1. ¿Tuku pulaktum tlawa pi makxtum natawila xfamilia Jehová?

¿NIXLIKANA pi lu lipaxuwayaw xlakata makgtapakgsiyaw kxfamilia Jehová? Pulaktum tuku xlakata kgalhiyaw takaksni chu makxtum wilaw wa xlakata lu liskujaw nakgalhakgaxmataw limapakgsin nema Jehová lakkaxwilinit. Chu akxni tlakg liwana akgatekgsaw uma, tlakg makxtum tawilayaw.

2. ¿Tuku takgalhskinin nakgalhtiyaw kʼuma artículo?

² Kʼuma artículo nalichuwinanaw limapakgsin nema anan kcongregación. Chu na nakgalhtiyaw umakgolh takgalhskinin: ¿tuku taskujut lakgayakgo natalan lakpuskatin?, ¿xlikana pi natalan lakchixkuwin xʼakgxakgakan kalitaxtunikgo putum natalan lakpuskatin? chu ¿lakgkgolotsin kamapakgsikgo natalan lakchixkuwin chu natalan lakpuskatin xtachuna la chatum xpulalina familia kamapakgsi xpuskat chu xkamanan? Pulana kaʼakxilhwi tuku taskujut lakgayakgo natalan lakpuskatin chu la xlilat nakaʼakxilhaw.

3. ¿Tuku nakinkamakgtayayan xlakata tlakg xtapalh nakaliʼakxilhaw kinatalankan lakpuskatin?

³ Kinatalankan lakpuskatin kalakgchan nakawaniyaw lakwan tachuwin xlakata kakuentajtlawakgo tiku xalak xfamiliajkan, lichuwinankgo xalaktlan tamakatsinin chu kamakgtayakgo natalan kcongregación. Pero komo nalilakpuwanaw la kaʼakxilha Jehová chu Jesús, chu la kalikatsinilh apóstol Pablo tlakg xtapalh nakaliʼakxilhaw.

4. ¿Tuku lichuwinan Biblia nema limasiya pi Jehová lakxtum xtapalh kaliʼakxilha lakchixkuwin chu lakpuskatin?

⁴ Biblia lichuwinan pi Jehová lakxtum xtapalh kaliʼakxilha lakpuskatin chu lakchixkuwin. Akgtum liʼakxilhtit, lichuwinan pi kxapulana siglo Jehová kamaxkilh xʼespíritu santo lakchixkuwin chu lakpuskatin xlakata tlan xtlawakgolh milagros, chuna la nachuwinankgo tanu tanu tachuwin (Hech. 2:1-4, 15-18).  Kʼgrupo nema makgtanumakgo kstalaninanin Cristo tiku xatalaksakni nema natamapakgsinankgo Cristo kʼakgapun litakgatsi lakpuskatin chu lakchixkuwin (Gál. 3:26-29). Nachuna, Jehová nakamaxki talakaskin lakchixkuwin chu lakpuskatin nalatamakgo xliputum kilhtamaku kKatiyatni (Apoc. 7:9, 10, 13-15). Chu Jesús kalimapakgsilh lakchixkuwin chu lakpuskatin pi xlichuwinankgolh xTachuwin Dios chu xmasiyakgolh xalaktlan tamakatsinin (Mat. 28:19, 20). Akgtum liʼakxilhtit, libro xla Hechos lichuwinan chatum kstalanina Cristo tiku xwanikan Priscila. Xla chu xchixku, Áquila, «maʼakgatekgsnikgolh xaxlikana» chatum chixku tiku xwanikan Apolos (Hech. 18:24-26).

5. Chuna la wan Lucas 10:38, 39, 42, ¿la xkaʼakxilha Jesús lakpuskatin?

⁵ Jesús xkamaxki kakni lakpuskatin. Xla nichuna xwanit la fariseos, tiku xkalakgmakgankgo lakpuskatin, xlakan nipara xkatachuwinankgo niku lhuwa xwilakgolh latamanin chu ni xkalitachuwinankgo tuku xwan Tatsokgni. Pero Jesús nichuna xwanit, xla kalitachuwinalh tuku masiya Biblia lakpuskatin chu lakchixkuwin (kalikgalhtawakga Lucas 10:38, 39, 42). * Nachuna, lakxtum xʼan katalichuwinan xTachuwin Dios lakpuskatin (Luc. 8:1-3). Chu kamaxkilh talakaskin makgapitsin lakpuskatin xkamakatsinikgolh apóstoles pi xla xlakastakwananit (Juan 20:16-18).

