Kakuentajtlawa mintalakapastakni chu katayani tatalatlawat
¡MINTALAKAPASTAKNI katuwa wi! Kintalatlawanakan, Satanás, limaklakaskin tuku lu nitlan. ¿Tuku uma? Wa tuku nitlan tamalakgatumi nema liwana talakkaxwilinit xlakata nalaktlawa kintalakapastaknikan.
Apóstol Pablo skgalalh xwi xlakata tuku nitlan tlawa tuku malakgatumi Satanás, pero makgapitsi kstalaninanin Cristo nema xlamakgolh kxkilhtamaku ni x’akxilhkgo pi katuwa xwilakgolh. Akgtum li’akxilhtit kCorinto makgapitsi xakstukan xkalipawankan chu xlakpuwankgo pi xtakanajlakan lu tliwakga xwi chu pi nikxni x’ama taxlajwani (1 Cor. 10:12). Wa xlakata, Pablo kawanilh: «Wampi kmakpuwan mpi wa lantla ntiliakgskgawilh Eva xliakgskgalala luwa mpala nachuna xalan naliakgtsankgayatit mintalakapastaknakan lantla akgstitum, chu xlipaks minakukan [nastalaniyatit] nCristo» (2 Cor. 11:3).
Xtachuwin Pablo kinkamasiyaniyan pi skgalalh kilitawilatkan chu ni nakinkalipawankanan. Xlakata ni nalaktlawa kintalakapastaknikan tuku malakgatumi Satanás, lu xlakaskinka nakatsiyaw pi lu nitlan chu kuenta natlawayaw.
¿TUKU UMA LU NITLAN?
Anan tuku malakgatumikan nema ni xaxlikana chu lita’akgskgawikan, nema kalakgpalini xtalakapastaknikan chu la likatsikgo latamanin. Uma tamalakgatumin na watiya «takgsanin, lakgpalikan tuku xaxlikana, akgskgawinankan, tlawakan pi achatum natlawa tuku nitlan, mapakgsikan talakapastakni [...] [chu] talatlawakan talakapastakni». Akxni chuna tlawakgo limaklakaskinkgo «talitsakgsat xlakata linkan nitlan latamat, tuku ni xa’akgstitum chu tuku laktlawanan» (Propaganda and Persuasion).
¿Tuku xlakata lu nitlan tuku tamalakgatumi?
Xlakata tuku nitlan tlawaninan tatalakxtumi gas nema ni takgankgawanan chu na nila akxilhkan. Lijaxananaw chu nipara katsiyaw chu tsinu tsinu tsuku laktlawa kintalakapastaknikan. Sociólogo Vance Packard wan pi lakgpali la lakapastaknanaw «chu tlakg kinkamatlawiyan tuku nitlan ni xawa la lakpuwanaw». Amakgapitsi tiku lakputsanankgo wankgo pi lakchixkuwin chu lakpuskatin makgkatsikgonit «natlawakgo tuku tlakg nitlan» kaj xlakata tuku tamalakgatumi tuku nitlan chu uma tlawanit pi na’anan tiku lakgmakganankgo, guerras, ni nala’akxilhputunkgo xlakata la tasiyakgo, xlakata takanajla, chu lhuwa atanu tuku lalilakgmakgankan (Easily Led—A History of Propaganda).Komo latamanin tlan kinkaliʼakgskgawikgoyan tuku malakgatumikgo, ¿ni xlikana pi Satanás tlakg lakapala nakinka’akgskgawiyan? Lata kxkilhtsukut kakilhtamaku xla akxilhma la likatsikgo latamanin. Xlakata wa akgchipanit kakilhtamaku, xla tlan nalimaklakaskin katuwa tuku maskuju xlakata namalakgatumi xtakgsanin (1 Juan 5:19; Juan 8:44). Kamalakgatsininit xtalakapastaknikan latamanin, wa xlakata Biblia wan pi ka’akgskgawima «putum latamanin» (Rev. o Apoc. 12:9; 2 Cor. 4:4). ¿La tlan natayaniyaw tuku Satanás litalatlawanan?
KAMATLIWAKGLHTI TUKU NALITAMAKGTAYAYA
Jesús masiyalh pulaktum tuku nituwa xlakata tlan natalatlawayaw tuku nitlan tamalakgatumima. Xla wa: «Nalakgapasatit ntalulokgtat, chu na wa ntalulokgtat, nakamalakgtaxtiyan» (Juan 8:31, 32). Pero, wankan pi kʼakgtum guerra tuku pulana lakla wa tuku xaxlikana, xlakata kgamputum talatlawana malakgatumi takgsanin xlakata naʼakgskgawi tiku talatlawama. Wa xlakata, soldado xlilat nawanikan tuku xaxlikana xlakata ni naʼakgskgawikan. Akinin nawa maklakaskinaw xlakata nitu nakinkatlawaniyan kintalatlawanakan. Tuku tlan nalipawanaw wa tuku kinkamaxkiyan Jehová; wa Biblia. Anta tekgsaw putum tuku tlan nalitalatlawayaw tuku malakgatuminit Satanás (2 Tim. 3:16, 17).
