1. ¿Tuku kilhtamaku putum tiku xatalaksakni wilakgocha nawan kʼakgapun?

 LATA makgasa, xlakskujnin Jehová xlilakpuwanaw: «¿Tuku kilhtamaku nakalinkan kʼakgapun xaʼawatiya kstalaninanin Cristo tiku xatalaksakni?». Milh kilhtamaku xlakpuwanaw pi makgapitsi tiku xatalaksakni xʼamakgo lakgtaxtukgo kʼArmagedón chu xʼamakgo latamakgo kParaíso ni makgas kilhtamaku. Pero krevista Makatsinina 15 xla julio kata 2013 katsiniw pi putum tiku xatalaksakni tiku wilakgolhku nawan kKatiyatni nakalinkan kʼakgapun akxni nina tsuku nawan Armagedón (Mat. 24:31).

2. ¿Tuku takgalhskinin max nalilakpuwanaw, chu tuku naʼakxilhaw kʼuma artículo?

² Pero max tawilapara atanu takgalhskinin: ¿Tuku nakaʼakgspula “amakgapitsi xborregos” Cristo tiku skujnimakgo nawan Jehová kKatiyatni akxni natsuku «lhuwa tapatin»? (Mat. 24:21; Juan 10:16). Max makgapitsin lilakgaputsakgo xlakata lakpuwankgo pi ni katikatsikgolh tuku natlawakgo o namakgkatsikgo pi kaʼakgxtakgmakgankanit akxni natalan tiku xatalaksakni nialh nalatamakgo kKatiyatni. Kaʼakxilhwi pulaktiy tuku lichuwinan Biblia nema max tlawanit pi chuna nalakpuwankgo. Na naʼakxilhaw pi pulaklhuwa tuku xlakata ni xlilakgaputsatkan.

TUKU NI KATILALH

3, 4. ¿Tuku max lilakgaputsakgo makgapitsi kskujnin Dios, chu tuku xlakata?

³ Max makgapitsin kskujnin Dios lilakgaputsakgo pi amakgapitsi borregos namakgxtakgkgo xaxlikana akxni Lakgkgolotsin tiku Pulalinankgo nialh natawilakgo kKatiyatni xlakata nakapulalinkgo. ¿Tuku xlakata chuna lakpuwankgo? Kaʼakxilhwi pulaktiy tuku lichuwinan Biblia nema max tlawanit pi chuna nalakpuwankgo. Xapulana wa tuku lichuwinankan xlakata sacerdote Jehoiadá, chatum tlan kskujni Dios. Xla chu  xpuskat, Jehosabeat, kuentajtlawakgolh aktsu kgawasa tiku xwanikan Jehoás chu makgtayakgolh xlakata chatum xatlan mapakgsina xlitaxtulh. Akxni Jehoiadá xlamajku, mapakgsina Jehoás skujnilh Jehová. Pero akxni nilh, Jehoás tsukulh tlawa tuku nitlan. Stalanilh xtastakyawkan príncipes tiku nitlan xlikatsikgo chu makgxtakgli Jehová (2 Crón. 24:​2, 15-19).

⁴ Xliʼakgtiy liʼakxilhtit wa tuku kaʼakgspulalh kstalaninanin Cristo kxliʼakgtiy siglo. Juan, xaʼawatiya apóstol, xkamakgtayanit lhuwa kstalaninanin Cristo xlakata ni xmakgxtakgkgolh Jehová (3 Juan 4). Chu xtachuna la amakgapitsi apóstoles tiku ni makgxtakgkgolh Jesús, Juan lu xliskujnit xlakata xtamasiykan apóstatas ni xtanulh kcongregación (1 Juan 2:18). Pero akxni Juan nilh, xtamasiykan apóstatas talakgatumilh chuna la akgtum tajatat, chu ni lhuwa kata titaxtulh putum congregación xla kstalaninanin Cristo litaxkajwanikgolh umakgolh tamasiy.

5. ¿Tuku ni kililakpuwanatkan xpalakata pulaktiy liʼakxilhtit nema lichuwinawa?

