ARTÍCULO NEMA NATALIKGALHTAWAKGA 29
Kamakgtayaw kimpulalinakan Jesucristo
«Putum limapakgsin kimaxkikanit kʼakgapun chu kkatiyatni» (MAT. 28:18).
TAKILHTLIN 13 Cristo, kiliʼakxilhtitkan
TUKU NATALICHUWINAN *
1. ¿Tuku lakaskin Dios katlawaka la uku?
TUKU Dios lakaskin la uku wa pi kalichuwinanka xalaktlan tamakatsinin xla Tamapakgsin kxlikalanka Katiyatni (Mar. 13:10; 1 Tim. 2:3, 4). Uma taskujut xla Jehová chu lu xlakaskinka, wa xlakata laksaknit xKgawasa xlakata napulalin uma taskujut. Liwana katsiyaw pi xlakata Jesús pulalima uma taskujut, liwana namakgantaxtikan akxni nina min lisputni chu uma lu namakgapaxuwa Jehová (Mat. 24:14).
2. ¿Tuku naʼakxilhaw kʼuma artículo?
2 Kʼuma artículo, naʼakxilhaw la Jesús limaklakaskin «skujni xatalipaw chu xaskgalala» xlakata nakinkamaxkiyan tuku maklakaskinaw xlakata kintakanajlakan chu xlakata nakinkamasiyanikanan la nalichuwinanaw Dios kʼuma kilhtamaku (Mat. 24:45). Na naʼakxilhaw tuku tlan natlawayaw xlakata namakgtayayaw Jesús chu skujni xatalipaw.
JESÚS PULALIMA LA LICHUWINAMAKA DIOS
3. ¿Tuku limapakgsin maxkika Jesús?
3 Jesús pulalima la lichuwinamaka Dios. ¿La likatsiyaw? Akxni nina xtaspita kʼakgapun, katatamakxtumilh makgapitsi kstalaninanin ksipi xalak Galilea chu kawanilh: «Putum limapakgsin kimaxkikanit kʼakgapun chu kkatiyatni». Chu alistalh kawanipa: «Wa xlakata kapitit chu kakamakgtayatit latamanin xliputum kachikinin xlakata kistalaninanin nawankgo» (Mat. 28:18, 19). Pulaktum tuku lakgayawakanit Jesús natlawa wa pi napulalin la lichuwinamaka Dios.
4. ¿Tuku xlakata liwana katsiyaw pi Jesús chuntiya pulalima la lichuwinamaka Dios?
4 Jesús wa pi xʼamaka lichuwinankan Dios chu xʼamaka kamakgalhtawakgekan latamanin «xliputum kachikinin», chu pi xla xʼama katatawila kstalaninanin «chali chali asta kxlisputni kakilhtamaku» (Mat. 28:20). Umakgolh tachuwin liwana limasiya pi Jesús xʼama pulalin la xlichuwinanka Dios asta kkinkilhtamakujkan.
5. ¿La makgtayanamaw nakgantaxtu tuku wan Salmo 110:3?
5 Jesús liwana xkatsi pi kxlikgalhsputni kakilhtamaku, lhuwa xʼama anankgo tiku xlichuwinankgolh Dios. Xkatsi pi xʼama kgantaxtu uma tuku xlichuwinankanit: «Minkachikin xatapaxuwan natamakamastaniyan xlakata misoldados nawankgo» (Sal. 110:3). Komo wix na makglichuwinana xalaktlan tamakatsinin, makgtayapat Jesús chu skujni xatalipaw, chu makgtayanampat nakgantaxtu uma tuku xlichuwinankanit. Xlikana pi lichuwinamaka Dios, pero na ananit tuku tuwa.
6. Kawanti pulaktum tuku tuwa titaxtuyaw.
6 Pulaktum tuku tuwa titaxtumaw wa taputsastalanit. Apóstatas, políticos chu xpulalinanin takanajla malakgatumikgo lhuwa taʼakgsanin xpalakata kintaskujutkan. Komo kifamiliajkan, kintalilakgapasnikan chu tiku kataskujaw nakanajlakgo uma, max natlawaputunkgo pi nialh kaskujnaniw Jehová chu nialh kalichuwinaw xalaktlan tamakatsinin. Kmakgapitsi kachikinin, kintalamakgasitsinkan kinkatlawanikgoyan tuku nitlan, kinkachipakgoyan chu asta kinkatamaknukgoyan kpulachin. Uma ni kaks kinkamalakawaniyan, xlakata Jesús wa: «Ni katikaʼakxilhputunkgon [...] kaj xlakata kintukuwani» (Mat. 24:9). Uma tasitsi limasiya pi stalanimaw xliʼakxilhtit Jesús chu kgalhiyaw xtamakgtay Jehová (Mat. 5:11, 12). Akgskgawini tiku tlawa pi nakinkaputsastalanikanan, pero xla nila makgatlaja Jesús. Cristo makgtayanama xlakata tamakatsinin xla Tamapakgsin nakalakgchan latamanin xalak putum kachikinin.
