«WA LANANAT, lu[...] xlikana lu[...] lhuwa, wampi wa skujnin, lu[...] tsinu, pus kaskinitit litlan Malana wa nti xla [tachanan], lakimpi namalakgachakgoy skujnin namakikgoy lananat» (Luc. 10:2). Umakgolh xtachuwin Jesús nema lichuwinalh liwaka akgtiy milh kata tatalakxtumi tuku lama la uku kMyanmar. ¿Tuku xlakata? Xlakata la uku kMyanmar anan 55 millones latamanin chu kajwatiya 4,200 tiku lichuwinankgo tamakatsinin xla Tamapakgsin.

Pero Jehová, «Malana wa nti xla [tachanan]» kamakgpuwantininit lhuwa natalan xalak lhuwa kachikinin xlakata naʼankgo latamakgo kʼuma kachikin ksureste xla Asia, xlakata namakgtayanankgo namakikan tachanan xaʼespiritual. ¿Tuku kamakgtayanit namakgxtakgkgo xkachikinkan? ¿Tuku tlawakgolh xlakata tlan na’ankgo? ¿Tuku tasikulunalin makglhtinankgonit? Kaʼakxilhwi.

Nina lhuwa kata, Kazuhiro, chatum precursor xalak Japón, xkgalhi akgtum tajatat nema wanikan epilepsia chu akgtum kilhtamaku tamakgwasli chu takwakalh, nialhtu xkatsi chu linka kʼhospital. Makuchina wanilh pi akgtiy kata nila xʼama matlawani putlaw. Kazuhiro nila xkanajla chu lakpuwa: «¿Tuku naktlawa? Tuku tlakg klipaxuwa wa precursorado chu ni kmakgxtakgputun». Tasaskinilh Jehová pi xmaxkilh litliwakga xlakata chuntiya precursor nalitaxtu.

Kazuhiro wan: «Titaxtulh akgtum papaʼ chu chatum kiʼamigo tiku xmakgtayanama kMyanmar katsilh tuku xaktitaxtuma. Kintachuwinalh chu kiwanilh: “Anta kMyanmar wa tuku tlakg maklakaskinkan wa autobús. Komo natana maski ni kgalhiya putlaw chuntiya tlan naskuja la precursor”. Kgalhskilh makuchina komo tlan nakan latama kMyanmar maski xaktatatla. Lu kaks klilakawa akxni kiwanilh: “Chatum neurólogo xalak Myanmar minit paxialhnan unu kJapón. Nakmalakgapasniyan. Komo chuna natitaxtuparaya, xla tlan namakgtayayan”. Uma kliʼakxilhli la akgtum xtakgalhtin Jehová».

Kazuhiro lakapala malakgachalh akgtum correo ksucursal xla Myanmar niku xwan pi xla chu xpuskat xʼamputunkgo makgtayanankgo la precursores. Kaj akgkitsis kilhtamaku alistalh sucursal kakgalhtilh: «Katantit tlakg talakaskin precursores». Kazuhiro chu xpuskat Mari, stakgolh xputlawkan, lakkaxtlawakgolh xkapsnatkan chu xokgokgolh xpasajekan xla avión. La  uku, lu lipaxuwakgo la skujmakgo kgrupo xla señas xla Mandalay. Kazuhiro wan: «Putum tuku ktitaxtuw matliwakglhnit kintakanajlakan ktamalaknun nema wi kSalmo 37:5, niku wan: “Kamakamaxki milatamat Kimapakgsinakan Dios, kalipawanti, kakanajla xlakata namakgtayayan, y naʼakxilha la natlawaj”».

