MIÉRCOLES 18 xla enero kata 2023, mastaka akgtum lu xlakaskinka tamakatsinin kjw.org: natalan Gage Fleegle chu Jeffrey Winder kalaksakka xlakata nakatatapakgsikgo Lakgkgolotsin tiku Pulalinkgo xtatayananin Jehová. Xchatiykan akglhuwata kata skujnanimakgo Jehová.

Tala Fleegle stakli kx’oeste Pensilvania (Estados Unidos). Xnatlatni masiyanikgolh xaxlikana. Akxni aku kstakma, ankgolh latamakgo k’akgtum aktsu kachikin niku tlakg xtalakaskin tiku xlichuwinankgolh Dios. Ni lhuwa kilhtamaku titaxtulh, tala Fleegle tamunulh 20 xla noviembre kata 1988.

Xnatlatni ankgalhin ma’akgpuwantinikgolh pi kskujnanilh Jehová putum kilhtamaku. Xkawanikgo superintendentes de circuito chu betelitas pi x’ankgolh kxchikkan, uma makgtayalh tala Fleegle na’akxilha pi lu xpaxuwakgo. Akxni nina makgas lata xtamununit, 1 xla septiembre kata 1989, precursor regular litaxtulh. Chu akgtiy kata alistalh, makgantaxtilh tuku xlakpuwanit lata akxni xkgalhi 12 kata: naskuja kBetel. Tsukulh makgtayanan kBetel xalak Brooklyn octubre kata 1991.

Anta, skujli ktaller de encuadernación akgtsayan kata, chu alistalh malakgachaka kDepartamento de Servicio. Ama kilhtamaku, makgtayanalh makgapitsi kata k’akgtum congregación niku xchuwinankan ruso. Kkata 2006 tatamakgaxtokgli Nadia, chu lata uma kilhtamaku, akxtum skujkgonit kBetel. Xchatiykan makgtayanankgolh kcongregaciones ktachuwin portugués chu liwaka akgkaw kata makgtayanankgolh kcongregaciones ktachuwin español. Akxni xtitaxtunita akglhuwa kata lata kskujma kDepartamento de Servicio, tala Fleegle lakgayawaka namakgtayanan kComité de Enseñanza chu alistalh kComité de Servicio. Marzo kata 2022 laksakka xlakata xmakgtayana Lakgkgolotsin tiku Pulalinankgo xlitaxtulh anta kComité de Servicio.

 Tala Winder stakli kMurrieta (California). Xnatlatni, tiku xtatayananin Jehová litaxtukgo, masiyanikgolh xaxlikana, chu xla tamunulh 29 xla marzo kata 1986. Akgtum papa’ alistalh, precursor auxiliar litaxtulh. Xlakata lu lakgatilh uma nialh makgxtakgputulh. Ni xlimakgas, 1 xla octubre kata 1986, precursor regular litaxtulh.

Akxni aku kstakma, tala Winder alh kalakgapaxialhnan chatiy xanapuxkun xnatalan tiku kskujmakgo kBetel. Uma ma’akgpuwantinilh namalakgatsama ksolicitud akxni xmakgatsilh kata nema xtalakaskin. Chu mayo kata 1990 wanika pi x’alh makgtayanan kBetel xalak Wallkill.

Anta, tanu tanu taskujut lakgayawaka. Skujli kDepartamento de Limpieza, kDepartamento de la Hacienda chu k’Oficina de Betel. Kkata 1997 tatamakgaxtokgli Angela, chu lata ama kilhtamaku akxtum skujkgonit kBetel. Kkata 2014 kamalakgachaka kWarwick, niku tala Winder makgtayanalh xlakata natlawakan niku kapulalinkan xtatayananin Jehová. Kkata 2016 ankgolh kPatterson, niku wi Centro Educativo de la Watchtower, chu anta skujli kDepartamaento de Audio y Video. Akgtati kata alistalh taspitparakgolh kWarwick, chu tala Winder lakgayawaka namakgtayanan kComité de Personal. Marzo kata 2022 laksakka xlakata xmakgtayana Lakgkgolotsin tiku Pulalinankgo xlitaxtulh anta kComité de Personal.

Umakgolh lakchixkuwin akgtum lu xatlan xtamaskiwin Jehová (Efes. 4:8). Kapalakaskinaw k’oración xlakata Jehová chuntiya kasikulunatlawalh tuku tlawamakgo xpalakata xTamapakgsin.