⁵ ¿Limasiya umakgolh liʼakxilhtit pi nachuna nakaʼakgspula amakgapitsi xborregos Cristo akxni nakalinkan kʼakgapun tiku xatalaksakni? ¿Natlawakgo chuna la Jehoás chu namakgxtakgkgo Jehová? ¿Nakaʼakgspula chuna la lhuwa kstalaninanin Cristo tiku latamakgolh kxliʼakgtiy siglo chu nastalanikgo xtamasiykan apóstatas? ¡Nichuna! Liwana katsiyaw pi maski tiku xatalaksakni nialh nalatamakgo kKatiyatni, amakgapitsi borregos chuntiya naskujnanikgo Jehová chu ni xʼakstukan katikamakgxtakgka. ¿Tuku xlakata chuna wanaw?

XASKULUNKU TAKAKNIN NI KATITAXKAJWANILH

6. ¿Tuku pulaktutu kilhtamaku nalichuwinanaw?

⁶ ¿Tuku xlakata liwana katsiyaw pi xaskulunku takaknin ni katitaxkajwanilh maski lu tuwa tuku natitaxtuyaw? Xlakata Biblia masiya pi kilhtamaku nema lamaw ni xtachuna la xkilhtamakujkan israelitas chu xla kstalaninanin Cristo tiku latamakgolh kxliʼakgtiy siglo. Wa xlakata, liwana kalichuwinaw umakgolh pulaktutu kilhtamaku: 1) xkilhtamaku xamakgan Israel, 2) kilhtamaku akxni nina makgas xnikgonit apóstoles chu 3) kilhtamaku “akxni natalakkaxwilipara putum tuku anan”, nema kilhchanima kinkilhtamakujkan (Hech. 3:21).

7. ¿Tuku xlakata israelitas tiku ni xmakgxtakgkgo Jehová ni litaxtalajwanikgolh akxni akxilhkgolh pi kachikin Israel chu xmapakgsinaninkan xtlawamakgo tuku nitlan?

⁷ Xkilhtamaku xamakgan Israel. Akxni Moisés xʼamaja niy, kawanilh israelitas: «Liwana kkatsi pi akxni nakni, wixin natlawayatit tuku nitlan chu nialh anta katitlawantit ktiji nema kkalimapakgsinitan» (Deut. 31:29). Na kawanilh pi komo ni xkgalhakgaxmatnankgolh xʼamaka kachilinkan (Deut. 28:​35, 36). ¿Kgantaxtulh tuku wa Moisés? Chuna. Akglhuwa ciento kata, lhuwa mapakgsinanin ni kgalhakgaxmatkgolh Jehová, chu lhuwa israelitas nachuna tlawakgolh. Wa xlakata, Jehová kamalakgaxokgelh tiku ni kgalhakgaxmatkgolh chu nialh mastalh talakaskin pi xʼanankgolh mapakgsinanin kʼIsrael (Ezeq. 21:​25-27). Pero israelitas tiku ni xmakgxtakgkgo Jehová, lu litatliwakglhkgolh akxni akxilhkgolh pi xkgantaxtuma putum uma (Is. 55:​10, 11).

8. ¿Tuku xlakata ni kaks lilakawanaw pi kstalaninanin Cristo tiku latamakgolh kxliʼakgtiy siglo makgxtakgkgolh Jehová?

⁸ Kilhtamaku akxni nina makgas xnikgonit apóstoles. Ni kaks kinkamalakawaniyan pi kstalaninanin Cristo tiku latamakgolh kxapulana siglo makgxtakgkgolh Jehová. ¿Tuku xlakata? Xlakata Jesús xlichuwinanita pi x’amakgo talhuwikgo tiku xmasiyakgolh tuku ni xaxlikana (Mat. 7:​21-23; 13:​24-30, 36-43). Akxni nina ksputa xapulana siglo, apóstoles Pablo, Pedro chu Juan lichuwinankgolh pi  tuku Jesús xwanit xlakata apóstatas xtsukunita kgantaxtu (2 Tes. 2:​3, 7; 2 Ped. 2:1; 1 Juan 2:18). Akxni nina lhuwa kilhtamaku xtitaxtunit lata nilh xa’awatiya apóstol, kstalaninanin Cristo tiku stalanikgolh xtamasiykan apóstatas makgtapakgsikgolh kxaLanka Babilonia, nema kilhchanima ni xaxlikana takanajla. Amakgtum kgantaxtupa tuku xlichuwinankanit.

9. ¿Tuku xlakata kinkilhtamakujkan ni xtachuna la xkilhtamakujkan israelitas chu tiku latamakgolh kxliʼakgtiy siglo?

