Maski chuna, Jehová lakaskin pi kakgalhkgalhiw asta akxni nachin kilhtamaku nema xla laklhkawilinit. ¿Tuku xlakata Jehová lakaskin pi chuna katlawaw? ¿Chu tuku nakinkamakgtayayan chuntiya napaxuwayaw maski nina chin uma kilhtamaku?

¿TUKU XLAKATA JEHOVÁ LAKASKIN PI KAKGALHKGALHINAW?

Biblia wan: «Jehová kgalhkgalhinama xlakata nakamakgtayayan, chu wi tuku natlawa xlakata nakalimasiyaniyan xtalakgalhaman. Xlakata Jehová chatum Dios tiku tlawa tuku xaʼakgstitum. Paxuwakgo putum tiku kgalhkgalhimakgolh» (Is. 30:18). Isaías kawanilh umakgolh tachuwin judíos tiku xalaktsakatwa xwankgonit (Is. 30:1). Pero ama kilhtamaku na xʼanankgo judíos tiku ni xmakgxtakgkgo Jehová. Umakgolh tachuwin lu tlan kamamakgkatsinilh umakgolh judíos, chu akinin na tlan nakinkamamakgkatsiniyan.

¿Pero tuku xlakata kilikgalhkgalhinatkan? Xlakata Jehová na kgalhkgalhinama. Xla laklhkawilinit kilhtamaku chu hora akxni namasputu uma kakilhtamaku chu kgalhkgalhima asta akxni nalakgchan (Mat. 24:36). Akxni nalakgchan, liwana nalitasiya pi tuku wanit Akgskgawini xpalakata Jehová chu kskujnin ni xaxlikana. Ama kilhtamaku Jehová namasputu Satanás chu putum tiku tatayakgo. Pero xlakskujnin kamalaknuninit pi “nakalimasiyani xtalakgalhaman”.

Katsiyaw pi xlakata nina chin xkilhtamaku Jehová, xla nina katimapanulh putum kintaʼakglhuwitkan. Pero liwana kinkawaniyan pi tlan napaxuwayaw. Chuna la wa Isaías, tlan napaxuwayaw la uku maski nina kgantaxtu tuku lu kgalhkgalhimaw (Is. 30:18). a ¿Tuku nakinkamakgtayayan napaxuwayaw? Kalichuwinaw pulaktati tuku tlan natlawayaw.

¿LA TLAN NAPAXUWAYAW LA UKU?

Wa kalilakpuwaw chu kaʼakxilhwi tuku tlan titaxtuyaw. Mapakgsina David lhuwa tuku nitlan akxilhli kxlatamat (Sal. 37:35). Maski chuna, xla tsokgwililh: «Kaks kataya kxlakatin Jehová chu xatapaxuwan kakgalhkgalhi. Ni kasitsini chixku tiku lakkaxwili natlawa tuku nitlan chu tlan kitaxtuni» (Sal. 37:7). Mapakgsina David stalanilh uma tastakyaw. ¿La tlawalh? Ankgalhin lilakpuwa pi Jehová xmalaknuninit pi xʼama lakgmaxtu. Na ankgalhin xtapalh liʼakxilhli putum tuku Dios xtlawanit xpalakata (Sal. 40:5). Komo  akinin na wa nalilakpuwanaw chu naʼakxilhaw tuku tlan kinkakitaxtuniman chu ni wa tuku nitlan kinkaʼakgspulayan, tlakg ni tuwa katimakgkatsiw nakgalhkgalhiyaw asta akxni Jehová wi tuku natlawa.

Ankgalhin kamalankiw Jehová. David max wa tiku tsokgwililh Salmo 71, chu anta wanilh Jehová: «Akit chuntiya nakkgalhkgalhi; tlakg nakmalankiyan chuna la natitaxtu kilhtamaku» (Sal. 71:14). ¿Tuku xtlawa David xlakata xmalankilh Jehová? Xkalitachuwinan amakgapitsin xlakata Jehová chu xkilhtlini (Sal. 71:​16, 23). Na namalankiyaw Jehová chuna la tlawalh David, komo nakalitachuwinanaw xTachuwin amakgapitsin, nakalitachuwinanaw kiʼamigoskan chu kifamiliajkan tuku katsininitaw xpalakata chu nakilhtliniyaw. Wa xlakata, alimakgtum akxni nalikilhtliya kintakilhtlinkan, kuenta katlawa tuku kinkamasiyaniyan. Putum uma nakinkamakgtayayan chuntiya napaxuwayaw asta akxni Jehová wi tuku natlawa.

Akxtum kakatatawilaw kinatalankan. Akxni David xkgalhi taʼakglhuwit, wanilh Jehová: «Kxlakatinkan miskujnin tiku ni makgxtakgkgoyan naklipawan mintukuwani» (Sal. 52:9). David lu liskujli nakatalalin amakgapitsi kskujnin Jehová chu uma lu makgpuwantinilh. Akinin na kalakputsaw la tlakg tlan nakatalalinaw kinatalankan chu tlakg nakatachuwinanaw ktamakxtumit, akxni anaw lichuwinanaw Dios chu atanu kilhtamaku (Rom. 1:​11, 12).

Chuntiya kakanajlaw pi tuku kgalhkgalhimaw nakgantaxtu. Salmo 62:5 wan: «Kkgalhkgalhi Dios chu kaks ktaya xlakata wa tiku kimaxki takgalhkgalhin». Lu xlakaskinka pi liwana nakanajlayaw pi nakgantaxtu tuku kgalhkgalhimaw, liwaka komo makgasa kgalhkgalhimaw xlisputni uma kakilhtamaku. Maski ni katsiyaw la xlilhuwa kilhtamaku nakgalhkgalhiyaw, kilikanajlatkan pi Jehová namakgantaxti xtamalaknun. ¿Chu tuku kilitlawatkan xlakata chuntiya nakanajlayaw pi Jehová namakgantaxti xtamalaknun? Talakaskin nalikgalhtawakgayaw xTachuwin chu naʼakxilhaw tuku xlichuwinanit pi xʼama la, naʼakxilhaw la latatalakxtumi putum tuku lichuwinan chu putum tuku kinkamasiyaniyan xlakata Jehová (Sal. 1:​2, 3). Na lu xlakaskinka natlawaniyaw oración Jehová chu naskiniyaw xʼespíritu xlakata nakinkamakgtayayan chuntiya tlan natalalinaw chu chuntiya nakgalhkgalhiyaw asta akxni nakinkamaxkiyan latamat nema ni kgalhi xlisputni (Jud. 20, 21).

Chuna la mapakgsina David, tlan nalipawanaw pi Jehová kaʼakxilhma tiku kgalhkgalhimakgo chu kalimasiyani xtapaxkit nema ni makgxtakgnan (Sal. 33:​18, 22). Wa xlakata, komo paxuwaputunaw la uku chu chuntiya kgalhkgalhiputunaw Jehová, wa kalilakpuwaw chu kaʼakxilhwi tuku tlan titaxtumaw, kamalankiw Dios, kakatalaliw kinatalankan chu tlakg kakanajlaw pi tuku kgalhkgalhimaw nakgantaxtu.