1. ¿Tuku lakaskinaw kimputumkan?

KALILAKPUWAW pi tatanokglhwi chatum tiku lu lakgapasaw, pero xla ni lakapastaka kintukuwanikan chu nipara tsinu kinkalakgapasan. ¿La xmakgkatsiw? Xlikana pi lu xlilipuwaw, xlakata kimputumkan lakaskinaw pi kakinkalakapastakkan. Pero ni kajwatiya lakaskinaw pi xlakapastakka tiku akinin, wata nachuna lakaskinaw pi lhuwa xtapalh xkinkaʼakxilhkan chu tuku tlawanitaw (Núm. 11:16; Job 31:6).

2, 3. ¿Tuku max nalaktlawa la lakaskinaw pi xkinkalakapastakkan? (Kaʼakxilhti xapulana dibujo).

² Xlakata makglakgalhinanin akinin max natlawa pi nalakxla la lakaskinaw kakinkalakgapaskan. Nachuna xkakilhtamaku Satanás tlan natlawa pi lu xlakaskinka kakinkamakgkatsikan. Akxni chuna lay, ni maxkiyaw Jehová tatlankit chu takaknin nema lakgchan (Rev. 4:11).

³ Kxkilhtamaku Jesús, makgapitsi xpulalinanin takanajla tanu  tuku xlakpuwankgo xlakata tlan xka’akxilhka. Xla kawanilh umakgolh tachuwin kstalaninanin: «Lu[...] kuentaj katlawatit ni chuna wixin natsakgsayatit la likatsikgo lakgtsokgninanin. Xlakan lu[...] lakgatikgoy lhakgakgoy xalhman klhakgatkan, chu na lakaskinkgoy pi lu[...] nakakninanikan ktlankati akxni xakgatlipaxtokgkan. Na akxni ankgoy kminpukgalhtawakgakan tsukukgoy laksakkgoy xalakwan putawilh, chu wantu klakatin wilakgo, na lakaskinkgo pi pulh wa namawikgokan». Chu alistalh wa: «Wa xlakan ti tlakg liwaka nalipatikgoy xtakgastakyawan Dios» (Luc. 20:46, 47). Jesús malankilh chatum puskat tiku xninita xchixku chu limaxkgen xwanit xlakata mastalh putum tuku xkgalhi maski ni lhuwa xwanit chu ni putsalh pi xmaxkika kakni (Luc. 21:1-4). Chuna xla limasiyalh la akxilha Jehová xlakata tlan na’akxilhkana. Uma artículo nakinkamakgtayayan naʼakxilhaw uma tuku lichuwinamaw chuna la akxilha Jehová.

4. ¿Tuku tlakg xlakaskinka nixawa tlan nakinkaʼakxilhkgoyan kakilhtamaku chu tuku xlakata?

⁴ ¿Tuku tlakg xlakaskinka naputsayaw kkakilhtamaku? Ni wa takaknin tuku mastakgo kakilhtamaku xlakata takgalhtawakga, taskujut chu talakgastan. Wata wa tuku Pablo lichuwinalh akxni wa: «Wampi wa nchu mpi lakgapasnitantita Dios, su xatlan mpi wa nkinkalakgapasnitan, ¿lantla xlilat natapuspitnipalakgoyatit wantu nalakgachixkuwiyatit wantu nkaj xachunata ntalakapastakni xala katuxawat, wa cha ntu lakgachixkuwiputumparayatit?» (Gál. 4:9). ¡Lu lanka talakgalhaman pi «wa nkinkalakgapasnitan», Malana xlikalanka Katiyatni! Xla lakaskin pi lu tlan xtalaliw. Chuna la lichuwinalh tiku lu katsini xalak Biblia «xla lu tlan kinkaʼakxilhan chu kinkalilakgaputsayan». Akxni Jehová xʼamigos kinkaliʼakxilhan, katsiniyaw tuku xlakata lamaw (Ecl. 12:13, 14).

5. ¿Tuku natlawayaw xlakata Jehová xʼamigos nakinkaʼakxilhan?

⁵ Wa uma tuku titaxtulh Moisés. Akxni skinilh Jehová pi xmakgtayalh xlakata liwana nalakgapasa xtiji, xla kgalhtilh: «Uma tuku lichuwinanita, na naktlawa, xlakata tlan kakxilhan chu klilakgapasan mintukuwani» (Éx. 33:12-17). Akinin nachuna makglhtinanaw tasikulunalin akxni Jehová liwana kinkalakgapasan. Pero ¿tuku natlawayaw xlakata Jehová xʼamigos nakinkaʼakxilhan? Napaxkiyaw chu namakamaxkiyaw kilatamatkan (kalikgalhtawakga 1 Corintios 8:3).

