1. Kawanti tuku xlakata xlakaskinka kuenta natlawayaw tuku lama la uku. (Kaʼakxilhti xapulana dibujo).

KALAKAPASTAKWI pi natsukuya lanka tamakxtumit. Tiku namatsuki tawaka kplataforma chu kawani putum pi lu tlan pi minkgonit. Tatlakgni natsukuya. Tiku ankgonit katsikgo pi lakgchanit kilhtamaku natawilakgoya. Kgaxmatputunkgo lakswan tatlakgni chu lu kgaxmatputunkgo taʼakgchuwin nema namastakan. Pero makgapitsi max ni kuentajtlawanimakgo tiku matsukima lanka tamakxtumit o ni kgaxmatkgo pi wilikaja tatlakgni. Xlakata ni kuentajtlawamakgo, ni akxilhkgo pi tamakxtumit tsukumaja chu tlawamakgolh kpasillos o katachuwinamakgo xʼamigos. Uma liʼakxilhtit limasiya tuku nakinkaʼakgspulayan komo ni kuenta natlawayaw kilhtamaku nema lamaw o tuku lama niku wilaw. Lu xlakaskinka tuku kinkamasiyaniyan xlakata nialh makgas natsuku tuku ni anan xtachuna, chu skgalalh kilitawilatkan. ¿Tuku lichuwinamaw?

2. ¿Tuku xlakata Jesús kawanilh kstalaninanin pi skgalalh xtawilakgolh?

 ² Jesucristo kawanilh kstalaninanin pi skgalalh xtawilakgolh xlakata xlisputni kakilhtamaku. Kawanilh: «Skgalalh katawilatit, na katlawatit mioracionkan, sampi ni katsiyatit akxni nakilakgchan nkilhtamaku». Alistalh, makglhuwa kawanilh: «Skgalalh katawilatit» (Mat. 24:3; kalikgalhtawakga Marcos 13:32-37). Libro xla Mateo na masiya pi Jesús kalitachuwinalh uma kstalaninanin. Kawanilh: «Skgalalh katawilatit: sampi ni katsiyatit ntu hora, akxni namin mimPuchinakan». Alistalh kawanipa: «[Skgalalh] katawilatit; sampi wa Xkam nchixku, namin akxni yama hora ni kgalhkgalhipatit». Chu wampa amakgtum: «Skgalalh katawilatit, sampi ni katsiyatit nkilhtamaku, su tu hora» (Mat. 24:42-44; 25:13).

3. ¿Tuku xlakata kilikgalhakgaxmatatkan tuku wa Jesús?

³ Xtatayananin Jehová kgalhakgaxmataw tuku wa Jesús. ¿Tuku xlakata? Xlakata katsiyaw pi lamaw kxaʼawatiya kilhtamaku chu nialh makgas natsuku «ntlanka takatsanajwat» (Dan. 12:4; Mat. 24:21). Chu chuna la wa Jesús, xkachikin Jehová lichuwinama xTamapakgsin Dios kputum Katiyatni. Chu na kgantaxtuma tuku xwanit xlakata akgatunu kilhtamaku tlakg anan guerras, tajatat, tachiki tiyat, anan tatsinksni, tlakg lakatsalakan limapakgsin chu latlawanikan tuku nitlan. Nachuna, la uku tlakg anan xpulalinanin takanajla tiku akgskgawikgo latamanin (Mat. 24:7, 11, 12, 14; Luc. 21:11). Lakaskinaw kachalh kilhtamaku akxni namin Jesús chu kamakgantaxtilh xtalakaskin xTlat (Mar. 13:26, 27).

4. 1) ¿Tuku xlakata wanaw pi Jesús katsi akxni natsuku Armagedón? 2) Maski ni katsiyaw tuku kilhtamaku natsuku lanka takatsanajwat, ¿tuku liwana katsiyaw?

