ARTÍCULO NEMA NATALIKGALHTAWAKGA 5
«Xʼakgxakga putum chixku wa Cristo»
«Xʼakgxakga putum chixku wa Cristo» (1 COR. 11:3).
TAKILHTLIN 12 Lanka Dios, Jehová
TUKU NATALICHUWINAN *
1. ¿Tuku max natlawa pi chatum chixku tlan o nitlan nalikatsini xfamilia?
¿TUKU lakpuwana akxni kgaxpata tachuwin «xʼakgxakga familia»? Makgapitsi lakchixkuwin mastakgo talakaskin pi xtalismaninkan o chuna la kamakgastakkanit natlawa pi tlan o nitlan nakalikatsinikgo xlakpuskatinkan chu xlakkamanankan. Yanita, chatum tala xalak Europa, wan: «Anta niku akit klama, latamanin lakpuwankgo pi lakpuskatin ni xlakaskinka litaxtukgo nixawa lakchixkuwin, chu nakalikatsinikan chuna la skujnin». Chu chatum tala tiku wanikan Luke, chu lama kʼEstados Unidos, wan: «Makgapitsi natlatni kamasiyanikgo xkamanankan pi putum tuku wankgo lakpuskatin ni xlakaskinka, wa xlakata lakchixkuwin ni kuenta xkalitlawanitkan tuku xlakan wankgo». Pero putum uma lakatsala chuna la Jehová lakaskin pi lakchixkuwin kakalikatsinikgolh xlakpuskatinkan (katamalakxtupi Marcos 7:13). ¿La tlan nakatsini chatum chixku napulalin familia?
2. ¿Tuku xlikatsit xʼakgxakga familia, chu tuku xlakata?
2 Xlakata tlan xʼakgxakga familia nalitaxtu, chatum chixku pulana xliʼakgatekgsat tuku lakaskin Jehová kamakgantaxtilh. Na xlikatsit tuku xlakata Jehová wi tiku kamaxkilh limapakgsin chu la tlan nastalani xliʼakxilhtit Jehová chu Jesús. ¿Tuku xlakata lu xlakaskinka pi chatum chixku nakatsi putum uma? Xlakata Jehová kamaxkinit limapakgsin tiku pulalinkgo familia chu lakaskin pi liwana kamaklakaskinkgolh (Luc. 12:48b).
¿TUKU KILHCHANIMA KGALHIKAN LIMAPAKGSIN?
3. ¿Tuku kinkamasiyaniyan 1 Corintios 11:3 xlakata tiku kgalhikgo limapakgsin?
3 (Kalikgalhtawakga 1 Corintios 11:3). Uma versículo lichuwinan la lakkaxwilinit Jehová xfamilia kʼakgapun chu kKatiyatni. Jehová wa tiku kgalhi putum limapakgsin, wa xlakata kamaxkinit limapakgsin amakgapitsin. Pero Jehová nakaskini kuenta la nalimaklakaskinkgo uma limapakgsin (Rom. 14:10; Efes. 3:14, 15). Jehová lakgayawanit Jesús namapakgsi congregación; pero nachuna naskini kuenta xlakata la kinkalikatsiniyan (1 Cor. 15:27). Jehová na maxkinit limapakgsin chixku xlakata napulalin xpuskat chu xkamanan; pero, nachuna, xachixku nakamaxki kuenta Jehová chu Jesús xlakata la likatsini xfamilia (1 Ped. 3:7).
4. ¿Tuku limapakgsin kgalhikgo Jehová chu Jesús?
4 Jehová wa xʼakgxakga xfamilia anta kʼakgapun chu kKatiyatni, wa xlakata kgalhi limapakgsin nakawani xlakkamanan tuku xlitlawatkan chu lakgchan nakawani pi kamakgantaxtikgolh (Is. 33:22). Jesús wa xʼakgxakga congregación, chu na kgalhi limapakgsin xlakata nawan tuku xlitatlawat anta chu lakgchan nawan pi kamakgantaxtika (Gál. 6:2; Col. 1:18-20).
