1. ¿Tuku tlawanit Jehová kimpalakatakan?

KALILAKPUWAW la xtatayana Jehová litaxtuw. Pulana, wi tiku kinkalitachuwinan «xatlan tamakatsinin», max kinatlatnikan, chatum tiku xtaskujaw o tiku xtaʼanaw kʼescuela, o chatum xtatayana Jehová tiku xlichuwinama Dios kʼakgatunu chiki (Mar. 13:10). Alistalh, wi tiku limaklakaskilh lhuwa kilhtamaku chu litliwakga xlakata xkinkalimakgalhtawakgen Biblia. Xlakata kinkamakgalhtawakgekan, katsiniw pi Jehová kinkapaxkiyan chu akinin na tsukuw paxkiyaw. Jehová kinkalimin kxaxlikana. Chu xlakata la uku, kstalaninanin Cristo litaxtuyaw, kgalhiyaw takgalhkgalhin xlakata nalatamayaw putum kilhtamaku (Juan 6:44). Xlikana pi lu paxtikatsiniyaw Jehová xlakata wi tiku maklakaskilh xlakata xkinkamasiyanin xaxlikana, chu xkinkamaxkin talakaskin xlakata naskujnaniyaw.

2. ¿Tuku nalichuwinanaw kʼuma artículo?

² Xlakata la uku lakgapasaw xaxlikana, kgalhiyaw talakgalhaman xlakata nakamakgtayayaw amakgapitsin na anta naʼankgo ktiji nema linan klatamat. Makgapitsi natalan ni tuwa makgkatsikgo nalichuwinankgo Dios kʼakgatunu chiki, pero tuwa makgkatsikgo naputsakgo tiku namakgalhtawakgekgo. ¿Nachuna kinkaʼakgspulayan? Komo chuna, lu nakinkamakgtayayan makgapitsi tastakyaw xla uma artículo. Nalichuwinanaw tuku kinkamakgpuwantiniyan nakamakgtayayaw latamanin kstalaninanin Cristo nalitaxtukgo. Na naʼakxilhaw tuku tlan natlawayaw akxni tuwa makgkatsiyaw namatsukiyaw akgtum takgalhtawakga xalak Biblia. Pero pulana kaʼakxilhwi tuku xlakata ni kajwatiya talakaskin nalichuwinanaw xalaktlan tamakatsinin wata na talakaskin namasiyayaw.

3. ¿Tuku xlakata lichuwinanaw Dios?

³ Akxni Jesús xlama kKatiyatni, kalimapakgsilh kstalaninanin pi xtlawakgolh pulaktiy xlakaskinka taskujut. Pulana, kawanilh pi xlichuwinankgolh xalaktlan tamakatsinin xla tamapakgsin chu kamasiyanilh la natlawakgo (Mat. 10:7; Luc. 8:1). Kawanilh tuku xlitlawatkan xwanit akxni latamanin xmakgamakglhtinankgolh tamakatsinin xla Tamapakgsin chu tuku xtlawakgolh akxni latamanin ni xkgaxmatputunkgolh (Luc. 9:2-5). Na lichuwinalh asta niku xʼama talichuwinan uma, xlakata wa pi «natamakatsininan kputum laklanka kachikinin» (Mat. 24:14; Hech. 1:8). Maski latamanin xkgaxmatputunkgolh o ni xkgaxmatputunkgolh, chuntiya xtalakaskin xlichuwinankgolh xTamapakgsin Dios chu tuku natlawa.

4. Chuna la wan Mateo 28:18-20, ¿tuku atanu natlawayaw chu ni kajwatiya nalichuwinanaw tamakatsinin xla Tamapakgsin?

⁴ ¿Tuku xlipulaktiy taskujut nema kalakgayawalh Jesús kstalaninanin? Kawanilh pi xkamasiyanikgolh latamanin nakgalhakgaxmatkgo putum tuku xla xlimapakgsinanit. Pero, ¿kajwatiya xʼamaka kalitachuwinankan Dios chu xʼamaka kamasiyanikan tiku xlamakgolh kxapulana siglo chuna la wankgo makgapitsin? Nichuna, xlakata Jesús lichuwinalh pi uma xlakaskinka taskujut xʼama tatlawa kkinkilhtamakujkan «asta kxlisputni kakilhtamaku» (kalikgalhtawakga Mateo 28:18-20). Max Jesús mastalh uma limapakgsin akxni katasiyanilh liwaka 500 kstalaninanin (1 Cor. 15:6). Chu tuku maʼakxilhnilh Juan, liwana masiyalh pi lakaskin pi putum kstalaninanin kakamakgtayakgolh amakgapitsin latamanin xlakata nalakgapaskgo Jehová (Apoc. 22:17).

