BIOGRAFÍA
Tuku ktlawanit wa tuku kilitlawat xwanit
LIWAKA 30 kata, Donald Ridley kakgalhmakgtayalh xtatayananin Jehová kxlakatin mapakgsinanin. Lhuwa tiku kamakgtayalh kʼhospitales xlakata ni nakawilinikan kgalhni, chu makgtayanalh xlakata natlajanankan kxlakatin mapakgsinanin klakalhuwa kachikinin xalak Estados Unidos. Don, chuna la xlilakgapaskgo xʼamigos, lu xlakgati kskuja, xtaktuju chu lu xkamakgtaya amakgapitsin.
Kkata 2019, wanika pi xkgalhi akgtum tajatat nema laktlawa akskitit chu ni kgalhi xalikuchun. Don lu lakapala tasnunilh chu nilh 16 xla agosto kata 2019. Wa uma xlatamat.
Klakachilh kkata 1954 kkachikin Saint Paul (Minnesota) kʼ Estados Unidos, kʼakgtum familia nema xtapakgsini católica chu ni lu xakkgalhiyaw tumin. Akit xlichatiy lata kgalhkitsis kamanan. Akxni aktsujku xakwanit, kkgalhtawakgalh kʼakgtum escuela xalak pusikulan chu monaguillo xakwanit, pero ni lhuwa tuku xakkatsi xlakata Biblia. Maski xakkanajla pi xʼanan chatum Dios tiku malakatsukilh putum tuku anan, nialh xakkanajla tuku xmasiyakan kpusikulan.
KLAKGAPASA TUKU XAXLIKANA
Akxni aku akgtum kata la xakkgalhtawakgama kʼescuela William Mitchell xlakata abogado xaklitaxtulh, akgtum tamakgaxtokgat xla xtatayananin Jehová tlakgkgolh kimalakcha. Xlakata xakchekgema lhakgat, xatapaxuwan kiwanikgolh pi xʼamaparakgo taspitkgo atanu kilhtamaku. Akxni taspitparakgolh, kkatlawanilh akgtiy takgalhskinin: «¿Tuku xlakata tiku lixkajni likatsikgo tlakg tlan kakitaxtuni nixawa tiku tlan likatsikgo?» chu «¿Tuku talakaskin xlakata tlan nakgalhikan tapaxuwan?». Kmakglhtinalh libro La verdad que lleva a vida eterna chu Traducción del Nuevo Mundo de las Santas Escrituras, nema xmakni xaxtakni xwanit. Nachuna kmakgamakglhtinalh akgtum takgalhtawakga xalak Biblia. Uma lu kaks klilakawa. Lu klakgatilh akxni kkatsinilh pi xTamapakgsin Dios akgtum tamapakgsin nema kimputumkan maklakaskinaw chu pi wa namapakgsi Katiyatni. Kkatsinilh pi mapakgsinanin xalak kakilhtamaku nila liwana mapakgsinankgo chu pi xliminkgonit tapatin, takatsanajwat, tuku ni xaʼakgstitum chu tuku nixatlan unu kkakilhtamaku.
Ktamakamastanilh Jehová kkata 1982 chu ktamunulh watiya uma kata kLanka tamakxtumit nema xwanikan «Verdad del Reino» kʼestadio St. Paul Civic Center. Semana nema kstala, ktaspitli kʼuma estadio xlakata naktlawa akgtum examen xlakata abogado xaklitaxtulh. Chu akxni xtsukuma papaʼ octubre kiwanika pi abogado naklitaxtu.
Kʼuma lanka tamakxtumit, klakgapasli Mike Richardson, tiku kskujma kBetel xla Brooklyn (Nueva York) chu kiwanilh pi kcentral mundial xlakkaxwilikanit niku xʼakxilhka xlakata taʼakglhuwit nema katakgalhikan mapakgsinanin. Klakapastakli xtachuwin eunuco etíope tiku litachuwinan kʼHechos 8:36 chu klakpuwa: «¿Tuku kimalakgachokgo xlakata ni nakskuja kʼOficina de Asuntos Legales?». Wa xlakata kmalakgatsamalh solicitud xlakata nakskuja kBetel.
Kinatlatni ni lakgatikgolh pi akit xtatayana Jehová xaklitaxtulh. Kintlat kikgalhskilh la xʼama kimakgtaya komo akit abogado xaklitaxtulh kWatchtower. Akit kwanilh pi xatapaxuwan xakama skuja chu xkimaxkika tsinu tumin akgatunu papaʼ, chuna la xkamaxkikan betelitas.
