Kakalakgalhamaw putum latamanin
AKXNI Jesús kamasiyanilh kstalaninanin la nalichuwinankgo xalakwan xalaksasti, xkatsi pi ni putum latamanin tlan x’amakgolh makgamakglhtinankgo (Luc. 10:3, 5, 6). Akxni lichuwinanaw Dios, lakgachunin katekgsaw latamanin tiku nitlan kinkalikatsinikgoyan o lixkajni kinkawanikgoyan. Xlikana pi akxni chuna kinkalikatsinikanan tuwa tamakgkatsi tlan nakalikatsiniyaw latamanin.
Tiku xalakgalhamana akxilha tuku maklakaskinkgo amakgapitsin chu ta’akglhuwit nema titaxtumakgolh, nitlan limakgkatsikgo chu kamakgtayaputunkgo. Komo nialh nalakgalhamananaw, max uma natlawa pi nialh katilipaxuwaw akxni lichuwinanaw Dios chu nialh liwana katitlawaw. Nachuna komo naliskujaw xlakata nalakgalhamananaw natlawa pi ankgalhin nalipaxuwayaw tuku tlawayaw. Xtachuna la nawiliniya kiwi lhkuyat xlakata ni namixa (1 Tes. 5:19).
¿La tlan nakatsiyaw xlakata tlakg xalakgalhamananin nawanaw, maski akxni tuwa namakgkatsiyaw? Nalichuwinanaw pulaktutu li’akxilhtit nema tlan namakglhkatiyaw: xla Jehová, Jesús chu apóstol Pablo.
KAMAKGLHKATIW XTALAKGALHAMAN JEHOVÁ
Lhuwata mil kata, Jehová tayaninit pi nawankan lhuwa takgsanin xpalakata. Maski chuna, chuntiyaku «lakgalhamankgo [...] nti ni mastakgoy mpaxkatsinit, chu nti ni lakwan chixkuwin» (Luc. 6:35). Chu limasiya xlakata xakgalhkgalhina. Xla «lakaskin mpi paks [latamanin] na’akgaputaxtukgoy» (1 Tim. 2:3, 4). Maski xkajni tuku nitlan, lhuwa xtapalh kali’akxilha latamanin chu ni lakaskin pi kamakgatsankgakgolh xlatamatkan (2 Ped. 3:9).
Jehová katsi pi Satanás malakgatsikgonit xtapuwankan latamanin tiku ni kanajlakgo (2 Cor. 4:3, 4). Lhuwa kamasiyanikanit takgsanin xlakata Dios lata akxni laktsujku xwankgonit. Wa xlakata tuwa makgkatsikgo namakgamakglhtinankgo tuku xaxlikana masiya Biblia. Pero Jehová lu kamakgtayaputun. ¿La likatsiyaw?
Ka’akxilhwi tuku titaxtukgolh latamanin xalak Nínive. Maski lixkajni xlikatsikgo, Jehová wanilh Jonás: «¿Ni xlilat naklakgalhaman lanka kachikin Nínive, niku lamakgolh liwaka akgtum ciento akgpuxum mil latamanin tiku ni katsikgo tuku tlan chu tuku nitlan, chu na anan lhuwa animales xalak chiki?» (Jon. 4:11). Jehová akxilhli pi ninivitas ni tsinu xlakgapaskgo. Wa xlakata kalimasiyanilh talakgalhaman chu wanilh Jonás pi xkamakatsinilh xlakata tuku xlakpuwanit natlawa.
Xtachuna la Jehová, akinin lhuwa xtapalh kali’akxilhaw latamanin. Tlan namakglhkatiyaw komo nakamakgtayaputunaw tiku kinkakgaxmatniyan, maski tasiya pi ni katimakgamakglhtinankgolh tuku xaxlikana.
KAMAKGLHKATIW XTALAKGALHAMAN JESÚS
Xtachuna la xTlat, Jesús lu kalakgalhamalh latamanin tiku xmaklakaskinkgo tamakgtay kxtakanajlakan. «Lantla ukxilhli ntachixkuwitat, kgayaj katsanikgolh; sampi kaj lhtuj xtamakgaxtakgkgonit xtakgawanikgonit xtachuna nkgalhnilu ntu ni kgalhikgoy xmapuchwanina» (Mat. 9:36). Jesús ni kajwatiya akxilhli la xtasiyakgo. Xkatsi pi xpulalinanin takanajla nitlan xkalikatsinikgonit tiku x’ankgo kgaxmatkgo chu xkamasiyanikgonit takgsanin. Maski xkatsi pi lhuwa latamanin x’amakgo makgxtakgkgo, chuntiya «xlimasiyunikgo lhuwa nkatuwajh kxtamasiyun» (Mar. 4:1-9).
