XMIN kilhtamaku, tiku tsokgwilikgolh Biblia makglhuwa xtsokgwilikgo watiya tachuwin. ¿Tuku xlakata chuna xtlawakgo? Kaʼakxilhwi pulaktutu tuku xlakata max chuna xtlawakgo:

Kilhtamaku akxni tsokgwilika. Kxamakgan Israel, lhuwa latamanin ni xkgalhikgo maktum copia xla Limapakgsin. Kajwatiya xkgaxmatkgo akxni putum kachikin xtamakxtumikgo chu xkalikgalhtawakganikan ktabernáculo chu ktemplo (Deut. 31:​10-12). Kalilakpuwaw pi max akxni lilhuwa latamanin xliyakgo, x’anan lhuwa tuku xtlawa pi ni kuenta xtlawakgolh tuku xlikgalhtawakgamaka (Neh. 8:​2, 3, 7). Uma kilhtamaku, lu xlitamakgtayakgo akxni makglhuwa xkgaxmatkgo watiya tachuwin xlakata chuna tlan xlakapastakkgolh chu xlilatamakgolh. Chu tlakg xkamakgtaya akxni lhuwa tuku xkalikgalhtawakganikan, chuna la akxni xkawanikan la xlimakgantaxtitkan xwanit Limapakgsin nema Dios xkamaxkinit (Lev. 18:​4-22; Deut. 5:1).

La tsokgwilika. Makgapitsi libros xalak Biblia takilhtlin litaxtukgo, chuna la libro xla Salmos, El Cantar de los Cantares chu Lamentaciones. Makgapitsi takilhtlin xkgalhikgo tachuwin nema makglhuwa xmin. Umakgolh tachuwin xkamakgtaya nalakapastakkgo tuku xlichuwinama takilhtlin chu tlakg ni tuwa xkatsinikgolh xaletra. Xlakata na’akgatekgsaw uma, kaʼakxilhwi tuku wan Salmo 115:​9-11: «Oh, Israel, kalipawanti Jehová. (Xla mimakgtayanakan chu miʼescudojkan). Oh, xchik Aarón, kalipawanti Jehová. (Xla mimakgtayanakan chu miʼescudojkan). Wixin tiku pekuaniyatit Jehová, kalipawantit Jehová. (Xla mimakgtayanakan chu miʼescudojkan)». Akxni wi tiku xlikilhtli uma takilhtlin, ni tuwa xlakapastaka umakgolh tachuwin.

Tuku xlakata tsokgwilika. Makgapitsi tsokgnanin makglhuwa xtsokgwilikgo watiya tachuwin xlakata xlakaskinka xwanit chu xlakaskinkgo pi tlakg xlakapastakka. Akgtum li’akxilhtit, akxni Jehová kawanilh israelitas pi ni xwakgolh kgalhni, skinilh Moisés pi makglhuwa xkawanilh tuku xlakata xlikgalhakgaxmatatkan xwanit uma limapakgsin. Dios xlakaskin pi xkatsikgolh pi latamat anta wi kkgalhni, kgalhni kilhchanima latamat (Lev. 17:​11, 14). Akglhuwa kata alistalh, akxni apóstoles chu lakgkgolotsin xalak Jerusalén lichuwinankgolh tuku kilitlawatkan komo makgapaxuwaputunaw Dios, lichuwinamparakgolh pi ni kiliwatkan chu ni kilimaklakaskinatkan kgalhni (Hech. 15:​20, 29).

Maski kBiblia wilakgo makgapitsi tachuwin nema makglhuwa min, uma ni wamputun pi Jehová lakaskin pi kakatsiniw makgapitsi tachuwin chu watiya watiya nawanaw. Jesús wa: «Akxni natlawaya oración, ni watiya watiya tachuwin kawanti» (Mat. 6:7). Nachuna, lichuwinalh pulaklhuwa tuku tlan nawanaw akxni natlawayaw oración chu naskinaw tuku Dios lakgati (Mat. 6:​9-13). Maski akxni tlawaniyaw oración Jehová ni watiya watiya tachuwin waniyaw, tlan makglhuwa naskiniyaw tuku lakaskinaw (Mat. 7:​7-11).

¡Lu tlan pi kBiblia wilakgo makgapitsi watiya tachuwin! Wa uma pulaktum tuku maklakaskin xaLanka kiMakgalhtawakgenakan xlakata nakinkamasiyaniyan tuku nalitamakgtayayaw (Is. 48:​17, 18).