6. ¿La limasiyalh apóstol Pablo pi xkamaxki kakni lakpuskatin?

⁶ Apóstol Pablo limapakgsilh Timoteo pi xkamaxkilh kakni lakpuskatin. Wanilh pi tiku xlinkgoya kata xkalikatsinilh “chuna la xnatsetni” chu tiku tlakg laktsumanku xwankgonit “chuna la xnatalan” xkaliʼakxilhli (1 Tim. 5:1, 2). Maski Pablo lu makgtayalh Timoteo xlakata tliwakga nakgalhi xtakanajla, liwana xkatsi pi wa xtse chu xnana tiku xmasiyanikgonit “xasantos tatsokgni” (2 Tim. 1:5; 3:14, 15). Nachuna, kcarta nema kamalakgachanilh romanos, Pablo kamalakgachanilh tapakgachipat makgapitsin natalan lakpuskatin chu kamapakuwilh. Xkatsi putum tuku xtlawakgo umakgolh natalan lakpuskatin chu lichuwinalh pi lu lanka xtapalh xliʼakxilha tuku xtlawakgo (Rom. 16:1-4, 6, 12; Filip. 4:3).

7. ¿Tuku takgalhskinin nakgalhtiyaw?

⁷ Chuna la akxilhnitaw, Biblia ni lichuwinan pi lakpuskatin nitu litaxtukgo nixawa lakchixkuwin. Xlakata limasiyakgo talakgalhaman chu lhuwa tuku xatapaxuwan mastakgo, kinatalankan lakpuskatin lhuwa tuku limakgtayanankgo kcongregación, chu lakgkgolotsin tlan kalipawankgo xlakata namakgtayanankgo naʼanan takaksni chu makxtum natawila congregación. Pero chuntiya talakaskin nakgalhtiyaw umakgolh takgalhskinin: ¿tuku xlakata Jehová kaskini natalan lakpuskatin pi namin kilhtamaku xlitakgtlapatkan? chu, xlakata kajwatiya natalan lakchixkuwin kalakgayawakan taskujut xlakata lakgkgolotsin chu siervos ministeriales nalitaxtukgo, ¿kilhchanima uma pi putum natalan lakchixkuwin xʼakgxakgakan kalitaxtunikgo putum natalan lakpuskatin?

8. Chuna la wan Efesios 5:23, ¿putum natalan lakchixkuwin xʼakgxakga kalitaxtunikgo putum natalan lakpuskatin?

⁸ Ni, nichuna. Kajwatiya Cristo xʼakgxakga putum natalan xalak congregación (kalikgalhtawakga Efesios 5:23). Anta kfamilia, wa xachixku tiku xʼakgxakga xpuskat, pero chatum kgawasa tiku tamununit ni xʼakgxakga xtse litaxtu (Efes. 6:1, 2). Chu kcongregación, lakgkgolotsin ni kgalhikgo putum limapakgsin xlakata nakawanikgo tuku xlitlawatkan putum  natalan lakpuskatin chu lakchixkuwin (1 Tes. 5:12; Heb. 13:17). Chu ¿tuku tlan nawanaw xlakata chatum tala tsumat tiku nialh akxtum katawi xnatlatni? Xla chuntiya kamaxki kakni, pero nialh wa xtlat mapakgsi. Chu kamaxki kakni lakgkgolotsin; pero xtachuna la putum lakchixkuwin chu lakgkgawasan xalak congregación, kajwatiya chatum tiku kapulalin: Jesús.

9. ¿Tuku xlakata namin kilhtamaku xlitakgtlapat nawan chatum tala puskat?

