KALILAKPUWAW pi tlawamaw ktiji akxni lu katsisnita. Kaj lakapala, akxilhaw pi wi tiku kinkastalaniman. Komo tachokgoyaw, na tachokgo. Komo tlakg lakapala tlawanaw, na lakapala tlawan. Alistalh lakapastakaw pi lakatsu wi xchik chatum kiʼamigokan. Wa xlakata tsukuyaw kgosnanaw asta chanaw kxchik. Akxni kinkamalakkiniyan chu kinkamaxkiyan talakaskin natanuyaw, lu tlan makgkatsiyaw xlakata katsiyaw pi anta nitu kintikaʼakgspulan.

Max nikxni akgspulanitan tuku lichuwinaw. Pero max kgalhiya atanu taʼakglhuwit nema lilipuwana. Akgtum liʼakxilhtit, ¿talatlawapat nitlan talismanin nema makgatlajaputuna pero chuntiya nila makgxtakga? ¿Makgasata ni kgalhiya taskujut chu chuntiya ni tekgsa maski lu putsanita? ¿Lilipuwana xlakata kgolompat chu lakpuwana pi max natatatlaya alistalh? ¿O anan atanu tuku lilipuwampat?

Maski tanu tanu tuku nalilipuwana, tlan nakitaxtu komo nakgalhiya chatum amigo tiku nawaniya tuku lilipuwana chu namakgtayaputunan. ¿Kgalhiya chatum amigo la uma? ¡Chuna! Wa Jehová tiku miʼamigo. Abrahán xʼamigo xwanit, chuna la lichuwinan Isaías 41:8-13. Anta kversículos 10 chu 13, Jehová kinkamalaknuniyan kinchatunukan: «Ni kapekuanti, xlakata akit ktawilan. Ni anu anu kalakapi, xlakata akit miDios. Xlikana akit nakmatliwakglhan. Lu xlikana akit nakmakgtayayan. Chuna, lu xlikana akit naklimatliwakglhan xaʼakgstitum kimpakgastakat. Xlakata akit, Jehová miDios, kpakgachipanitan, Akit tiku waniyan: “Ni kapekuanti. Akit xlikana nakmakgtayayan”».

Xtachuwin Jehová lu tlan kinkamamakgkatsiniyan. Kalilakapastakti tuku Jehová kinkamalaknuniman. Texto ni wan pi paxtutlawampat Jehová chu makgachipaliman. Komo paxtutlawampat xlitaxtulh, xpakgastakat Jehová xlipakgachipalin mimpakgxwiki. Pero Jehová stonkga «xaʼakgstitum [x]pakgastakat» chu chipa kimpakgastakatkan, la komo xkinkalakatiputun chu xkinkamakgtayaputun ktuwa taʼakglhuwit. Akxni Jehová chipa mimpakgastakat, matliwakglhan akxni waniyan: «Ni kapekuanti. Akit xlikana nakmakgtayayan».

¿Liʼakxilha Jehová la chatum miʼamigo chu mintlat tiku paxkiyan? ¿Kanajlaya pi namakgtayayan akxni natitaxtuya tuku tuwa? Jehová xlikana lilakgaputsayan chu makgtayaputunan. Akxni kgalhiya taʼakglhuwit, Jehová lakaskin ni lu nalilipuwana. ¿Tuku xlakata? Xlakata lu kinkapaxkiyan. Jehová xlikana litaxtu «akgtum tamakgtay nema tunkun tekgskan akxni titaxtukan tuku tuwa» (Sal. 46:1).

Makgapitsi chuntiya lakapastakkgo xtalakgalhinkan chu lakpuwankgo komo Dios katapatinit. Komo  chuna makgkatsiya, kalilakapastakti Job, chatum chixku tiku ni makgxtakgli Dios. Xla wa pi xlakgalhinanit akxni kgawasaku xwanit (Job 13:26). Salmista David na chuna makgkatsilh chu tasaskinilh Jehová: «Kakimatsankganani kintalakgalhin y kintatlakatni nima xaktlawa akxni kgawasaku xakwanit, yan kalakapastakti» (Sal. 25:7, Salmos Ixtatlincan ti Talipawan Dios, SXP). Xlakata makglakgalhinanin akinin, makgat lamaniw xlilanka Dios (Rom. 3:23).