Akxni kmasputulh taskujut nema xaklakgaya kʼakgtum tribunal, kkata 1984 ktsukulh skuja kBetel xla Brooklyn. Kiwanika pi xakskujli kʼOficina de Asuntos Legales. Tuku ktitaxtulh akxni xakskujma ktribunal lu kimakgtayalh.
KAXTLAWAPARAKAN TEATRO STANLEY
Teatro Stanley akxni tamawaka.
Noviembre kkata 1983, xtatayananin Jehová xtamawakgonit Teatro Stanley, xla Jersey City (Nueva Jersey). Natalan skinkgolh pi xkamaxkika talakaskin xlakata nakaxtlawakan luz chu chuchut. Akxni katatamakxtumikgolh mapakgsinanin, kawanikgolh pi xtatayananin Jehová xmaklakaskimputunkgo uma teatro xlakata anta natlawakan laklanka tamakxtumit. Pero analh akgtum taʼakglhuwit. Chuna la xwi limapakgsin xlakata namastakan talakaskin wi tuku natlawakan, niku tlan kakninanikan Dios kajwatiya tlan xwilikan niku lakkaxwilikanit xlakata nakatlawakan chiki. Chu xlakata teatro xwi niku lakkaxwilikanit xlakata nakatlawakan putaskujut, ni kamaxkika talakaskin nakaxtlawakgo teatro. Natalan wankgolh pi xkamaxkika talakaskin, pero ni tlajanankgolh.
Xapulana semana nema xakwi kBetel, xkachikin Jehová skinkgolh pi tribunal federal xla distrito xkatalakkaxtlawalh uma taʼakglhuwit. Xlakata akgtiy kata kskujli ktribunal federal xla distrito kSaint Paul (Minnesota), liwana xakkatsi la lakkaxtlawakan uma taʼakglhuwit. Chatum abogado tiku xkinkakgalhmakgtayaman wa pi Teatro Stanley xlimaklakaskinkanit xlakata lhuwa tuku anta natlawakan, la komo namatitaxtikan akgtum película o asta conciertos niku xtlakgnankan. Wa xlakata, ¿tuku xlakata ni mastakan talakaskin pi na namatitaxtikan akgtum tamakxtumit xlakata nakakninanikan Dios? Tribunal akxilhli uma, chu wa pi Jersey City xlakatsalanit limapakgsin nema lichuwinan pi putum kgalhiyaw talakaskin nakakninaniyaw Dios chu kawanilh mapakgsinanin pi xkinkamaxkikgon talakaskin xlakata nakkaxtlawayaw teatro. Chuna ktsukulh akxilha pi Jehová ksikulunatlawama xkachikin xlakata nakamaxki talakaskin pi xtaskujut ni namalakgachokgokan. Lu xaklipaxuwa xlakata xakmakgtayanama tsinu.
Natalan tsukukgolh lakkaxtlawakgo uma teatro chu kaj akgtum kata litlawakgoka. Kilhtamaku 8 xla septiembre kkata 1985, tlawaka graduación xla clase 79 xla Galaad kteatro nema lilakgapaska Salón de Asambleas xla Jersey City. Lu lanka talakgalhaman pi kmakgtayanalh xlakata natlawakan xtaskujut Jehová. Uma taskujut lu kimakgapaxuwalh nixawa atanu taskujut nema ktlawalh akxni nina xakmakgtayanan kBetel. Ni xaklakpuwanit pi Jehová xʼama kimaxki lhuwa tasikulunalin.
KKGALHMAKGTAYANAN XLAKATA NI NAKAWILINIKAN KGALHNI NATALAN
Kkata 80, lhuwa makuchinanin chu hospitales ni xkgalhakgaxmatkgo tuku xwankgo xtatayananin Jehová tiku laklankata akxni xwankgo pi ni xlakaskinkgo nakawilinikan kgalhni. Tiku xʼamakgo kgalhikgo skgata tlakg tuwa xkakitaxtuni, xlakata jueces xwankgo pi xlakan ni xlilakgmakganatkan xwanit nakawilinikan kgalhni, xlakata komo xnilh xatse, skgata ni xkgalhilh tiku nakuentajtlawa.