5. ¿Tuku liʼakxilhtit maklakaskilh Pablo 1 Corintios 3:6-9 xlakata nalimasiya pi lichuwinankan Dios chu masiyakan lu xlakaskinka uma pulaktiy?

⁵ Apóstol Pablo tamalakxtumilh la lichuwinankan Dios chuna la chananankan, chuna limasiyalh pi ni kajwatiya talakaskin nachankan talhtsi. Kamalakapastakalh natalan xalak Corinto: «Akit kchalh, Apolos munuwililh, [...]. Wixin xkatakuxtu Dios niku chananama» (kalikgalhtawakga 1 Corintios 3:6-9). Tiku skujaw “kxkatakuxtu Dios” ni kajwatiya chanaw talhtsi, wata na munuwiliyaw chu kuenta tlawayaw la staktilha (Juan 4:35). Pero katsiyaw pi wa Dios tiku tlawa pi nastaka.

6. Akxni nakamasiyaniyaw latamanin, ¿tuku nakamakgtayayaw natlawakgo?

⁶ Kaputsayaw tiku kxnakujkan makgamakglhtinamputunkgo «xaxlikana tuku masta latamat nema ni kgalhi xlisputni» (Hech. 13:48). Xlakata kstalaninanin Cristo nalitaxtukgo, talakaskin nakamakgtayayaw 1) naʼakgatekgskgo, 2) namakgamakglhtinankgo chu 3) nalilatamakgo tuku katsinimakgo kBiblia (Juan 17:3; Col. 2:6, 7; 1 Tes. 2:13). Putum tiku xalak congregación tlan nakamakgtayakgo, nakalimasiyanikgo tapaxkit chu tlan nakamakgamakglhtinankgo akxni naʼankgo ktamakxtumit tiku kamakgalhtawakgemaka (Juan 13:35). Max makgalhtawakgena na nalimaxtu lhuwa kilhtamaku chu litliwakga xlakata namakgtaya xtamakgalhtawakgen nalakgmakgan takanajla o talismanin nema “tliwakglh wi” kxtalakapastakni (2 Cor. 10:4, 5). Makgtayakan chatum lataman xlakata natlawa putum umakgolh talakgpalit chu tlan natamanu, max natalakaskin lhuwa papaʼ, pero tlan nakitaxtu.

7. ¿Tuku xlakata lichuwinanaw Dios chu kamakgtayayaw latamanin kstalaninanin Cristo nalitaxtukgo?

⁷ ¿Tuku xlakata lichuwinanaw Dios chu kamakgtayayaw latamanin kstalaninanin Cristo nalitaxtukgo? Pulaktum, xlakata paxkiyaw Jehová. Akxni lu liskujaw nakgalhakgaxmataw limapakgsin xlakata nalichuwinanaw Dios chu nakamakgtayayaw latamanin kstalaninanin Cristo nalitaxtukgo, limasiyayaw pi paxkiyaw Dios (1 Juan 5:3). Kalilakpuwaw uma: tapaxkit nema kgalhiniyaw Jehová kinkamakgpuwantinitan nalichuwinanaw Dios kʼakgatunu chiki. ¿Tuwa makgkatsiw nakgalhakgaxmataw uma limapakgsin? Max tuwa. Xlikana pi max xpekuanaw akxni xapulana tlakgwi malakcha. Pero chuna tlawaw xlakata xkatsiyaw pi Jesús wa uma tuku lakaskin. Chu la uku max nialh lu tuwa makgkatsiyaw nalichuwinanaw Dios, pero ¿chu akxni matsukikan akgtum takgalhtawakga xalak Biblia? Maski kaj lilakpuwanaw max pekuanaw. Pero komo naskiniyaw Jehová tamakgtay xlakata ni napekuanaw chu namatsukiyaw akgtum takgalhtawakga, xla tlan nakinkamakgtayayan namakgantaxtiyaw uma taskujut.

