KILHTAMAKU akxni tsokgka Biblia, akxni xtamakgaxtokgkgo tsumat chu kgawasa, kgawasa kxokgo xlakata tlan natatamakgaxtokga tsumat. Tlan xlixokgokan tuku lu xtapalh xwanit, animales o tumin. Nachuna, tlan kxokgokan komo xtlawaka akgtum taskujut, chuna la titaxtulh Jacob akxni xʼama tatamakgaxtokga Raquel. Xla talakkaxlalh xputiatlat xlakata nataskuja akgtujun kata xlakata tlan xtatamakgaxtokgli xtsumat (Gén. 29:17, 18, 20). ¿Tuku xlakata kxokgokan akxni kskinkan chatum tsumat?

Carol Meyers chatum tiku lu katsini tuku lichuwinan Biblia, lichuwinan: «Wi tuku xmastakan xlakata nalilakgxokgonikan xfamilia tsumat taskujut nema xla nialh xʼama tlawa, uma lu xlakaskinka xwanit xpalakata familias tiku kskujkgo kkapukuxtun». Uma tuku xmastakan na xlimasiya pi uma akgtiy familias lu tlan xlatalalinkgo chu akxni xtitaxtukgo tuku tuwa, uma akgtiy familias tlan xlamakgtayakgo. Nachuna, akxni wi tuku xmastakan akxni kskinkan chatum tsumat xlimasiya pi xla kskinkanita chu nialh wa xtlat xʼama kuentajtlawa, wata wa xchixku.

Akxni wi tuku xmastakan akxni kskinkan chatum tsumat ni xwamputun pi tlan xtamawakan o tlan kstakan. Libro Instituciones del Antiguo Testamento wan: «Uma tumin o tuku xtachuna xtapalh nema xlitamaxkit xwanit xfamilia tsumat, limasiya pi xtamakgaxtokgatkan israelitas xtachuna la komo kxokgokan. Pero […] tuku xmastakan ni xlitamawamaka chatum tsumat, wata kaj xlipaxtikatsinikan xfamilia». *

La uku, kmakgapitsi países ananku ama talismanin xlakata xokgokan akxni skinkan chatum tsumat. Komo natlatni tiku kstalaninanin Cristo ni lhuwa tuku naskinkgo xpalakata xtsumatkan, latamanin nakatsikgo pi xlakan tlan “talakapastakni kgalhikgo” (Filip. 4:5; 1 Cor. 10:32, 33). Chuna nalimasiyakgo pi ni “paxkikgo tumin” (2 Tim. 3:2). Nachuna, komo ni namalakatsalikgo tuku naskinkgo, kgawasa litatawilat ni katimamakgaslilh xtamakgaxtokgat kaj xlakata natekgsa tuku namasta. Chu komo precursor litaxtu, ni katimakgxtakgli la skujnanima Dios xlakata naskuja putum kilhtamaku chu namastokga xtumin.

Kmakgapitsi países, anan limapakgsin nema wan pi ni xlitamalakatsalit tuku naskinkgo xnatlatni chatum tsumat. Kʼumakgolh kachikinin, natlatni tiku kstalaninanin Cristo litaxtukgo ni lakatsalakgo uma limapakgsin. Chuna tlawakgo xlakata katsikgo pi Dios lakaskin pi kstalaninanin Cristo «kakakgalhakgaxmatkgolh mapakgsinanin» chu limapakgsin nema ni lakatsala xlimapakgsin (Rom. 13:1; Hech. 5:29).