⁴ Akxni anaw klanka tamakxtumit, katsiyaw tuku hora namatsukikan. Pero nila liwana katsiyaw tuku kilhtamaku natsuku lanka takatsanajwat. Akxni xlama kkatiyatni Jesús wa: «Xlakata ama kilhtamaku chu hora, niti katsi, nipara ángeles xalak akgapun, nipara xaKgawasa, kajwatiya xaTlat» (Mat. 24:36, TNM). Xlakata wa Jesús tiku napulalin guerra xla Armagedón, xlilat nalakpuwanaw pi la uku katsi tuku kilhtamaku natsuku (Apocalipsis [Revelación] 19:11-16). Pero akinin chuntiya ni katsiyaw tuku kilhtamaku chu tuku hora nachin lisputni. Wa xlakata xlakaskinka skgalalh natawilayaw. Jehová liwana lakkaxwilinit tuku hora natsuku lanka takatsanajwat. Chu uma kilhtamaku tlakg talakatsuwima. Chuna la wan Biblia: «Ni katimakgapalalh» (kalikgalhtawakga Habacuc 2:1-3). ¿Tuku xlakata liwana katsiyaw?

5. ¿La katsiyaw pi tuku Jehová wan kgantaxtu akxni xlilat? Kawanti akgtum liʼakxilhtit.

⁵ Akxni Jehová wanit pi wi tuku nakgantaxtu, kgantaxtunit akxni xlilat. Akgtum liʼakxilhtit, kalilakpuwaw kilhtamaku 14 xla nisán kata 1513 akxni nina xmin Jesús.  Amacha kilhtamaku Dios kamaxtulh israelitas kʼEgipto. Alistalh, Moisés tsokgli pi Jehová kalakgmaxtulh «uma kilhtamaku» akxni sputli «akgtati ciento puxamakaw kata» (Éx. 12:40-42). Umakgolh 430 kata tsukukgolh 14 xla nisán kkata 1943 akxni nina xmin Jesús, akxni tsukulh kgantaxtu tuku xwanit Jehová, pi xʼama sikulunatlawa xfamilia Abrahán (Gál. 3:17, 18). Alistalh, Jehová wanilh Abrahán: «Liwana kakatsi pi minkamanan kaj namakgtawilakgo kʼatanu kachikin chu latamanin xala anta kskujnanin nakalimaxtukgo chu nitlan tuku natlawanikgo akgtati ciento kata» (Gén. 15:13; Hech. 7:6). Umakgolh 400 kata tsukulh kkata 1913 akxni nina xmin Jesús, akxni Ismael tsukulh likgalhkgamanan Isaac. Chu sputli akxni Jehová kalakgmaxtulh israelitas kʼEgipto (Gén. 21:8-10; Gál. 4:22-29). Chuna la akxilhaw, lhuwa ciento kata akxni nina xchan, Jehová liwana xlakkaxwilinit tuku kilhtamaku xʼama lakgmaxtu xkachikin.

6. ¿Tuku xlakata liwana katsiyaw pi Jehová nalakgmaxtu xkachikin?

⁶ Josué chatum israelita xwanit tiku na kʼEgipto taxtulh. Lhuwa kata alistalh kamalakapastakalh israelitas: «Wixin liwana katsiyatit xliputum minakujkan chu xliputum milatamatkan pi ni anan tachuwin xliputum xalakwan tachuwin wantuku kawaninitan Jehová miDioskan nema ni kgantaxtunit. Putum kgantaxtukgonit mimpalakatakan. Ni anan tachuwin nema ni kgantaxtunit» (Jos. 23:2, 14). Jehová kamalaknuninit kskujnanin pi nakalakgmaxtu akxni natawila lanka takatsanajwat chu putum kilhtamaku nalatamakgo kxasasti katiyatni. Liwana katsiyaw pi namakgantaxti tuku malaknunit. Wa xlakata, komo latamaputunaw kxasasti katiyatni, skgalalh kilitawilatkan.