⁹ Xlikana pi Jehová lakkaxwilinit pi wa lakchixkuwin tiku napulalinkgo congregaciones chu ni wa lakpuskatin (1 Tim. 2:12). ¿Tuku xlakata? Xlakata congregación liwana natalakkaxtawila, na wa uma tuku xlakata Jehová lakgayawalh Jesús xʼakgxakga chixku nalitaxtu. Komo namin kilhtamaku chatum tala puskat natlawa akgtum taskujut nema tlawa chatum tala chixku, Jehová skini pi natakgtlapa (1 Cor. 11:4-7). * Uma ni limasiya pi maktuju, wata maxki talakaskin nalimasiya pi maxki kakni limapakgsin nema wilinit Jehová. La uku kakgalhtiw uma takgalhskinin: ¿la xlilhuwa limapakgsin kgalhikgo tiku pulalinkgo familias chu lakgkgolotsin?

10. ¿Tuku xlakata max chatum kgolotsin nalakpuwan pi tlan nakawilini limapakgsin natalan xalak congregación?

¹⁰ Lakgkgolotsin paxkikgo Cristo chu na paxkikgo borregos nema Jehová chu Jesús kamakuentajlikgonit (Juan 21:15-17). Chatum kgolotsin tiku lu makgtayanamputun max nalakpuwan pi xla xtlatkan kalitaxtuni natalan xalak congregación. Max nalakpuwan: «Komo chatum xʼakgxakga familia lakgchan nawili limapakgsin xlakata nakuentajtlawa xfamilia, chatum kgolotsin nachuna tlan nawili  limapakgsin xlakata nakakuentajtlawa xborregos». Chu max makgapitsi natalan lakpuskatin chu lakchixkuwin chuna nakamalakpuwanikgo lakgkgolotsin akxni nakaskinikgo pi wi tuku kalaksakkgolh xpalakatakan. Pero ¿lakxtum limapakgsin kgalhikgo lakgkgolotsin chu tiku xʼakgxakga familias litaxtukgo?

11. ¿Tuku tatalakxtumi limapakgsin nema kgalhikgo xʼakgxakga familia chu limapakgsin nema kgalhikgo lakgkgolotsin?

¹¹ Pablo lichuwinalh pi limapakgsin nema kgalhi tiku xʼakgxakga familia wi tuku tatalakxtumi limapakgsin nema kgalhikgo lakgkgolotsin xalak congregación (1 Tim. 3:4, 5). Akgtum liʼakxilhtit, Jehová lakaskin pi tiku xalak familia kakgalhakgaxmatkgolh xʼakgxakga familia chu lakaskin pi natalan xalak congregación kakgalhakgaxmatkgolh lakgkgolotsin (Col. 3:20). Na lakaskin pi xʼakgxakga familia chu lakgkgolotsin nakuentajtlawakgo pi tiku kamakuentajlimaka tliwakga nakgalhikgo xtakanajlakan, namakgkatsikgo pi kapaxkikan chu xtapalh kaliʼakxilhkan. Chu xtachuna la xʼakgxakga familias, lakgkgolotsin kamakgtayakgo natalan tiku maklakaskinkgo (Sant. 2:15-17). Nachuna, Jehová lakaskin pi lakgkgolotsin chu xʼakgxakga familias nakamakgtayakgo amakgapitsin nakgalhakgaxmatkgo xlimapakgsin Jehová chu ni nalakatsalakgo «tuku tatsokgnit» kBiblia (1 Cor. 4:6).

12, 13. Chuna la wan Romanos 7:2, ¿tuku xlakata limapakgsin nema kgalhikgo tiku pulalinkgo familias ni xtalakxtum limapakgsin nema kgalhikgo lakgkgolotsin?

 ¹² Nachuna limapakgsin nema kgalhikgo lakgkgolotsin ni xtalakxtum nema kgalhikgo tiku pulalinkgo familias. Pulaktum tuku litalakgpalikgo wa pi Jehová kamaxkinit talakgatay lakgkgolotsin xlakata jueces nalitaxtukgo chu nakatamakxtukgo kcongregación tiku tlawakgo talakgalhin chu ni limasiyakgo pi nitlan limakgkatsikgo (1 Cor. 5:11-13).