7. ¿Tuku litasiya pi kgantaxtuma Apocalipsis 14:6, 7?
7 Atanu tuku tuwa makgkatsinitaw wa pi anan tipalhuwa tachuwin. Tuku Jesús maʼakxilhnilh apóstol Juan, masiyalh pi uma ni xʼama tlawa pi nialh xlichuwinanka xalaktlan tamakatsinin (kalikgalhtawakga Apocalipsis 14:6, 7). ¿Tuku tlawanitaw xlakata ni nakinkamalakgachokgoyan uma? Tlawanitaw likgalhtawakga nema takilhtinit kBiblia kliwaka 1,000 tanu tanu tachuwin chu wilinitaw kkisitiojkan jw.org, xlakata latamanin naʼakxilhkgo. Nachuna, Lakgkgolotsin tiku Pulalinankgo mastakgonit talakaskin pi kamatitaxtika libro Kalipaxuwa latamat kliwaka 700 tanu tanu tachuwin, uma libro wa maklakaskinaw xlakata namakgalhtawakgenanaw. Na katlawanikanit videos tiku nila kgaxmatkgo chu likgalhtawakga kxabraille xpalakata tiku nila akxilhkgo. Chuna tlakg lhuwa latamanin kalitachuwinamaka tamakatsinin xla Tamapakgsin. Akxilhmaw la kgantaxtuma tuku xlichuwinanit Biblia: latamanin xalak «tipalhuwa kachikinin chu tipalhuwa xtachuwinkan» katsinimakgo «xatlan tachuwin», uma tachuwin kilhchanima tuku xaxlikana masiya Biblia (Zac. 8:23; Sof. 3:9). Putum uma kgantaxtuma xlakata Jesucristo pulalima uma taskujut.
8. ¿La kitaxtuma xlakata lichuwinamaka xalaktlan tamakatsinin?
8 La uku, liwaka 8 millones latamanin k240 países chu kachikinin makgtapakgsikgo xkachikin Jehová. ¡Chu akgatanu kata lhuwa tiku tamunukgo! Pero wa tuku tlakg xlakaskinka ni wa pi lhuwa tiku tamunukgo, wata wa pi umakgolh latamanin limasiyakgo laktlan tayat nema Biblia limapakuwi «xasasti tayat» (Col. 3:8-10). Lhuwa umakgolh latamanin nialh tlawakgo talakgxtumit nema ni xlitatlawat, nialh lakluku, nialh laksakpaxkinankgo chu nialh lakpuwankgo pi xkachikinkan wa tlakg xatlan. Kgantaxtuma tuku lichuwinan Isaías 2:4: «Nipara katikatsiniparakgolh tlawakgo guerra». Xlakata liskujaw nalimasiyayaw xasasti tayat, uma tlawa pi latamanin natalakatsuwiniputunkgo xkachikin Dios chu limasiyayaw pi stalanimaw Jesucristo, kimpulalinakan (Juan 13:35; 1 Ped. 2:12). Putum uma chuna lama xlakata Jesús kinkamakgtayaman.
JESÚS LAKSAKA CHATUM SKUJNI
9. Chuna la wan Mateo 24:45-47, ¿tuku wa Jesús pi xʼama la kxlikgalhsputni kakilhtamaku?
9 (Kalikgalhtawakga Mateo 24:45-47). Jesús wa pi kxlikgalhsputni kakilhtamaku xʼama laksaka chatum «skujni xatalipaw chu xaskgalala» xlakata xkinkamaxkin tuku maklakaskinaw kkintakanajlakan. Wa xlakata uma skujni lu palha xʼama skuja kkinkilhtamakujkan. Chu chuna tlawama. Jesús kamaklakaskin uma xatalaksakni kstalaninanin xlakata nakamaxkikgo «xtawaykan akxni xlilat» amakgapitsi kskujnin Dios chu latamanin tiku limasiyakgo takanajla. Umakgolh lakchixkuwin ni lakpuwankgo pi xmalanakan xtakanajlakan amakgapitsin (2 Cor. 1:24). Wata katsikgo pi Jesucristo «xpuxkukan chu xcomandantejkan» (Is. 55:4).