⁹ Kilhtamaku “akxni natalakkaxwilipara putum tuku anan”. Kinkilhtamakujkan ni xtachuna la xkilhtamakujkan israelitas chu tiku latamakgolh kxliʼakgtiy siglo, akxni apóstatas akgchipakgolh congregación xla kstalaninanin Cristo. ¿La litapakuwi kinkilhtamakujkan? Akinin limapakuwiyaw “xaʼawatiya kilhtamaku” (2 Tim. 3:1). Pero Biblia masiya pi akxni tsukulh xaʼawatiya kilhtamaku na tsukulh atanu kilhtamaku nema tlakg xʼama makgapala chu tlakg xlakaskinka. Uma kilhtamaku litapakuwi “akxni natalakkaxwilipara putum tuku anan” (Hech. 3:21). Tsukulh kkata 1914 chu nasputa akxni latamanin nialh nakgalhikgo talakgalhin chu Katiyatni akgtum paraíso nawan kxTamapakgsin Mesías. ¿Chu tuku lakkaxwililh Jehová kkata 1914? Jesús tsukulh mapakgsinan kʼakgapun uma kata, chu wa xlakata tawilapa chatum mapakgsina xlakgxokgo Jehová, chatum xkgawasa David tiku lakgchan namapakgsinan. Pero ni kajwatiya uma. Ni makgas kilhtamaku titaxtulh, tsukuparaka lakkaxwilikan xaskulunku takaknin (Is. 2:​2-4; Ezeq. 11:​17-20). Pero ¿namaxkajwiparakan xaskulunku takaknin?

10. 1) ¿Tuku lichuwinan Biblia pi xʼama la xpalakata xaskulunku takaknin kkinkilhtamakujkan? (Isaías 54:17). 2) ¿Tuku xlakata lu kinkamatliwakglhan tuku lichuwinan Isaías?

¹⁰ (Kalikgalhtawakga Isaías 54:17). Uma texto wan: «Katuwa tuku nalitalachipaputunkana, nitu katilitlawanikgon». Tuku lichuwinan uma texto kgantaxtuma kkinkilhtamakujkan. Na kgantaxtuma umakgolh tachuwin: «Putum minkamanan wa Jehová nakamasiyani, chu xtakaksni minkamanan lhuwa nawan. Nikxni katitapanunin tuku xaʼakgstitum. [...] Nitu katimakgapekuan chu ni katiʼanalh tuku nalipekuana, xlakata uma ni katitalakatsuwinin» (Is. 54:​13, 14). Nipara wa «dios xalak uma kakilhtamaku», Satanás, tlan malakgachokgo chuna la xkachikin Dios limakgalhtawakgenama Biblia (2 Cor. 4:4). Lakkaxwiliparakanit xaskulunku takaknin. ¡Nikxni katimaxkajwaniparaka! Katuwa tuku nakinkalitalatlawaputunkanan, nitu kintikatlawanin.

 TUKU NALA

11. Akxni putum tiku xatalaksakni wilakgochata nawan kʼakgapun, ¿tuku xlakata ni katimakgkatsiw pi kinkaʼakgxtakgmakgankanitan?

¹¹ ¿Tuku nala akxni tiku xatalaksakni nakalinkan kʼakgapun? Kalakapastakwi pi Jesús wa kiMapuchwayaninakan chu xʼakgxakga congregación. Xla wa: «Kaj chatum mimPulalinakan, wa Cristo» (Mat. 23:10). KiMapakgsinakan ankgalhin namakgantaxti tuku lakgaya, nakinkakuentajtlawayan. Xlakata wa kinkapulaliman, kstalaninanin tiku natamakgxtakgaw kKatiyatni nitu katilipekuaw. Xlikana pi ni katsiyaw tuku natlawa Cristo uma kilhtamaku xpalakata xkachikin Jehová. Pero wilakgo makgapitsi liʼakxilhtit xalak Biblia nema nakinkamakgtayayan ni napekuanaw. Kalichuwinaw umakgolh liʼakxilhtit.

12. 1) ¿La kakuentajtlawalh Jehová xkachikin akxni Moisés xninita? 2) ¿La kakuentajtlawalh akxni Elías alh skujnani alakatanu? (Na kaʼakxilhti dibujo).

