Kstalaninanin Cristo wi tuku tlan natlawakgo xlakata nakakuentajtlawakan o natamakgtayakgo. Pero kuenta xlitlawatkan xtastakyaw Biblia. Nitlan namaklakaskinkan pistolas, rifles o atanu tuku limakgninankan kaj xlakata nalitamakgtayaya. Kaʼakxilhwi tuku tlan nakinkamakgtayayan nalaksakaw tuku xatlan.

Xpalakata Jehová, xasanto liʼakxilha xlatamatkan latamanin. David xkatsi pi Jehová wa «makilhtsukinit latamat» (Sal. 36:9, SXP). Wa xlakata, komo kstalanina Cristo lakpuwan pi nakuentajtlawakan o nakuentajtlawa tuku kgalhi, kuenta xlitlawat xlakata ni namakgni a chatum lataman chu «ni nalitawila kgalhni» (Deut. 22:8; Sal. 51:14).

Xlikana pi kaj xa tukuya nalimaklakaskina tlan nalimakgniya a chatum. Pero xlikana pi tlakg ni tuwa nalimakgninana tuku limakgninankan, maski kaj akglakgwa o ni akglakgwa natlawaya. * Nachuna, komo chatum kgalhana pekuama chu naʼakxilha pi a chatum kgalhi tuku limakgninankan max tuwa nakitaxtu chu max wi tiku na niy.

Katsisni akxni xaʼawatiya latamalh Jesús, kawanilh kstalaninanin pi xputsakgolh akgtum espada, pero ni wa xlakata xlitamakgtayakgolh (Luc. 22:36, 38). Chuna kawanilh xlakata wi tuku xʼama kamasiyani: pi ni xtalachipanankgolh, maski lhuwa latamanin xkatalatlawaputunkgolh (Luc. 22:52). Akxni Pedro tlawanilh tuku nitlan kskujni xapuxku sacerdote, Jesús wanilh: «Kamanu minkuchilu  kxputanun». Chu alistalh, akgtum tastakyaw nema asta la uku kapulalinit kstalaninanin Cristo: «Xlipaks wa nti nkuchilu xlimakapawankgolh, na wa nkuchilu nalinikgoy» (Mat. 26:51, 52).

Chuna la wan Miqueas 4:3, xlakskujnin Dios «Namastalankikgo xʼespadajkan nalitlawakgo arado chu xlanzas nalitlawakgo tuku liʼakgsitkan kiwi». Kstalaninanin Cristo lilakgapaskgokan la komo latamanin tiku tlan likatsikgo. Stalanikgo xtastakyaw apóstol Pablo tiku tsokgli: «Ni katlawanitit tuku nitlan tiku nitlan tuku katlawaniyan» chu «ni katakgalhitit taʼakglhuwit putum latamanin» (Rom. 12:17, 18). Xla lhuwa tuku nitlan titaxtulh, pulaktum wa “talakgaputsit xlakata kgalhananin” (2 Cor. 11:26). Pero ni lakatsalalh limapakgsin xlakata la nakuentajtlawakan. Wata lipawa Jehová chu xtastakyaw, nema «tlakg tlan ni xawa tuku limaklakaskinkan akxni talatlawanankan» (Ecl. 9:18).

Xlakata kstalaninanin Cristo, latamat tlakg xlakaskinka nixawa tuku lhuwa xtapalh. Katsiyaw pi chatum lataman ni wa tlakg xlakaskinka tlawa komo lhuwa tuku kgalhi (Luc. 12:15). Komo wi tiku nakinkamakgkgalhananan, xlilat kaj lakatsuku naxakgatliya. Komo chuntiya nakinkamakgkgalhanamputunan, talakaskin skgalala nawanaw chu nastalaniyaw xtastakyaw Jesús: «Ni kalakgapaxtokgtit nti nitlan nkapuwaniyan» o nitlan likatsi. Uma wamputun pi namaxkiyaw tuku nakinkamakglhtiyan chu namaxkiyaw tuku nkikaskiniyan (Mat. 5:39, 40; Luc. 6:29). * Xlikana, wa tuku tlakg tlan wa nakuentajtlawakanaw. Komo chuna natlawayaw ni tunkun kintikatlawanikan tuku nitlan chu liwana nakuentajtlawayaw tuku kgalhiyaw chu komo kintalilakatsukan katsikgo pi paxkiyaw takaksni xlakata xtatayananin Jehová akinin (Prov. 18:10; 1 Juan 2:16).

Akinin kstalaninanin Cristo maxkiyaw kakni tuku lakapastakkgo amakgapitsin (Rom. 14:21). Komo natakatsi pi anta kcongregación wi tiku kgalhi pistola o rifle, max makgapitsi natalan napekuankgo o nalitaʼakglhuwikgo. Tapaxkit natlawa pi nalakapastakaw xpalakatakan amakgapitsin, maski max uma natlawa pi ni namakgantaxtiyaw limapakgsin nema kinkamaxkikanan (1 Cor. 10:32, 33; 13:4, 5).

Akinin kstalaninanin Cristo liskujaw xlakata tlan nakinkaʼakxilhkanan (2 Cor. 4:2; 1 Ped. 5:2, 3). Kalakapastakwi pi chatum kstalanina Cristo kgalhi akgtum pistola xlakata nalikuentajtlawakan. Komo chuntiya kgalhi maski makglhtinalha tastakyaw, nitlan katiliʼakxilhka. Wa xlakata, nila tuku katilakgayawaka anta kcongregación. Nachuna, chatum tala tiku lin akgtum likan nema limakgninankan kaj xlakata max chuna skinikan kxtaskujut. Komo chuna, tlakg tlan nawan komo naputsa atanu taskujut. *

Chuna la akxilhwi, chatunu kstalaninanin Cristo nalaksaka la nakuentajtlawa xlatamat, xfamilia, tuku kgalhi chu tuku taskujut namakglhtinan. Pero akxni nalaksakaw tuku natlawayaw kuenta natlawayaw tastakyaw nema masta Biblia, nema limasiya xliskgalala chu xtapaxkit Dios. Kstalaninanin Cristo tiku kuenta tlawakgo uma tastakyaw chu laksakkgo pi ni nakgalhikgo akgtum pistola xlakata nalikuentajtlawakan. Katsikgo pi namin kilhtamaku akxni putum tlan natawila chu nialhti katipekualh komo nalipawankgo Dios chu namaxkikgo kakni tastakyaw xalak Biblia (Sal. 97:10; Prov. 1:33; 2:6, 7).