10. Xliputum libros nema tasiya kdibujo, ¿tuku libro makgtayan wix nalakgapasa xaxlikana?
10 Lata kkata 1919, skujni xatalipaw tlawanit lhuwa likgalhtawakga xlakata latamanin nalakgapaskgo xaxlikana. Kkata 1921, skujni xatalipaw maxtulh ktachuwin xaʼinglés libro El Arpa de Dios xlakata xkamasiyanika latamanin tuku pulana masiya Biblia. Xlakata kilhtamaku xtalakgpalitilhama, tsukuka kamaxtukan atanu libros. ¿Tuku libro makgtayan wix nalakgapasa chu napaxkiya kinTlatkan xalak akgapun? Max wa umakgolh: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Tuku xlikana masiya Biblia? o ¿Tuku masiya Biblia? O max maklakaskimpat xasasti libro Kalipaxuwa latamat. Umakgolh libros katlawaka xlakata nakamakgalhtawakgeyaw latamanin chu uma ankgalhin lu kinkamakgtayanitan.
11. ¿Tuku xlakata lu xlakaskinka pi putum akinin namakglhtinanaw tuku namatliwakglha kintakanajlakan?
11 Ni kajwatiya tiku kalimakgalhtawakgemaka Biblia maklakaskinkgo tuku namatliwakglha xtakanajlakan, putum akinin maklakaskinaw. Apóstol Pablo tsokgli: «Xapalha liwat kalakgchan tiku tliwakgata kgalhikgo xtakanajlakan». Na wa pi komo nalilatamayaw tuku katsinimaw nakinkamakgtayayan nakatsiyaw «tuku tlan chu tuku nitlan» (Heb. 5:14). Xlakata la uku lu lixkajnit tayat kgalhikgokan, max tuwa namakgkatsiyaw nakgalhakgaxmataw xlimapakgsin Jehová. Pero Jesús kinkamaxkiyan liwat nema matliwakglha kintakanajlakan chu takilhtinit kxTachuwin Dios, kBiblia. Jesús pulalin skujni xatalipaw xlakata nalakkaxtlawa chu namakgpitsi uma liwat.
12. ¿Tuku tlawanitaw xlakata namaxkiyaw kakni xtukuwani Dios chuna la tlawalh Jesús?
12 Chuna la Jesús, akinin maxkinitaw kakni xtukuwani Dios chuna la lakgchan (Juan 17:6, 26). Akgtum liʼakxilhtit, kkata 1931 litapakuwiw xtatayananin Jehová. Chuna limasiyaw pi limputunaw xtukuwani kinTlatkan xalak akgapun, xlakata lu xlakaskinka kimpalakatakan (Is. 43:10-12). Chu octubre, watiya uma kata, tsukulh taxtu xtukuwani Dios kxmakni uma revista xaʼinglés. Nachuna, Traducción del Nuevo Mundo wilinit xtukuwani Dios anta niku xliʼanat. Uma ni xtachuna tuku tlawakgo amakgapitsi takanajla, nema mapanukgo xtukuwani Jehová akxni matitaxtikgo kxBibliajkan.
JESÚS KAPULALIMA KSTALANINANIN
13. ¿Tuku makanajliyan pi Jesús maklakaskima la uku «skujni xatalipaw chu xaskgalala»? (Juan 6:68).
13 Jesús limaklakaskima «skujni xatalipaw chu xaskgalala» xlakata kstalaninanin namakgtapakgsikgo kʼakgtum lu tlan kachikin unu kKatiyatni chu namasiyakgo xaxlikana takaknin. ¿Tuku lakpuwana xlakata uma kachikin? Max nachuna lakpuwana la Pedro, tiku wanilh Jesús: «¿Tiku naklakganaw? Wix kgalhiya tachuwin nema linan klatamat nema ni kgalhi xlisputni» (Juan 6:68). ¿Tuku xkinkakitaxtunin komo ni xlakgapaswi xkachikin Jehová? Cristo maklakaskin uma kachikin xlakata nakinkamaxkiyan tuku maklakaskinaw kkintakanajlakan chu na kinkamasiyaniyan la tlakg tlan makgalhtawakgenanin nawanaw. Nachuna, kinkamakgtayayan nakgalhiyaw «xasasti tayat» xlakata namakgapaxuwayaw Jehová (Efes. 4:24).
