Jehová lakaskin pi kakgalhikgolh tapaxuwan chatiy lataman tiku tamakgaxtokgkgo chu pi xtamakgaxtokgatkan tliwakga kawa chu nikxni kalaklalh (Mat. 19:4-6). Komo wix tamakgaxtokgputuna, ¿la tlan natekgsa chatum tlan puskat o chatum tlan chixku? Xlakata Jehová wa tiku kinkamalakatsukinitan, xla katsi tuku kilitlawatkan xlakata tlan nakinkakitaxtuniyan akxni nakgalhiyaw litatawilat o taskin chu ktamakgaxtokgat. Lilatamakan xtastakyaw Biblia ankgalhin tlan kitaxtu. Kaʼakxilhwi makgapitsi tastakyaw.

Pulana, kiliʼakgatekgsatkan pulaktum tuku kgalhiyaw putum latamanin: «Kinakujkan tlakg akgskgawinan nixawa atanu, chu tatlakgaja» (Jer. 17:9). Akxni chatiy lataman tsukukgo lalakgapaskgo xlakata tamakgaxtokgputunkgo, tuku makgkatsikgo lu lakapala staka chu max uma natlawa pi ni liwana nalakapastaknankgo. Komo natamakgaxtokgkgo kaj xlakata tuku makgkatsikgo, lu nitlan katikakitaxtunilh (Prov. 28:26). Wa xlakata, nitlan pi tiku lalakgapasmakgo natsukukgo lalitachuwinankgo tuku makgkatsikgo o wi tuku nalamalaknunikgo akxni nina liwana lalakgapaskgo.

Proverbios 22:3 wan: «Tiku skgalala akxilha tuku nitlan chu tatsekga, pero tiku xalaktontos tsaj ankgo chu patikgo tuku nitlan kitaxtu». ¿Tuku max nitlan nakitaxtu komo namaklakaskinkan sitios xla Internet chu aplicaciones niku putsakan tiku tlan natatamakgaxtokgkan? Lu nitlan, pero makgapitsi tiku lalakgapaskgonit kʼumakgolh sitios tsukukgonit lalakgatikgo chu alistalh katsikgonit pi kaj kaʼakgskgawikanit. Nachuna, latamanin tiku nitlan likatsikgo ni wankgo la likatsikgo chu tuku xlikana xtukuwanikan, xlakata nakaʼakgskgawikgo amakgapitsin chu nakamakgkgalhankgo xtuminkan. Min kilhtamaku, makgapitsi tiku tlawakgo uma tuku lu nitlan, xwankgo pi xtatayananin Jehová xlitaxtukgo.

Kaʼakxilhwi atanu tuku nitlan kitaxtu. Makgapitsi umakgolh sitios maklakaskinkgo fórmulas matemáticas nema wankgo pi tlan namakgtayanan xlakata tlan natekgskan tiku natatamakgaxtokgkan. Pero ni anan tuku limasiya komo uma xlikana makgtayanan. ¿Xlimasiyaw liskgalala komo xmastaw talakaskin pi kaj akgtum programa xla computadora xlaksakli tiku tlan xtatamakgaxtokgwi? Xlikana pi ni. Xtastakyaw Biblia tlakg laktlan chu nila tamalakxtumikan fórmulas matemáticas (Prov. 1:7; 3:5-7).

Anta kProverbios 14:15 tekgsaw atanu tuku lu xlikana. Anta wan: «Tiku ni skgalala kanajla putum tuku wanikan, pero tiku skgalala kuenta tlawa  tuku tlawa». Akxni nina laksakaw komo chatum lataman tlan chixku o tlan puskat nalitaxtu lu xlakaskinka pulana liwana nalakgapasaw. Pero nila liwana katilakgapaswi chatum lataman komo namaklakaskinaw akgtum sitio xla Internet niku putsakan tiku natatamakgaxtokgkan. Asta maski chatiy lataman lamasiyanikgo tuku wilikgo kxperfileskan chu lhuwa kilhtamaku latachuwinankgo Internet, ¿tlan nawanaw pi xlikana lalakgapaskgo? Makgapitsi tiku xlakpuwankgonit pi xtekgskgonit tiku xʼamakgo tatamakgaxtakgkgo lu kaks lilakawankgolh akxni tatanokglhkgolh chu akxilhkgolh tiku xtachuwinankgo kʼInternet.

