1. ¿Tuku xatapaxuwan tlawakgo xkachikin Jehová?

 MAKGASA, Biblia lichuwinalh pi xkachikin Jehová xatapaxuwan xʼamakgo skujnanikgo chu xʼamakgo stalanikgo xtapulalit xKgawasa (Sal. 110:3). Xlikana pi uma tuku xlichuwinankanit kgantaxtuma la uku. Kata kata, xlakskujnin Dios xatapaxuwan limaxtukgo lhuwa horas xlakata nalichuwinankgo xtachuwin Dios chu ni matajinankgo. Na limaxtukgo xkilhtamakujkan xlakata nakamaxkikgo xnatalankan tuku maklakaskinkgo, tlan kamamakgkatsinikgo chu na kamatliwakglhnikgo xtakanajlakan. Nachuna, lakgkgolotsin chu siervos ministeriales limaxtukgo lhuwa kilhtamaku xlakata nalakkaxwilikgo tuku kalakgchan chu taʼakgchuwin nema matitaxtikgo ktamakxtumit chu kalakgapaxialhnankgo natalan xlakata nakamatliwakglhnikgo xtakanajlakan. ¿Tuku kamakgpuwantini natlawakgo putum uma? Tapaxkit nema kgalhinikgo Jehová chu xtalatamankan (Mat. 22:37-39).

2. Chuna la wan Romanos 15:1-3, ¿tuku liʼakxilhtit kinkamakgxtakgnin Jesús?

² Jesús pulana wililh tuku xmaklakaskinkgo amakgapitsin nixawa tuku xla xmaklakaskin, chu kstalaninanin lu liskujaw xlakata nastalaniyaw lu xatlan xliʼakxilhtit (kalikgalhtawakga Romanos 15:1-3). Komo chuna natlawayaw, lu tlan nakinkakitaxtuniyan. Jesús wa: «Tlakg anan tapaxuwan akxni mastakan nixawa akxni makglhtinankan» (Hech. 20:35).

3. ¿Tuku nalichuwinanaw kʼuma artículo?

 ³ Kʼuma artículo nalichuwinanaw makgapitsi tuku tlawalh Jesús xpalakatakan amakgapitsin chu naʼakxilhaw la tlan nastalaniyaw xliʼakxilhtit. Na naʼakxilhaw tuku tlan natlawayaw xlakata nakamakgtayaputunaw amakgapitsin.

4. ¿La limasiyalh Jesús pi pulana xwili tuku xmaklakaskinkgo amakgapitsin nixawa tuku xla xmaklakaskin?

⁴ Jesús kamakgtayalh amakgapitsin maski xtlakgwanit. Kalilakpuwaw tuku tlawalh akxni lhuwa latamanin lakgankgolh akxni xwi kʼakgtum lanka sipi, max lakatsu kCapernaúm. Jesús tantaskaka xtlawanit oración, wa xlakata max lu xtlakgwanit. Pero akxni kaʼakxilhli umakgolh latamanin kalakgalhamalh limaxkgenin chu tiku xtatatlakgo. Ni kajwatiya kamapaksalh, na mastalh akgtum lu xlakaskinka taʼakgchuwin nema ni anan xtachuna: Taʼakgchuwin xalak Sipi (Luc. 6:12-20).

5. ¿La stalanikgo natlatni xliʼakxilhtit Jesús akxni tlakgwankgonit?

⁵ La stalanikgo xliʼakxilhtit Jesús xʼakgxakga familia. Kalilakpuwaw chatum tlat tiku akxni chin xchik lu tlakgwanit xlakata tantaku skujnit. Uma katsisni na kakninanikgo Dios kfamilia. Lakpuwan pi tlan xwa komo atanu kilhtamaku xtlawakgolh, pero skini Jehová pi kamaxkilh litliwakga. Jehová kgalhti xʼoración, chu makxtum kgalhtawakgakgo chuna la lismanikgo akgatunu semana. Uma katsisni xkamanankan wi tuku lu xlakaskinka katsinikgo: pi xnatlatnikan tuku tlakg xlakaskinka akxilhkgo wa tuku xla xtakanajlakan.

