ARTÍCULO NEMA NATALIKGALHTAWAKGA 7
TAKILHTLIN 51 Tamakamastaninitaw Dios
¿Tuku kinkamasiyaniyan xliʼakxilhtitkan nazareos?
«Kilhtamaku nema nazareo nalitaxtu, xla xasanto litaxtu kxlakatin Jehová» (NÚM. 6:8).
TUKU NAʼAKXILHAW
Naʼakxilhaw la kinkamakgtayayan xliʼakxilhtitkan nazareos xlakata ni napekuanaw chu xatapaxuwan wi tuku nalimakgxtakgaw xlakata naskujnaniyaw Jehová.
1. ¿Tuku tlawakgonit lhuwa xlakskujnin Jehová chuna la titaxtunit kilhtamaku?
¿XTAPALH liʼakxilha chuna la talalipina Jehová? ¡Xlikana pi chuna! Chu ni miʼakstu chuna makgkatsiya. Chuna la titaxtunit kilhtamaku lhuwa latamanin chuna makgkatsikgonit (Sal. 104:33, 34). Lhuwa tiku wi tuku limakgxtakgkgonit xlakata tlakg naskujnanikgo Jehová, chuna la nazareos xalak Israel xalamakgasa. Pero ¿tiku umakgolh nazareos, chu tuku kinkamasiyaniyan xliʼakxilhtitkan?
2. 1) ¿Tiku nazareos? (Números 6:1, 2). 2) ¿Tuku xkamakgpuwantini makgapitsi israelitas nazareos nalitaxtukgo?
2 Tachuwin nazareo minacha kʼakgtum tachuwin xaʼhebreo nema kilhchanima «tiku laksakkanit», «tanu wilikanit», o «makamastakanit». Uma tachuwin lu xkaminini umakgolh israelitas, tiku xatapaxuwan wi tuku xmakgxtakgkgo xlakata tlakg kskujnanikgolh Jehová. Limapakgsin nema maxkika Moisés xmaxki talakaskin chatum chixku o chatum puskat pi xmalaknunilh Jehová pi xʼama latama chuna la chatum nazareo kilhtamaku nema xla xlakkaxwililh (kalikgalhtawakga Números 6:1, 2). a Akxni wi tiku xtlawa uma tamalaknun, xtalakaskin xkgalhakgaxmatli makgapitsin limapakgsin nema amakgapitsi israelitas ni xtalakaskin xkgalhakgaxmatkgolh. ¿Chu tuku xmakgpuwantini chatum israelita nazareo nalitaxtu? Wa tapaxkit nema xkgalhini Jehová chu xlakata xpaxtikatsini tasikulunalin nema xmaxkinit (Deut. 6:5; 16:17).
3. Chuna la nazareos, ¿tuku na tlawanitaw?
3 Akxni «xlimapakgsin Cristo» tawi xlakgxokgo Limapakgsin nema xmaxkikanit Moisés, xlakskujnin Dios nialhla nazareos litaxtukgolh (Gál. 6:2; Rom. 10:4). Pero chuna la nazareos, akinin na skujnaniputunaw Jehová xliputum kinakujkan, kilatamatkan, kintalakapastaknikan chu kilitliwakgakan (Mar. 12:30). Chu wa uma tuku malaknuniyaw Jehová akxni tamakamastaniyaw. Xlakata nalilatamayaw tuku malaknuniw, talakaskin namakgantaxtiyaw xtalakaskin chu wi tuku nalimakgxtakgaw xlakata tlakg naskujnaniyaw. Naʼakxilhaw tuku xlitlawatkan xwanit nazareos xlakata xmakgantaxtikgolh tuku xmalaknukgonit chu la nakinkamakgtayayan xliʼakxilhtitkan xlakata namakgantaxtiyaw tuku malaknuninitaw Jehová (Mat. 16:24). b
WI TUKU KATLAWAW XPALAKATA JEHOVÁ
4. Chuna la wan Números 6:3, 4, ¿tuku xlitlawatkan xwanit nazareos?
4 (Kalikgalhtawakga Números 6:3, 4). Nazareos nila xwakgo kuchu, nipara uvas chu pasas. Amakgapitsin latamanin tlan xwakgo putum uma, xlakata ni akgtum talakgalhin xwanit. Asta Biblia wan pi vino akgtum xtamaskiwin Dios chu «makgapaxuwa xnaku chixku» (Sal. 104:14, 15). Maski chuna, nazareos xatapaxuwan xmakgxtakgkgo putum uma. c
Xtachuna la nazareos, ¿wi tuku xatapaxuwan limakgxtakgputunaw xlakata tlakg naskujnaniyaw Jehová? (Kaʼakxilhti párrafos 4 asta 6).