8. Chuna la wan Marcos 6:34, ¿tuku xlipulaktiy anan nema tlawa pi nakamasiyaniyaw latamanin xaxlikana?

 ⁸ Pulaktiy, masiyayaw xaxlikana xlakata kapaxkiyaw latamanin. Akgtum kilhtamaku, Jesús chu kstalaninanin lu xtlakgwankgonit xlakata tantaku xlichuwinankgonit Dios, wa xlakata putsakgolh niku najaxkgo. Pero lhuwa latamanin xkakgalhkgalhimakgo. Jesús lu kalakgalhamalh chu «lhuwa tuku tsukulh kamasiyani» (kalikgalhtawakga Marcos 6:34). ¿Tuku xlakata Jesús lu liskujli? Xlakata makgkatsilh tuku xtitaxtumakgolh umakgolh latamanin chu xkamakgtayaputun. Xkatsi pi xpatinamakgolh chu xmaklakaskinkgo takgalhkgalhin. La uku, maski latamanin tasiyakgo pi paxuwakgo, na maklakaskinkgo takgalhkgalhin. Xtachuna la borregos tiku xaʼakgtsankgan lamakgolh chu niti kamakgtaya, ni kgalhikgo xmapuchwayanakan tiku nakapulalin. Apóstol Pablo wa pi ni lakgapaskgo Dios chu ni kgalhikgo takgalhkgalhin (Efes. 2:12). Amakgo ktiji «nema linan kpulakgsputni» (Mat. 7:13). Akxni kalilakpuwanaw latamanin tiku lamakgolh anta niku lichuwinanaw Dios chu la lu nitlan wi xtakanajlakan, xlakata kapaxkiyaw chu xlakata kalakgalhamanaw uma kinkamakgpuwantiniyan nakamakgtayayaw. Chu tuku tlakg tlan natlawayaw xpalakatakan wa nakawaniyaw pi tlan nakalimakgalhtawakgeyaw Biblia.

9. Chuna la wan Filipenses 2:13, ¿la tlan nakinkamakgtayayan Jehová?

⁹ Max niti limakgalhtawakgeputunaw Biblia xlakata katsiyaw pi talakaskin nalimaxtuniyaw lhuwa kilhtamaku xlakata tlan napulalinaw. Komo chuna, kawaniw Jehová tuku makgkatsiyaw chu kaskiniw kakinkamakgtayan natekgsputunaw tiku nalikgalhtawakgaputun Biblia (kalikgalhtawakga Filipenses 2:13). Apóstol Juan liwana kinkawaniyan pi Dios nakgalhti oraciones nema makgtanuma kxtalakaskin (1 Juan 5:14, 15). Wa xlakata liwana katsiyaw pi Jehová nakinkamakgtayayan nakamakgtayaputunaw latamanin xlakata kstalaninanin Cristo nalitaxtukgo.

10, 11. ¿Tuku xlakata max ni pulalimputunaw akgtum takgalhtawakga xalak Biblia?

¹⁰ Katsiyaw pi lu xlakaskinka nakamakgtayayaw latamanin kstalaninanin Cristo nalitaxtukgo, pero anan makgapitsi tuku tuwa nema max natlawa pi nila natlawayaw putum tuku xtlawaputuw. Kaʼakxilhwi makgapitsi chu la tlan nakamakgatlajayaw.

¹¹ Lakpuwanaw pi xlakata la tatekgsaw nila lhuwa tuku tlawayaw. Akgtum liʼakxilhtit, makgapitsi tiku lichuwinankgo Dios linkgoya kata o tatatlakgo. Komo chuna titaxtumaw, kalilakpuwaw tuku kinkamasiyaninitan tajatat xla COVID-19: pi tlan limaklakaskinkan teléfono o internet xlakata nalimakgalhtawakgenankan Biblia. Wa xlakata max tlan namatsukiyaw chu napulalinaw akgtum takgalhtawakga xalak Biblia lata kkinchikkan. Chu ni kajwatiya uma. Makgapitsi latamanin lakaskinkgo kakalimakgalhtawakgeka Biblia, pero nila chuna tlawakgo kilhtamaku akxni natalan lismanikgo lichuwinankgo Dios. ¿Tlan nakawaniyaw pi tlan nakalimakgalhtawakgeyaw Biblia akxni xlakan matlanikgo, max lu tsisa  o lu katsisni? Jesús masiyanilh Nicodemo katsisni, xlakata Nicodemo chuna lakaskilh (Juan 3:1, 2).

