan Dios kimakgtayalh naktayani uma, chu kpaxtikatsini Jehová pi kimakgtayalh uma xakatuwa kilhtamaku chu pi kilimasiyanilh xtapaxkit. Titaxtulh kilhtamaku, ktatamakgaxtokgli Carolyn Elliott, chatum precursora tiku chuwinan Inglés chu xʼanit makgtayanan kQuebec. Xla chatum puskat tiku lu kalilakgaputsa amakgapitsin, liwaka tiku ni lu chuwinankgo o maxanankgo. Lu kimakgtayanit tlan nakmakgantaxti kintaskujut la superintendente viajante.

Enero kkata 1978, kiwanika pi xakmasiyalh kxapulana Escuela xla Precursores anta kQuebec. Lu xakpekuama, xlakata ni xakkatsi tuku xakamaw akxilhaw chu nachuna xmakgkatsikgo tiku xʼamakgolh kgalhtawakgakgo. Lu tlan xlakata kclase kilakgolh lhuwa precursores tiku lhuwata kata xliskujmakgo. Wa xlakata, maski akit tiku xakmasiyama, lhuwa tuku kimasiyanikgolh tiku kilakgolh.

Alistalh, watiya uma kata 1978, tlawaka akgtum Asamblea Internacional nema xlitapakuwi  «Fe victoriosa» kʼEstadio Olímpico xla Montreal. Nikxni xtlawakanit kQuebec tlakg xalanka tamakxtumit chuna la uma, niku kilakgolh liwaka 80 mil latamanin. Akit kimalakgachaka kDepartamento de Servicio de Noticias. Kkatachuwinalh lhuwa periodistas, chu lu tlan klimakgkatsilh la tlan xkinkalichuwinankanan ktelevisión chu kradio. Liwaka 20 horas matitaxtika entrevistas anta kradio chu ktelevisión, chu lhuwa artículos lichuwinanka kperiódicos. ¡Lu tlan kinkalichuwinankan!

Kkata 1996, wi tuku talakgpalilh kkilatamat. Lata akxni ktamunulh, anta kQuebec xakmakgtayananit, niku chuwinankan francés. Pero kimalakgachaka kToronto kʼakgtum kachikin niku chuwinankan Inglés. Xakmakgkatsi pi nila xakama makgantaxti uma chu xakpekuan nakmasta taʼakgchuwin xaʼinglés xlakata ni lu xakkatsini uma tachuwin. Xtalakaskin tlakg xaktlawanilh oración Jehová chu xaklipawa.

La uku tlan nakwan pi lu tlan tuku ktitaxtulh akgtiy kata anta kToronto. Carolyn lu kimakgtayalh ni nakpekuan akxni nakchuwinan Inglés, chu natalan lu kimakgtayakgolh. Lakapala kkgalhiw lhuwa amigos.

Kakgotanun viernes akxni xʼamaja lakgchan akgtum lanka tamakxtumit, maski lhuwa tuku xaktlawayaw, lu xaklakgati xakan lichuwinan Dios kʼakgatunu chiki. Max wi tiku xlakpuwan tuku xlakata xakan lichuwinan Dios akxni xʼamaja tawila lanka tamakxtumit chu xʼanan lhuwa taskujut. Pero kkatsilh pi lu xkimakgtaya akxni xakkatachuwinan latamanin. Chu la uku chuntiya lu tlan kmakgkatsi akxni kan lichuwinan Dios.

Kkata 1998, Carolyn chu akit kinkamalakgachakan kMontreal la precursores especiales. Lhuwa kata kilakgayawaka naklakkaxwili la nalichuwinankan Dios niku titaxtukgo lhuwa latamanin chu nakkatachuwinan tiku lakkaxwilikgo tuku natalichuwinan kperiódicos, kradio chu ktelevisión xlakata nakkawani tuku xaxlikana xlakata xtatayananin Jehová. La uku, Carolyn chu akit kkalitachuwinanaw Dios tiku xalak atanu kachikinin tiku chinkgo kCanadá chu tlakg katsiniputunkgo xlakata Biblia, chu uma lu kinkamakgapaxuwayan.

Akxni klilakpuwan 68 kata lata ktamununit, lu tlan klimakgkatsi. Lu kimakgapaxuwanit nakkatsini la naklichuwinan Dios, chu la kkamakgtayanit lhuwa latamanin nalakgapaskgo xaxlikana. Akxni kintsumat, Lise chu xchixku kamakgastakkgolh xkamanankan, precursores regulares litaxtukgolh. Lu tlan klimakgkatsi pi Lise xatapaxuwan lichuwinan Dios. Chu lu kkapaxtikatsini natalan tiku kilimakgtayakgolh lu xatlan xliʼakxilhtitkan chu kimaxkikgolh laktlan tastakyaw nema lu kimakgtayalh natatliwakglha kintakanajla chu tlan nakmakgantaxti taskujut nema kilakgayawaka kxkachikin Dios. Liwana kkatsinit pi kajwatiya tlan namakgantaxtiyaw kintaskujutkan komo nalipawanaw xʼespíritu santo Jehová (Sal. 51:11). Putum kilhtamaku nakpaxtikatsini Jehová xlakata kimaxkinit talakgalhaman nakmalanki xtukuwani (Sal. 54:6).