5. ¿Tuku tlawakgolh Madián chu Marcela, chu tuku xlakata?
5 Xtachuna la nazareos, akinin lhuwa tuku limakgxtakgnitaw xlakata tlakg naskujnaniyaw Jehová. Kalichuwinaw xliʼakxilhtitkan Madián chu Marcela. d Uma tamakgaxtokgat xalak Colombia lhuwa tuku xkgalhikgo. Madián xtlaja lhuwa tumin, wa xlakata xwilakgo kʼakgtum lu xastlan chiki. Pero xlakan tlakg kskujnaniputunkgo Jehová. Wa xlakata, wi tuku talakaskilh nalakgpalikgo. Xlakan wankgo: «Xtalakaskin pi nialh lhuwa tumin xaklaktlawaw, kaw tawilayaw kʼakgtum chiki nema tlakg aktsu xwanit chu kstaw kimputlawkan». Niti kamafuerzajlinilh Madián chu Marcela natlawakgo putum uma. Chuna tlawakgolh xlakata tlakg xlichuwinamputunkgo Dios. La uku lu paxuwakgo chu lu tlan limakgkatsikgo tuku laksakkgolh.
6. ¿Tuku xlakata kstalaninanin Cristo wi tuku xatapaxuwan limakgxtakgaw? (Na kaʼakxilhti dibujo).
6 Putum kstalaninanin Cristo wi tuku xatapaxuwan limakgxtakgaw xlakata tlakg naskujnaniyaw Jehová (1 Cor. 9:3-6). Jehová ni xafuerza kinkawaniyan pi wi tuku kalimakgxtakgwi xlakata tlakg naskujnaniyaw, chu tuku limakgxtakgaw ni wamputun pi nitlan. Akgtum liʼakxilhtit, makgapitsi natalan laksakkgonit namakgxtakgkgo xchikkan o akgtum tlan taskujut. Amakgapitsin laksakkgonit nina natamakgaxtokgkgo o ni tunkun nakgalhikgo kamanan akxni aku tamakgaxtokgkgonit. Chu amakgapitsin laksakkgonit naʼankgo makgtayanankgo niku tlakg talakaskin tamakgtay, maski max talakaskin nakamakgxtakgkgo xfamiliajkan chu xʼamigoskan. Lhuwa akinin laksaknitaw wi tuku nalimakgxtakgaw xlakata tlakg skujnaniputunaw Jehová. Liwana kakatsiw pi Jehová lu xtapalh liʼakxilha putum tuku nalimakgxtakgaw xlakata naskujnaniyaw, maski lhuwa o ni (Heb. 6:10).
NI KALIKATSIW CHUNA LA AMAKGAPITSIN
7. ¿Tuku xlakata xmin kilhtamaku chatum nazareo tuwa xmakgkatsi namakgantaxti tuku xmalaknunit? (Números 6:5; na kaʼakxilhti dibujo).
7 (Kalikgalhtawakga Números 6:5). Xlakata tamalaknun nema xtlawakgo, nazareos nila xkachukunikan xchixitkan. Chuna xlimasiyakgo pi kajwatiya Jehová xtapakgsinikgo. Komo chatum israelita tlakg lhuwa kilhtamaku nazareo xlitaxtu, laklhman kstaka xchixit chu max amakgapitsin tunkun xʼakxilhkgo pi tanu xtasiya. Komo tiku xʼakxilhkgo xtatayakgo tuku xtlawama, uma israelita ni tuwa xmakgkatsi namakgantaxti tuku xmalaknunit. Pero milh kilhtamaku, kʼIsrael lu ni xkamaxkikan kakni chu ni xtapalh xkaliʼakxilhkan tiku nazareos xlitaxtukgo. Akgtum liʼakxilhtit, kxkilhtamaku palakachuwina Amós, israelitas tiku xmakgxtakgkgonit Jehová “xkamawikgo vino” nazareos, max xlakata xtlawaputunkgo pi nialh xmakgantaxtikgolh tuku xmalaknukgonit (Amós 2:12). Xmin kilhtamaku, nazareos lu tuwa xmakgkatsikgo ni nalikatsikgo la amakgapitsin latamanin chu xtalakaskin pi ni xpekuankgolh.
