1. ¿Tuku xlakata Jehová tlan nawan pi tapakgsini putum tuku anan? (Kaʼakxilhti xapulana dibujo).

JEHOVÁ wa tapakgsini putum tuku anan: «Akgapun chu putum tuku anan k’akgapun chu katiyatni chu putum tuku anan anta» (Deut. 10:14; Rev. 4:11). Chu komo wa katlawalh latamanin, akinin nawa tapakgsiniyaw (Sal. 100:3). Chuna la titaxtunit kilhtamaku, Jehová kalaksaknit makgapitsi latamanin tiku kajwatiya natapakgsinikgo.

2. ¿Tiku latamanin lichuwinan Biblia pi kajwatiya tapakgsini Jehová?

² Akgtum li’akxilhtit, anta kSalmo 135 wan pi xlakskujnin Dios xala makgasa xalak Israel tiku ni xmakgxtakgkgo wa «xtapakgsinij» (Sal. 135:4, SXP). Nachuna, libro xla Oseas lichuwinalh pi makgapitsi tiku ni israelitas xwankgonit, nachuna x’amakgo tapakgsikgo kxkachikin Jehová (Os. 2:23). Uma tuku xlichuwinankanit kgantaxtulh akxni Dios tsukulh kamakgamakglhtinan tiku ni judíos xwankgonit xlakata natamapakgsinankgo Jesús k’akgapun (Hech. 10:45; Rom. 9:23-26). Umakgolh latamanin tiku kalilaksakka espíritu santo kalilakgapaskan «xasanto kachikin» akgtum «kachikin xatalaksakni» xla Jehová (1 Ped. 2:9, 10). Chu lhuwa kstalaninanin  Cristo xala uku tiku ni makgxtakgkgo, kgalhkgalhimakgo nalatamakgo kKatiyatni, Dios na kalilakgapasa la «xkachikin» chu tiku «kalaksakkanit» (Is. 65:22).

3. 1) ¿Tiku lu tlan talalinkgo Jehová la uku kilhtamaku? 2) ¿Tuku na’akxilhaw k’uma artículo?

³ La uku kilhtamaku, tiku kgalhikgo takgalhkgalhin nalatamakgo k’akgapun, «ni xalhuwa borregos» chu tiku kgalhkgalhimakgo nalatamakgo kKatiyatni, «amakgapitsi borregos», kajwatiya «kgamputum borregos» litaxtukgo tiku makxtum skujnanikgo Jehová (Luc. 12:32; Juan 10:16). Xlikana pi lu limasiyaniputunaw Dios pi lu paxtikatsiniyaw xlakata kinkamaxkinitan talakgalhaman natapakgsiniyaw. K’uma artículo na’akxilhaw makgapitsi la nalimasiyayaw paxtikatsinit xlakata uma talakgalhaman.

4. 1) ¿Tuku pulaktum nalimasiyayaw pi paxtikatsiniyaw Jehová xlakata kinkamaxkin talakaskin x’amigos nalitaxtuyaw? 2) ¿Tuku xtachuna tlawalh Jesús?

⁴ Pulaktum la nalimasiyaniyaw tapaxtikatsinit Jehová, wa namakamaxkiyaw xliputum kilatamatkan. Akxni tamunuyaw, limasiyayaw kxlakatin amakgapitsin latamanin pi tapakgsiniyaw Jehová chu kajwatiya kgalhakgaxmatputunaw (Heb. 12:9). Wa uma tuku limasiyalh Jesús akxni tamunulh, xtachuna la komo xwanima xTlat: «Klipaxuwa ktlawa mintalakaskin» (Sal. 40:7, 8, SXP). Limasiyalh pi xlikana xtlawaputun xtalakaskin Dios maski akxni lakachilh xtapakgsiniya akgtum kachikin nema xtamakamastaninita Jehová.

5, 6. 1) ¿La makgkatsilh Jehová akxni Jesús tamunulh? 2) Kawili akgtum li’akxilhtit nema limasiya la makgkatsi Jehová akxni tamakamastaniyaw.