Kata 2014, xtatayananin Jehová xalak Myanmar kgalhikgolh lu xatlan talakgalhaman, xlakata tawi akgtum lanka tamakxtumit. Chu kamakgamakglhtinankgolh lhuwa natalan xalak atanu países nema minkgolh. Tiku na’alh kʼuma tamakxtumit wa chatum tala xalak Estados Unidos wanikan Monique tiku kgalhi 34 kata. Xla wan: «Akxni kitaspitli la kkilalh kʼuma tamakxtumit, ktlawanilh oración Jehová xlakata tuku xakama tlawa kkilatamat. Nachuna kkatachuwinalh kinatlatni xlakata tuku xaktlawaputun. Kinkgalhtutukan tlan kakxilhwi pi xakalh makgtayanan kMyanmar. Akxni nina liwana xakkatsi tuku xakama tlawa, lhuwa ktlawalh oración chu titaxtulh tsinu kilhtamaku». Monique kinkalitachuwinanan tuku xlakata.

Xla wan: «Jesús kamakgpuwantinilh kstalaninanin pi pulana nalakkaxwilikgo la xlilhuwa nalaktlawakgo tumin. Wa xlakata kinkgalhskinka: “¿Kkgalhi tumin nema natalakaskin xlakata naktlawa uma talakgpalit kkilatamat? ¿Tlan nakmakchani kintumin maski ni lhuwa nakskuja?”». Monique wan: «Tunkun kakxilhli pi ni xakkgalhi lhuwa tumin xlakata nakan latama alakatanu país». Wa xlakata, ¿tuku tlawalh? (Luc. 14:28).

Monique chuntiya lichuwinan: «Akgtum kilhtamaku puskat tiku xaktaskuja kintasanilh xlakata xakalh tachuwinan. Lu xakpekuama, xaklakpuwan pi xʼama kimakglhti kintaskujut. Pero ni, wata kimaxkilh paxtikatsinit la xakskujma chu kiwanilh pi tlakg xʼama kixokgoni. Uma tumin wa tuku xakmaklakaskima xlakata xakxokgolh tuku xaklakgawi».

Monique lama kMyanmar lata diciembre kata 2014. ¿La makgkatsi xlakata makgtayanama kkachikin niku tlakg talakaskin tiku nalichuwinankgo Dios? Xla wan: «Lu kpaxuwa xlakata unu kwi. Kkamakgalhtawakgema kgalhtutu latamanin. Chatum kgalhi 67 kata tiku ankgalhin xatapaxuwan kimakgamakglhtinan. Akxni katsinilh pi xtukuwani Dios wa Jehová, tsukulh tasa. Kiwanilh: “Kaj xlimakgtumku kkgaxmata xtukuwani Dios. Lu tsumatku wix nixawa akit chu kimasiyaninita tuku tlakg xlakaskinka kkilatamat”. Xlikana pi akit na ktasalh. Uma tuku ktitaxtulh tlawa pi lu naklipaxuwa nakkamakgtaya latamanin anta niku tlakg talakaskin tamakgtay». Nina makgas Monique kilalh kʼEscuela xla Tiku lichuwinankgo xTamapakgsin Dios.

Tuku lichuwinalh Anuario de los testigos de Jehová 2013 xlakata Myanmar nachuna kamakgpuwantinilh amakgapitsin naʼankgo latamakgo kʼuma país. Chatum tala tiku kgalhi 30 kata wanikan Li xlama ksureste xla Asia chu putum kilhtamaku kskujma, pero tuku likgalhtawakgalh kʼAnuario makgpuwantinilh naʼan makgtayanan kMyanmar. Xla wa: «Kata 2014, akxni kkilalh kYangón kʼakgtum lanka tamakxtumit, kkalakgapasli akgtum tamakgaxtokgat tiku xmakgtayanamakgolh kMyanmar ktachuwin chino. Xlakata kchuwinan uma tachuwin, klakkaxwililh pi nakan makgtayanan kMyanmar kʼakgtum grupo xla chino. Monique chu akit klakkaxwiliw pi akxtum xakamaw makgtayananaw kMandalay. Jehová kinkasikulunatlawan chu ktekgswi akgtum taskujut nema kaj itat kilhtamaku xakamaw skujaw la makgalhtawakgenanin kʼakgtum escuela. Nachuna ktekgswi niku lakatsu naktawilayaw. Maski lu lhkaknan chu atanu tuku ktitaxtu, lu klipaxuwa xlakata kmakgtayanama kʼuma kachikin. Latamanin xalak Myanmar ni lhuwa tuku kgalhikgo, lu tlan likatsikgo chu kgaxmatputunkgo tamakatsinin xalak Biblia. Lu tapaxuwan akxilhkan la Jehová sikulunatlawa xtaskujut. Liwana kkatsi pi Jehová lakaskin chuntiya nakmakgtayanan unu kMandalay».