¹³ Nachuna, Jehová kamaxkinit limapakgsin xʼakgxakga familias xlakata natlawakgo tuku lakgkgolotsin nila tlawakgo. Pulaktum tuku tlan tlawa chatum xʼakgxakga familia wa pi nakamaxki limapakgsin tiku xalak xchik chu kuenta natlawa pi kamakgantaxtikgolh (kalikgalhtawakga Romanos 7:2). Akgtum liʼakxilhtit, lakgchan nawan tuku hora nachin xkgawasa katsisni anta kxchik, chu na lakgchan nastakyawa komo ni kgalhakgaxmatninan (Efes. 6:1). Xlikana, akxni nina lakkaxwili uma, chatum xʼakgxakga familia talakaskin natakgalhchuwinan xpuskat, xlakata xchatiykan «akgtum makni» litaxtukgo (Mat. 19:6). *

14. 1) Chuna la wan Marcos 10:45, ¿tuku xlakata Jehová lakgayawalh Jesús xʼakgxakga congregación nalitaxtu? 2) ¿Tuku taskujut lakgayakgo Lakgkgolotsin tiku Pulalinankgo? (Kaʼakxilhti recuadro « ¿Tuku lakgayakgo Lakgkgolotsin tiku Pulalinankgo?»).

¹⁴ Jehová maklakaskilh talakgmaxtut xlakata natamawaxtu xlatamatkan putum tiku makgtapakgsikgo kcongregación chu putum tiku kanajlanikgo Jesús (kalikgalhtawakga Marcos 10:45; Hech. 20:28; 1 Cor. 15:21, 22). Xlakata Cristo nilh kimpalakatakan, lakgchan pi  Jehová xʼakgxakga congregación xlimaxtulh. Wa xlakata, Jesús lakgchan nawili limapakgsin xlakata la nalikatsikgo latamanin, familias chu putum congregación, chu lakgchan nawan pi kamakgantaxtika (Gál. 6:2). Pero xla ni kajwatiya kinkawiliniyan limapakgsin: kuenta kinkatlawayan chu kinkamaxkiyan tuku maklakaskinaw kinchatunukan (Efes. 5:29).

15, 16. ¿Tuku katsiniya wix xlakata tuku wan Marley chu Benjamin?

¹⁵ Natalan lakpuskatin limasiyakgo pi maxkikgo kakni limapakgsin nema Cristo kgalhi akxni stalanikgo xtapulalit lakchixkuwin nema xla kalakgayawanit congregación. Chatum tala puskat tiku wanikan Marley, tiku lama kʼEstados Unidos, wan: «Lu lanka xtapalh kliʼakxilha taskujut nema klakgaya chuna la puskat kkifamilia chu kcongregación. Talakaskin pi chuntiya nakliskuja xlakata nakakxilha limapakgsin nema Jehová kamaxkinit makgapitsin chuna la xlilat. Pero kinchixku chu natalan xalak congregación tlawakgo pi ni tuwa nakmakgkatsi xlakata kimaxkikgo kakni chu kilimasiyanikgo pi xtapalh liʼakxilhkgo putum tuku ktlawa». Xlikana pi nachuna makgkatsikgo lhuwa kinatalankan lakpuskatin.

¹⁶ Natalan lakchixkuwin limasiyakgo pi akgatekgskgo tuku kilhchanima kgalhikan limapakgsin akxni kamaxkikgo kakni natalan lakpuskatin. Benjamin, chatum tala tiku lama kʼInglaterra, wan: «Lu lhuwa tuku kkatsininit xlakata takgalhtin nema mastakgo natalan lakpuskatin ktamakxtumit chu tuku wankgo xlakata la likgalhtawakgakan Biblia chu xlakata la lichuwinankan Dios chu tlakg tlan namasiyakan. Klakpuwan pi lu tlan taskujut tuku tlawakgo».

17. ¿Tuku xlakata xlakaskinka nakamaxkiyaw kakni tiku kalakgayawakanit limapakgsin?

¹⁷ Akxni putum tiku xalak congregación, lakchixkuwin, lakpuskatin, tiku pulalinkgo familias chu lakgkgolotsin, liwana akgatekgsaw chu maxkiyaw kakni tiku kalakgayawakanit limapakgsin, kcongregación anan takaksni. Chu tuku tlakg xlakaskinka wa pi malankiyaw kinTlatkan xalak kʼakgapun, Jehová (Sal. 150:6).