BIBLIA limin xtachuwinkan latamanin tiku na xmakgkatsikgo «chuna la akinin» (Sant. 5:17). Akgtum liʼakxilhtit, apóstol Pablo liwana wa: «Akxni ktlawaputun tuku tlan, kmakgkatsi pi wata wa ktlawaputun tuku nitlan. [...] ¡Kgoxota chixku akit!» (Rom. 7:21-24). Xlikana pi max nachuna makgkatsiyaw. Akxni talatlawayaw kintalakgalhinkan, tuku xla lichuwinalh tlan kinkamamakgkatsiniyan.

Pero Pablo na lichuwinalh tuku xmakgkatsi xlakata xtamakamastan Jesús. Anta kʼGálatas 2:20 lichuwinalh: «[Wa] xKgawasa Dios [...] kimpaxkilh chu tamakamastalh kimpalakata». Apóstol Pablo liwana xkatsi pi uma xlikana. ¿Akinin nachuna lakpuwanaw la xla? Max lakgachunin nichuna.

Komo lakpuwanaw pi nitu litaxtuyaw xlakata tlawaw talakgalhin makgasa, max lakgachunin tuwa namakgkatsiyaw namakgamakglhtinanaw pi Jehová kinkatapatinitan chu pi kinkapaxkiyan. Chu max tlakg tuwa naʼakgatekgsaw pi talakgmaxtut akgtum tamaskiwin nema kinkamaxkikanan chatunu chatunu akinin. ¿Xlikana chuna lakaskin Jesús naʼakxilhaw talakgmaxtut? Komo chuna, ¿tuku nakinkamakgtayayan chuna naʼakxilhaw? Kakgalhtiw umakgolh akgtiy takgalhskinin.

Jesús lakaskin pi kamakgamakglhtinaw xtamakamastan la komo akgtum tamakamastan nema xla kinkamaxkiyan chatunu chatunu akinin. ¿Tuku xlakata liwana katsiyaw uma? Kalilakpuwaw tuku lichuwinan Lucas 23:39-43. Chatum chixku tiku na xwaka kkgantum kiwi kxpaxtun Jesús litaya talakgalhin nema xtlawanit. Max lu nitlan talakgalhin nema tlawalh, xlakata chuna la xmalakgaxokgemaka kajwatiya chuna xkamalakgaxokgekan tiku xtlawakgo lu xalixkajni talakgalhin. Xlakata lu lilakgaputsama tuku titaxtuma, tasaskini Jesús: «Kakilakapastakti akxni natanuya kminTamapakgsin».

¿Tuku kgalhti Jesús? Kalilakpuwaw pi lu katsani akxni talakgaspita xlakata nalakaʼakxilha uma makglakgalhina. Maski lu katsanima, xatapaxuwan talitsin uma chixku chu wani: «Xlikana kwaniyan uku: Nakintatawilayapi kParaíso». Max Jesús kajwatiya tlan xtiwanilh pi xKgawasa chixku xminit «xlakata namasta xlatamat chu nakalilakgmaxtu lhuwa latamanin» (Mat. 20:28). Pero, makgtayalh uma chixku xlakata naʼakgatekgsa pi xʼama tamakamasta xpalakata. Limasiyanilh tapaxkit akxni wanilh «nakintatawilayapi» chu wanilh la xʼama litamakgtaya tamakamastan: tlan xlatamalh kʼakgtum Paraíso unu kKatiyatni.

Uma chixku ni kgalhilh kilhtamaku xlakata naskujnani Dios. Pero xlikana pi Jesús xlakaskin xakgatekgsli pi xtamakamastan akgtum tamaskiwin nema xʼama maxki. Komo Jesús xlakaskin pi uma chixku chuna xakgatekgsli, xlikana lakaskin pi chatum kstalanina tiku tamununita chu skujnani Dios naʼakgatekgsa. Wa xlakata, ¿tuku nakinkamakgtayayan liwana naʼakgatekgsaw pi xtamakamastan Cristo kinkamakgtayayan chatunu chatunu akinin maski xtlawanitaw talakgalhin makgasa?