5. ¿Tuku limapakgsin kgalhi chatum xʼakgxakga familia, chu tuku nila tlawa?
5 Chuna la Jehová chu Jesús, chatum xʼakgxakga familia kgalhi limapakgsin xlakata wi tuku nalaksaka xpalakata xfamilia (Rom. 7:2; Efes. 6:4). Pero ni kgalhi putum limapakgsin. Akgtum liʼakxilhtit, anta kBiblia xlikilhtiyat tuku nawan pi xlitatlawat (Prov. 3:5, 6). Nachuna, chatum xʼakgxakga familia ni kgalhi limapakgsin xlakata nakawani tiku ni xalak xfamilia tuku xlitlawatkan (Rom. 14:4). Chu akxni xkamanan stakkgo chu nialh anta kxchikkan wilakgolh, chuntiya maxkikgo kakni, pero nialh wa kamapakgsi (Mat. 19:5).
¿TUKU XLAKATA JEHOVÁ WI TIKU KAMAXKINIT LIMAPAKGSIN?
6. ¿Tuku xlakata Jehová wi tiku kamaxkinit limapakgsin?
6 Chuna la Jehová wi tiku kamaxkinit limapakgsin limasiya pi paxki xfamilia. Xlakata Jehová liwana lakkaxwilinit tiku kamaxkinit limapakgsin, xfamilia kgalhi takaksni chu liwana talakkaxtawilanit (1 Cor. 14:33, 40). Komo niti xkatsilh tiku kgalhi limapakgsin, xʼanalh taʼakglhuwit chu niti xpaxuwalh. Akgtum liʼakxilhtit, niti xkatsilh tiku nawan tuku xlitatlawat chu tiku xlimakgantaxtit.
7. Chuna la wan Efesios 5:25, 28, ¿la lakaskin Jehová pi xachixku nalikatsini xpuskat?
7 Komo limapakgsin nema Jehová kamaxkinit lakchixkuwin lu tlan, ¿tuku xlakata lhuwa lakpuskatin makgkatsikgo pi xlakchixkuwinkan lu nitlan kalikatsinikgo? Xlakata lhuwa lakchixkuwin lakatsalakgo limapakgsin nema wilinit Jehová xlakata familia chu kajwatiya stalanikgo xtalismaninkan. Nachuna max nitlan kalikatsinikgo xlakpuskatinkan xlakata xʼakstukan kapaxkikan chu xlakata tlan namakgkatsikgo. Akgtum liʼakxilhtit, max chatum chixku nitlan nalikatsini xpuskat xlakata namakgkatsi pi lu xlakaskinka litaxtu chu nalimasiya pi xla «lu chixku». Max lakpuwan pi maski nila fuerza tlawa pi xpuskat napaxki, tlan natlawa pi napekuani. Wi tiku maklakaskin uma tapekua xlakata namatlawi xpuskat tuku xla lakaskin. * Xlikana pi uma talakapastakni tlawa pi ni namaxkikan kakni puskat chu ni xtapalh naliʼakxilhkan. Chu nachuna, uma lakatsala xlimapakgsin Jehová (kalikgalhtawakga Efesios 5:25, 28).
¿LA TLAN CHATUM CHIXKU NAKATSINI TLAN XʼAKGXAKGA FAMILIA NALITAXTU?
8. ¿La tlan chatum chixku nakatsini tlan xʼakgxakga familia nalitaxtu?
8 Chatum chixku tlan xʼakgxakga familia nalitaxtu komo namaklakaskin xlimapakgsin chuna la Jehová chu Jesús tlawakgo. Kaʼakxilhwi pulaktiy tayat nema Jehová chu Jesús limasiyakgo, chu kaʼakxilhwi la tlan xpulalinanin familia nakalimasiyanikgo xpuskat chu xkamanan umakgolh tayat.
9. ¿La limasiya Jehová pi taktuju?
