1. Chuna la wan 3 Juan 3, 4, ¿tuku lu kinkamakgapaxuwayan?

¿LILAKPUWANAW la paxuwalh apóstol Juan akxni katsilh pi kstalaninanin Cristo tiku kamakgtayalh nalakgapaskgo tuku xaxlikana chuntiyaku ni xmakgxtakgkgo Jehová? Juan xkaliʼakxilha chuna la xkamanan umakgolh kstalaninanin Cristo. Xlakata xkgalhikgo lhuwa taʼakglhuwit, Juan tlawalh tuku xmatlani xlakata xkamatliwakglhnilh xtakanajlakan. Akinin nachuna lu lipaxuwayaw akxni kinkamanankan, chu tiku kamakgtayaw nalakgapaskgo tuku xaxlikana, makamaxkikgo xlatamatkan Jehová chu chuntiya skujnanikgo (kalikgalhtawakga 3 Juan 3, 4).

2. ¿Tuku xlakata Juan tsokgwililh maktutu cartas?

² Kkata 98, Juan xlama kʼÉfeso o lakatsu anta. Max anta alh latama akxni tamakxtuka kpulachin xla Patmos. Ama kilhtamaku, xʼespíritu santo Jehová malakpuwanilh natsokgwili maktutu cartas. Tsokgwililh umakgolh cartas xlakata nakamakgpuwantini kstalaninanin Cristo chuntiya nakanajlanikgo Jesús chu chuntiya nalatamakgo kxaxlikana.

3. ¿Tuku takgalhskinin nakgalhtiyaw kʼuma artículo?

³ Ama kilhtamaku, kajwatiya apóstol Juan tiku xlamajku chu lu xmakgalipuwan xlakata nixaxlikana makgalhtawakgenanin xtlawamakgolh tuku nitlan kcongregaciones (1 Juan 2:18, 19, 26). * Umakgolh apóstatas xwankgo pi xlakgapaskgo Dios, pero xlakgmakgankgo xlimapakgsin. Kʼuma artículo, naʼakxilhaw tastakyaw nema mastalh Juan chu nakgalhtiyaw akgtutu takgalhskinin: ¿tuku kilhchanima latamakan kxaxlikana?, ¿tuku  tuwa titaxtuyaw?, ¿chu la nalamakgtayayaw xlakata chuntiya nalatamayaw kxaxlikana?

4. Chuna la wan 1 Juan 2:3-6 chu 2 Juan 4, 6, ¿tuku natlawayaw xlakata nalatamayaw kxaxlikana?

⁴ Xlakata nalatamayaw kxaxlikana, pulana talakaskin nalakgapasaw tuku xaxlikana nema wi kxTachuwin Dios, Biblia. Nachuna, talakaskin nakgalhakgaxmataw xlimapakgsin Jehová (kalikgalhtawakga 1 Juan 2:3-6; 2 Juan 4, 6). Jesús wililh lu xatlan liʼakxilhtit xlakata uma. Wa xlakata pulaktum la nakgalhakgaxmataw Jehová wa pi nastalaniyaw xliʼakxilhtit Jesús (Juan 8:29; 1 Ped. 2:21).

5. ¿Tuku liwana kilikatsitkan?

⁵ Xlakata chuntiya nalatamayaw kxaxlikana, talakaskin liwana nakatsiyaw pi Jehová wa xaxlikana Dios chu xlikana tuku kinkawaniyan kxTachuwin. Nachuna liwana kilikatsitkan pi Jesús wa Mesías tiku xwankanit pi namin. La uku, lhuwa latamanin ni kanajlakgo pi Jesús wa tiku laksakkanit xlakata Mapakgsina nawan kxTamapakgsin Dios. Juan lichuwinalh pi xʼanan «lhuwa akgskgawinanin», tiku xkaʼakgskgawikgolh tiku ni liwana xkatsikgolh tuku xaxlikana xlakata Jehová chu Jesús (2 Juan 7-11). Juan tsokgli: «¿Tiku akgsanina? ¿Ni wa tiku wan pi Jesús nixaxlikana Cristo?» (1 Juan 2:22). Xlakata ni nakinkaʼakgskgawikanan talakaskin nalikgalhtawakgayaw xTachuwin Dios. Komo chuna natlawayaw nalakgapasaw Jehová chu Jesús (Juan 17:3). Chu chuna liwana nakatsiyaw pi kgalhiyaw xaxlikana.

6. ¿Tuku tuwa titaxtukgo lakgkgawasan chu laktsuman?