12. Komo lakpuwanaw pi ni katsiniyaw masiyayaw, ¿tuku pulaktutu natlawa ni chuna nalakpuwanaw?

¹² Lakpuwanaw pi ni katsiyaw la napulalinaw akgtum takgalhtawakga xalak Biblia. Max lakpuwanaw pi ni lhuwa tuku katsiyaw o lakpuwanaw pi talakaskin tlakg tlan makgalhtawakgena nawanaw. Komo chuna, kaʼakxilhwi pulaktutu tuku nakinkamalakpuwaniyan pi tlan wi tiku namakgalhtawakgeyaw. Pulaktum, Jehová lakpuwan pi tlan nakamasiyaniyaw amakgapitsin (2 Cor. 3:5). Xlipulaktiy, Jesús, tiku maxkikanit «putum limapakgsin [...] kʼakgapun chu kkatiyatni», kinkalimapakgsinitan namasiyayaw (Mat. 28:18). Chu xlipulaktutu, ni kiʼakstukan wilaw. Xtachuna la Jesús, tlan nalipawanaw pi Jehová nakinkamakgtayayan nakatsiyaw tuku nawanaw (Juan 8:28; 12:49). Nachuna, tlan natachuwinanaw superintendente de grupo, chatum precursor tiku lu katsini o chatum tiku makgasa chuna la lichuwinan Dios xlakata nakinkamasiyaniyan chu nakinkamakgtayayan napulalinaw chu namatsukiyaw akgtum takgalhtawakga xalak Biblia. Komo nakatanaw akxni wi tiku makgalhtawakgekgo, nakatsiniyaw la tlakg tlan namakgalhtawakgenanaw.

13. ¿Tuku xlakata talakaskin nakatsiniyaw maklakaskinaw tuku xalaksasti?

¹³ Tuwa makgkatsiyaw nalakgpaliyaw chuna la makgalhtawakgenanaw chu namaklakaskinaw tuku xalaksasti. Chuna la limakgalhtawakgenanaw Biblia talakgpalinit. Likgalhtawakga nema maklakaskinaw la uku, Kalipaxuwa latamat, tlawa pi nalakkaxwiliyaw tuku nalimakgalhtawakgenanaw chu tanu la napulalinaw ni chuna la xtlawayaw makgasa. Nialh lhuwa párrafos kalikgalhtawakgayaw chu tlakg katakgalhchuwinanaw tiku kamakgalhtawakgeyaw. Tlakg lhuwa videos kamaklakaskinaw chu tuku malakkikan kdispositivos, chuna la JW Library^®. Komo tuwa makgkatsiyaw nakamaklakaskinaw umakgolh tuku xalaksasti, wi tiku kaskiniw kakinkamasiyanin la maklakaskinkan. Tuwa tlawakan tuku xasasti. Makglhuwa, wi tuku tlawaputunaw chuna la ankgalhin lismaninitaw. Pero, xlakata xtamakgtay Jehová chu xtamakgtaykan kinatalankan, tlakg ni tuwa namakgkatsiyaw nalakgpaliyaw chuna la limakgalhtawakgenanaw Biblia chu tlakg nalipaxuwayaw. Chuna la wa chatum precursor, uma xasasti chuna la limakgalhtawakgenankan Biblia «tlakg lipaxuwakgo tiku limakgalhtawakgemaka chu makgalhtawakgena».

14. 1) ¿Tuku kililakapastakatkan komo anta niku lichuwinanaw Dios tuwa katekgskan tiku nakgaxmatkgo? 2) ¿La kinkamatliwakglhan 1 Corintios 3:6, 7?

