1, 2. ¿Tuku xlakata Jehová kinkamaxkin talakaskin namakgtapakgsiyaw kxfamilia, chu la tlawalh?

JEHOVÁ kinkamaxkinitan talakaskin pi namakgtapakgsiyaw kxfamilia. Anta wilakgolh latamanin tiku makamaxkikgonit xlatamatkan chu kgalhinikgo takanajla tamakamastan nema tlawalh xKgawasa. Wilaw kʼakgtum xatapaxuwan familia. La uku tapaxuwan wilaw kkilatamatkan, chu paxuwayaw xlakata kgalhiyaw akgtum tlan takgalhkgalhin xlakata nalipaxuwayaw akgtum latamat nema ni kgalhi lisputni, anta unu kKatiyatni o anta kʼakgapun.

² Xlakata Jehová lu kinkapaxkiyan, tlawalh akgtum lanka tamakamastan xlakata tlan namakgtapakgsiyaw kxfamilia (Juan 3:16). Biblia lichuwinan pi «kinkaxokgokanitan» (1 Cor. 6:20). Paxtikatsiniyaw uma talakgmaxtut, la uku tlan talalinaw Jehová. Kgalhiyaw akgtum lanka talakgalhaman kinTlatkan nalimapakuwiyaw tiku tlakg xlakaskinka xlikalanka kakilhtamaku. Chu, chuna la lichuwinaw kʼartículo nema titaxtulh, wa tlakg xatlan Tlat nema kgalhiyaw.

3. ¿Tuku takgalhskinin max tlan nakinkatlawanikanan? (Nachuna kaʼakxilhti recuadro « ¿Jehová kuenta kintlawa?»).

³ Max nachuna nalakpuwanaw la salmista tiku wa: «¿La nakxokgoni Jehová putum tuku tlan tlawanit kimpalakata?» (Sal. 116:12). Nila tuku tlawayaw xlakata naxokgoniyaw Jehová tuku tlawalh kimpalakatakan. Pero tapaxkit nema kinkakgalhiniyan tlawa pi akinin nachuna napaxkiputunaw. Apóstol Juan tsokgli: «Akinin paxkinanaw xlakata wa pulana kinkapaxkin» (1 Juan 4:19). Wa xlakata, ¿la tlan nalimasiyaniyaw pi paxkiyaw kinTlatkan?

4. Chuna la wan Santiago 4:8, ¿tuku xlakata lu naliskujaw nalakgtalakatsuwiyaw Jehová?

⁴ Jehová lakaskin pi kalakgtalakatsuwiw chu pi xʼamigos kalitaxtuw (kalikgalhtawakga Santiago 4:8). Kinkawaniyan pi ankgalhin katlawaniw oración, chu xla ankgalhin nakinkakgaxmatniyan (Rom. 12:12). Ni nalakpuwanaw pi ni kintikakgaxmatnin xlakata lu tlakgwanit o wi tuku tlawama. ¿Chu akinin la tlan nakgaxmatniyaw? Pulaktum la tlan nakgaxmatniyaw wa pi nalikgalhtawakgayaw xTachuwin, Biblia, chu amakgapitsi likgalhtawakga nema nakinkamakgtayayan naʼakgatekgsniyaw. Nachuna tlan nakgaxmatniyaw akxni kuenta natlawaya tuku lichuwinankan ktamakxtumit. Xtachuna la natlatni ankgalhin katachuwinankgo xkamanankan kamakgtaya akxtum natawilakgo, nachuna akinin komo ankgalhin natachuwinanaw Jehová nakinkamakgtayayan lakatsu natawilaniyaw.

5. ¿La tlakg tlan natlawayaw kioracioneskan?

⁵ ¿La tachuwinanaw Jehová? Xla lakaskin pi kawaniw putum tuku makgkatsiyaw akxni tlawaniyaw oración (Sal. 62:8). Wa xlakata xlakaskinka nalakpuwanaw: «¿Ankgalhin watiya tachuwin kwan akxni ktlawa kioraciones? ¿O chuna ktachuwinan Jehová la ktachuwinan chatum amigo tiku kwani putum tuku kmakgkatsi?». Xlikana pi lu paxkiyaw Jehová chu ankgalhin lakatsu tawilaniputunaw. Xlakata tlan chuna natlawayaw, talakaskin ankgalhin natachuwinanaw. Kawaniw putum tuku makgkatsiyaw, kawaniw tuku lipaxuwayaw chu tuku lilakgaputsayaw. Liwana kakatsiw pi tlan naskiniyaw xtamakgtay.

6. ¿Tuku talakaskin natlawayaw xlakata lakatsu natawilaniyaw Jehová?