Xtalakaskin pi nazareos ni xpekuankgolh xlakata ni xlikatsikgolh chuna la amakgapitsin (Kaʼakxilhti párrafo 7).
8. ¿La makgtayayan xliʼakxilhtit Benjamin?
8 Xlakata Jehová nakinkamakgtayayan, tlan ni napekuanaw maski max xamaxananin akinin chu tlan ni natlawayaw tuku tlawakgo amakgapitsin. Kaʼakxilhwi tuku titaxtulh Benjamin, chatum xtatayana Jehová xalak Noruega tiku kajku 10 kata kgalhi. Kxʼescuela wi tuku tlawaka xlakata xlimasiyaka pi xkamakgtayamaka tiku xalak Ucrania, xlakata anan guerra anta. Kawanika laktsu kamanan pi xlikilhtlikgolh akgtum takilhtlin chu xlilhakganankgolh colores nema kgalhi xbandera Ucrania. Xlakata ni xmakgtlawalh uma, Benjamin lakgamakgat tayalh. Pero chatum xmakgalhtawakgena akxilhli chu wanilh: «¡Katat unu! ¡Kalakapala, kkakgalhkgalhiman!». Benjamin ni pekualh, talakatsuwinilh xmakgalhtawakgena chu wanilh: «Akit ni kmakgtlawa uma. Ni kmakgtlawa tuku tlawakan xlakata natatayakan o namalankikan akgtum kachikin. Asta lhuwa xtatayananin Jehová katamaknukanit kpulachin xlakata ni ankgonit kʼguerra». Xmakgalhtawakgena akgatekgsli chu nialhtu wanilh. Pero xcompañeros tsukukgolh kgalhskinkgo tuku xlakata ni akxtum xkatakilhtli. Benjamin tsukulh pekuan chu asta xtasaputun. Maski chuna, ni makgatlajalh xtapekua chu kawanilh tuku xwaninita xmakgalhtawakgena. Alistalh, kawanilh xnatlatni pi Jehová xmakgtayanit nakgalhmakgtaya xtakanajla.
9. ¿Tuku tlan natlawayaw xlakata namakgapaxuwayaw Jehová?
9 Akxni kgalhakgaxmataw Jehová, latamanin akxilhkgo pi akinin nichuna likatsiyaw la amakgapitsin. Talakaskin ni napekuanaw xlakata kkintaskujutkan o kkiʼescuelajkan nawanaw pi akinin xtatayananin Jehová. Chu xlakata latamanin tlakg nitlan katilikatsikgolh chuna la natitaxtu kilhtamaku, ni kaks lilakawanaw pi tlakg tuwa namakgkatsiyaw nalilatamayaw xtastakyaw Biblia chu nakalitachuwinanaw xalaktlan tamakatsinin amakgapitsin (2 Tim. 1:8; 3:13). Pero talakaskin nalakapastakaw pi makgapaxuwayaw Jehová akxni ni pekuanaw chu ni tlawayaw tuku tlawakgo tiku ni skujnanikgo (Prov. 27:11; Mal. 3:18).
WA PULANA KAWILIW JEHOVÁ KKILATAMATKAN
10. ¿Tuku xlakata nazareos tuwa xmakgkatsikgo nakgalhakgaxmatkgo limapakgsin nema min kNúmeros 6:6, 7?
10 (Kalikgalhtawakga Números 6:6, 7). Nazareos nila xtalatakatsuwinikgo chatum nin. Max nalakpuwanaw pi uma ni tuwa xwanit, pero max tuwa xkitaxtuni chatum nazareo akxni tiku xniy chatum tiku xalak xfamilia xwanit. ¿Tuku xlakata? Xlakata akxni wi tiku xniy, lhuwa tuku xtlawakan niku xtalakaskin natalakatsuwinikan nin o naxamakan (Juan 19:39, 40; Hech. 9:36-40). Wa xlakata nazareos nila xtlawakgo umakgolh talismanin. Pero akxni xmakgantaxtikgo tuku xmalaknukgonit maski tuwa xmakgkatsikgo chu xlipuwamakgo, xlimasiyakgo pi xkgalhikgo tliwakga takanajla. Pero ni xʼakstukan xwilakgo, Jehová ankgalhin xkamaxki litliwakga nema xmaklakaskinkgo.