7, 8. 1) ¿Tuku xtlawa makatsinina xala makgasa, chu tuku kinkamasiyaniyan? 2) ¿Tuku max xlalh komo makatsinina klhtatalh? Kawili akgtum liʼakxilhtit.

⁷ Tlan wi tuku kinkamasiyaniyan lakchixkuwin tiku xkuentajtlawakgo kachikinin xala makgasa. Jerusalén chu atanu kachikinin xkgalhikgo laktalhman patsaps xlakata xtalamakgasitsinkan nila xkalakgtanukgolh. Makatsininanin xtayakgo kxakgspun patsaps, anta tlan xʼakxilhkgo putum tuku xwi lakatsu kkachikin. Amakgapitsi xkuentajtlawakgo xmalakcha kachikin. Putum skgalalh xlitawilatkan xwanit kakuwani chu katsisni. Chu akxni xʼakxilhkgo pi xtalamakgasitsinkan xmimakgolh, xliwanitkan xwanit tiku xwilakgo kkachikin (Is. 62:6). Xkatsikgo pi lu xlakaskinka skgalalh natawilakgo chu kuenta natlawakgo tuku xlama. Komo ni chuna xtlawakgolh, max xnikgolh lhuwa latamanin (Ezeq. 33:6).

⁸ Kkata 70 akxni nina xmin Jesús, soldados romanos tanukgolh kJerusalén. ¿La tlawakgolh? Chuna la wan historiador judío Josefo, makgapitsi tiku xkuentajtlawamakgolh kachikin lhtatakgolh. Wa xlakata romanos tanukgolh, lhkuyukgolh templo chu malakgsputukgolh putum kachikin. Chuna lisputli tuku nitlan xakgspulanit xkachikinkan judíos.

9. ¿Tuku ni kuenta tlawakgo latamanin la uku?

⁹ La uku, atsinu ni putum mapakgsinanin kgalhikgo soldados chu tuku xalaksasti xlakata nakuentajtlawakgo anta niku xkachikinkan tapakgta atanu kachikin. Chuna tlawakgo  xlakata nila tiku kalipekua nawili xpaiskan. Pero xlakan ni katsikgo pi anan akgtum tlakg tliwakga tamapakgsin kʼakgapun chu Jesucristo xmapakgsina. Uma tamapakgsin nialh makgas nakatatlawa guerra putum mapakgsinanin xalak katiyatni (Is. 9:6, 7; 56:10; Dan. 2:44). Lakaskinaw kachalh ama kilhtamaku chu skgalalh tawilaputunaw. Wa xlakata kuentajkatlawaw tuku Biblia wan pi nala chu chuntiya kaskujnaniw Jehová (Sal. 130:6).

10, 11. 1) ¿Tuku kuenta kilitlawatkan, chu tuku xlakata? 2) ¿Tuku xlakata katsiyaw pi Satanás tlawanit pi latamanin ni nakuentajtlawakgo tuku wan Biblia pi nala?

¹⁰ Kalilakpuwaw chatum kuentajtlawana tiku tantaskaka ni lhtatanit. Kxaʼawatiya horas akxni nina xkgakga lu tlakgwanita, wa xlakata tlakg tuwa makgkatsi ni nalhtata. Nachuna, lamaw kxaʼawatiya kilhtamaku. Chu chuna la tlakg natalakatsuwitilha lisputni, tlakg tuwa namakgkatsiyaw skgalalh natawilayaw. Lu nitlan xwa komo ni skgalalh xtawilaw. Kalichuwinaw pulaktutu tuku max natlawa pi nalhtatayaw.