6, 7. ¿Tuku max natlawa pi nialh natalalinaw Jehová?

⁶ Wa xlakata talakaskin pi nakuentajtlawayaw la talalinaw Jehová. Chuna la kstalaninanin Cristo xalak Galacia tiku Pablo katsokgnanilh pi ni xmastaw talakaskin pi «ntalakapastakna xala katuxawat» kskujni nalitaxtuyaw, uma na wamputun pi ni naputsayaw pi kakinkalakgapaskan (Gál. 4:9). Dios liwana xkalakgapasa umakgolh kstalaninanin Cristo. Pero xla kawanilh pi xlakgtaspitmaparakgolh tuku ni xkgalhi xtapalh. La komo xkawanima: «Lhuwa tuku katsininitantit, ¿tuku xlakata lakgtaspitparayatit tuku ni lhuwa xtapalh nema makgxtakgtit?».

⁷ ¿Tlan nachuna nakinkaʼakgspulayan? Chuna. Akxni lakgapaswi Jehová max lakgmakgaw pi xkakilhtamaku Satanás lanka nakinkaʼakxilhan, chuna la tlawalh Pablo (kalikgalhtawakga Filipenses 3:7, 8). Max nialh kgalhtawakgaw kʼuniversidad, ni makglhtinaw tlakg xalanka taskujut o natlajayaw lhuwa tumin. Komo lu xkatsiniyaw tlakgnanaw o kgamananaw max tlan lhuwa tumin xkgalhiw o asta lu xkinkalakgapaskan.  Pero makgxtakgwi putum uma (Heb. 11:24-27). ¿Nalakpuwanaw pi nitlan tuku tlawaw? Komo chuna xtlawaw ni xlimasiyaw liskgalala. Max xlakgtaspitparaw tuku makgasa limaxtuw «ntalakapastakna xala katuxawat». *

8. ¿Tuku namatliwakglha la lakaskinaw pi Jehová tlan xkinkaʼakxilhni?

⁸ ¿La namatliwakglhaw la lakaskinaw pi wa Jehová tlan xkinkaʼakxilhni chu ni wa kakilhtamaku? Lu xlakaskinka nalakapastakaw uma pulaktiy. Pulana, pi Jehová ankgalhin lhuwa xtapalh kaʼakxilha kskujnin (kalikgalhtawakga Hebreos 6:10; 11:6). Xla xputumkan lhuwa xtapalh kaʼakxilha chu nikxni kalakgmakgan. Ankgalhin «lakgapaskgoy nkimPuchinakan wanti ntapakgsinikgoy» (2 Tim. 2:19). Jehová kuentajtlawama «xlatamatkan ti laktankswa» chu liwana katsi la nakamakgtaya akxni natitaxtukgo taputsan (Sal. 1:6, SXP; 2 Ped. 2:9).

9. Kalichuwinanti tuku tlawalh Jehová akxni lakgmaxtulh xkachikin.

⁹ Lakgachunin lu kaks lilakawanaw la Jehová lakgmaxtulh xkachikin (2 Crón. 20:20, 29). Kalilakpuwaw la Jehová kalakgmaxtulh israelitas kxaspinini Pupunu akxni ksoldados faraón xkamasputuputun (Éx. 14:21-30; Sal. 106:9-11). Uma tuku lalh lu kaks kamalakawanilh latamanin tiku anta lakatsu xlamakgolh chu chuntiya xlichuwinankgo maski liwakaya 40 kata lata xtitaxtunit (Jos. 2:9-11). Lu kinkamatliwakglhan nalakapastakaw la Jehová kalakgmaxtulh xkachikin xala makgasa, xlakata la uku lakatsu wilaw akxni nakinkatalatlawayan Gog xla Magog (Ezeq. 38:8-12). Akxni chuna nala, lu napaxtikatsiniyaw xlakata putsaw pi wa Jehová tlan nakinka’akxilhan chu ni wa kakilhtamaku.

10. ¿Tuku xlipulaktiy kililakapastakatkan?

¹⁰ Xlipulaktiy tuku tlan nalakapastakaw wa pi Jehová tlan nakinka’akxilhan chu nakinkamaxkiyan tuku akinin nikxni lakpuwanitaw. Xla ni katikamaxkilh talakgalhaman tiku tlawakgo tuku xatlan kaj xlakata amakgapitsi naka’akxilhkgo. ¿Tuku xlakata? Jesús lichuwinalh pi akxni amakgapitsin akxilhkgo tuku xlakan tlawamakgo lakpuwankgo pi kgalhikgoya tuku kalakgchan (kalikgalhtawakga Mateo 6:1-5). Pero nachuna lichuwinalh pi xTlat «tsekg ukxilha» tiku ni kamaxkikan tuku kalakgchan maski kamakgtayakgo amakgapitsin. Dios akxilha tuku tlawamakgo chu kamaxki tuku kalakgchan, lakgachunin chuna tlawa akxni nitu kgalhkgalhimakgo. Ka’akxilhwi makgapitsi li’akxilhtit.