Chatum tiku tsokgli salmo wa: «Ni kkatalalin tiku lakgatikgo akgskgawinankgo chu kkatapanuni tiku lakgaputiyunankgo» (Sal. 26:4). Lhuwa latamanin ni tuwa makgkatsikgo nawankgo taʼakgsanin kxperfileskan xlakata amakgapitsin tlakg nakalakgapasputunkgo. Max namatsekgkgo la xlikana likatsikgo o max ni nalimasiyakgo kmensajes ni xatlan xtayatkan. Max makgapitsi nawankgo pi xtatayananin Jehová litaxtukgo, pero ¿xlikana tamunukgonit? ¿Tliwakga xtakanajlakan kgalhikgo? ¿Tlan talalinkgo Jehová? ¿Kamaxkikan kakni kcongregación? ¿O nitlan liʼakxilhtit litaxtukgo chu «nitlan likatsikgo»? (1 Cor. 15:33; 2 Tim. 2:20, 21). ¿Tlan natamakgaxtokgkgo chuna la wan Biblia? Uma lu xlakaskinka xlitakatsit, pero nila nakatsikan komo ni nakatachuwinanaw amakgapitsi natalan tiku liwana lakgapaskgo (Prov. 15:22). Chu, chatum tiku xlikana ni makgxtakga Dios ni katilakpuwa natatamakgaxtokga chatum “tiku ni kanajla” chu ni tamununit (2 Cor. 6:14; 1 Cor. 7:39).

Xlakata katsiyaw pi max nitlan nakitaxtu komo namaklakaskinaw sitios xla Internet chu aplicaciones niku putsakan tiku natatamakgaxtokgkan, ¿anan niku tlakg tlan naputsakan chu nalakgapaskan chatum tala tiku tlan chixku o puskat nalitaxtu? Akxni nakgalhiyaw talakaskin natamakxtumiyaw, tlan nakalakgapasaw amakgapitsi xtatayananin Jehová ktamakxtumit, kʼasambleas chu atanu kilhtamaku akxni tlan natamakxtumiyaw.

Akxni nila tamakxtumiyaw kPukgalhtawakga, chuna la titaxtuma la uku xlakata anan tajatat xla COVID-19, limaklakaskinaw dispositivos electrónicos xlakata natamakxtumiyaw, chu anta tlan kalakgapaskan amakgapitsi lakgkgawasan chu laktsuman tiku xtatayananin Jehová. Anta tlan nakgaxmatkgo xtakgalhtinkan o xtaʼakgchuwinkan nema mastakgo chu tlan naʼakxilhkgo xtakanajlakan nema limasiyakgo (1 Tim. 6:11, 12). Na tlan latakgalhchuwinankan akxni sputnita tamakxtumit klaktsu grupos anta kvideoconferencia. Na tlan chuna tlawakan akxni makxtum lakgo makgapitsi natalan xlakata nalatachuwinankgo chu napaxuwakgo kʼInternet. Uma kilhtamaku tlan naʼakxilhkgo la likatsi chatum tala chu la kalikatsini amakgapitsin (1 Ped. 3:4). Chuna la nalalakgapastilha xchatiykan tlan naʼakxilhkgo komo lakxtum tuku lakgchamputunkgo chu komo xlikana nalaʼakgatekgsnikgo komo natamakgaxtokgkgo.

Akxni chatum tala kgawasa o chatum tala tsumat masta talakaskin napulalin xtastakyaw Biblia akxni putsama tiku natatamakgaxtokga, uma tlan namakgtaya xlakata nakgalhi akgtum xatapaxuwan tamakgaxtokgat. Chuna la wan akgtum proverbio: «Tiku tekgsa chatum tlan puskat [o chatum tlan chixku] tekgsa tuku lu xtapalh chu makglhtinan xtasikulunalin Dios» (Prov. 18:22).