⁶ Putum kstalaninanin Cristo talakaskin kuenta natlawayaw xlakata ni nakinkaʼakgskgawikgoyan tuku lakpuwankgo latamanin (1 Juan 2:26). Tiku tlakg kuenta xlitlawatkan wa lakgkgawasan chu laktsuman. Alexia, * chatum tala xalak Francia tiku kgalhi 25 kata, wan: «Akxni xakan kʼescuela, kgalhtawakgalh xlakata evolución chu atanu tuku masiyakgo latamanin. Uma tlawalh pi xaklakpuwa pi nixaxlikana tuku xakkanajla. Lakgachunin lu lilakgatit xakakxilha. Pero klakpuwa pi nitlan xwanit kajwatiya xakkgaxmatli tuku xkimasiyanimaka kʼescuela pero ni xakmaxkilh talakaskin Jehová pi xkintachuwinalh». Alexia likgalhtawakgalh libro La vida... ¿cómo se presentó aquí? ¿Por evolución, o por creación? Ni makgas kilhtamaku, nialh chuna  lakpuwa. Xla wampara: «Liwana kkatsilh pi Biblia kgalhi tuku xaxlikana. Chu kʼakgatekgsli pi komo nakkgalhakgaxmata xlimapakgsin lu xakpaxuwalh chu xakkgalhilh takaksni».

7. ¿Tuku tayat nalakgmakganaw chu tuku xlakata?

⁷ Putum kstalaninanin Cristo, maski lakgkgawasanku akinin o linawa kata, kuenta natlawayaw xlakata ni nalakgaputiyunanaw. Juan lichuwinalh uma akxni wa pi nila nalatamayaw kxaxlikana chu nachuna natlawayaw talakgxtumit xalimaxana (1 Juan 1:6). Komo lakaskinaw pi Dios tlan kakinkaʼakxilhni la uku chu kkilhtamaku nema aku mima, talakaskin natlawayaw tuku tlan kxlakatinkan amakgapitsin. Tuku xaxlikana wa pi nila tuku matsekgaw xlakata Jehová putum akxilha (Heb. 4:13).

8. ¿Tuku nalakgmakganaw?

⁸ Nachuna talakaskin nalakgmakganaw tuku lakpuwan kakilhtamaku xlakata talakgalhin. Apóstol Juan tsokgli: «Komo wanaw pi ni kgalhiyaw ntalakgalhin, akstu taʼakgskgawiyaw» (1 Juan 1:8). Kxkilhtamaku Juan, apóstatas xlakpuwankgo pi chatum lataman tlan xmakglakgalhinalh chu chuntiya tlan xtalalilh Dios. La uku nachuna lakpuwankgo. Wankgo pi kanajlanikgo Dios, pero ni xlakaskinka akxilhkgo tuku wan Dios xlakata talakgalhin, liwaka xlakata talakgxtumit. Tuku Jehová wan pi talakgalhin, latamanin wankgo pi kaj tlawakgo tuku lakgatikgo.

9. ¿La kamakgtaya lakgkgawasan chu laktsuman nalilatamakgo tuku katsinikgonit kBiblia?

⁹ Lakgkgawasan chu laktsuman tiku skujnanimakgolh Jehová, max na tlan nalakpuwankgo chuna la tiku kataʼankgo kʼescuela o tiku kataskujkgo xlakata talakgxtumit xalimaxana. Chuna titaxtulh chatum kgawasa tiku wanikan Aleksandar. Xla lichuwinan: «Makgapitsi laktsuman tiku xakkataʼan kʼescuela xlakaskinkgo pi xakkatatalakgxtumilh. Xwankgo pi komo ni xakkgalhi kintaskin, xakkalakgati lakchixkuwin».  Max wix, nachuna titaxtunita. Komo chuna, kalakapastakti pi xlakata wix lilatapaya tuku katsininita kBiblia, tlan namakgkatsiya, ni natatatlaya, nitu nalilakgaputsaya chu tlan natalalipina Jehová. Chu komo natayaniya, ni tuwa nawan natlawaya tuku tlan. Ankgalhin kalakapastakti pi wa Satanás tiku kamalakpuwani latamanin tuku nitlan xlakata talakgxtumit. Wa xlakata akxni wix ni lakpuwana chuna la kakilhtamaku, makgatlajaya tiku lixkajni likatsi (1 Juan 2:14).

10. ¿La kinkamakgtayayan 1 Juan 1:9 chuntiya naskujnaniyaw Jehová xlakata kgalhiyaw xaskulunku talakapastakni?