Lhuwa natalan tiku makgtayanamakgo kkachikin niku tlakg talakaskin tamakgtay akxilhkgonit pi tlawakan oración lu makgtayanan. Akgtum liʼakxilhtit, Jumpei chu xpuskat Nao, xchatiykan xkgalhikgo liwaka 30 kata, xmakgtayanamakgolh kʼakgtum congregación ktachuwin xla señas anta kJapón. ¿Tuku xlakata ankgolh latamakgo kMyanmar? Jumpei kinkawaniyan: «Kimpuskat chu akit ankgalhin xaklakpuwanitaw pi xakmakgtayanaw kʼatanu país. Chatum tala xalak kincongregacionkan tiku xmakgtayanama ktachuwin xla señas xʼanit latama kMyanmar. Chu akinin nachuna kaw latamayaw mayo kata 2010, maski ni lhuwa tumin xakkgalhiyaw. Natalan xalak Myanmar xatapaxuwan kinkamakgamakglhtinankgon». ¿Tuku wan Jumpei xlakata la talichuwinan Dios kMyanmar? Xla wa: «Latamanin lu kgaxmatputunkgo tamakatsinin. Tiku akgatapakgo kaks lilakawankgo akxni akxilhkgo videos ktachuwin xla señas. Lu klipaxuwayaw xlakata unu kwilaw».

¿Tuku tlawakgonit Jumpei chu Nao xlakata natekgskgo tuku maklakaskinkgo? Xla wan: «Titaxtulh akgtutu kata, kakxilhwi pi xaklaktlawanitaw tumin nema xakkgalhiyaw chu nialh xakkgalhiyaw tuku xakamaw lixokgoyaw niku xakwilaw kata nema aku xmima. Lhuwa ktlawaniw oración Jehová. Lu kaks klilakawaw akxni sucursal kinkawanin pi xakamaw skujaw la precursores especiales ni lhuwa kilhtamaku. Klipawaw Jehová chu xla ni kinkamakgxtakgni. Ankgalhin kinkakuentajtlawanitan». Nina makgas, Jumpei chu Nao kilakgolh kʼEscuela xla Tiku lichuwinankgo xTamapakgsin Dios.

Simone, chatum tala xalak Italia tiku kgalhi 43 kata, chu xpuskat Anna, xalak Nueva Zelanda kgalhi 37 kata, ankgolh latamakgo kMyanmar. ¿Tuku kamakgpuwantinilh? Anna wan: «Anuario xla 2013 nema lichuwinalh xlakata Myanmar». Simone wan: «Akgtum lanka talakgalhaman makgtayanankan kMyanmar. Tlan lhuwa kskujni Jehová xlakata ni lhuwa tuku klilakgaputsa. Kaks malakawaninan la Jehová kinkakuentajtlawayan akxni makgtayananaw niku tlakg talakaskima tiku lichuwinankgo Dios» (Sal. 121:5). Anna lichuwinampara: «Nikxni xakpaxuwanit chuna la uku. Ni lhuwa tuku kkgalhi chu tlakg lhuwa kilhtamaku akxtum ktatawila kinchixku. Nachuna lhuwa amigos kkgalhiyaw. Latamanin ni kalaksakpaxkikgo xtatayananin Jehová, lu kaks malakawaninan xlakata lu katsiputunkgo tuku xaxlikana». ¿Tuku xlakata?