Tachuwin nema tatsokgnit kcapítulo 41 katsokgnika israelitas. Xtalakgalhinkan lu nitlan xwanit wa xlakata Jehová wa pi xʼama kamalakgaxokge chu xʼama tlawa pi xkachilinka kBabilonia (Is. 39:6, 7). Pero na kawanilh pi xʼama kalakgmaxtu tiku nitlan xlimakgkatsikgolh xtalakgalhinkan chu xlakgtaspitkgolh (Is. 41:8, 9; 49:8). La uku, Jehová na kapaxki chu kalakgalhaman tiku xlikana nitlan limakgkatsikgo xtalakgalhinkan chu liskujkgo namakgapaxuwakgo (Sal. 51:1).

Kalichuwinaw tuku titaxtulh Takuya. * Xla xliskujma nialh naʼakxilha tiku ni lhakganankgonit chu nialh natlawa tuku nalimakgkatsi pi wi tiku tatalakgxtumima. Makglhuwa chuna xtlawapara. Xwan pi xmakgkatsi pi nitu xlilaka xwanit, pero akxni xtasaskini Jehová pi xtapatilh, xmakgkatsi la komo Dios xmakgtayalh nataki akxni xakgchakgxa. ¿La chuna xtlawa Jehová? Xkamaklakaskin lakgkgolotsin xalak congregación. Wanikgolh Takuya pi xkilhanikgolh kteléfono akxni chuna xtlawapa. Xla wan pi tuwa xmakgkatsi nakakilhani, pero akxni chuna xtlawa, tlakg tlan xmakgkatsi. Akgtum kilhtamaku, lakgkgolotsin skinikgolh superintendente de circuito pi xlakgalh Takuya xlakata xmatliwakglhli xtakanajla. Akxni superintendente lakgapaxialhnalh, wanilh pi ni xakstu xlakapastaknit nalakgan, wata lakgkgolotsin xalak congregación xlaksakkgonit xlakata xʼalh lakgapaxialhnan. Takuya wan pi maski xlakgalhinama, Jehová kamaklakaskilh lakgkgolotsin xlakata xmakgtayakgolh. Titaxtulh kilhtamaku, makgxtakgli uma nitlan talismanin chu precursor regular litaxtulh. La uku, skujnanima Dios kʼakgtum sucursal. Jehová makgtayalh uma tala chu na nakinkamakgtayayan akxni nalakgalhinanaw.

Makgapitsi lilakgaputsakgo xlakata nialh kgalhikgo taskujut chu nila tekgskgo atanu. Kalilakapastakti pi lu tuwa kitaxtu lakalhuwa napina chu nawanikana pi ni katimaxkika taskujut. Akxni makgapitsi titaxtukgo uma tuku tuwa, makgkatsikgo pi nitu litaxtukgo. ¿La namakgtayayan Jehová? Max ni kaj xalakapala namaxkiyan akgtum lu tlan taskujut, pero namakgtayayan nalakapastaka tuku wa David: «Akit makgasa klatamanit y chi kkgolunita; pero nak wakg kilatamat nikxni kakxilhnit akgxtakgwilinit Dios chatum ti tanks lamaj, nipara ixkamanan kkakxilhnit para taskiwayan» (Sal. 37:25, SXP). Jehová lu xlakaskinka akxilhan chu maxkiyan xpakgastakgat xlakata nakgalhiyaw tuku maklakaskinaw xlakata chuntiya naskujnaniyaw.