9 Tataktujut. Jehová wa tlakg xaskgalala tiku anan chu, maski chuna, kgaxmata tuku lakpuwankgo xlakskujnin (Gén. 18:23, 24, 32). Chu asta mastanit talakaskin pi tiku kamapakgsi nawanikgo tuku lakpuwankgo (1 Rey. 22:19-22). Maski ni kgalhi talakgalhin, xla ni lakpuwan pi akinin nachuna nawanaw. Wata kamakgtaya xlakskujnin xlakata tlan nakakitaxtuni maski xlakan makglakgalhinanin (Sal. 113:6, 7). Biblia wan pi David wanilh Jehová: «Wix tiku kimakgtaya» (Sal. 27:9; Heb. 13:6). Xla xkatsi pi putum tuku tlawalh, chuna tlawalh xlakata Jehová makgtayalh chu xla taktuju (2 Sam. 22:36).
10. ¿La limasiyalh Jesús pi xtaktuju?
10 Kalichuwinaw xliʼakxilhtit Jesús. Maski xla “xMakgalhtawakgenakan chu xMalanakan” kalitaxtunilh kstalaninanin, katuchekgelh. ¿Tuku xlakata Jehová tlawalh pi uma xtsokgwilika kBiblia? Chuna tlawalh xlakata nakinkamasiyaniyan pi kilitaktujutkan, chu nachuna tiku pulalinkgo familia. Jesús wa: «Akit kkawilinin xaliʼakxilhtit, chuna la ktlawalh mimpalakatakan, nachuna wixin militlawatkan» (Juan 13:12-17). Maski lhuwa limapakgsin xkgalhi, ni kgalhkgalhilh pi wa naskujnanikan, wata xla kaskujnanilh amakgapitsin (Mat. 20:28).
Xʼakgxakga familia limasiya pi taktuju chu paxkinan akxni makgtayanama kxchik chu akxni makgtaya xfamilia xlakata tliwakga nakgalhi xtakanajla (Kaʼakxilhti párrafos 11 chu 13).
11. ¿Tuku kamasiyani xʼakgxakgakan familia xliʼakxilhtitkan Jehová chu Jesús xlakata la taktujukgo?
11 ¿Tuku kinkamasiyaniyan? Chatum xʼakgxakga familia pulaklhuwa la tlan nalimasiya pi taktuju. Akgtum liʼakxilhtit, ni nakgalhkgalhi pi xpuskat chu xkamanan putum tlan natlawakgo. Kuentajtlawa o kakgaxmatni tuku wankgo tiku xalak xfamilia, maski ni matlani putum tuku xlakan wankgo. Marley, tiku lama kʼEstados Unidos, wan: «Kinchixku chu akit min kilhtamaku ni lakxtum tuku klakpuwanaw, pero kmakgkatsi pi xlakaskinka klitaxtu xlakata xla ankgalhin kinkgalhskin tuku klakpuwan chu akxilha tuku klakpuwan akxni wi tuku nalaksaka». Nachuna, chatum chixku tiku taktuju ankgalhin tlawa taskujut nema tlawakan kchiki, asta maski lama niku lakpuwankan pi umakgolh taskujut kajwatiya lakpuskatin xlitlawatkan. Uma lu tuwa kitaxtu. ¿Tuku xlakata? Chatum tala tiku wanikan Rachel wan: «Anta kkinkachikin, komo chatum chixku namakgtaya xpuskat nalakgchekgenan o nakaxaka kchiki, xtalakatsunin chu tiku xalak xfamilia wankgo pi “nixlikana chixku” litaxtu. Nalakpuwankgo pi nila matlawi xpuskat tuku xla lakaskin». Komo niku wix lapat lhuwa latamanin nachuna lakpuwankgo, kalakapastakti pi Jesús katuchekgelh kstalaninanin maski xlakpuwankan pi uma taskujut kajwatiya xlitlawatkan xwanit tiku skujnin xlitaxtukgo. Chatum xʼakgxakga familia ni wa lilakgaputsa pi amakgapitsin tlan naʼakxilhkgo, wata wa lilakgaputsa pi xfamilia tlan namakgkatsi. Maski tataktujut lu xlakaskinka, kaʼakxilhparaw atanu tayat tuku lu xlakaskinka xlikgalhitkan tiku xʼakgxakga familia litaxtukgo.