⁵ ¿La makgkatsilh Jehová akxni Jesús tamunulh? Biblia lichuwinan: «Cha nchu alistalh akxni ntamunulh Jesús, tunkun takutli kchuchut. Ka’ukxilhtit, wa akgapun talakkinilh, na ukxilhli kspiritu Dios ntu xtaktama xtachuna ntijtimput, na anta xmima kxokgspun. Cha nchu ntichuwinanka nkakgapun mpi xwankan: “Wa yuma nkinKam nti lu kpaxkiy, wa nti lu klimakgapaxuwakan”» (Mat. 3:16, 17). Jehová lu lipaxuwalh akxni akxilhli xKgawasa, tiku xtapakgsiniya, pi lu xlikana xlakpuwanit naskujnani. Nachuna, Jehová lu lipaxuwa akxni tamakamastaniyaw chu kinkasikulunatlawayan (Sal. 149:4).

⁶ Ka’akxilhwi akgtum li’akxilhtit nema nakinkamakgtayayan liwana na’akgatekgsaw la makgkatsi Jehová akxni tamakamastaniyaw. Kalilakpuwaw pi chatum chixku chan lhuwa lakglilakgatit xanat. Akgtum kilhtamaku aktsu xtsumat tukxa kgantum xanat chu maxki. Maski putum xanat wa xla uma chixku, lu lakgati pi xtsumat maxki uma xanat xlakata chuna limasiyani pi paxki. Xlikana, uma chixku akxilha uma xanat pi wa tlakg lilakgatit. Nachuna, Jehová lu lipaxuwa akxni laksakaw namakamaxkiyaw kilatamatkan (Éx. 34:14).

7. ¿La kinkamakgtayayan Malaquías tlan na’akgatekgsaw la makgkatsi Jehová xpalakata tiku xatapaxuwan skujnanikgo?

⁷ (Kalikgalhtawakga Malaquías 3:16). Tiku nina tamakamastakgo chu nina tamunukgo talakaskin nalilakpuwankgo pi xlakaskinka chuna natlawakgo. Xlikana pi tapakgsiniyaw Jehová lata akxni lakachinaw, chuna la putum latamanin. Pero, kalilakpuwaw pi lu tlan limakgkatsi akxni lilakgapasaw la kiMapakgsinakan chu wa xlakata tamakamastaniyaw chu natlawayaw xtalakaskin (Prov. 23:15). Xla nachuna katsi tiku xatapaxuwan skujnanimakgo chu tsokgwili xtukuwanikan anta «kxlibro xla talakapastakni».

8, 9. ¿Tuku lakaskin Jehová natlawakgo tiku wi xtukuwanikan anta «kxlibro xla talakapastakni»?

⁸ Xlakata natawila kintukuwanikan anta «kxlibro xla talakapastakni» xla Jehová wi  tuku talakaskin natlawayaw. Malaquías lichuwinalh pi talakaskin napekuaniyaw Dios chu nalilakpuwanaw xtukuwani. Komo wi tuku o wi tiku nakakninaniyaw nema ni wa Jehová, xla naxapa kintukuwanikan kxlibro (Éx. 32:33; Sal. 69:28).

⁹ Wa xlakata, tamakamastanikan Jehová ni kaj xman wa nawanaw pi natlawayaw xtalakaskin chu natamunuyaw. Kaj makgtum tamakamastayaw chu tamunuyaw kkilatamatkan chu kaj lakapala makgtum titaxtu. Natatayayaw Jehová chu xlakskujni nalitaxtuyaw kilhchanima nalimasiyayaw tuku natlawayaw kkilatamatkan pi xlikana kgalhakgaxmataw (1 Ped. 4:1, 2).

10. ¿Tuku xkalilakgapaska tiku skujnanikgo Jehová chu tiku ni skujnanikgo?

¹⁰ K’artículo nema titaxtulh lichuwinaw xlakata xli’akxilhtitkan Caín, Salomón chu israelitas. Putum xlakan xwankgo pi xkakninanikgo Dios, pero ni kaj xman wa kakninanikgolh. Umakgolh li’akxilhtit, liwana masiya pi tiku tapakgsinikgo Jehová talakaskin natatayakgo tuku xa’akgstitum chu nalakgmakgankgo tuku nixatlan (Rom. 12:9). Akxni Malaquías xlichuwinanita «libro xla talakapastakni», Jehová lichuwinalh la x’amaka lilakgapaskan «tiku tlan likatsi chu tiku lixkajni likatsi, tiku lakskujnani Dios chu tiku nina lakskujnani» (Mal. 3:18).

11. ¿Tuku xlakata xlakaskinka pi amakgapitsin na’akxilhkgo pi kajwatiya Jehová tamakamastaninitaw?

