Jesús xaPuxku Sacerdote litaxtulh akxni tamunulh, kkata 29. ¿Tuku likatsiyaw? Kaʼakxilhwi. Akxni tamunulh limasiyalh pi xatapaxuwan xʼama makamasta xlatamat kpumakamastan nema kilhchanima «xtalakaskin» Dios (Gál. 1:4; Heb. 10:5-10). Xlakata uma pumakamastan lakkaxwilika lata akxni tamunulh Jesús, katsiyaw pi xalanka templo xaʼespiritual nachuna watiya uma kilhtamaku lakkaxwilika, xlakata pumakamastan lu xlakaskinka litaxtu kʼuma templo xaʼespiritual. Xtemplo Jehová xaʼespiritual kilhchanima putum tuku kinkamaxkiyan talakaskin nakakninaniyaw chuna la xla lakaskin xlakata xtamakamastan Jesús (Mat. 3:16, 17; Heb. 5:4-6).

Lata akxni lakkaxwilika templo xaʼespiritual, xtalakaskin chatum xapuxku sacerdote. Wa xlakata, Jehová lilaksakli Jesús «xʼespíritu santo chu xlitliwakga» (Hech. 10:37, 38; Mar. 1:9-11). Pero, ¿la likatsiyaw pi Jesús xaPuxku Sacerdote litaxtulh akxni nina xniy chu akxni nina xlakastakwanan? Chuna wanaw xlakata tuku masiya xliʼakxilhtit Aarón chu tiku xapuxku sacerdotes litaxtukgolh akxni xla xninita, kilhtamaku akxni xtapakgsinikan xLimapakgsin Moisés.

Limapakgsin xwan pi kajwatiya xapuxku sacerdote tlan xtanulh niku Tlakg xaSanto chu alistalh ktemplo. Maktum cortina xmapapitsi Santo chu niku Tlakg xaSanto, chu xapuxku sacerdote kajwatiya tlan xtanu Kilhtamaku akxni kXapakan Talakgalhin (Heb. 9:1-3, 6, 7). Aarón chu tiku xapuxku sacerdotes litaxtukgolh kalakgayawaka uma taskujut akxni nina xlaktanukgo «kcortina» nema xwaka ktabernáculo. Xtachuna la uma, xtalakaskin pi Jesús xaPuxku Sacerdote xtilitaxtulh akxni nina xniy, chu alistalh laktanulh «kcortina, nema kilhchanima, xtiyatliwa» xlakata nalatama kʼakgapun (Heb. 10:20). Wa xlakata, apóstol Pablo lichuwinalh pi Jesús «milh xlakata xapuxku sacerdote nalitaxtu» chu alistalh «tanulh anta niku xasanto nema ni kaj latamanin tlawakgonit» uma kilhchanima akgapun (Heb. 9:11, 24).

Akxni lakkaxwilika xasasti talakkaxlan na akxni tsukulh kgantaxtu. ¿Tuku xlakata chuna wanaw? Xlakata akxni Jesús alh k’akgapun chu makamastalh xtapalh xlatamat nema ni kgalhi talakgalhin xlakata nakalilakgmaxtu latamanin, tsukulh tuku x’ama makgtayanan xlakata tlan xlakkaxwilika xasasti talakkaxlan chu nachuna tlan xtsukulh kgantaxtu. Uma pulaktutu la kgantaxtulh. ¿Tuku umakgolh?

Pulana, Jesús tayalh kxlakatin Jehová. Xlipulaktiy, makamaxkilh xTlat xtapalh xlatamat nema ni xkgalhi talakgalhin. Chu xlipulaktutu, Jehová makgamakglhtinalh xtapalh xkgalhni nema kstajmakganit. Xasasti talakkaxlan tsukulh kgantaxtu akxni tlawaka uma pulaktutu.

Biblia ni liwana lichuwinan tuku kilhtamaku Jehová makgamakglhtinalh xtapalh xlatamat Jesús. Wa xlakata, nila liwana wanaw tuku kilhtamaku lakkaxwilika chu tsukulh kgantaxtu uma xasasti talakkaxlan. Pero katsiyaw pi Jesús alh k’akgapun akgkaw kilhtamaku akxni nina xtsuku Pentecostés (Hech. 1:3). Lata umakgolh kilhtamaku akxni makamaxkilh Jehová xtapalh xlatamat chu xla makgamakglhtinalh (Heb. 9:12). Anta kPentecostés liwana litasiyalh pi Dios xmakgamakglhtinanit (Hech. 2:1-4, 32, 33). Ama kilhtamaku, liwana litasiyalh pi xasasti talakkaxlan tsukulh kgantaxtu.

Wa xlakata, akxni Jehová makgamakglhtinalh xtapalh xkgalhni Jesús nema kstajmakganit, lakkaxwilika xasasti talakkaxlan niku makgtanukgolh putum tiku xatalaksakni chu watiya uma kilhtamaku tsukulh kgantaxtu, akxni xaPuxku Sacerdote, Jesús Makgtayana litaxtulh (Heb. 7:25; 8:1-3, 6; 9:13-15).