Xlikana, Satanás, xapuxku tiku malakgatumi tuku nitlan, xla katsi uma. Wa xlakata limaklakaskin tuku xalak kkakilhtamaku nema tlawa pi latamanin nalimakgatsankgakgo xkilhtamakujkan chu uma tlawa pi nialh nalikgalhtawakgakgo Biblia chu ni nalakputsananikgo. ¡Ni katawakapi kx’akgsiyat! (Efes. 6:11). Kaliskujwi xlakata «tlan [naʼakgatekgsaw]» tuku xaxlikana (Efes. 3:18). Kalilakpuwanti tuku wa makgalhtawakgena Noam Chomsky: «Nitiku kintikatamaknunin tuku xaxlikana ki’akskititkan. Akinin kilitekgsatkan». Wa xlakata mi’akstu katekgsti tuku xaxlikana «chali chali [kalakpusanani] ntatsokgnun» (Hech. 17:11).
Xlakata ni nalaktlawa kintalakapastaknikan tuku malakgatumi Satanás, lu xlakaskinka nakatsiyaw pi lu nitlan chu kuenta natlawayaw.
Liwana kakatsi pi Satanás ni lakaskin liwana namaskujuyaw kintalakapastaknikan chu nalakputsananaw. ¿Tuku xlakata? Xlakata, chuna la wan maktum libro, tuku tamalakgatumi tlakg tlan kitaxtu, akxni latamanin ni lilakpuwankgo (Media and Society in the Twentieth Century). Wa xlakata ni kakanajla putum tuku nawanikana (Prov. 14:15). Kalimaklakaskinti mintalakapastakni chu mintapuwan nema maxkinitan Dios xlakata liwana nakatsiya pi xaxlikana tuku katsiya (Prov. 2:10-15; Rom. 12:1, 2).
KUENTA: SATANÁS KINKAMAPAPITSIPUTUNAN
Tiku tlawakgo guerra nalimaklakaskinkgo tuku nitlan malakgatumikan xlakata namaxlajwani xtalatlawana. Max natlawa pi soldados nema talatlawamakgolh natsukukgo latalatlawa o natapapitsikgo. Chatum general alemán katsilh tuku xlakata xpaís makgatsankgalh xaPulana Guerra xLikalanka Katiyatni wa xlakata «tuku tamalakgatumima kaʼakgskgawilh latamanin, chuna la tantum luwa akgskgawi tantum skaw». Satanás nachuna tlawa xlakata namapapitsi congregación chu nakinkatlajayan. Akgtum liʼakxilhtit, tlan natlawa pi makgapitsi natalan kakgalhikgolh taʼakglhuwit o natlawa pi tiku nitlan kamamakgkatsinika o nalakpuwankgo pi ni xaʼakgstitum kalikatsinika, natlawa pi natamakgatlinikgo xkachikin Jehová.
¡Ni kamasta talakaskin naʼakgskgawikgoyan! Kamasta talakaskin pi xTachuwin Dios napulalinan. Xlakata tlan makxtum natawilayaw, Biblia kinkamakgpuwantiniyan pi chuntiya na nalamatsankgananiyaw «nchatunu amakgapitsin» chu tunkun nalakkaxtlawayaw (Mat. 5:23, 24; Col. 3:13, 14). Nachuna liwana kinkawaniyan pi ni natamakgatliniyaw congregación xlakata tuwa nakitaxtu (Prov. 18:1). ¿Tuku xlakata ni akxilha komo tliwakga wi tuku litamakgtayaya? Akgtum liʼakxilhtit, kalilakpuwanti akxni nitlan mamakgkatsinika. Chu katakgalhskinti: «¿La kmakgkatsilh? ¿Klimasiyalh tapuwan xalak kkakilhtamaku o xla Dios?» (Gál. 5:16-26; Efes. 2:2, 3).
NITI KATLAWALH PI NIALH NAKALIPAWANA AMAKGAPITSIN
Komo chatum soldado nialh nalipawan xcomandante, nila liwana katitalatlawanalh. Wa xlakata tiku katuwa tuku malakgatumikgo maxlajwaniputunkgo soldados. Malakgatumikgo la uma tamakatsinin: «Ni kalipawantit tiku kapulalinan»
o «¡Kaliman niku nakamasputukanatit!». Chu tuku maklakaskinkgo xaxlikana tasiya. Satanás nachuna tlawa. Ankgalhin maxlajwaniputun la kalipawanaw lakchixkuwin nema kamaklakaskin Jehová xlakata napulalin xkachikin.¿La tlan nakuentajtlawakana? Liwana kalilakpuwanti pi ni namakgxtakga xkachikin Jehová chu kakamakgtaya tiku kamaklakaskima xlakata nakinkapulalinkgoyan, maski makglakgalhinanin (1 Tes. 5:12, 13). Ni kaʼakgskgawikgon apóstatas o amakgapitsin kintalatlawanakan tiku putsastalani xkachikin, maski lu xlikana tasiya tuku wankgo (2 Tes. 2:2; Tito 1:10). Na katlawa tastakyaw nema maxkika Timoteo: katlawa tuku xaxlikana nema masiyanika chu ni kapatsankga niku katsini (2 Tim. 3:14, 15). ¿Ni xlikana pi lhuwa wi tuku nalikanajlayaw pi tlan nalipawanaw skujni xalipaw, tiku Jehová maklakaskinit kʼuma xaʼawatiya akgtum ciento kata nema titaxtunit xlakata nakinkamasiyaniyan tuku xaxlikana? (Mat. 24:45-47; Heb. 13:7, 17).