Pablo xakgatekgsnit pi Jesús xninit xpalakata, xlakata xlakgayawanit nakalitachuwinan xtachuwin  Dios amakgapitsin. Lichuwinalh: «Lu kpaxtikatsini Cristo Jesús kiMalanakan, tiku kimaxkilh litliwakga xlakata kiʼakxilhli pi ni kmakgxtakgnan chu kilakgayawalh xasanto taskujut, maski xapulana lixkajnit klichuwinalh Dios, kputsastalanilh xkachikin chu ktlankajwanalh» (1 Tim. 1:12-14). Xlakata makgamakglhtinalh uma taskujut makgtayalh xlakata liwana naʼakgatekgsa pi Jesús xlimasiyaninit talakgalhaman. Jesús nachuna kinkalakgayawanitan nalichuwinanaw Tamapakgsin (Mat. 28:19, 20). ¿Nachuna makgkatsiyaw la Pablo?

Kaʼakxilhwi tuku titaxtulh Albert, tiku 34 kata lata xtamakxtukanit kcongregación chu nina makgas lakgtaspitpa Jehová. Xla lichuwinan: «Kintalakgalhin ankgalhin wi kkilakatin. Pero akxni kan lichuwinan Dios, kmakgkatsi pi Jesús kilakgayawanit uma taskujut chuna la Pablo. Uma tlawa pi nakpaxuwa chu kimakgtaya xlakata naklakpuwan tuku tlan kimpalakata chu xlakata kilatamat chu xlakata kilhtamaku nema aku mima» (Sal. 51:3).

Allan lu xaluku xwanit chu tlawalh tuku nitlan akxni nina xlakgapasa xaxlikana. Xla wan: «Klilakpuwanku tuku nitlan ktlawalh. Min kilhtamaku lu klilipuwan. Pero kpaxtikatsini Jehová pi maxki talakaskin chatum makglakgalhina chuna la akit pi nakalini xalakwan tamakatsinin latamanin. Chuna la latamanin makgamakglhtinankgo tamakatsinin, kimalakapastaka pi Jehová lu xapaxkina chu lu xalakgalhamana. Klakpuwan pi xla kilimaklakaskin xlakata nakkamakgtaya latamanin tiku chuna likatsikgo la akit xaklikatsi».

Lichuwinankan xtachuwin Dios kinkamakgtayayan wa nalilakpuwanaw chu naliskujaw tuku xatlan. Kinkamakgtayayan liwana naʼakgatekgsaw pi Jesús kinkalimasiyaniyan talakgalhaman, pi kinkapaxkiyan chu kinkalipawanan.

Max kinakujkan chuntiya nitlan nakinkamamakgkatsiniyan xlakata talakgalhin nema tlawanitaw makgasa asta klisputni xkakilhtamaku Satanás. ¿Tuku nakinkamakgtayayan natalatlawayaw uma talakapastakni?

Jean ankgalhin nitlan limakgkatsi xlakata akxni aku kstakma pulaktiy la xlin xlatamat. Pero xla wan: «Lu tlan klimakgkatsi pi “Dios tlakg lanka nixawa kinakujkan”» (1 Juan 3:19, 20). Akinin na tlan makgkatsiyaw xlakata katsiyaw pi Jehová chu Jesús akgatekgskgo pi makglakgalhinanin akinin. Kalakapastakwi pi tapaxkit kamakgpuwantinilh nakinkamaxkikgoyan talakgmaxtut, akinin tiku makglakgalhinanin chu nitlan limakgkatsiyaw kintalakgalhinkan, chu ni wa kamaxkika tiku ni kgalhikgo talakgalhin (1 Tim. 1:15).

Liwana nakatsiyaw pi talakgmaxtut akgtum tamaskiwin nema chatunu chatunu kinkamaxkikanitan komo natlawayaw uma pulaktiy: nalilakpuwanaw la kalikatsinilh Jesús latamanin maski makglakgalhinanin xwankgonit chu naliskujaw xlakata namakgantaxtiyaw taskujut nema kinkalakgayawanitan. Komo chuna natlawayaw, tlan nawanaw la Pablo: Jesús «kimpaxkilh chu tamakamastalh kimpalakata».