¹¹ Satanás kaʼakgskgawi latamanin. Xla litaxtu «nti xapuxku yunu nkatuxawat». Akxni Jesús nina xni, makgtutu kamalakapastakalh uma kstalaninanin (Juan 12:31; 14:30; 16:11). Akgskgawini maklakaskinit ni xaxlikana takanajla xlakata nakaʼakgskgawi latamanin. Wa xlakata la uku lhuwa latamanin ni katsikgo pi Biblia wan pi nialh makgas namasputukan kakilhtamaku (Sof. 1:14). Liwana tasiya pi «malakgatsikgonit xtapuwankan» latamanin (2 Cor. 4:3-6). Wa xlakata, akxni kawaniputunaw latamanin pi nialh makgas namasputukan uma kakilhtamaku chu Cristo mapakgsinama la uku, lhuwa ni kinkakgaxmatnikgoyan. Lakgachunin wankgo: «Ni kkatsiputun».

12. ¿Tuku xlakata ni kilimastatkan talakaskin pi Akgskgawini nakinkaʼakgskgawiyan?

¹² Maski lhuwa latamanin ni katsiputunkgo tuku wan Biblia pi nala, ni xlilat pi tuku lakpuwankgo nakinkamaxlajwaniyan. Katsiyaw tuku xlakata xlakaskinka skgalalh  natawilayaw. Pablo kawanilh xnatalan: «Sampi lu[...] tlan likatsiyatit wixin, mpi wa akxni nalakgchan xkilhtamaku nkimPuchinakan, xtachuna nchatum nkgalhana namin, mpala katsisni» (kalikgalhtawakga 1 Tesalonicenses 5:1-6). Jesús kinkawanin: «Skgalalh katawilatit, sampi akxni lu[...] ni likatsiwilatit nakmimpalay kit, Xatalaksakni Chixku» (Luc. 12:39, 40, Hua Xasasti Talaccaxlan, 1999). Nialh makgas, Satanás nakaʼakgskgawi latamanin akxni nakamakanajla pi «anan ntakaksni, nitu ntamakpuwan». Alistalh, xkilhtamaku Jehová kaj lakapala namin chu lu napekuankgo. ¿Chu akinin? Komo skgalalh tawilaputunaw ama kilhtamaku, ni kilimastatkan talakaskin pi Akgskgawini na nakinkaʼakgskgawiyan. Wa xlakata kilitlawatkan tuku wa Pablo: «Skgalalh natawilayaw, chu nkatalakatlan natawilayaw». Kilikgalhtawakgatkan Biblia chali chali chu kililakapastakatkan tuku Jehová kinkawaniyan.

13. ¿Tuku kamalakpuwani latamanin xtayat uma kakilhtamaku, chu tuku tlan tlawayaw xlakata ni nakinkapasayan?

¹³ Xtayat kakilhtamaku tlawa pi tanu la nalakpuwankgo latamanin. La uku lhuwa lakpuwankgo pi ni talakaskin nalakgapaskgo Dios (Mat. 5:3). Wata limaklakaskinkgo atsinu ni putum xkilhtamakujkan chu xlitliwakgakan xlakata nakgalhikgo tuku anan kkakilhtamaku (1 Juan 2:16). Nachuna, la uku tlakg anan lhuwa tuku tlan lilakgastanankan nema latamanin lakgatikgo chu kamalakpuwani kajwatiya nakgalhiputunkgo tuku lakaskinkgo chu tuku nalipaxuwakgo (2 Tim. 3:4). Uma tlawa pi latamanin nialh lu kuenta natlawakgo tuku tlakg xlakaskinka chu ni lakpuwankgo tlan natalalinkgo Dios. Wa xlakata Pablo wa pi kstalaninanin Cristo «natakiyaw ktalhtata» chu ni kajwatiya nakgalhiputunaw tuku lakaskinaw (Rom. 13:11-14).

14. ¿Tuku tastakyaw tekgsaw kLucas 21:34, 35?