Sara, tiku lama kColombia, akxilhli la Jehová makgtayalh. Xla putum kilhtamaku kskuja kʼakgtum lu xlakaskinka compañía chu lhuwa tumin xtlaja. Pero tlakg kskujnaniputun Jehová, wa xlakata makgxtakgli xtaskujut chu precursora regular litaxtulh. Pero tuwa kitaxtunilh natekgsa akgtum taskujut kaj itat kilhtamaku chuna la xmaklakaskin, wa xlakata tsukulh sta helados, pero tsinu tsinu  makgasputli xtumin chu na makgxtakgli uma taskujut. Xla wan pi akgtutu kata nema titaxtulh, lu makgas kilhtamaku makgkatsilh, pero Jehová makgtayalh natayani. Katsinilh tuku xlikana xmaklakaskin chu tuku xlitlawat xwanit xlakata ni lu xlilakgaputsalh tuku xʼama maklakaskin lichali (Mat. 6:33, 34). Titaxtulh kilhtamaku, tiku xmalana xwanit tachuwinalh xlakata namaxkipara taskujut. Xla wa pi kajwatiya xʼama makglhtinan taskujut komo kaj itat kilhtamaku kskujli chu komo xmaxkilh talakaskin naʼan kxtamakxtumit chu klaklanka tamakxtumit. Xmalana wa pi tlan. La uku, Sara nialh lhuwa tumin tlaja la xapulana, pero chuntiya precursora. Wan pi putum kilhtamaku akxni titaxtulh tuku tuwa, makgkatsilh la Jehová limasiyanilh tapaxkit akxni xmakgachipa.

Lhuwa tiku lu lilakgaputsakgo xlakata kgolomakgolh chu nialh makgas natajubilarlikgo. Lakpuwankgo komo nakgalhikgo tumin xlakata tlan nalatamakgo. Na lilakgaputsakgo komo namin kilhtamaku natatatlakgo. Max wa mapakgsina David tiku skinilh Jehová: «Kumu akit kkgolunita, kmakgskinan litlan ni kakilakgmakganti; ni kakiʼakgxtakgwili akxni lakgonit kilitliwekge» (Sal. 71:9, 18, SXP).

¿Tuku nakamakgtaya tiku kgolomakgolh ni lu nalilakgaputsakgo kilhtamaku nema aku namin? Talakaskin chuntiya namatliwakglhkgo xtakanajlakan chu nalipawankgo pi Dios nakamaxki tuku namaklakaskinkgo. Makgapitsi wi tuku lipaxuwakgolh akxni tlakg xkgalhikgo tumin. Wa xlakata max xlikatsinitkan ni lhuwa tuku nakgalhikgo chu napaxuwakgo maski ni lhuwa tuku kgalhikgo. Max asta naʼakxilhkgo pi xlakata ni natatatlakgo, tlakg tlan wakan tuku makgalakan kkapukuxtun ni xawa xakgama liwa (Prov. 15:17). Komo tlakg xlakaskinka akxilhaw naskujnaniyaw Jehová, xla nakinkamaxkiyan putum tuku maklakaskinaw akxni nakgolonaw.

Kalilakapastakwi José chu Rose, tiku skujnanikgonit Jehová xliputum kilhtamaku liwaka 65 kata. Putum umakgolh kata lu titaxtukgonit tuku tuwa. Akgtum liʼakxilhtit, kuentajtlawakgolh xtlat Rose, tiku xlakaskin xkuentajtlawaka putum kilhtamaku. Nachuna, José chukuka xlakata xkgalhi cáncer chu tlawanika quimioterapia. ¿La kamakgtayalh Jehová uma tamakgaxtokgat? Kalimaklakaskilh chatiy xtatayananin Jehová tiku kawanikan Tony chu Wendy. Xlakan xkgalhikgo akgtum apartamento nema ni xmaklakaskinkgo chu xkawaniputunkgo tiku kskujnanimakgo Dios xliputum kilhtamaku pi xmaklakaskinkgolh chu ni kxokgokgolh. Tony lakapastakli pi akxni xkgalhtawakga ksecundaria, makglhuwa kaʼakxilhli kventana akxni José chu Rose xlichuwinankgo Dios. Xlakgati akxni xʼakxilha pi xatapaxuwan xlichuwinankgo Dios, chu uma lu kaks malakawanilh. Xlakata José chu Rose putum xlatamatkan kskujnanikgonit Jehová, Tony chu Wendy kamaxkikgolh xʼapartamentojkan. Xlakan 15 kata kamakgtayakgonit José chu Rose, chu la uku kgalhikgoya 85 kata. José chu Rose kaʼakxilhkgo Tony chu Wendy la akgtum xtamaskiwin Jehová.

Jehová kinkamalaknuniyan: «Ni kapekuanti. Akit xlikana nakmakgtayayan». Xla na kinkalimakgtayaputunan «xaʼakgstitum [x]pakgastakat». ¿Nastonkgaw kimakxpankan xlakata napakgachipayaw?