¹² Moisés nilh akxni israelitas nina xtanukgo kTiyat nema xKawanikanit pi Nakamaxkikan. ¿Tuku akgspulalh xkachikin Dios? ¿Xʼakstukan tamakgxtakgkgolh chu nialh x’anan tiku xkamakgtaya xlakata xninita Moisés? Nichuna, xlakata Jehová ankgalhin kamakgtayalh tiku ni makgxtakgkgolh. Akgtum liʼakxilhtit, akxni Moisés nina xniy, Jehová wanilh pi tiku xʼama pulalin kachikin wa Josué, chatum chixku tiku Moisés akglhuwata kata xmasiyaninit la natlawa taskujut (Éx. 33:11; Deut. 34:9). Nachuna, xʼanankgo lhuwa amakgapitsi lakchixkuwin tiku na lu xkatsinikgo pulalinkgo kachikin: xwilakgo napuxkun tiku xkapulalinkgo akgtum mil latamanin, akgtum ciento, tipuxamakaw chu asta kgalhakaw latamanin (Deut. 1:15). Chuna la akxilhaw, liwana xkuentajtlawamaka xkachikin Dios. Na kgalhiyaw xliʼakxilhtit Elías. Akglhuwa kata, xla kamakgtayalh israelitas nakakninanikgo Jehová. Pero chalh kilhtamaku, Jehová malakgachalh alakatanu, pakgʼan ksur, anta kJudá (2 Rey. 2:1; 2 Crón. 21:12). ¿Xʼakstukan tamakgxtakgkgolh kskujnin Jehová tiku xtapakgsikgo kʼakgkaw tribus xalak Israel? Nichuna, xlakata Elías akglhuwata kata xmasiyaninit Eliseo la natlawa taskujut. Nachuna, xkgalhikgo xtamakgtaykan «xkamanan palakachuwinanin», tiku xkamasiyanikan la natlawakgo taskujut (2 Rey. 2:7). Chuna la akxilhaw, ankgalhin ananit lakchixkuwin tiku pulalinkgonit xkachikin Dios. Uma makgtayanalh xlakata Jehová chuntiya xmakgantaxtilh xtalakaskin chu xkakuentajtlawalh kskujnin tiku ni xmakgxtakgkgo.

13. ¿Tuku liwana kinkawaniyan Hebreos 13:5b? (Na kaʼakxilhti dibujos).

¹³ Komo nalilakpuwana umakgolh liʼakxilhtit,  ¿tuku lakpuwana pi nakaʼakgspula xlakskujnin Jehová tiku natamakgxtakgkgo kKatiyatni akxni putum tiku xatalaksakni nakalinkan kʼakgapun? Ni talakaskin lu makglhuwa nalilakpuwanaw: Biblia liwana kinkawaniyan pi Jehová nikxni katikamakgxtakgli kskujnin (kalikgalhtawakga Hebreos 13:5b). Xtachuna la Moisés chu Elías, xatalaksakni kstalaninanin Cristo tiku pulalinkgo xkachikin Jehová la uku, katsikgo pi lu xlakaskinka nakamasiyanikgo amakgapitsin la natlawakgo taskujut. Lata makgasa, Lakgkgolotsin tiku Pulalinankgo kamasiyanimakgo amakgapitsin natalan lakchixkuwin tiku katatapakgsikgo amakgapitsi borregos xlakata napulalinkgo taskujut. Akgtum liʼakxilhtit, katlawakanit escuelas xlakata nakamasiyanikan lakgkgolotsin, superintendentes de circuito, tiku makgtapakgsikgo kComités de Sucursal, superintendentes xalak Betel chu amakgapitsi. Nachuna, chatunu Lakgkgolotsin tiku Pulalinankgo kamasiyanikgonit xmakgtayananinkan la natlawakgo taskujut. Umakgolh makgtayananin lu tlan tlawamakgo xtaskujutkan. Xlikana pi lu katsinikgo la nakakuentajtlawakgo xborregos Cristo.

14. ¿Tuku lu xlakaskinka kinkamasiyaniyan uma artículo?

¹⁴ Putum uma kinkamasiyaniyan tuku lu xlakaskinka lichuwinan uma artículo: akxni tiku xatalaksakni nakalinkan kʼakgapun, akxni sputmaja nawan lhuwa tapatin, kskujnin Dios chuntiya nakakninanikgo. Chu xlakata Jesús wa nakapulalin, ni katiʼanalh tuku nakamalakgachokgo. Xlikana pi uma kilhtamaku, kachikinin nema Biblia kalimapakuwi Gog xalak Magog, nakatalatlawakgo (Ezeq. 38:​18-20). Pero ni katimakgapalalh chu nitu katitlawakgolh. Nila katimalakgachokgokgolh takaknin nema maxkikgo Dios. Jehová nakalakgmaxtu. Apóstol Juan maʼakxilhnika «lhuwa latamanin» tiku litaxtukgo amakgapitsi xborregos Cristo, chu na wanika pi umakgolh «lhuwa latamanin» wa tiku xlakgtaxtunikgonit «lhuwa tapatin». Uma limasiya pi xkachikin Dios nalakgtaxtu (Apoc. 7:​9, 14).