¹¹ Atanu la tlan nalimasiyayaw pi paxtikatsiniyaw Jehová xlakata kinkalaksaknitan naskujnaniyaw, wa pi amakgapitsin na’akxilhkgo la tatliwakglhtilhama kintakanajlakan (1 Tim. 4:15; Mat. 5:16). Kakinkakgalhskinkan: «¿Akxilhkgo amakgapitsin latamanin pi xlikana ni kmakgxtakga Dios? ¿Kputsa la naktlawa xlakata naklimasiya pi xtatayana Jehová akit?». Jehová lu nalilipuwan komo tiku kalaksaknit xlakata nalakskujnanikgo namaxanankgo akxni nawankgo pi wa tapakgsinikgo (Sal. 119:46; kalikgalhtawakga Marcos 8:38).

12, 13. ¿Tuku xlakata lakgachunin tuwa kalakgapaskan tiku xtatayananin Jehová?

¹² Lu nitlan, pero makgapitsi natalan makglhkatikgo  «ntalakapastakna ntu xala katuxawat» chu wa xlakata ni lhuwa tuku litalakgpalikgo chuna la tiku ni skujnanikgo Dios (1 Cor. 2:12). Latamanin tiku kgalhikgo uma talakapastakni kajwatiya lilakpuwankgo tuku lakgatikgo (Efes. 2:3). Akgtum li’akxilhtit, maski lhuwata tastakyaw mastakanit xlakata talhakgan, makgapitsi lhakganankgo chu takaxtayakgo la xalak kakilhtamaku. Wilikgo lhakgat nema lhtank katawilani o tlawa pi natasiya xmaknikan chu asta akxni ankgo ktamakxtumit. Makgapitsi malakatsalikgo la takgsitkgo o takxkitkgo (1 Tim. 2:9, 10). Wa xlakata, akxni akxtum katalakgo amakgapitsi latamanin, tuwa kalakgapaskan tiku tapakgsinikgo kakilhtamaku chu tiku ni (Sant. 4:4).

¹³ Makgapitsi xtatayananin Jehová tanu la limasiyakgo pi nina lakgmakgankgo tayat xalak kakilhtamaku. Akgtum li’akxilhtit, akxni ankgo kpaskua, tantlikgo chu tlawakgo tuku ni xlitlawat kstalanina Cristo. Mawakakgo xfotoskan kredes sociales chu anta lichuwinankgo tuku ni xliwanat kstalanina Cristo. Max nina makglhtinankgo tastakyaw anta kcongregación xlakata tlawakgonit akgtum lanka talakgalhin, pero nitlan li’akxilhtit kawilinikgo tiku liskujkgo xlakata natlawakgo tuku xatlan (kalikgalhtawakga 1 Pedro 2:11, 12).

14. ¿Tuku natlawayaw xlakata nakuentajtlawayaw la talalinaw Jehová?

¹⁴ Kkakilhtamaku ankgalhin matlawinamputun «tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat» (1 Juan 2:16). Pero akinin tapakgsiniyaw Jehová, wa xlakata xla kinkawaniyan nalakgmakganaw «wa ntu ni maxkiy nkakni Dios, chu wa ntu xtatlawaputu ntu xala kkatuxawat» chu «wa ntu ntlan talakapastakna nkalilatamaw yunu nkatuxawat, chu wa ntu akgstitum, chu wa ntu nalimaxkiyaw nkakni Dios» (Tito 2:12). Putum kkilatamatkan, kkintachuwinkan, tuku wayaw chu tuku likgotnanaw, lhakgat, la takaxtayayaw chu la skujaw, nakalimasiyaniyaw tiku kinka’akxilhkgoyan pi kajwatiya tapakgsiniyaw Jehová (kalikgalhtawakga 1 Corintios 10:31, 32).

15. ¿Tuku xlakata tlan nakalikatsiniyaw chu nakapaxkiyaw kinatalankan?

¹⁵ Xlakata paxtikatsiniyaw Jehová la talalinaw nalitasiya la kalikatsiniyaw kinatalankan. Xlakan na tapakgsinikgo Dios. Komo putum kilhtamaku nalakapastakaw uma, ankgalhin tlan nakalikatsiniyaw chu nakalimasiyaniyaw pi kapaxkiyaw (1 Tes. 5:15). Jesús kawanilh kstalaninanin: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakget, lapi xlakgalhinitit ntapaxkit nchatunu chatunu» (Juan 13:35).