⁶ Xlakata lakatsu natawilaniyaw Jehová, na talakaskin napaxtikatsiniyaw. Nachuna lakpuwanaw tuku tsokgwililh chatum salmista: «Kintiku Dios, lhuwa [taskujut tlawanita] y mintapuwan kilamasininitaw. ¡Xlikana, niti la wix! Para akit xakmakatsininalh y xaklikgalhchiwinalh wakg tu tlawanita kilakata, nila wakg xakkalikgalhchiwinankgolh» (Sal. 40:5, SXP). Pero ni kajwatiya makgkatsiyaw pi paxtikatsiniyaw. Wata limasiyaniyaw Jehová kkintachuwinkan chu tuku tlawayaw. Uma limasiya pi akinin ni xtachuna la amakgapitsin latamanin. Lamaw kkakilhtamaku niku latamanin ni paxtikatsinikgo Dios xlakata putum tuku tlawanit xpalakatakan. Pulaktum tuku litasiya pi lamaw «kxaʼawatiya kilhtamaku» wa pi latamanin ni paxtikatsininankgo (2 Tim. 3:1, 2). Akinin nikxni kakgalhiw uma tapuwan.

7. ¿Tuku lakaskin Jehová katlawaw chu tuku xlakata?

⁷ Xanatlatni ni lakaskinkgo pi xkamankan nalawilinikgo, wata lakaskinkgo pi tlan nalatalalinkgo. Chu Jehová nachuna lakaskin xpalakata xkamanan. Tapaxkit nema lakgalhiniyaw chatunu akinin litasiya pi xaxlikana kstalaninanin Cristo akinin (Juan 13:35). Chatum xlakskujni Dios tsokgwililh: «¡Kaʼakxilhtit, lu tlan chu lipaxaw pi natalan makxtum wilakgolh!» (Sal. 133:1). ¿Nixlikana pi nachuna makgkatsiyaw chuna la uma salmista? Akxni kapaxkiyaw kinatalankan, na limasiyaniyaw Jehová pi paxkiyaw (1 Juan 4:20). Lu lipaxuwayaw pi makgtapakgsiyaw kʼakgtum familia, niku kinatalankan “lu lalakgalhamankgo” chu ankgalhin “tlan lalikatsinikgo” (Efes. 4:32).

8. Chuna la wan 1 Juan 5:3, ¿tuku xlakata kgalhakgaxmataw Jehová?

⁸ Jehová lakaskin pi kamanan kakgalhakgaxmatkgolh xnatlatnikan, chu nachuna lakaskin pi akinin na nakgalhakgaxmataw (Efes. 6:1). Lakgchan nakgalhakgaxmataw xlakata xla kinkamalakatsukin, kinkamaxkiyan latamat chu wa Tlat tiku tlakg kgalhi liskgalala.  Pero pulaktum tuku xlakata kgalhakgaxmataw Jehová wa pi paxkiyaw (kalikgalhtawakga 1 Juan 5:3). Xlikana pi lhuwa tuku xlakata tlan nalikgalhakgaxmataw, pero xla ni fuerza kinkawaniyan. Kinkamaxkinitan talakaskin akinin nalaksakaw tuku natlawayaw, wa xlakata xla lu paxuwa akxni laksakaw nakgalhakgaxmataw xlakata paxkiyaw.

9, 10. ¿Tuku xlakata lu xlakaskinka nalakgapasaw xlimapakgsin Dios chu nalilatamayaw?

⁹ Natlatni lakaskinkgo pi xkamanankan tlan kakakitaxtunilh. Wa xlakata kawanikgo tuku xlitlawatkan. Laktsu kamanan tiku kgalhakgaxmatkgo limasiyakgo pi kalipawankgo xnatlatnikan chu kamaxkikgo kakni. Wa xlakata akinin tlakg xlakaskinka nalakgapasaw xlimapakgsin kinTlatkan xalak akgapun chu nalilatamayaw. Chuna nalimasiyaniyaw Jehová pi paxkiyaw chu maxkiyaw kakni. Chu akxni chuna tlawayaw tlan kinkakitaxtuniyan (Is. 48:17, 18). Pero tiku lakgmakgankgo xlimapakgsin Dios nitlan kakitaxtuni kxlatamatkan (Gál. 6:7, 8).

¹⁰ Komo nalatamayaw chuna la lakaskin Jehová tlan nakinkakitaxtuniyan kkilatamatkan, tlan namakgkatsiyaw chu tliwakga nawan kintakanajlakan. Xla katsi tuku tlan kimpalakatakan. Chatum tala tiku lama kʼEstados Unidos wanikan Aurora lichuwinan: «Kkatsi pi akxni kgalhakgaxmatkan Jehová tlakg tlan kinkakitaxtuniyan kkilatamatkan». Chuna, ankgalhin tlan nakinkakitaxtuniyan tuku natlawayaw. Kalilakpuwaw uma takgalhskinin: «¿La kimakgtayanit tuku wan xlimapakgsin Jehová?».

11. ¿La kinkamakgtayayan oración?