6. Kalichuwinanti akxni Jesús kalimaxtunilh kilhtamaku amakgapitsin xlakata nakamakgtaya.

⁶ Jesús kalimaxtunilh kilhtamaku amakgapitsin. Kalilakpuwaw uma: Jesús aku xmakatsinikanit pi xʼamigo, Juan Mununa, xmakgnikanit chu max lu xlilipuwama. Biblia wan: «Akxni Jesús kgaxmatli uma, tajulh kbarco chu alh alakatanu niku tlan akstu xtawi» (Mat. 14:10-13). Taʼakgatekgsa pi xʼakstu xtawilaputun. Makgapitsi latamanin tiku niy tiku xpaxkikgo xʼakstu tawilaputunkgo. Pero uma nichuna kitaxtulh xpalakata Jesús, xlakata lhuwa latamanin xkgalhkgalhimakgolha. ¿Tuku tlawalh uma kilhtamaku? Lilakpuwa tuku xmaklakaskinkgo umakgolh latamanin  chu «lu kalakgalhamalh». Katsilh pi lu xmaklakaskimakgo tuku tlan xkamamakgkatsinilh xla xtakanajlakan, ni mamakgapalilh chu chuna tlawalh. Chu, asta «lhuwa tuku tsukulh kamasiyani» (Mar. 6:31-34; Luc. 9:10, 11).

7, 8. Kalichuwinanti akgtum liʼakxilhtit la lakgkgolotsin stalanikgo xliʼakxilhtit Jesús akxni wi tiku maklakaskin tamakgtay.

⁷ La xatapaxuwan stalanikgo lakgkgolotsin xliʼakxilhtit Jesús. ¿Ni xlikana pi xtapalh akxilhaw putum tuku tlawakgo lakgkgolotsin kimpalakatakan? Lhuwa ni katsiyaw putum tuku tlawakgo lakgkgolotsin. Akgtum liʼakxilhtit, akxni wi tiku maklakaskin tamakgtay khospital, tiku makgtapakgsikgo kComités de Enlace con los Hospitales lakapala kamakgtayakgo natalan tiku maklakaskinkgo, chu makglhuwa chuna tlawakgo maski xʼitat tsisni. Xlakata lakgalhamanankgo, pulana wilikgo tuku maklakaskinkgo xnatalankan nixawa tuku xlakan maklakaskinkgo.

⁸ Lakgkgolotsin na makgtayanankgo akxni katlawakan Pukgalhtawakga chu makgapitsi chiki nema kamaklakaskin xkachikin Dios, na makgtayanankgo akxni wi tuku masputunan. Atanu tuku tlawakgo wa pi limaklakaskinkgo lhuwa kilhtamaku xlakata namasiyanankgo, nakamakgtayakgo chu nakamakgpuwantinikgo natalan xalak xcongregacioneskan. Umakgolh lakgkgolotsin chu xfamiliajkan kalakgchan nakawaniyaw pi lu tlan tuku tlawamakgo. Lakaskinaw pi Jehová kasikulunatlawalh tuku tlawamakgo. Xlikana, chuna la tlawakgo amakgapitsi natalan, lakgkgolotsin kuenta xlitlawatkan la limaklakaskinkgo xkilhtamakujkan. Ni xlilat nialh kuenta natlawakgo xfamiliajkan kaj xlakata namakgantaxtikgo taskujut xalak congregación.

9. Chuna la wan Filipenses 2:4, 5, ¿tuku talakapastakni kilikgalhitkan putum kstalaninanin Cristo?

⁹ (Kalikgalhtawakga Filipenses 2:4, 5). Xlikana pi ni kimputumkan lakgkgolotsin litaxtuyaw, pero na tlan wi tuku natlawayaw xpalakatakan amakgapitsin chuna la tlawalh Jesús. Biblia wan pi xla «skujni litaxtulh» (Filip. 2:7). ¿Tuku kinkamasiyanikgoyan umakgolh tachuwin? Chatum tlan skujni putsa la namakgapaxuwa xmalana. Xlakata akinin xlakskujnin Jehová chu xlakskujnin kinatalankan, lhuwa tuku tlawaputunaw xpalakata kiDioskan chu kinatalankan. ¿La tlan chuna natlawayaw? Kaʼakxilhti makgapitsi.

10. ¿La kiʼakstukan nakinkalakputsananikanan?