¹⁴ Lakpuwanaw pi anta niku lichuwinanaw Dios tuwa namatsukiyaw akgtum takgalhtawakga xalak Biblia. Max makgapitsi latamanin ni kgaxmatputunkgo tuku lichuwinanaw o asta lakatakikgo taskujut nema tlawamaw. ¿Tuku nakinkamakgtayayan chuntiya nakalitachuwinanaw Dios? Kalakapastakwi pi kʼuma kakilhtamaku nema lakapala talakgpali, na tlan lakapala natalakgpali chuna la wilakgolh latamanin chu tiku ni xkgaxmatputunkgo tuku lichuwinanaw max alistalh nakgaxmatputunkgo (Mat. 5:3). Makgapitsi latamanin tiku ankgalhin xlakgmakgankgo kilikgalhtawakgakan titaxtulh kilhtamaku lakaskinkgolh pi xkalimakgalhtawakgeka Biblia. Nachuna, katsiyaw pi Jehová wa xmalana tachanan (Mat. 9:38). Lakaskin pi chuntiya kachananaw chu kamunuwilinaw, pero wa tiku lakgchan namastaka talhtsi (1 Cor. 3:6, 7). Nachuna, lu kinkamatliwakglhan akxni lakapastakaw pi maski la uku niti limakgalhtawakgemaw Biblia, Jehová kinkasikulunatlawayan xlakata taskujut nema tlawamaw, ni xlakata la kitaxtuma kintaskujutkan. *

15. ¿La makgkatsi Jehová akxni chatum lataman masta talakaskin nalimakgalhtawakgekan Biblia chu lilatama tuku katsinima?

¹⁵ Jehová lu paxuwa akxni chatum lataman makgamakglhtinan tuku masiya Biblia chu kalitachuwinan amakgapitsin (Prov. 23:15, 16). Xlikana pi lu paxuwa akxni akxilha tuku kitaxtuma la uku. Akgtum liʼakxilhtit, maski analh tajatat xla COVID-19 kkata nema lichuwinanka Dios 2020, kapulalinka 7,705,765 takgalhtawakga xalak Biblia, nema kamakgtayakgolh 241,994 latamanin xlakata xmakamaxkikgolh Jehová xlatamatkan chu xtamunukgolh. Chu umakgolh xalaksasti kstalaninanin Cristo na nakamakgtayakgo amakgapitsin xlakata na kstalaninanin Cristo nalitaxtukgo (Luc. 6:40). Xlikana pi akxni makgtlawayaw uma taskujut makgapaxuwayaw xnaku Jehová.

16. ¿Tuku tlan xlakkaxwiliw natlawayaw?

¹⁶ Talakaskin naliskujaw xlakata wi tiku namasiyaniyaw napaxki kintlatkan xalak akgapun, pero xlakata xtamakgtay Jehová tlan nakamakgtayayaw amakgapitsin xlakata kstalaninanin Cristo nalitaxtukgo. ¿Tlan xlakkaxwiliw namatsukiyaw chu napulalinaw maski kaj akgtum takgalhtawakga? Akxni chuna xlilat, tlan nakakgalhskinaw putum latamanin tiku nakatachuwinanaw, komo lakaskinkgo nakalimakgalhtawakgeyaw Biblia. Komo chuna natlawayaw, max kaks nalilakawanaw tuku nakinkakgalhtikgoyan. Liwana kakatsiw pi Jehová nasikulunatlawa kintaskujutkan.

17. ¿La namakgkatsiyaw komo wi tiku nalimakgalhtawakgeyaw Biblia?

¹⁷ Lichuwinankan chu masiyakan xaxlikana akgtum lanka talakgalhaman. Uma taskujut xlikana kinkamakgapaxuwayan. Apóstol Pablo, tiku kamakgtayalh lhuwa latamanin xalak Tesalónica xlakata kstalaninanin Cristo xlitaxtukgolh, lichuwinalh la xmakgkatsi: «¿Tuku naklipawanaw o naklipaxuwayaw o kintatlajakan nawan akxni namin kiMalanakan Jesús? ¿Pi ni wixin? Wixin litaxtuyatit tuku lanka kinkalimakgkatsikanan chu kintapaxuwankan» (1 Tes. 2:19, 20; Hech. 17:1-4). La uku, lhuwa kstalaninanin Cristo na kgalhikgo uma tapaxuwan. Chatum tala tiku wanikan Stéphanie, xla chu xchixku lhuwa tiku kamakgtayakgonit natamunukgo, xla wan: «Ni anan akgtum tapaxuwan nema tlakg lanka nixawa nakamakgtayaya latamanin namakamaxkikgo Jehová xlatamatkan».