12. ¿Tuku tlawakgo Jehová chu Jesús xlakata kinkapaxkikgoyan?
12 Tapaxkit. Putum tuku Jehová tlawa chuna tlawa xlakata paxkinan (1 Juan 4:7, 8). Xlakata kinkalakgalhamanan, Jehová limaklakaskin xTachuwin chu xkachikin xlakata nakinkamaxkiyan tuku maklakaskinaw kkintakanajlakan. Xla tlan kinkamamakgkatsiniyan akxni kinkamalakapastakayan pi kinkapaxkiyan. ¿Chu tuku tlan nawanaw xlakata tuku maklakaskinaw? Jehová «kinkamaxkiyan putum tuku lipaxuwayaw» (1 Tim. 6:17). Akxni tlawayaw tuku nitlan, xla kinkastakyawayan, pero chuntiya kinkapaxkiyan. Xlakata Jehová kinkapaxkiyan mastalh xKgawasa xlakata nakinkalakgmaxtuyan, chu Jesús na lu kinkapaxkiyan chu asta mastalh xlatamat kimpalakatakan (Juan 3:16; 15:13). Nitu katitlawalh pi xlakan nialh nakapaxkikgo tiku ni makgxtakgkgo (Juan 13:1; Rom. 8:35, 38, 39).
13. ¿Tuku xlakata lu xlakaskinka pi chatum xʼakgxakga familia nalimasiya tapaxkit? (Na kaʼakxilhti recuadro « ¿Tuku tlan natlawa chatum chixku tiku aku tamakgaxtokgli xlakata xpuskat namaxki kakni?»).
13 ¿Tuku kinkamasiyaniyan? Putum tuku tlawa chatum tiku xʼakgxakga familia litaxtu chuna xlitlawat xlakata paxkinan. ¿Tuku xlakata lu xlakaskinka? Apóstol Juan lichuwinalh: «Tiku ni paxki xtala [o xfamilia], tiku akxilha, nila paxki Dios, tiku nila akxilha» (1 Juan 4:11, 20). Wa xlakata, chatum chixku tiku paxki xfamilia chu stalaniputun xliʼakxilhtitkan Jehová chu Jesús kuenta natlawa tuku xla xtakanajla, tuku makgkatsi chu tuku maklakaskin xfamilia (1 Tim. 5:8). Nakamasiyani chu nakastakyawa xkamanan. Nachuna chuntiya nakatsini la nalaksaka tuku maxki kakni Jehová chu tuku natlawa pi tlan nakitaxtuni xfamilia. La uku kalichuwinaw pulakatunu uma chu la chatum xʼakgxakga familia tlan nastalani xliʼakxilhtitkan Jehová chu Jesús.
TUKU XLITLAWAT TIKU XʼAKGXAKGA FAMILIA LITAXTU
14. ¿Tuku tlan natlawa chatum xʼakgxakga familia xlakata nakuentajtlawa xtakanajla xfamilia?
14 Kuentajtlawa xtakanajla xfamilia. Chuna la xTlat, Jesús lilakgaputsalh pi kstalaninanin tliwakga xkgalhikgolh xtakanajlakan (Mat. 5:3, 6; Mar. 6:34). Nachuna, xpalakata chatum tiku xʼakgxakga familia litaxtu, tuku tlakg xlakaskinka wa pi xfamilia tlan natalalinkgo Jehová (Deut. 6:6-9). Xlakata tlan natlawa uma, talakaskin pi xla chu xfamilia akxtum nalikgalhtawakgakgo Biblia chu nalilakpuwankgo, naʼankgo ktamakxtumit, nalichuwinankgo Dios chu lu naliskujkgo xlakata tlan natalalinkgo Jehová.