¹⁰ Kalakputsanani mintayat. Kalilakpuwanti umakgolh takgalhskinin: «¿Tlan wi tuku naklimakgxtakga xlakata nakkamakgtaya amakgapitsin? Akgtum liʼakxilhtit, ¿tuku ktlawa akxni kiskinikan kaklakgapaxialhnalh chatum tala tiku lina kata o kaklilh ktamakxtumit? ¿Xatapaxuwan ktalaknu akxni kaxakakan niku natlawakan asamblea o akxni kaxtlawakan Pukgalhtawakga?». Akxni tamakamastaniw Jehová, malaknuniw pi xʼamaw maklakaskinaw putum tuku kgalhiyaw xlakata naskujnaniyaw, chuna la kinkilhtamakujkan chu kintuminkan. Wa xlakata, xla lu paxuwa akxni xatapaxuwan maklakaskinaw putum umakgolh xlakata nakamakgtayayaw amakgapitsin. Chu, ¿tuku kilitlawatkan komo naʼakxilhaw pi wi tuku kililakgpalitkan?

11. ¿La nakinkamakgtayayan oración xlakata nakamakgtayaputunaw amakgapitsin?

¹¹ Katlawani oración Jehová xliputum minaku. Komo naʼakxilha pi wi tuku mililakgpalit, pero ni chuna tlawaputuna, katlawani oración Jehová xliputum minaku. Ni kaʼakgskgawi. Kawani la makgkatsiya chu kaskini pi kamaxkin litliwakga xlakata chuna natlawaputuna chu “xlakata chuna natlawaya” (Filip. 2:13).

12. ¿La tlan namakgtayanankgo kxkachikin Dios lakgkgawasan tiku nina linkgo kata chu tamunukgonita?

¹² ¿Wix chatum kgawasa tiku nina lin kata chu tamununitata? Komo chuna, kaskini Jehová pi kamakgtayan xlakata namakgtayanamputuna kcongregación. Kmakgapitsi congregaciones tlakg anan lakgkgolotsin nixawa siervos ministeriales chu lhuwa umakgolh siervos ministeriales linkgoya kata. Xlakata xkachikin Dios chuntiya stakma, tlakg talakaskin natalan lakgkgawasan tiku nakamakgtayakgo lakgkgolotsin xlakata nakuentajtlawakgo xkachikin Jehová. Komo nawana pi pimputuna makgtayanana niku tlakg talakaskin tamakgtay, tlakg napaxuwaya xlakata namakgapaxuwaya Jehová, nakgalhiya tlan tukuwani chu tlan namakgkatsiya xlakata nakamakgtayaya amakgapitsin.

13, 14. ¿Tuku tlan xtlawaw xlakata tlan xkamakgtayaw kinatalankan? (Kaʼakxilhti xmakni revista).

¹³ Kuenta katlawa tuku maklakaskinkgo amakgapitsin. Apóstol Pablo mastalh uma tastakyaw nema kamalakgachanilh Hebreos: «Putum kilhtamaku kakalimakgtayatit amakgapitsin tuku kgalhiyatit, xlakata uma xtachuna akgtum tamakamastan, chu lu makgapaxuwa Dios» (Heb. 13:16). ¡Lu xkilhta mastaka umakgolh tachuwin! Akxni nina makgas xmakglhtinankgonit uma carta, natalan xalak Judea makgxtakgkgolh xchikkan, xnegocioskan chu xfamiliajkan tiku ni kstalaninanin Cristo xlitaxtukgo, chu tsalakgolh kkasipijni (Mat. 24:16). Liwana tasiya pi uma kilhtamaku lu xlakaskinka xwanit pi xlamakgtayakgolh chatunu chatunu. Komo xapulana xmakgantaxtikgonita uma tastakyaw nema xkamaxkinit Pablo  xlakata nakatatapapitsikgo amakgapitsin tuku xkgalhikgo, ni tuwa xmakgkatsikgolh xlismanikgolh kxasasti xpulatamankan.