¹⁰ Katsiyaw pi Jehová wa tiku wan tuku akgtum talakgalhin. Chu lu liskujaw xlakata nalakgmakganaw. Pero akxni tlawayaw talakgalhin, waniyaw kʼoración (kalikgalhtawakga 1 Juan 1:9). Chu komo tlawanitaw akgtum lanka talakgalhin, putsayaw xtamakgtaykan lakgkgolotsin xlakata Jehová kalakgayawanit nakinkakuentatlawakgoyan (Sant. 5:14-16). Pero ni namastayaw talakaskin pi tuku tlawanitaw makgasa nitlan nakinkamamakgkatsiniyan. ¿Tuku xlakata? Xlakata xapaxkina kinTlatkan Jehová makamastalh xKgawasa xlakata nakinkatapatikanan kintalakgalhinkan. Akxni Jehová wan pi nakatapati tiku makgxtakgkgo xtalakgalhinkan, makgantaxti xtachuwin. Chuna tlan naskujnaniyaw xlakata nakgalhiyaw xaskulunku talakapastakni (1 Juan 2:1, 2, 12; 3:19, 20).

11. ¿Tuku natlawayaw xlakata apóstatas ni natlawakgo pi nialh nalipawanaw Jehová?

¹¹ Wi atanu tuku na nalakgmakganaw: tuku wankgo apóstatas. Lata akxni lakatsukulh congregación xla kstalaninanin Cristo, Satanás kalimaklakaskima umakgolh latamanin xlakata nakaʼakgskgawikgo xlakskujnin Dios. Wa xlakata, talakaskin nakatsiyaw tuku xaxlikana chu tuku ni xaxlikana. * Kintalamakgasitsinkan  max namaklakaskinkgo Internet chu redes sociales xlakata namaxlajwanikgo la lipawanaw Jehová chu tapaxkit nema kakgalhiniyaw kinatalankan. Kalakgmakgaw umakgolh taʼakgsanin, xlakata wa Satanás tiku malakgatumima (1 Juan 4:1, 6; Apoc. 12:9).

12. ¿Tuku xlakata namatliwakglhaw takanajla nema kgalhiniyaw xaxlikana nema katsininitaw?

¹² Komo lakgmakgamputunaw tuku kinkalitalatlawayan Satanás talakaskin namatliwakglhaw la lipawanaw Jesús chu tuku makgantaxti kxtalakaskin Dios. Nachuna talakaskin nakalipawanaw skujni xatalipaw chu xaskgalala, tiku Jehová kamaklakaskin xlakata napulalin xkachikin (Mat. 24:45-47). Komo ankgalhin likgalhtawakgayaw xTachuwin Dios, tlakg natatliwakglha la lipawanaw Jehová chu kintakanajlakan nalitaxtu la xtankgaxekg kiwi nema lu pulhman aknu. Pablo lichuwinalh uma akxni katsokgnanilh colosenses: «Chuna la kanajlaninitantit Cristo Jesús kiMalanakan, milatamatkan chuntiya xliwanat chuna la xlatamat, chuna la katsininitantit, kakamatliwakglhni chuna la kanajlaniyatit Cristo» (Col. 2:6, 7). Komo kintakanajlakan tliwakga wi, putum tuku natlawa Satanás o amakgapitsin ni kintikamaxlajwanin (2 Juan 8, 9).

13. ¿Tuku katsiyaw kstalaninanin Cristo, chu tuku xlakata?

¹³ Katsiyaw pi kakilhtamaku ni kintikaʼakxilhputun (1 Juan 3:13). Juan kinkamalakapastakayan pi «kakilhtamaku wa akgchipanit tiku lixkajni likatsi» (1 Juan 5:19). Xlisputni uma kakilhtamaku tlakg talakatsuwinit, wa xlakata Satanás tlakg sitsinit (Apoc. 12:12). Ni kajwatiya limaklakaskin talakgxtumit xalimaxana chu xtaʼakgsaninkan apóstatas, wata na limaklakaskin xlitliwakga. Xla katsi pi nialh lhuwa kilhtamaku kgalhi, wa xlakata lu liskuja namalakgachokgo la lichuwinankan Dios o namalakgsputu kintakanajlakan. Ni kaks kinkamalakawaniyan pi alakatanu países ni mastakan talakaskin nalichuwinankan Dios. Maski chuna, kinatalankan chuntiya tayanimakgolh. Limasiyakgo pi nikxni katimakgxtakgwi Dios maski lhuwa tuku nakinkatlawaniyan Akgskgawini.