¹⁴ Lakaskinaw pi xʼespíritu Dios kakinkapulalin, chu ni wa xtayat kakilhtamaku. Jehová maklakaskinit xʼespíritu xlakata nakinkamaʼakgatekgsniyan tuku nialh makgas nala (1 Cor. 2:12) ^[1] (kaʼakxilhti nota niku kgalhsputa artículo). Pero kuenta kilitlawatkan. Asta tuku tlawayaw chali chali tlan natlawa nialh liwana naskujnaniyaw Jehová (kalikgalhtawakga Lucas 21:34, 35). Makgapitsi max nakinkawanikgoyan pi xatontos akinin xlakata lakpuwanaw pi nialh makgas namasputukan uma kakilhtamaku (2 Ped. 3:3-7). Pero ni kamastaw talakaskin pi nakinkamaxlajwanikgoyan. Liwana tasiya pi nialh makgas nachin lisputni. Komo lakaskinaw pi xʼespíritu Dios kakinkapulalin, chuntiya kiliʼanatkan ktamakxtumit xalak congregación.

15. ¿Tuku kaʼakgspulalh Pedro, Santiago chu Juan, chu la max nachuna xkinkaʼakgspulan?

¹⁵ Kintalakgalhinkan tlawa pi tuwa namakgkatsiyaw skgalalh natawilayaw. Jesús xkatsi pi latamanin kgalhiyaw talakgalhin chu xlajwananaw. Kalilakpuwaw tuku lalh akxni nina xmakgnikan. Maski  ni xkgalhi talakgalhin, xkatsi pi xtalakaskin kskinilh xtamakgtay xTlat xlakata ni xmakgatsankgananilh. Jesús kaskinilh apóstol Pedro, Santiago chu Juan pi ni klhtatakgolh akxni xtlawama xʼoración. Pero apóstoles ni akxilhkgolh pi lu xlakaskinka xwanit ni nalhtatakgo. Xtlakgwankgonit chu klhtataputunkgo. Jesús na xtlakgwanit pero ni lhtatalh chu tlawanilh oración xTlat. Apóstoles nachuna xlitlawatkan xwanit (Mar. 14:32-41).

16. Chuna la wan Lucas 21:36, ¿tuku wa Jesús pi kilitlawatkan xlakata skgalalh natawilayaw?

¹⁶ ¿Tuku nakinkamakgtayayan ni nalhtatayaw chu skgalalh natawilayaw xlakata xkilhtamaku Jehová? Talakaskin lu natlawaputunaw tuku xaʼakgstitum. Pero ni kajwatiya uma. Ni lhuwa kilhtamaku akxni nina xmakgnikan, kawanilh kstalaninanin pi xtalakaskin kskinikgolh tamakgtay Jehová kʼoración (kalikgalhtawakga Lucas 21:36). Xlakata ni nalhtatayaw kʼuma xaʼawatiya kilhtamaku, na talakaskin natlawayaw oración putum kilhtamaku (1 Ped. 4:7).

17. ¿La nakatsiyaw pi skgalalh wilaw xlakata tuku namin?

¹⁷ Jesús kawanilh kstalaninanin pi lisputni namin «akxni yama hora ni kgalhkgalhipatit» (Mat. 24:44). Wa xlakata skgalalh kilitawilatkan putum kilhtamaku. Ni xkilhtamaku naputsayaw tuku masta xkakilhtamaku Satanás. Uma kakilhtamaku wan pi nalipaxuwayaw, pero akinin katsiyaw pi ni xlikana. Jehová chu Jesús kinkawaniyan kBiblia tuku tlan natlawayaw xlakata skgalalh natawilayaw. Wa xlakata kuenta katlawaw tuku wan Biblia pi nala chu la kgantaxtuma. Chuntiya katalakatsuwiniw Jehová chu pulana kawiliw xTamapakgsin kkilatamatkan. Komo chuna natlawayaw, skgalalh natawilayaw akxni namin lisputni (Apoc. 22:20). Kalakapastakwi pi chuna kilitlawatkan komo latamaputunaw.