NI KAPEKUANTI
Kalakapastakti pi Satanás min kilhtamaku kaj lakapala tuku kinkatlawaniputunan. Lakgachunin maklakaskin tapekua, «pulaktum nema lata makgasa maklakaskin» (Easily Led—A History of Propaganda). Akgtum liʼakxilhtit chuna la wan makgalhtawakgena británico Philip Taylor, asirios makgatlajakgolh xtalamakgasitsinkan kaj xlakata maklaskinkgolh «política nema makgapekuanan chu tuku tamalakgatumi». Nachuna Satanás, nalimaklakaskin tapekua nema kakgalhinikan lakchixkuwin, taputsastalanit, linin o atanu tuku nalimakgapekuanan chu chuna nialh naskujnaniya Jehová (Is. 8:12; Jer. 42:11; Heb. 2:15).
¿Namastaya talakaskin pi Satanás namaklakaskin tapekua xlakata namaxlajwaniyan o nalakgalhinana kxlakatin Jehová? Jesús wa: «Ni tipikuanikgoyatit wa nti makgnikgoy ntiyatliwa, cha nchu alistalh, ni tu kgalhikgoy ntu natlawakgo» (Luc. 12:4). Liwana kakatsi pi Jehová namakgantaxti tuku malaknunit xlakata nakuentajtlawayan, chu namaxkiyan «yuma ntlanka litliwakga» chu namakgtayayan xlakata nialh napekuana chu xlakata ni namakgxtakga (2 Cor. 4:7-9; 1 Ped. 3:14).
Xlikana max namin kilhtamaku napekuana o namakgkatsiya pi taxlajwanipat. Pero kalakapastakti xtachuwin Jehová nema wanilh Josué: «Ni nataxlajwaniya chu tliwakga kawanti. Ni lhpipakg kalat chu ni kapekuanti, xlakata Jehová miDios tawilan anta niku napina» (Jos. 1:9). Akxni wi tuku nalilakgaputsaya, tunkun katlawani oración Jehová chu kawani tuku lilakgaputsapat. Liwana kakatsi pi «xtakaksni Dios» nakuentajtlawa minaku chu mintalakapastakni xlakata tlan nalakgmakgana tuku malakgatumi Satanás (Filip. 4:6, 7, 13).
¿Lakapastaka tamalakgatumin nema maklakaskilh rabsaqué, nema malakgachalh mapakgsina xalak Asiria, xlakata nalakawani xkachikin Dios? Wa uma tuku wa: «Niti la katikamakgtayan kxmakan Asirios. Ni para mi Dioskan Jehová, tlan nakamakgtayayan». Ni maxanalh chu wa: «Xla kimalakgachalh xlakata nakmalakgsputuy uma katiyatni». Jehová makgpuwantinilh mapakgsina xalak Judá akxni wanilh: «Ni kapekuanti xlakata tachuwin nema kgaxpatti, nema lu ni tlan la kilichuwinankgolh xlakskujnin mapakgsina xalak Asiria» (2 Rey. 18:22-25; 19:6). Alistalh malakgachalh chatum ángel tiku kamakgnilh 185,000 soldados asirios akgtum tsisni (2 Rey. 19:35).
SKGALALA KAWANTI CHU ANKGALHIN KAKGAXPATNI JEHOVÁ
¿Akxilhnitata akgtum película niku taxtu chatum lataman tiku ni katsi komo wi tuku nitlan tlawaniputunkan? ¿Max wix xwaniputuna: «Ni kakgalhakgaxpatti, kaj wi tuku nitlan tlawaniputunan»? Kaj kalilakpuwanti la ángeles kinkaʼaxilhmakgon chu kinkawanikgoyan: «¡Ni kaʼakgskgawin Satanás!».
Ni kuenta katlawani tuku malakgatumi Satanás (Prov. 26:24, 25). Kakgaxpatni Jehová chu ankgalhin wa kalipawanti (Prov. 3:5-7). Kamakglhtinanti xatlan xtastakyaw: «Xaskgalala kawanti, kinkgawasa, chu kamakgapaxuwa kinaku» (Prov. 27:11). Komo chuna natlawaya, mintalakapastakni nitu katilaktlawalh chu tlan natayaniya.