Ni kataxlajwaniw komo chatum lataman ni liwana makgamakglhtinan tamakatsinin akxni xlipulana tachuwinanaw
Xlatamatkan talakgpali chu max nalakgpalikgo tuku lakpuwankgo xlakata tuku xaxlikana
Akxni latamanin nitlan makgamakglhtinankgo tamakatsinin, ni kajwatiya na’akxilhaw la tasiyakgo chu nakinkakgalhskinkanan tuku xlakata chuna kgalhtinankgo. Max makgapitsi nalakgmakgankgo Biblia xlakata nitlan li’akxilhtit kawilinikgo tiku wankgo pi kstalaninanin Cristo. Makgapitsi max kawanikan takgsanin xlakata kintakanajlakan. Max wi tiku pekuankgo xlakata komo nakinkakgaxmatniyan tiku lakatsu tawilakgo o xfamiliajkan nakalikgalhkgamanankgo.
Max makgapitsi ni makgamakglhtinamputunkgo xlakata tuwa tuku titaxtukgonit chu nitlan kamamakgkatsini. Chatum misionera wanikan Kim lichuwinan: «Anta niku klichuwinanaw xlakata Dios, lhuwa patinamakgolh xlakata guerra chu makgatsankgakgolh tuku xkgalhikgo. Makgkatsikgo pi ni kgalhikgo takgalhkgalhin. Lu nitlan makgkatsikgo chu niti lipawankgo. Ankgalhin kkatekgsaw latamanin tiku ni kgaxmatputunkgo tamakatsinin xalak Biblia. Akgtum kilhtamaku kintalatlawakgolh akxni xaklichuwinama Dios».
¿Tuku tlawa Kim xlakata chuntiya nalimasiya talakgalhaman? Xla lichuwinan: «Akxni latamanin nitlan kilikatsinikgo, klilakpuwan tachuwin nema wi kProverbios 19:11: “Xliskgalala chixku tlawa pi ni lakapala nasitsi”. Akxni kuenta ktlawa tuku max nitlan titaxtukgonit uma latamanin kimakgtaya nakkalimasiyani talakgalhaman. Nachuna, ni putum latamanin chuna kinkalikatsinikgoyan. Chu uma kkachikin wilakgolh tiku kkalimakgalhtawakgayaw Biblia».
Nachuna akinin tlan nakinkakgalhskinkanan tuku xtlawaw komo akinin chuna xtatekgswi chuna la umakgolh latamanin. Akgtum li’akxilhtit, komo makglhuwa xkinkawanikan takgsanin xlakata xtatayananin Jehová, max nachuna nitlan xkgalhtinaw chu xmaklakaskiw pi xkinkalimasiyanikan talakgalhaman. Komo nalilakpuwanaw xtastakyaw Jesús xlakata tlan nakalikatsiniyaw amakgapitsin chuna la lakaskinaw pi nakinkalikatsinikan uma natlawa pi na namakgkatsiyaw tuku xlakan titaxtumakgo (Mat. 7:12).
KAMAKGLHKATIW XTALAKGALHAMAN PABLO
Apóstol Pablo xalakgalhamana xwanit asta na kalakgalhamalh tiku nitlan xlikatsinikgo. ¿Tuku xlakata? Xlakata chuntiya xlakapastaka tuku xtitaxtunit kxlatamat. Lichuwinalh: «Maski kit wa nti xalipulana xakmaxkajwaliy Jesús, chu na xaktalatlaway, chu na xakli’akgslokgonan; wampi kinkgalhinilh ntalakgalhaman, sampi kaj kilituntu xaklitlaway, chu mpi na ni xakkanajlay» (1 Tim. 1:13). Xkatsi pi Jehová chu Jesús xlimasiyanikgonit talakgalhaman. Xlikana pi akxni xkalixakgatli Dios makgapitsi latamanin, xlilakpuwan pi nachuna xwanit.