Kilhtamaku 29 xla diciembre kkata 1988, tala Denise Nicoleau tsukulh makgan lhuwa kgalhni akxni lakachilh kskgata. Xʼhemoglobina lu xlitaktanit chu kajwatiya xkgalhi 5.0 chu tiku xmakuchima wanilh pi xmastalh talakaskin xwilinika kgalhni. Pero xla ni lakaskilh. Xlichali, hospital wanilh chatum juez pi xmastalh talakaskin nawilinikan kgalhni. Niti kgalhskinka chu ni wanika tala Nicoleau, nipara xchixku, chu juez mastalh talakaskin nawilinikan kgalhni.
Viernes 30 xla diciembre, makuchinanin wilinikgolh kgalhni tala maski xchixku chu tiku xalak xfamilia xkilhwamakgolh pi ni xwilinika kgalhni. Nachuna, kakgotanun makgapitsi natalan chu tiku xalak xfamilia katamaknuka kpulachin. Kalimawakaka pi ni xmastamakgo talakaskin pi makuchinanin xlakgtalakatsuwikgolh tala chu xwilinikgolh kgalhni. Tsisa sábado 31 xla diciembre, uma tuku lalh xlichuwinamaka knoticias xalak Nueva York chu kkachikinin nema lakatsu xwilikgolh.
Philip Brumley chu akit akxni lakgkgawasanku xakwanitaw.
Kskiniw tribunal superior pi xkinkatalakkaxtlawan uma taʼakglhuwit, chu tsisa lunes ktachuwinalh juez tiku xlakkaxtlawama taʼakglhuwit, Milton Mollen. Klitachuwinalh tuku xlanit chu liwana kwanilh pi atanu juez xfirmarlinit uma kapsnat chu niti xkgalhskininit. Juez Mollen kiwanilh pi xakalh kxʼoficina uma kakgotanun xlakata xaklitachuwinalh tuku xlanit chu tuku xlitatlawat xwanit. Ktaʼalh tala Philip Brumley. Juez nachuna wanilh pi xʼalh abogado xalak hospital. Ktsukuw klitaʼakglhuwiyaw. Asta tala Brumley kimaxkilh maktum kapsnat niku xwan: «Ni lu pixlanka kachuwinanti». Uma lu tlan tastakyaw xwanit, xlakata akxni xakwan tuku nalimasiya pi nixlikana tuku xkilhwama abogado xalak hospital, lu xaksitsinit.
Lata kpakgxwiki asta kpakgastakat: Richard Moake, Gregory Olds, Paul Polidoro, Philip Brumley, akit chu Mario Moreno akxni kkgalhmakgtayaw xkachikin Jehová kxlakatin Tribunal Supremo xla Estados Unidos akxni lakkaxtlawaka taʼakglhuwit nama litapakuwilh Watchtower contra Stratton (kaʼakxilhti ¡Despertad! 8 xla enero kata 2003 xla página 3, 4, 6 chu 9).
Titaxtulh akgtum hora chu juez Mollen wa pi xlichali pulana xʼama akxilha tuku xaklakkaxtlawaputunaw. Akxni ktaxtuw kʼoficina, kinkawanin pi abogado xalak hospital tuwa xʼama kitaxtuni natlajanan. Kmakgkatsilh pi Jehová xkiwanima pi xakamaw tlajananaw. Lu kaks xkinkamalakawaniyan la Jehová xkinkalimaklakaskiman xlakata namakgantaxti xtalakaskin.
Lu lhuwa horas kmakgapalaw xlakata xaklakkaxwilimaw tuku xakamaw waniyaw juez. Tribunal ni makgat xwi lata xwi Betel xla Brooklyn, wa xlakata lhuwa tiku akxtum xakkataskujaw kʼOficina de Asuntos Legales tlawaʼankgolh. Akxni kgaxmatkgolh tuku klichuwinaw, kgalhtati jueces tiku xkinkatalakkaxtlawamakgon kintaʼakglhuwitkan wankgolh pi xlaktlawaka kapsnat nema xfirmarlikanit. Tribunal kakgalhmakgtayalh tala Nicoleau chu wa pi firmarlikan maktum kapsnat nema ni makatsinikan tiku namakuchikan lakatsala limapakgsin.