¹¹ Oración kinkamakgtayayan nakgalhakgaxmatnanaw asta maski akxni tuwa makgkatsiyaw.  Xlakata putum akinin makglakgalhinanin, lakgachunin lu liskujaw nakgalhakgaxmataw Jehová. Pero talakaskin ankgalhin chuntiya natlawayaw. Chatum salmista tasaskinilh Dios: «Kakimaxki tlan tapuwan xlakata ankgalhin nakkgalhakgaxmatan» (Sal. 51:12). Chatum precursora regular wanikan Denise lichuwinan: «Komo tuwa kmakgkatsi nakkgalhakgaxmata Jehová, kskini pi kakimaxkilh litliwakga xlakata naktlawa tuku xatlan». Liwana kakatsiw pi Dios ankgalhin nakgalhti kioracioneskan (Luc. 11:9-13).

12. ¿Tuku kinkawaniyan Efesios 5:1 pi natlawayaw?

¹² (Kalikgalhtawakga Efesios 5:1). Xlakata akinin «xkamanan [Jehová] tiku lu kapaxki», lu liskujaw xlakata nastalaniyaw xliʼakxilhtit. Kapaxkiyaw amakgapitsin, tlan kalikatsiniyaw chu katapatiyaw. Akxni latamanin tiku ni lakgapaskgo Dios akxilhkgo la likatsiyaw, max nalakgapasputunkgo (1 Ped. 2:12). Lu tlan kitaxtu akxni natlatni tiku kstalaninanin Cristo chuna kalikatsinikgo xkamanankan la kinkalikatsiniyan Jehová. Komo chuna natlawakgo, xkamanankan max nachuna xʼamigos Jehová nalitaxtuputunkgo.

13. ¿Tuku talakaskin kuenta natlawayaw xlakata ni namaxananaw akxni nakalitachuwinanaw Jehová amakgapitsin?

¹³ Lakgachunin laktsu kamanan tlan makgkatsikgo chu paxuwakgo akxni lichuwinankgo xnatlatnikan. Nachuna, akinin tlan limakgkatsiyaw akxni lichuwinanaw kinTlatkan xalak akgapun chu lakaskinaw pi amakgapitsin  nalakgapaskgo. Chuna makgkatsiyaw la mapakgsina David, tiku tsokgwililh: «Xatapaxuwan naklichuwinan Jehová» (Sal. 34:2). Pero max makgapitsi akinin maxananaw chu max ni nalichuwinanaw. ¿Tuku nakinkamakgtayayan? Wa kalilakpuwaw la namakgapaxuwayaw Jehová chu la xlilhuwa litamakgtayakgo tiku lakgapaskgo. Xla nakinkamaxkiyan litliwakga xlakata ni napekuanaw. Chuna la kamakgtayalh natalan xalak pulana siglo, nachuna akinin nakinkamakgtayayan (1 Tes. 2:2).

14. ¿Tuku xlakata lu xlakaskinka naliskujaw nakaputsayaw latamanin tiku kstalaninanin Cristo nalitaxtukgo?

¹⁴ Jehová ni laksakpaxkinan, chu paxuwa akxni akxilha pi kapaxkiyaw amakgapitsin, maski tanu tanu xkachikinkan (Hech. 10:34, 35). Pulaktum la tlan nalimasiyayaw pi kapaxkiyaw amakgapitsin wa pi nakalitachuwinanaw xalakwan tamakatsinin (Mat. 28:19, 20). ¿Tuku tlan nakitaxtu? Pi tiku nakinkakgaxmatnikgoyan tlan nakakitaxtuni la uku chu nakgalhikgo akgtum takgalhkgalhin xlakata tlan nalatamakgo putum kilhtamaku (1 Tim. 4:16).

15, 16. ¿Tuku xlakata tlan napaxuwayaw?

¹⁵ Jehová chatum Tlat tiku lu xalakgalhamana chu lakaskin pi xfamilia kapaxuwakgolh (Is. 65:14). Maski natitaxtuyaw tuku tuwa, lhuwa tuku tlan nalipaxuwayaw la uku. Akgtum liʼakxilhtit, liwana katsiyaw pi kinTlatkan xalak akgapun lu kinkapaxkiyan. Katsiyaw tuku xaxlikana masiya xTachuwin, Biblia (Jer. 15:16). Chu makgtapakgsiyaw kʼakgtum familia niku latamanin paxkikgo Jehová, paxkikgo xlimapakgsin chu lapaxkikgo (Sal. 106:4, 5).

¹⁶ Nachuna tlan napaxuwayaw xlakata liwana katsiyaw pi tlakg tlan natawila latamat kkilhtamaku nema aku mima. Katsiyaw pi Jehová nialh makgas nakamasputu tiku nitlan likatsikgo chu xTamapakgsin akgtum Paraíso natlawa Katiyatni. Nachuna kgalhiyaw akgtum tlan takgalhkgalhin xlakata tiku nikgonita nalakastakwanamparakgo chu akxtum nakatatawilaparakgo xfamiliajkan (Juan 5:28, 29). ¿Nixlikana pi lu tlan nawan? Chu tuku tlakg xlakaskinka wa pi putum tiku wilakgolh nawan kʼakgapun chu unu kKatiyatni namaxkikgo kakni kinTlatkan.