Biblia liwana wan pi Jehová tlan alisokg lichuwinan tuku nala kkilhtamaku nema aku mima (Is. 45:21). Xlikana, ni kinkawaniyan la tlawa, tuku kilhtamaku chuna tlawa chu la xlilhuwa katsi xlakata tuku nala. Xlakata ni putum akgatekgsaw, nila liwana wanaw la tlawa. Pero wi makgapitsi tuku katsiyaw.

Jehová putum tlan tlawa, pero min kilhtamaku laksaka pi wi tuku ni natlawa. Xlakata kgalhi putum liskgalala, tlan alisokg nalichuwinan tuku aku nala chuna la xla lakaskin (Rom. 11:33). Pero xlakata xla tlan machokgo tuku tlawaputun, na tlan laksaka ni nakatsi tuku nala (katamalakxtupi Isaías 42:14).

Jehová tlawa pi kakgantaxtulh xtalakaskin. Chu uma, ¿la tatalakxtumi pi tlan alisokg lichuwinan tuku nala? Isaías 46:10 wan: «Akit tiku alisokg lichuwinan tuku nala, chu tiku lata makgasa lichuwinanit tuku nina tatlawa. Akit kwan: “Tuku klaksaknit nakgantaxtu, chu naktlawa putum tuku akit naktlawaputun”».

Pulaktum tuku xlakata Jehová tlan alisokg lichuwinan tuku nala, wa pi kgalhi litliwakga xlakata natlawa pi chuna nakikgantaxtu. Ni talakaskin pi Jehová naʼakxilha o nalakputsanan xlakata nakatsi tuku aku nala. Xla ni xtachuna la tiku likgalhtawakga maktum libro, tiku akxilha la kgalhsputa libro xlakata nakatsi tuku nala nema tsokgwilikanita. Wata Jehová tlan nalaksaka akgtum kilhtamaku xlakata wi tuku natlawa, chu alistalh akxni lakgchan uma kilhtamaku, tlawa pi chuna kalalh (Éx. 9:​5, 6; Mat. 24:36; Hech. 17:31).

Wa xlakata, Jehová maklakaskin tachuwin «klakkaxwililh», «ktlawalh» chu «klakpuwanit naktlawa» xlakata nalichuwinan tuku tlawalh xlakata tuku aku x’ama la (2 Rey. 19:25; nota; Is. 46:11). Ktachuwin xaʼhebreo, umakgolh versículos limaklakaskinkgo tachuwin nema limaklakaskinkan akxni lichuwinankan tiku liskuja tiyat o «xtlawana tlamank» (Jer. 18:4). Xtachuna la tiku liskuja tiyat tlan tlawa pi maktsu tiyat patum lu xastlan tlamank nalitaxtu, Jehová na tlan wi tuku natlawa xlakata namakgantaxti xtalakaskin (Efes. 1:11).

Jehová masta talakaskin pi kalaksakwi tuku tlawaputunaw. Xla ni tsokgwilinit tuku nala kxlatamatkan chatunu latamanin, chu na ni kamafuerzajlini tiku tlan likatsikgo pi katlawakgolh tuku nakalin klinin. Wata kinkamasiyaniyan la tlakg tlan nalinaw kilatamatkan chu alistalh masta talakaskin nalaksakaw tuku natlawayaw.

Kalichuwinaw akgtiy li’akxilhtit. Pulana nakalichuwinanaw tiku xlamakgo kNínive. Kʼuma kachikin x’anan lhuwa tuku nitlan, wa xlakata Jehová wa pi x’ama malakgsputu. Pero xlakata xlakan nitlan limakgkatsikgolh xtalakgalhinkan, Dios «lakgpalilh tuku xlakpuwanit natlawa chu nialh kamalakgsputulh chuna la xkawaninit» (Jon. 3:​1-10). Jehová lakgpalilh tuku xwanit pi x’ama la. ¿Tuku xlakata? Xlakata tiku xlamakgo kNínive kgaxmatkgolh tuku Jehová kamakatsinilh chu laksakkgolh nalakgpalikgo xtayatkan.

Xliʼakgtiy li’akxilhtit wa tuku xlichuwinankanit xpalakata Ciro, chatum chixku tiku x’ama kalakgmaxtu judíos chu x’ama limapakgsinan pi xkaxtlawaparaka xtemplo Jehová (Is. 44:26–45:4). Uma tuku xlichuwinankanit, makgantaxtilh mapakgsina Ciro xalak Persia (Esd. 1:​1-4). Pero Ciro ni xkakninani xaxlikana Dios. Xlikana pi Jehová maklakaskilh Ciro xlakata namakgantaxti tuku xwanit, pero ni mafuerzajlinilh naskujnani (Prov. 21:1).

Xlikana, anan lhuwa tuku kilikatsitkan. Chatum lataman nila liwana akgatekgsa la lakpuwan Jehová chu putum tuku tlawa, na nila akgatekgsaw la tlawa Jehová xlakata nakatsi tuku nala kkilhtamaku nema aku mima (Is. 55:​8, 9). Maski chuna, tuku lakgapasaw xpalakata Jehová kinkamakanajliyan pi putum tuku tlawa xatlan, asta akxni lichuwinan tuku aku nala.