14. Xlakata makgtapakgsiya kxkachikin Jehová, ¿la makgtayanitan kʼuma pandemia xla COVID-19?
14 Akxni titaxtuyaw tuku tuwa, Jesús kinkawaniyan tuku kilitlawatkan. Uma akxilhwi akxni tsukulh pandemia xla COVID-19. Lhuwa latamanin ni xkatsikgo tuku natlawakgo, pero Jesús maklakaskilh xkachikin Jehová xlakata xkinkawanin tuku kilitlawatkan xwanit. Kinkawanikan pi xmaklakaskiw cubrebocas anta niku anankgo lhuwa latamanin chu ni xlatalakatsuwiniw. Lakgkgolotsin kawanika pi xkatachuwinankgolh putum publicadores chu xkamakgtayakgolh komo wi tuku xmaklakaskinkgo xlakata tlan xtawilakgolh chu tlan lakatsu xtawilanikgolh Jehová (Is. 32:1, 2). Chu ktamakatsinin xla Lakgkgolotsin tiku Pulalinankgo kinkamatliwakglhkanitan chu kinkawanikanitan tuku kilitlawatkan.
15. ¿Tuku atanu kinkawanikanitan pi kilitlawatkan kʼuma pandemia, chu tuku kitaxtunit?
15 Kpandemia na kinkamaxkikan makgapitsi tastakyaw xlakata la natlawayaw kintamakxtumitkan chu la nalichuwinanaw Dios. Kaj lakapala xtlawamawa tamakxtumit chu asambleas kvideoconferencia, chu tsukuw maklakaskinaw carta chu teléfono xlakata nalichuwinanaw Dios. Jehová sikulunatlawanit putum kintaskujutkan. Lhuwa sucursales makatsininankgonit pi taliwakanit la xlilhuwa publicadores anankgo. Nachuna, lhuwa natalan lichuwinankgonit pi tlan kakitaxtuninit lata tsukunit pandemia (kaʼakxilhti recuadro « Jehová sikulunatlawama la lichuwinamaka xalaktlan tamakatsinin»).
16. ¿Tuku liwana katsiyaw?
16 Max makgapitsi natalan lakpuwankgonit pi xkachikin Jehová malakatsali akxni kinkawaniyan la natamakgtakgalhaw kʼuma pandemia. Pero makglhuwa litasiyanit pi tuku kinkawanikanan tlan kitaxtu (Mat. 11:19). Komo nalilakpuwanaw la kinkapulaliman Jesús, liwana nakatsiyaw pi kalalh tuku kalalh kkilhtamaku nema aku mima, Jehová chu xKgawasa ankgalhin nakinkatatawilakgoyan (kalikgalhtawakga Hebreos 13:5, 6).
17. ¿La makgkatsiya akxni lilakpuwana pi Jesús wa pulalima taskujut nema tlawapat?
17 ¡Lu paxuwayaw xlakata katsiyaw pi wa Jesús pulalima kintaskujutkan! Makgtapakgsiyaw kʼakgtum kachikin niku makxtum wilaw maski tanu tanu kinkachikinkan, kintalismaninkan chu kintachuwinkan. Lhuwa kgalhiyaw tuku maklakaskinaw kkintakanajlakan chu liwana kinkamasiyanikanitan la nalichuwinanaw Dios. Chu chatunu akinin chuntiya katsinimaw nalimasiyayaw xasasti tayat chu nakapaxkiyaw amakgapitsin. ¡Lu tlan limakgkatsiyaw pi Jesucristo kinkapulaliman!
TAKILHTLIN 16 Kamalankiw Jehová xlakata xKgawasa
^ La uku, lhuwa millones lakchixkuwin, lakpuskatin chu kamanan, xatapaxuwan lichuwinankgo xalaktlan tamakatsinin. ¿Na lichuwinana uma tamakatsinin? Komo chuna, stalanipat xtapulalit kiMalanakan Jesucristo. Kʼuma artículo naʼakxilhaw tuku limasiya pi Jesús wa pulalima la lichuwinamaka Dios la uku. Akxni nalilakpuwanaw uma, nakinkamakgtayayan chuntiya naskujnaniyaw Jehová chu nastalaniyaw xtapulalit Cristo.