11. ¿La limasiyanilh Jehová talakgalhaman María?

¹¹ Akxni xlakgchanit kilhtamaku xlakata xKgawasa xlakachilh unu kKatiyatni, Jehová laksakli chatum tsumat tiku ni tlankajwa xwanit, xwanikan María, xlakata wa namalakachini. Xla anta xlama kNazaret, akgtum aktsu kachikin nema ni lu xlakaskinka xwanit chu lakgamakgat xwi kJerusalén, chu kxtemplo Jehová (kalikgalhtawakga Lucas 1:26-33). ¿Tuku xlakata wa laksakli ama tsumat? Ángel Gabriel wanilh María pi Dios lu tlan x’akxilhnit. María limasiyalh pi tliwakga xwi xtakanajla akxni tachuwinalh Elisabet tiku xtalilakgapasni xwanit (Luc. 1:46-55). Xlikana, Jehová x’akxilhnit María chu xlakata ni xmakgxtakga maxkilh uma talakgalhaman tuku xla max ni xkgalhkgalhi.

12, 13. ¿La limasiyanika kakni Jesús akxni lakachilh chu akxni linka ktemplo?

 ¹² Akxni Jesús lakachilh, Jehová ni wa kamakatsinilh laklanka mapakgsinanin xalak Jerusalén chu xalak Belén pi xla xlakachinit. Wata kamalakgachalh makgapitsin ángeles xlakata nakamakatsinikgo tiku xkuentajtlawakgo borregos tiku xlamakgolh lakatsu kBelén (Luc. 2:8-14). Xkuentajtlawananin borregos lakgapaxialhnankgolh Jesús akxni lakachilh (Luc. 2:15-17). Xlikana pi María chu José lipaxuwakgolh akxni akxilhkgolh pi maxkika kakni Jesús. Kalilakpuwaw pi ni tatalakxtumi tuku tlawa Jehová chu tuku tlawa Satanás. Akxni Satanás kamalakgachalh astrólogos xlakata nalakgapaxialhnankgo Jesús chu xnatlatni, putum latamanin xalak Jerusalén lu lilakgaputsakgolh akxni katsikgolh uma tamakatsinin (Mat. 2:3). Akxni putum latamanin katsikgolh pi xlakachinit Jesús lu nitlan kitaxtulh xlakata kamakgnika lhuwa laktsu kamanan, tiku ni xtlawakgonit tuku nitlan (Mat. 2:16).

¹³ Akxni xtitaxtunit 40 kilhtamaku lata xlakachinit Jesús, María xlimakamaxkit xwanit Jehová akgtum tamakamastan anta ktemplo xla Jerusalén, nema akgnajatsa kilómetros la xlilakgamakgat xwi Belén (Luc. 2:22-24). Akxni x’amakgolh ktiji, María max xlilakpuwama komo sacerdote x’ama maxki kakni Jesús xlakata tuku x’ama tlawa kkilhtamaku nema aku xmima. Xlikana pi Jesús maxkika kakni, pero nichuna tuku max María xlakpuwama. Jehová limaklakaskilh chatum tiku lu «tlan chixku xwanit, na lu akgstitum xkaknina Dios», wanikan Simeón chu chatum palakachuwina puskat tiku ni xkgalhi xchixku xwanikan Ana chu xkgalhi 84 kata, xlakata namakatsininankgo pi Jesús wa Cristo, tiku xwankanit pi namin (Luc. 2:25-38).

14. ¿Tukuya tasikulunalin maxkilh Jehová María?

¹⁴ ¿Jehová limasiyanilh talakgalhaman María xlakata xkuentajtlawanit chu xmakgastaknit xKgawasa? Chuna. Pulana, anta kBiblia tsokgwililh tuku xla tlawalh chu tuku wa. Chuna la katsiyaw, xla nila talatamalh Jesús akgtutu kata la makgapalalh la xlichuwinama xTamapakgsin Dios. ¿Xlitamakgxtakgat xwanit kNazaret xlakata nialhti xwanit xchixku? Max chuna. Wa xlakata ni akxilhli lhuwa tasikulunalin nema makglhtinankgolh amakgapitsi latamanin. Pero anta xtawi Jesús akxni nilh (Juan 19:26). Nachuna, xkatawi kstalaninanin Cristo kJerusalén akxni kamaxkika espíritu santo, kPentecostés kata 33 (Hech. 1:13, 14). Max na xatalaksakni xwanit chuna la amakgapitsin. Komo chuna, uma wamputun pi maxkika lanka talakgalhaman na anta natatawila Jesús k’akgapun putum kilhtamaku. ¡Lu lanka talakgalhaman xlakata nikxni makgxtakgli Jehová!