15. ¿Tuku tlan natlawa chatum xʼakgxakga familia xlakata tlan namamakgkatsini xfamilia?
15 Tlan mamakgkatsini xfamilia. Jehová wanilh Jesús kxlakatin amakgapitsin pi xpaxki (Mat. 3:17). Jesús kalimasiyanilh kstalaninanin pi xkapaxki xlakata tuku tlawalh chu tuku wa. Nachuna, xlakan limasiyakgolh pi xpaxkikgo (Juan 15:9, 12, 13; 21:16). Chatum xʼakgxakga familia tlan nakalimasiyani xpuskat chu xkamanan pi kapaxki akxni wi tuku tlawa xpalakatakan, akgtum liʼakxilhtit, akxtum nakatalikgalhtawakga Biblia. Na talakaskin nakawani pi kapaxki chu pi xtapalh kaliʼakxilha chu, akxni chuna xlilat, nakawani kxlakatinkan amakgapitsin pi tlan tuku tlawakgo (Prov. 31:28, 29).
Komo chatum xʼakgxakga familia makgapaxuwaputun Jehová, talakaskin nakamaxki xfamilia tuku maklakaskinkgo (Kaʼakxilhti párrafo 16).
16. 1) ¿Tuku atanu xlitlawat chatum xʼakgxakga familia? 2) ¿Tuku kuenta xlitlawat chatum xʼakgxakga familia?
16 Maxki xfamilia tuku maklakaskin. Jehová kamaxkilh israelitas putum tuku xmaklakaskinkgo asta akxni xkastakyawanit xlakata ni xkgalhakgaxmatkgonit (Deut. 2:7; 29:5). La uku, na kamaxki xlakskujnin tuku maklakaskinkgo (Mat. 6:31-33; 7:11). Nachuna, Jesús lilakgaputsalh xlakata nakamawi kstalaninanin chu ni xtatatlakgolh (Mat. 4:24; 14:17-20). Xlakata chatum tiku xʼakgxakga familia litaxtu namakgapaxuwa Jehová, xlimaxkit tuku maklakaskin xfamilia. Pero wi tuku kuenta xlitlawat. Ni lu lhuwa kilhtamaku xlimaxtut xlakata naskuja, xlakata max uma natlawa pi nialh kuenta natlawa tuku maklakaskin xfamilia xlakata xtakanajla chu la makgkatsi.
17. ¿La kinkamasiyanikgoyan chu kinkastakyawakgoyan Jehová chu Jesús?
17 Masiya chu stakyawanan. Jehová kinkamasiyaniyan chu kinkastakyawayan xlakata tlan nakinkakitaxtuniyan (Heb. 12:7-9). Xtachuna la xTlat, Jesús kalimasiyanilh tapaxkit akxni kamasiyanilh chu kastakyawalh tiku xtapakgsinikgo (Juan 15:14, 15). Xla palha stakyawanan, pero na limasiya tapaxkit (Mat. 20:24-28). Katsi pi makglakgalhinanin akinin chu pi tlawayaw tuku nitlan (Mat. 26:41).
18. ¿Tuku liwana katsi chatum xʼakgxakga familia?
18 Xʼakgxakga familia tiku stalani xliʼakxilhtitkan Jehová chu Jesús katsi pi xpuskat chu xkamanan makglakgalhinanin chu ni lu kasitsini (Col. 3:19). Wata lilakgtsakgsa tuku lichuwinan Gálatas 6:1 chu akxni kastakyawa limasiya pi kgalhi «tsatata naku», chu ni patsankga pi xla na makglakgalhina. Xtachuna la Jesús, katsi pi tlakg tlan nakitaxtu komo akxni namasiya wa nawili xaliʼakxilhtit (1 Ped. 2:21).
19, 20. ¿La tlan chatum xʼakgxakga familia nastalani xliʼakxilhtitkan Jehová chu Jesús akxni wi tuku nalaksaka?