Anna wan: «Akgtum kilhtamaku ktachuwinalh chatum tsumat tiku an k’universidad anta niku stanankan chu kwanilh pi xakamapa tachuwinan. Akxni kakxilhpa uma tsumat, xtamin xʼamiga. Atanu kilhtamaku xkatamin kgalhatati. Chu alistalh kgalhakitsis. La uku xputumkan kkamakgalhtawakgema». Simone wan: «Latamanin tiku kkalitachuwinanaw Dios lu tlan likatsikgo chu lhuwa takgalhskinin tlawakgo. Lu katsiputunkgo tamakatsinin. Ni kkgalhiyaw kilhtamaku xlakata nakkatachuwinanaw xputumkan».

 ¿Tuku tlawakgolh makgapitsi akxni nina xʼankgo kMyanmar? Mizuho, xalak Japón, wan: «Kinchixku Sachio, chu akit ankgalhin xakmakgtayanamputunaw kʼatanu país niku tlakg xtalakaskin tamakgtay, pero ¿niku tlan xakaw? Tuku xlichuwinan Anuario 2013 lakgchalh kinakujkan. Wa xlakata klakpuwaw pi nakanaw makgtayananaw kMyanmar». Sachio wan: «Klakkaxwiliw pi naktamakgxtakgaw akgtum semana kYangón, kachikin nema tlakg xlakaskinka xla Myanmar. Xakakxilhputunaw la xwanit. Uma tuku ktlawaw kinkamalakpuwanin pi tlan nakanaw latamayaw anta».

Rodney chu xpuskat Jane, xalak Australia kgalhikgo 50 kata. Chu nachuna xkamanankan Jordan chu Danica, makgtayanamakgolh kMyanmar lata kata 2010. Rodney wan: «Akxni kakxilhwi pi latamanin lu xmaklakaskinkgo tuku xla xtakanajlakan lu kkamakgtayaputuw. Kamakgpuwantini familias pi kamakgtayanankgolh kʼakgtum país chuna la kMyanmar». ¿Tuku xlakata chuna wan? Xla wan: «Tasikulunalin nema kmakglhtinanitaw nitu tuku xtachuna. Lhuwa kamanan lu lilakgaputsakgo xteléfonoskan, xputlawkan, xtaskujutkan chu atanu. Kinkamanankan lu liskujmakgolh xlakata katsinimakgolh xasasti tachuwin nema namaklakaskinkgo akxni nalichuwinankgo Dios. Liwana kamasiyaniputunkgo latamanin tuku wan Biblia chu mastaputunkgo xtakgalhtinkan ktamakxtumit. Wa uma tuku lu liskujkgo chu atanu tuku xla xtakanajlakan».

Oliver chatum tala xalak Estados Unidos tiku kgalhi 37 kata. Xla lichuwinan tuku xlakata makgpuwantininan nachuna natlawayaw: «Klakskujnani Jehová niku ni klismaninit lu kimakgtayanit. Xlakata alakatanu niku kwi matliwakglhnit kintakanajla chu la klipawan Jehová, maski tuwa tuku ktitaxtunit. Kkataskuja tiku ni kkalakgapasa, chu akxtum tuku kkanajlayaw kimakgtayanit liwana nakatsi pi ni anan atanu tuku tlakg xlakaskinka chuna la xTamapakgsin Dios». La uku Oliver chu xpuskat, Anna, chuntiyaku xatapaxuwan kalitachuwinankgo Dios latamanin ktachuwin chino.

Trazel, chatum tala xalak Australia, tiku kgalhi 52 kata chuntiya makgtayanama kMyanmar lata kata 2004. Xla wan: «Xlikana kkamakgpuwantiniyan pi putum tiku matlani kamakgtayanankgolh niku tlakg talakaskin tiku nalichuwinan Dios. Kakxilhnit pi Jehová sikulunatlawa tiku lakskujnaniputun. Nikxni xaklakpuwanit pi chuna xakama tlawa. Wa uma tuku tlakg tlan ktlawanit kkilatamat».

Klakaskinaw pi uma tuku wankgo natalan namakgpuwantiniyan komo wix na tlan napina kamakgtayaya latamanin niku nina talichuwinan Dios. Xtachuna la komo natalan tiku makgtayanamakgolh anta xkawanikgon: «¡Katitaxtu kMyanmar chu kakilamakgtayaw!».