¹⁴ Max ni ankgalhin kintikawanikgon kinatalankan tuku maklakaskinkgo. Kalilakpuwaw chatum tala tiku ni xpuskat. ¿Maklakaskin tamakgtay xlakata natlawanikan xliwat, xlakata naʼan kputlaw o xlakata taskujut nema xlitatlawat kxchik? Max nitu katiwa xlakata ni akgtum takuka litaxtuputun. Pero xlikana pi napaxtikatsininan komo namakgtayayaw. Ni kililakpuwanatkan pi achatum tiku tlan namakgtaya o ankgalhin nakinkawaniyan tuku namaklakaskin. Kalilakpuwaw: «Komo akit chuna xaktatekgsli, ¿tuku xakpaxtikatsinilh pi xtlawaka kimpalakata?».

15. ¿Tuku kilitlawatkan komo kamakgtayaputunaw amakgapitsin?

¹⁵ Kakalimaxtuni kilhtamaku amakgapitsin. Xlikana pi kkincongregacionkan wilakgolh natalan tiku kamakgtayaputunkgo amakgapitsin. Nikxni kinkamamakgkatsinikgoyan pi akgtum takuka litaxtuyaw. Wata katsiyaw pi ankgalhin kinkamakgtayaputunkgoyan, chu stalaniputunaw xliʼakxilhtitkan. Alan, chatum kgolotsin tiku kgalhi 45 kata lakkaxwilinit xlakata nakalimaxtuni kilhtamaku amakgapitsin. Akxni lilakpuwan xliʼakxilhtit Jesús, xla wan: «Jesús ankgalhin xkgalhi taskujut, pero latamanin tiku tanu tanu kata xkgalhikgo akxtum xtatawilaputunkgo chu kskinkgo tamakgtay. Xkatsikgo pi xlikana xkalilakgaputsa. Tuku tlakg klakaskin wa nakstalani xliʼakxilhtit Jesús chu amakgapitsin kaʼakxilhkgolh pi kkalimaxtuni kilhtamaku, kkapaxki chu tlan kkalikatsini».

16. ¿La kinkamakgtayayan Salmo 119:59, 60 liwana nastalaniyaw xliʼakxilhtit Jesús?

¹⁶ Ni kilitaxlajwanitkan komo nila liwana stalaniyaw xliʼakxilhtit Jesús (Sant. 3:2).  Chatum tiku kgalhtawakgama nila liwana stalani xmakgalhtawakgena, pero, komo nakatsini tuku nitlan tlawa chu naliskuja xlakata nastalani xliʼakxilhtit xmakgalhtawakgena chuna la matlani, tlan nakitaxtuni. Nachuna nakitaxtu komo nalilatamayaw tuku katsininitaw akxni kiʼakstukan kgalhtawakgayaw chu naliskujaw xlakata nalakgpaliyaw tuku nitlan tlawayaw, tlan nastalaniyaw liʼakxilhtit nema kinkamakgxtakgnin Jesús (kalikgalhtawakga Salmo 119:59, 60).

17, 18. ¿Tuku tlan nakitaxtu komo nakamakgtayayaw amakgapitsin chuna la tlawalh Jesús?

¹⁷ Akxni kamakgtayayaw amakgapitsin nachuna tlawaputunkgo tiku kinkaʼakxilhkgoyan. Chatum kgolotsin tiku wanikan Tim, wan: «Kkincongregacionkan, anankgo natalan lakgkgawasan tiku lakapala matliwakglhkgonit xtakanajlakan chu siervos ministeriales litaxtukgonit xlakata akxilhkgolh pi amakgapitsin nachuna tlawakgonit chu stalanikgolh xliʼakxilhtitkan. Xlakata chuna tlawakgo uma lu makgtayanit congregación chu tlakg kamakgtayakgo lakgkgolotsin».

¹⁸ Kakilhtamaku litsama latamanin tiku xʼakstukan kapaxkikan, pero xlakskujnin Jehová nichuna likatsiyaw. Kinkamakgpuwantiniyan chuna la Jesús kamakgtayalh amakgapitsin chu akinin na lakpuwanitaw nastalaniyaw xliʼakxilhtit. Xlikana pi nila liwana chuna tlawayaw, pero “stalaniputunaw xtatukit” (1 Ped. 2:21). Komo naliskujaw xlakata nakamakgtayaputunaw amakgapitsin chuna la tlawalh Jesús, napaxuwayaw xlakata nakatsiyaw pi Jehová tlan kinkaʼakxilhan.