11. Akxni wi tuku lu xlakaskinka kililaksakatkan kkifamiliajkan, ¿tuku tlakg xlakaskinka kiliʼakxilhatkan? (Na kaʼakxilhti dibujo).
11 Putum kstalaninanin Cristo lu xtapalh liʼakxilhaw tamalaknun nema tlawaninitaw Jehová. Uma litasiya akxni wi tuku laksakaw chu chuna la kalikatsiniyaw kifamiliajkan. Tlawayaw putum tuku matlaniyaw xlakata namakgantaxtiyaw putum tuku lakgayaw kkifamiliajkan, pero nikxni wa pulana wiliyaw tuku xlakan lakaskinkgo nixawa tuku lakaskin Jehová (Mat. 10:35-37; 1 Tim. 5:8). Max namin kilhtamaku kifamiliajkan ni katilakgatikgolh tuku tlawayaw xlakata namakgapaxuwayaw Jehová chu uma natlawa pi nakinkasitsinikgoyan.
¿Liwana lakkaxwilinitaw wa pulana nawiliyaw Jehová kkilatamatkan, asta maski natitaxtuyaw tuku tuwa? (Kaʼakxilhti párrafo 11). e
12. Akxni Alexandru tuwa tuku titaxtulh kxfamilia, ¿tuku tlawalh, chu tuku ni tlawalh?
12 Kalichuwinaw xliʼakxilhtit Alexandru chu xpuskat, Dorina. Akxni xtitaxtunita akgtum kata lata xlikgalhtawakgamakgo Biblia, Dorina nialh kgalhtawakgaputulh chu xlakaskin pi Alexandru na nialh xkgalhtawakgalh. Pero xla liwana wanilh pi chuntiya xkgalhtawakgaputun. Dorina nipara tsinu lakgatilh uma chu xmafuerzajliniputun Alexandru xlakata nialh xkgalhtawakgalh. Maski xla xʼakgatekgsputun la xmakgkatsi xpuskat, tuwa makgkatsilh. Xmin kilhtamaku, akxni Dorina nitlan xlikatsini chu xwani ni xatlan tachuwin, Alexandru nialh xkgalhtawakgaputun. Maski chuna, chuntiya pulana wililh Jehová kxlatamat chu chuntiya tlan likatsinilh xpuskat chu xmaxki kakni. Alistalh, xliʼakxilhtit makgtayalh xpuskat natsukupara likgalhtawakga Biblia chu namakgamakglhtinan xaxlikana. (Kaʼakxilhti video Alexandru chu Dorina Văcar: «Tapaxkit lu kgalhkgalhinan chu tlan likatsi», nema min kjw.org ksección «Tuku xaxlikana kalakgpalini xlatamatkan latamanin»).
13. ¿Tuku kilitlawatkan xlakata nalimasiyayaw pi paxkiyaw Jehová chu kifamiliajkan?
13 Jehová malakatsukilh familia chu lakaskin pi putum familias xatapaxuwan natawilakgo (Efes. 3:14, 15). Komo lakaskinaw pi xlikana naʼanan tapaxuwan kkifamiliajkan, talakaskin natlawayaw tuku Jehová kinkawaniyan. Xla lu xtapalh liʼakxilha putum tuku tlawayaw xlakata naskujnaniyaw chu nakuentajtlawayaw kifamiliajkan, chu nakalimasiyaniyaw tapaxkit chu kakni (Rom. 12:10).
KALAMAKGPUWANTINIW XLAKATA NALITAXTUYAW CHUNA LA NAZAREOS
14. ¿Tiku tlakg talakaskin nakamakgpuwantiniyaw?
14 Putum tiku skujnaniputunaw Jehová, talakaskin wi tuku xatapaxuwan nalimakgxtakgaw xlakata paxkiyaw. Min kilhtamaku uma tuwa. ¿La nalamakgpuwantiniyaw xlakata wi tuku nalimakgxtakgaw xlakata naskujnaniyaw Jehová? Nalawaniyaw laktlan tachuwin (Job 16:5). ¿Wi chatum tala kmincongregación tiku liskujma wi tuku namakgxtakga xlakata tlakg skujnaniputun Jehová? ¿Lakgapasa chatum kgawasa tiku limasiyama kxʼescuela pi ni likatsi chuna la xcompañeros, maski tuwa makgkatsi? ¿Lakgapasa chatum tala o chatum tiku limakgalhtawakgemaka Biblia tiku xfamilia ni lakaskin pi naskujnani Jehová? Kakamakgpuwantiniw chu kakawaniw pi lu xtapalh liʼakxilhaw pi ni pekuankgo chu wi tuku limakgxtakgmakgo xlakata naskujnanikgo Jehová (Filem. 4, 5, 7).