19 Laksaka tuku tlan nakitaxtuni xfamilia. Akxni wi tuku Jehová laksaka lilakpuwan tuku tlan nakakitaxtuni amakgapitsin. Akgtum liʼakxilhtit, xla malakatsukilh latamat, ni kaj xlakata wa tlan nakitaxtuni, wata chuna tlawalh xlakata amakgapitsin nalipaxuwakgo latamat. Niti mafuerzajlinilh xlakata xmakamilh xKgawasa chu xnilh kimpalakatakan. Xla tlawalh uma tamakamastan xlakata nakinkamakgtayayan. Jesús na wi tuku tlan laksakli xlakata xkamakgtayalh amakgapitsin (Rom. 15:3). Akgtum liʼakxilhtit, akxni lu xtlakgwanit, ni lakpuwa kaj najaxa, wata laksakli nakamasiyani lhuwa latamanin (Mar. 6:31-34).
20 Chatum tlan xʼakgxakga familia katsi pi tuku tlakg tuwa kitaxtu wa nalaksaka tuku tlan nakitaxtuni xfamilia, chu wa xlakata ni kaj takgaman liʼakxilha uma. Lu liskuja xlakata ni wa nalaksaka tuku kaj xʼakstu lakaskin chu ni lakapala tuku tlawa. Wata masta talakaskin pi Jehová namasiyani liwana tuku nalaksaka, chu chuna nalilakpuwan tuku tlakg tlan xpalakatakan amakgapitsin chu ni kajwatiya tuku tlan xpalakata (Prov. 2:6, 7; Filip. 2:4). *
21. ¿Tuku naʼakxilhaw kʼatanu artículo?
21 Jehová kalakgayawanit putum xʼakgxakga familia akgtum lu tuwa taskujut, chu nakaskini kuenta xlakata la namakgantaxtikgo uma taskujut. Pero, komo xachixku lu naliskuja xlakata nastalani xliʼakxilhtitkan Jehová chu Jesús, tlan xʼakgxakga familia nalitaxtu. Chu komo xpuskat namakgantaxti tuku lakgayawakanit kxfamilia, xtamakgaxtokgatkan xatapaxuwan natawila. ¿La xkaliʼakxilhatkan lakpuskatin tiku kamaxkikanit limapakgsin, chu tuku tuwa titaxtukgo? Naʼakxilhaw kʼatanu artículo.
TAKILHTLIN 16 Kamalankiw Jehová xlakata xKgawasa
^ párr. 5 Akxni chatum chixku tamakgaxtokga, akgxakga litaxtu kʼakgtum xasasti familia. Kʼuma artículo, naʼakxilhaw tuku kilhchanima kgalhikan limapakgsin, tuku xlakata lakkaxwililh Jehová chu tuku tlan nakatsinikgo lakchixkuwin xlakata xliʼakxilhtit Jehová chu Jesús. Kxliʼakgtiy artículo xla uma serie, naʼakxilhaw tuku tlan nakatsinikgo lakchixkuwin chu lakpuskatin xlakata xliʼakxilhtit Jesús chu atanu tiku kalichuwinan Biblia. Chu kxaʼawatiya artículo, nalichuwinanaw la natalan xlimaklakaskinatkan limapakgsin kcongregación.
^ párr. 7 Min kilhtamaku, películas, historias chu programas xla televisión nema makgalitsinan, masiyakgo pi xachixku nitlan likatsini xpuskat chu asta wilini. Wa xlakata, makgapitsin latamanin lakpuwankgo pi ni lixkajnit komo chatum chixku namatlawi xpuskat tuku xla lakaskin.
^ párr. 20 Anta krevista Makatsinina 1 xla abril kata 2011, páginas 16 asta 20, kʼartículo «Kalimalankiw Dios tuku lakapastakaw natlawayaw» tlakg natekgsa xlakata la tlan wi tuku nalaksaka.