15, 16. Chuna la wan Apocalipsis 17:​14, ¿tuku natlawakgo tiku xatalaksakni kʼguerra xla Armagedón, chu tuku xlakata lu kinkamakgpuwantiniyan akxni katsiyaw uma?

¹⁵ Pero max tawila atanu takgalhskinin: ¿Tuku natlawakgo tiku xatalaksakni akxni xputumkan wilakgocha nawan kʼakgapun? Biblia  liwana kinkawaniyan pi mapakgsinanin xalak kakilhtamaku «natalatlawakgo Borrego, pero Borrego nakamakgatlaja». ¿Chu tiku namakgtayakgo xlakata natlajanan? Biblia wan: «Tiku Dios katasaninit, kalaksaknit chu ni makgxtakgkgo», uma kakilhchanima xatalaksakni kstalaninanin Cristo tiku kamalakastakwanikanita nawan (kalikgalhtawakga Apocalipsis 17:14). Uma wamputun pi akxni putum tiku xatalaksakni wilakgocha nawan kʼakgapun, xapulana taskujut nema nakamaxkikan wa pi natalatlawanankgo. ¡Lu kaks malakawaninan uma! Makgapitsin tiku xatalaksakni xlakgatikgo xtalatlawanankgo akxni nina xtatayananin Jehová xlitaxtukgo. Asta makgapitsin soldados xlitaxtukgo. Pero akxni lakgapaskgolh xaxlikana, makgxtakgkgolh putum uma chu katsinikgolh nialh natalatlawanankgo (Gál. 5:22; 2 Tes. 3:16). Pero akxni wilakgocha nawan kʼakgapun, namakgtayakgo Cristo chu xʼángeles xlakata namakgtlawakgo xaʼawatiya guerra niku nakamasputukan xtalamakgasitsin Dios.

¹⁶ Kalilakpuwaw uma: makgapitsi tiku xatalaksakni tiku lamakgolhku kKatiyatni lu linkgoya kata chu nialh lakgtliwakgan. Pero akxni nalatamakgo k’akgapun, lakgtliwakga espíritus nalitaxtukgo tiku nila kamakgnikan chu namakgtayakgo Mapakgsina Jesucristo xlakata natalatlawanan. Akxni titaxtunita nawan guerra xla Armagedón, nakamakgtayakgo latamanin xlakata nialh nakgalhikgo talakgalhin. Xlikana pi umakgolh tiku xatalaksakni, tlakg tlan nakamakgtayakgo xnatalankan akxni wilakgocha nawan k’akgapun nixawa komo chuntiya xtamakgxtakgkgolh kKatiyatni.

17. ¿Tuku likatsiyaw pi putum kskujnin Dios nalakgtaxtukgo kʼguerra xla Armagedón?

¹⁷ ¿Katatapakgsiya amakgapitsi xborregos Jesús? Komo chuna, ¿tuku natalakaskin natlawaya akxni lama nawan guerra xla Armagedón? Kajwatiya natalakaskin nalipawana Jehová chu nakgalhakgaxpata. Max pulaktum tuku natalakaskin nakgalhakgaxpata wa tuku wan Isaías 26:20: «Katanu niku tlakg xatsekg kminchik chu kamalakchuwa mimalakcha. Kaj tsinu katatsekgti asta akxni nasputa tasitsi». Lu tlan limakgkatsiyaw akxni katsiyaw pi putum kskujnin Dios, lata kʼakgapun chu kKatiyatni, nalakgtaxtukgo uma kilhtamaku. Chuna la apóstol Pablo, liwana katsiyaw pi «nipara mapakgsinanin, nipara tuku anan uku, nipara tuku aku namin, [...] natlawa pi Dios nialh nakinkapaxkiyan» (Rom. 8:​38, 39). Ankgalhin kalakapastakti: Jehová lu paxkiyan chu nikxni katimakgxtakgni.