15. ¿Tuku tlawakgonit makgapitsi natalan xlakata nakamakgtayakgo tiku skujnanimakgo Jehová putum kilhtamaku?
15 Namin kilhtamaku max wi tuku tlan nakalimakgtayayaw kinatalankan tiku skujnanimakgo Jehová putum kilhtamaku (Prov. 19:17; Heb. 13:16). Wa uma tuku tlawalh chatum tala puskat xalak Sri Lanka tiku lina kata. Xlakata maliwakanika tumin nema limakgtaya gobierno, lakpuwa nakamakgtaya chatiy natalan laktsuman xlakata tuwa xmakgkatsikgo chuntiya precursoras xlitaxtukgolh xlakata ni xkaʼakchani tumin. Wa xlakata akgatunu papaʼ xmaʼakgataxti xtumin xlakata xkalakgaxokgonilh recibo xla teléfono. ¡Lu tlan tuku tlawalh uma tala!
16. ¿Tuku kinkamasiyaniyan xliʼakxilhtitkan nazareos?
16 ¡Lhuwa tuku katsininitaw xlakata nazareos! Pero na wi tuku katsiniyaw xlakata kinTlatkan xalak akgapun, Jehová. Xla katsi pi xliputum kinakujkan makgapaxuwaputunaw chu pi xatapaxuwan wi tuku limakgxtakgaw xlakata namakgantaxtiyaw tamalaknun nema tlawaniw akxni tamakamastaniw. Nachuna, kinkamaxkiyan talakaskin nalimasiyaniyaw la xlilhuwa paxkiyaw (Prov. 23:15, 16; Mar. 10:28-30; 1 Juan 4:19). Xliʼakxilhtitkan nazareos kinkamasiyaniyan pi Jehová akxilha putum tuku tlawayaw xlakata naskujnaniyaw chu lu xtapalh liʼakxilha. Wa xlakata, chuntiya kaskujnaniw Jehová chu xliputum kinakujkan chuntiya kamaxkiw tuku tlakg tlan kgalhiyaw.
¿TUKU XKGALHTINANTI?
-
¿Tuku xlimakgxtakgkgo nazareos xlakata tlakg kskujnanikgolh Jehová chu la xlimasiyakgo pi ni xpekuankgo?
-
¿La tlan nakamakgpuwantiniyaw amakgapitsin xlakata chuna la nazareos nalitaxtukgo?
-
¿Tuku kinkamasiyaniyan xlakata Jehová tuku xtlawakgo nazareos?
TAKILHTLIN 124 Putum kilhtamaku katataya Dios
a Maski xmin kilhtamaku Jehová xkalaksaka makgapitsi nazareos, tlakg lhuwa tiku xʼakstukan xlaksakkgo nazareos nalitaxtukgo (kaʼakxilhti recuadro « Tiku Jehová kalaksakli nazareos nalitaxtukgo»).
b Minit kilhtamaku kkilikgalhtawakgakan katamalakxtuminitaw nazareos natalan tiku skujnanikgo Jehová putum kilhtamaku. Pero kʼuma artículo nalichuwinanaw pi putum kskujnin Jehová tlan nalitaxtukgo chuna la nazareos.
c Max tamalaknun nema xtlawakgo nazareos, ni xkilhchanima pi xkalakgayawakan lu xlakaskinka taskujut.
d Kaʼakxilhti artículo «Elegimos una vida sencilla», nema min kjw.org ksección «Experiencias de los testigos de Jehová».
e TUKU TASIYA KDIBUJO: Xtalilakgapasni chatum nazareo nilh, pero xla nila makgtlawa tuku tlawamakgo xfamilia xlakata tuku malaknuninit Jehová. Wa xlakata akxni ankan maknukan tiku nilh, xla ya kxʼakgstin chiki chu lata lakgamakgat kaʼakxilhma.