16. ¿Tuku li’akxilhtit kilhtikanit kxLimapakgsin Moisés nema masiya la makgkatsi Jehová xlakata xlakskujnin?

¹⁶ Ka’akxilhwi akgtum li’akxilhtit nema nakinkamakgtayayan na’akgatekgsaw la nakalikatsiniyaw natalan xalak congregación. Tuku xtamaklakaskin kxtemplo Jehová kajwatiya xlimaklakaskinkan kxaxlikana takaknin. Limapakgsin nema xmaxkikanit Moisés liwana xwan la xkuentajtlawakgolh chu xkamakgnikan tiku ni xmakgantaxti uma limapakgsin (Núm. 1:50, 51). Komo Jehová xkuentajtlawa tuku xtamaklakaskin kxtakaknin, nachuna tlakg liwaka kakuentajtlawa xlakskujnin tiku tamakamastanikgonit chu ni makgxtakgkgo. Akgtum kilhtamaku kawanilh xkachikin: «Xlakata tiku kaxamayan xamama kilakgastapu» (Zac. 2:8).

17. ¿Tuku kuenta tlawa Jehová?

¹⁷ Kaks lilakawanaw akxni Malaquías lichuwinalh pi Jehová kuentajtlawa chu kakgaxmatni xlakskujnin akxni akxtum katalakgo amakgapitsin (Mal. 3:16). Xlikana pi «lakgapaskgoy nkimPuchinakan wanti ntapakgsinikgoy» (2 Tim. 2:19). Lu kuentajtlawa tuku lichuwinanaw chu tuku tlawayaw (Heb. 4:13). Akxni ni kalakgalhamanaw kinatalankan, Jehová akxilha. Pero liwana katsiyaw pi kuentajtlawa akxni katapatiyaw chu tlan kamakgamakglhtinanaw, kalakgalhamanaw chu tlan kalikatsiniyaw amakgapitsin (Heb. 13:16; 1 Ped. 4:8, 9).

18. ¿La limasiyaniyaw paxtikatsinit Jehová xlakata makgtapakgsiyaw kxkachikin?

¹⁸ Xlikana pi akinin lu limasiyaniputunaw Jehová pi paxtikatsiniyaw xlakata kinkamaxkiyan talakgalhaman namakgtapakgsiyaw kxkachikin. Katsiyaw pi tuku tlakg xlakaskinka laksaknitaw kkilatamatkan wa namakamaxkiyaw kilatamatkan. Maski lamaw niku wilakgolh «xa’akgtsankgatayanin ntachixkuwitat xla yuma nkilhtamaku», kilhchanima, tiku nitlan likatsikgo, lakaskinaw pi latamanin na’akxilhkgo pi akinin «xalaksmalhwan, xlakgskgatan Dios» chu makaxkgakgenanaw «xtachuna xkgakganat nkatuxawat» (Filip. 2:15). Putum kilhtamaku lakgmakganaw tuku nixatlan (Sant. 4:7). Kapaxkiyaw chu kamaxkiyaw kakni kinatalankan, xlakata katsiyaw pi na tapakgsinikgo Jehová (Rom. 12:10).

19. ¿La kasikulunatlawa Jehová tiku tapakgsinikgo?

¹⁹ Biblia liwana kinkawaniyan uma: «Kintikukan Dios, ni ama ka’akgxtakgwili ti talipawan» (Sal. 94:14, SXP). Uma tamalaknun xlikana nakgantaxtu maski natitaxtuyaw tuku nitlan. Ni para wa linin natlawa pi Dios nialh nakinkapaxkiyan (Rom. 8:38, 39). «Chu wa lapi lamaw, pus wa nkinTlatikan ntapakgsiniyaw, chi lapi naniyaw, na wa ntapakgsiniyaw. Chuna mpi maski latamayaw, su naniyaw, chunata mpi xla nkinTlatikan» (Rom. 14:8). Lakaskinaw pi xchilha ama kilhtamaku akxni nakamaxkipara latamat x’amigos tiku ni makgxtakgkgolh (Mat. 22:32). Asta la uku lipaxuwayaw lhuwa tasikulunalin. Chuna la wan Biblia: «Snun lipaxaw lamaka nak pulataman, latani tachixkuwit ixDioskan tatlawanit xastakna kiDioskan, wanikan Jehová. Snun tapaxawa ama tachixkuwit nima Dios kalaksaknit xlakata ixla natawan» (Sal. 33:12, SXP).