Alistalh, tribunal nema tlakg xkgalhi limapakgsin xalak Nueva York lichuwinalh pi tala Nicoleau tlan xmakuchika chu ni xmaklakaskinka kgalhni. Uma wa xapulana lata makgtati la kinkatalakkaxtlawakan kintaʼakglhuwitkan xlakata kgalhni ktribunales nema tlakg xkgalhikgo limapakgsin xalak Estados Unidos niku kmakgtayanalh (kaʼakxilhti recuadro « Lakkaxtlawakan taʼakglhuwit ktribunales»). Nachuna kmakgtayananit kBetel chu kkataskujnit makgapitsin abogados xlakata nalakkaxtlawakan taʼakglhuwit xlakata tiku nakuentajtlawa kamanan, akxni lakxtlawakan tamakgaxtokgat, akxni tamawakan akgtum putawilh chu akxni kskinkan talakaskin wi tuku natlawakan kʼakgtum putawilh.
KINTAMAKGAXTOKGAT CHU KIFAMILIA
Akit chu kimpuskat Dawn
Akxni klakgapasli Dawn, xla xkgalhi kgalhtutu lakkamanan. Xla lu kskuja chu precursora xlitaxtu. Xlakata lu tuwa tuku xtitaxtunit, lu kaks klilakawa la kskujnanima Jehová. Kkata 1992, kkilaw klanka tamakxtumit nema xwanikan «Portadores de Luz» kNueva York chu kwanilh pi tlakg xaklakgapasputun. Akgtum kata alistalh ktamakgaxtokgwi chu akit chuntiya xakmakgtayanama kBetel. Akgtum xtamaskiwin Jehová xlakata kkgalhi chatum puskat tiku lu tliwakga xtakanajla chu lu paxuwa. Chuna la wan Proverbios 31:12, Dawn lu tlan tuku tlawanit kimpalakata lata kmakgaxtokgaw.
Akxni ktamakgaxtokgwi, xlakkamanan xkgalhikgo 11, 13 chu 16 kata. Xlakata tlan tlat xaklitaxtuputun, ankgalhin xaklikgalhtawakga chu xaklitsakgsa tuku xaktekgsa kkilikgalhtawakgakan xlakata natlatni tiku kakuentajtlawakgo kamanan nema ni xlakan. Chuna la titaxtunit kata ktitaxtunitaw tuku tuwa, pero lu klipaxuwa pi umakgolh lakgkgawasan kiliʼakxilhkgonit la chatum tlat xapaxkina chu chatum amigo tiku tlan lipawankan. Lu tlan xakkamakgamakglhtinanaw xʼamigoskan kkinchikkan chu lu xaklipaxuwayaw pi kkinchikkan xwilakgolh tiku xkinkamakgapaxuwayan.
Kkata 2013, Dawn chu akit kkaw latamayaw kWisconsin xlakata nakkakuentajtlawayaw kinatlatnikan. Lu kaks klilakawa pi la xakmakgtayanama kBetel ni sputli. Kiwanika pi chuntiya xakmakgtayanalh xlakata nalakkaxtlawakan taʼakglhuwit akxni xtalakaskin kintamakgtay.
LAKAPALA TALAKGPALI KILATAMAT
Septiembre kkata 2018, kakxilhli pi lu xakkujunan akxni xakchuwinan. Makuchina nila kiwanilh tuku xlakata chuna xkiʼakgspulama. Alistalh, chatum makuchina kiwanilh pi xakkalh akxilha chatum neurólogo (chatum makuchina tiku akxilha akskitit). Enero kkata 2019, uma makuchina kiwanilh pi max xakkgalhi akgtum tajatat nema xʼama laktlawa putum kimakni.
Akgtutu kilhtamaku alistalh, ktamakgwasli akxni xakmakgkgamanama chu ktamakgatlakgalh. Ankgalhin chuna xakmakgkgamanan chu xaklakgati. Wa xlakata kkakxilhli pi nialhla tlan xakmatsuwi kimakni. Kintajatat lakapala kimasnuninit chu nialhla liwana kchuwinan, nialhla ktatsuwi chu nialh lu la tuku xakkgotwa.
Lu lanka talakgalhaman pi klimaklakaskilh tuku xakkatsini xlakata abogado xakwanit xlakata nakmakgtayanan kxkachikin Jehová. Nachuna lu lanka talakgalhaman kliʼakxilhnit pi ktsokgwilinit tuku tlan likgalhtawakgakgo makuchinanin, abogados chu jueces. Nachuna kmastalh taʼakgchuwin kxlikalanka katiyatni xlakata tlan nakkakgalhmakgtaya xlakskujnin Jehová xlakata tlan nakamakuchikan chu ni nakawilinikan kgalhni. Maski chuna, tlan nakwan tuku lichuwinan Lucas 17:10, akit skujni tiku nitu klitaxtu; tuku ktlawanit wa tuku kilitlawat xwanit.
