Pulaktum tuku nakinkamakgtayayan natekgsaw tuku lhuwa xtapalh xalak Biblia akxni kgalhtawakgayaw wa pi nalakputsananaw. Pero ¿tuku tlan natlawayaw xlakata tlan nalitamakgtayayaw?

Liwana kalakputsananiw tuku likgalhtawakgayaw. Kalilakpuwaw: «¿Tiku tsokgli uma, tuku kilhtamaku tsokgli chu tiku katsokgnanika? ¿Tuku xlama ama kilhtamaku? ¿Tuku lalh akxni nina xtsokgwilikan chu tuku lalh alistalh?».

Kalilakpuwaw tuku kinkamasiyaniyan. Kaputsaw xatakgalhtin umakgolh takgalhskinin: «¿La makgkatsikgolh tiku kalichuwinankan? ¿Tuku xatlan tayat limasiyakgolh chu la tlan nachuna naktlawa? ¿Tuku nitlan tlawakgolh chu tuku xlakata nichuna kilitlawat?».

Katlawaw tuku katsinimaw. Akgtum li’akxilhtit, tlan namaklakaskinaw tuku katsiniw akxni nalichuwinanaw Dios o akxni nakatachuwinanaw latamanin. Komo chuna natlawayaw, makgantaxtimaw nawan tuku wan Salmo 107:43: «Tiku skgalala nakuentajtlawa putum uma».

• Tuku tlan natlawaya: Kaʼakxilhti sección «Tuku lhuwa xtapalh xalak Biblia», nema akxilhkan ktamakxtumit xla itat semana. Anta kinkamasiyanikanan la nalilatamayaw tuku katsinimaw, chu akxni wix nakgalhtawakgaya nachuna katlawa la lakkaxwilikanit uma sección. Akgatunu semana, uma sección limin takgalhskinin, tuku tlan nalilakpuwanaw chu dibujos nema kinkamakgtayayan.