14. ¿La nakamakgtayayaw kinatalankan chuntiya nalatamakgo kxaxlikana?

¹⁴ Tlan nakamakgtayayaw natalan chuntiya nalatamakgo kxaxlikana komo nakalakgalhamanaw (1 Juan 3:10, 11, 16-18). Wa xlakata talakaskin nalalimasiyaniyaw tapaxkit akxni tlan o nitlan kinkakitaxtuniman. Akgtum liʼakxilhtit, ¿lakgapasaw chatum tala tiku aku makgatsankgalh klinin tiku lu xpaxki chu maklakaskin takgoxumixat o atanu tamakgtay? ¿Katsiyaw pi xlakata lalh tuku masputunan natalan maklakaskinkgo tamakgtay xlakata nakaxtlawakgo Pukgalhtawakga xla xtatayananin Jehová o xchikkan? Xaxlikana tapaxkit chu talakgalhaman nema kakgalhiniyaw kinatalankan natlawa pi nalimasiyayaw akxni wi tuku natlawayaw chu ni kaj tuku nawanaw.

15. Chuna la wan 1 Juan 4:7, 8, ¿tuku kilitlawatkan?

¹⁵ Akxni lalimasiyaniyaw tapaxkit chatunu chatunu, stalaniyaw xliʼakxilhtit xapaxkina kinTlatkan xalak akgapun (kalikgalhtawakga 1 Juan 4:7, 8). Pulaktum la nalimasiyayaw tapaxkit wa akxni katapatiyaw amakgapitsin. Akgtum liʼakxilhtit komo wi tiku nitlan nakinkamamakgkatsiniyan, tapaxkit natlawa pi natapatiyaw chu nialh nalakapastakaw tuku kinkatlawanin (Col. 3:13). Kaʼakxilhwi tuku titaxtulh chatum tala tiku wanikan Aldo. Lu nitlan makgkatsilh akxni kgaxmatli pi chatum tala tiku lu xmaxki kakni nitlan kalichuwinalh latamanin xalak xkachikin. Aldo lichuwinan: «Makglhuwa xakskini Jehová pi  xkimakgtayalh xlakata ni naklakpuwan pi uma tala nitlan likatsi». Pero wi tuku tlawalh: wanilh pi xtaʼalh akxni xʼalh lichuwinan Dios. Chu wanilh la xmakgkatsi. Lichuwinan: «Akxni akgatekgsli la klimakgkatsilh tuku wa, kiwanilh pi xaktapatilh. Chuna la kintachuwinalh kakxilhli pi lu nitlan xlimakgkatsi. Klakkaxtlawaw uma taʼakglhuwit chu alistalh tlan klatalalimparaw».

16, 17. ¿Tuku talakaskin natlawayaw?

¹⁶ Apóstol Juan lu xkapaxki xnatalan chu xlilakgaputsa xlakata tlan xtawilalh xtakanajlakan. Chu uma liwana tasiya ktastakyaw nema mastalh kcartas nema tsokgwililh. Lu kinkamakgpuwantiniyan akxni katsiyaw pi lakchixkuwin chu lakpuskatin tiku naʼankgo kʼakgapun xlakata natamapakgsinankgo Cristo nachuna lu xapaxkinanin chuna la Juan (1 Juan 2:27).

¹⁷ Kuenta katlawaw tastakyaw nema akxilhnitaw. Kalakkaxwiliw xlakata ankgalhin nalatamayaw kxaxlikana chu ankgalhin nakgalhakgaxmataw Jehová. Kalikgalhtawakgaw xTachuwin chu wa kalipawaw. Kamatliwakglhwi kintakanajlakan nema kgalhiniyaw Jesús. Kalakgmakgaw talakapastakni nema kgalhikgo latamanin chu tuku wankgo apóstatas. Chu kaliskujwi xlakata ni nalakgaputiyunanaw chu ni natlawayaw talakgalhin. Kamastaw talakaskin pi nakinkapulalinan xtastakyaw Jehová xlakata la linkan latamat. Chu kakamakgtayaw kinatalankan xlakata tliwakga nawankgo akxni nakatapatiyaw tiku nitlan tuku kinkatlawanikgon chu kakamakgtayaw tiku maklakaskinkgo tamakgtay. Wa xlakata, maski tuwa tuku natitaxtuyaw, chuntiya nalatamayaw kxaxlikana.