15. Akxni Jesús xlama kKatiyatni, ¿la limasiyalh Jehová pi lanka xtapalh x’akxilha?

¹⁵ Jesús ni wa xputsa pi lhuwa xtapalh x’akxilhkgolh tiku xpulalinkgo takanajla chu políticos. Wa tuku xlakaskin wa lanka xtapalh x’akxilhli Jehová. Lu matliwakglhi akxni Dios makgtutu tachuwinalh. Anta kxkgalhtuchokgo Jordán akxni tamunulh, Jehová wa: «Wa yuma nkinKam nti lu kpaxkiy, wanti lu klimakgapaxuwakan» (Mat. 3:17). Chuna la akxilhaw, kaj xman wa Jesús chu Juan tiku xmununan kgaxmatkgolh uma tachuwin. Akxni akgtum kata xtsankga namakgnikan Jesús, kgalhtutu x’apóstoles kgaxmatkgolh akxni Dios chuwinalh: «Wa yuma nkinKam nti lu kpaxkiy, wa nti klimakgapaxuwakan: wa nkakgaxpatnitit» (Mat. 17:5). Chu xa’awatiya, Jehová tachuwinampa  xKgawasa akxni nialh lhuwa kilhtamaku xtsankga la x’amaka makgnikan (Juan 12:28).

16, 17. ¿Tuku lanka xtapalh maxkilh Jehová Jesús?

¹⁶ Jesús xkatsi pi lu nitlan tuku x’ama pati akxni x’amaka makgnikan, xlakata xlimawakaka taʼakgsanin. Maski chuna, tlawalh akgtum oración chu wanilh Jehová pi wa xlalh tuku xtalakaskin chu ni wa tuku xla xlakaskin (Mat. 26:39, 42). «Wata kaj tipatinalh kkiwi, ni lilakapastakli mpala limaxana», chu ni putsalh pi wa kakilhtamaku lanka xtapalh xli’akxilhli, wata wa putsalh lanka xtapalh xli’akxilhli xTlat (Heb. 12:2). ¿La limasiyanilh Jehová?

¹⁷ Akxni xwi kKatiyatni, Jesús lichuwinalh pi xmakglhtinamputumpara takaknin nema xkgalhi k’akgapun akxni xtawi xTlat (Juan 17:5). Ni xlakpuwan pi wi atanu tuku tlakg «lanka xtapalh» x’ama makglhtinan. Maski chuna, ¿tuku tlawalh Jehová? Wi tuku limasiyanilh pi lu lanka xtapalh x’akxilha. Malakastakwanilh chu maxkilh «akgtum ntapakuwit wa cha ntu ntlakg tlanka». Nachuna, wi tuku maxkilh nema nikxni xmaxkikanit a chatum lataman: akgtum latamat xaʼespiritual (Filip. 2:9; 1 Tim. 6:16). * ¡Lu tlan tuku makglhtinalh xlakata nikxni makgxtakgli Jehová!

18. ¿Tuku nakinkamakgtayayan ni wa naputsayaw tlan nakinka’akxilhkanan kkakilhtamaku?

¹⁸ ¿Tuku nakinkamakgtayayan ni wa naputsayaw tlan nakinka’akxilhkanan kkakilhtamaku? Kuenta natlawayaw pi Jehová ankgalhin lhuwa xtapalh kali’akxilha kskujnin chu nakinkamaxkiyan tuku akinin nikxni lakpuwanitaw. ¡Chu niti katsi tuku nakinkamaxkiyan kkilhtamaku nema aku mima! Pero la uku, maski chuntiya titaxtuyaw ta’akglhuwit kkakilhtamaku, kalakapastakwi pi uma kakilhtamaku chu takaknin nema masta nialh makgas namasputukan (1 Juan 2:17). Jehová tiku xapaxkina kinTlatkan, tlan likatsi chu ankgalhin lakapastaka tapaxkit nema kgalhiniyaw xpalakata xtukuwani (Heb. 6:10). Xlikana, xla nakinkamaxkiyan tuku kinkalakgchanan, max chuna natlawa la akinin nikxni chuna lakpuwanitaw.