Lakgachunin, Pablo xkatekgsa latamanin tiku lu xkanajlakgo tuku nixaxlikana xkamasiyanikanit. ¿Tuku xtlawa akxni chuna xtitaxtu? Hechos 17:16 wan pi akxni xlama k’Atenas, «lipekua makgalipuwa xnaku lantla x’ukxilha [kkachikin], mpi lu xkakninanikgoy wa ntu nkaj tatlawamakxtu». Uma tuku titaxtulh makgtayalh xlakata tlan nalichuwinan xlakata Dios (Hech. 17:22, 23). Xlakata Pablo xkatsi tuku xtitaxtukgonit latamanin, tanu tanu la xkalitachuwinan Dios xlakata nakamakgtaya nalakgtaxtukgo makgapitsin latamanin (1 Cor. 9:20-23).
Akxni katekgsaw latamanin tiku nitlan kinkamakgamakglhtinanan o nitlan tuku kanajlakgo, tlan chuna natlawayaw la Pablo. Kalimaklakaskiw tuku katsiyaw xlakata xlatamatkan latamanin chu chuna nakamakgtayayaw nalakgapaskgo «lakwan tamakatsin xlakata tuku tlakg tlan mima» (Is. 52:7). Akgtum li’akxilhtit chatum tala wanikan Dorothy lichuwinan: «Lhuwa latamanin kamasiyanikanit pi Dios lu kinkamakgapatinanan akxni kinkastakyawayan. Pulana kkawani pi lu tlan komo kanajlanikgo Dios chu alistalh kkamasiyani tuku wan Biblia xlakata xtapaxkit Dios chu xtamalaknun xlakata kilhtamaku nema aku mima».
«WANTU XATLAN [NALITLAJAYAW] WANTU NI XATLAN»
Xtayatkan makgapitsi latamanin tiku kalitachuwinanaw Dios «nataliwakanikgoy» tuku nitlan chuna la talakatsuwitilha «xaʼawatiya kilhtamaku» (2 Tim. 3:1, 13). Pero ni kamastaw talakaskin pi nialh nakgalhiyaw talakgalhaman chu tapaxuwan. Jehová kinkamaxkiyan litliwakga xlakata «wantu xatlan [nalitlajayaw] wantu ni xatlan» (Rom. 12:21). Chatum precursora wanikan Jessica lichuwinan: «Ankgalhin ktekgsa latamanin tiku lu tlankajlakgo, kinkalakgmakgankgoyan chu ni makgamakglhtinankgo tamakatsinin xalak Biblia. Uma lu nitlan mamakgkatsininan. Akxni wi tiku ktachuwinan, kskini Jehová pi kakimakgtayalh nakakxilha uma lataman chuna la xla akxilha. Chu chuna nialh klilakpuwan tuku akit kmakgkatsi wata klilakpuwan la nakmakgtaya».
Chuntiya kaputsayaw tiku tekgsputunkgo tuku xaxlikana
Alistalh wi tiku tlan namakgamakglhtinankgo xlakata liskujaw nakamakgtayayaw nalakgapaskgo Jehová
Nachuna kililakpuwanatkan la nakamakgpuwantiniyaw natalan tiku anaw kalitachuwinanaw Dios. Jessica lichuwinan: «Komo wi tuku nitlan titaxtunitaw, kliskuja xlakata ni naklakapastaka tuku nitlan lanit. Tanu tuku klichuwinan chu wa tuku xatlan klichuwinan, la komo lu tlan kitaxtu akxni kalitachuwinankan Dios latamanin maski nitlan kinkamakgamakglhtinankgoyan».
Jehová liwana katsi tuku tuwa titaxtuyaw akxni lichuwinanaw xTachuwin chu liwana katsiyaw pi lu lipaxuwa akxni akxilha pi akinin xalakgalhamananin chuna la xla (Luc. 6:36). Xlikana, Dios ni ankgalhin katilimasiyalh talakgalhaman. Kanajlayaw pi xla katsi tukuya kilhtamaku nalimin xlisputni uma kakilhtamaku. Pero la uku chuntiya talakaskin nalichuwinanaw Dios (2 Tim. 4:2). Wa xlakata chuntiya xatapaxuwan katlawaw taskujut nema lakgayaw chu kakalakgalhamaw putum latamanin.
