1. ¿La kiliʼakxilhatkan oración?

 XMALAKATSUKINA akgapun chu Katiyatni kinkamaxkinitan akgtum lu lanka talakgalhaman: tlan natachuwinanaw akxni tlawayaw oración. Kalilakpuwaw tuku kilhchanima uma. Tlan nawaniyaw Jehová tuku wi kkinakujkan kaxatukawa kilhtamaku chu kkaxatukawa tachuwin, chu ni talakaskin namaxtuyaw cita. Tlan natlawaniyaw oración xapaxkina kinTlatkan lata kʼakgtum hospital o kpulachin chu liwana katsiyaw pi xla nakinkakgaxmatniyan. ¿Ni xlikana pi lu xtapalh akxilhaw uma talakgalhaman?

2. ¿La limasiyalh mapakgsina David pi akgtum lanka talakgalhaman xliʼakxilha oración?

² Mapakgsina David lu lanka talakgalhaman xliʼakxilha oración. Kʼakgtum takilhtlin wanilh Jehová: «Kioración kalitaxtulh kmilakatin chuna la xamuksun incienso» (Sal. 141:1, 2). Kxkilhtamaku David xmaklakaskinkan akgtum xasanto incienso xlakata nakakninanikan Jehová, chu sacerdotes liwana xlakkaxtlawakgo (Éx. 30:34, 35). Uma kinkamasiyaniyan pi akxni David lichuwinalh incienso, xwamputun pi pulana xʼama lakpuwan tuku xʼama wani xTlat xalak akgapun akxni xtlawanilh oración. Chu akinin nachuna tlawaputunaw, xlakata lakaskinaw pi kioracioneskan kamakgapaxuwalh Jehová.

3. Akxni tlawaniyaw oración Jehová, ¿la kilitlawatkan chu tuku xlakata?

³ Akxni tlawaniyaw oración Jehová kilimaxkitkan kakni. Kalilakpuwaw tuku kamaʼakxilhnika Isaías, Ezequiel, Daniel chu Juan. Maski tanu tanu tuku akxilhkgolh, wi tuku akxtum katlawa: lichuwinankgo Jehová la chatum Mapakgsina nema lu kaks malakawaninan. Isaías akxilhli pi Jehová «xwi k’akgtum talhman laktawilh» (Is. 6:1-3). Ezequiel akxilhli pi xwi  kxcarro xalak akgapun chu pi putum xmaxkgakge xmakni chuna la chamakxkulit (Ezeq. 1:26-28). Daniel akxilhli chatum «Kgolotsin» nema xlilhakgananit xasnapapa lhakgat chu xwi kxputawilh nema xtaxtuyachi lhkuyat anta (Dan. 7:9, 10). Chu Juan akxilhli Jehová pi xwi kxputawilh nema xlistili «akgtum chamakxkulit nema xtasiya chuna la chiwix nema wanikan esmeralda» (Apoc. 4:2-4). Akxni lilakpuwanaw la xlilanka Jehová kinkamalakapastakayan pi tlawanikan oración akgtum lanka talakgalhaman chu pi lu xlakaskinka nalimasiyayaw kakni akxni tlawaniyaw oración. Pero ¿tuku tlan nawanaw kkioracioneskan?

4. ¿Tuku kinkamasiyaniyan xapulana tuku lichuwinan oración xla padrenuestro? (Mateo 6:9, 10).

⁴ (Kalikgalhtawakga Mateo 6:9, 10). Anta kTaʼakgchuwin xalak Sipi, Jesús kamasiyanilh kstalaninanin la xlitlawatkan xwanit oración nema Dios tlan akxilha. Akxni xlichuwinanita «chuna natlawayatit mioracionkan», tuku pulana lichuwinalh tatalakxtumi xtalakaskin Jehová: pi katamasantujlilh xtukuwani; kamilh xTamapakgsin nema namasputu xtalamakgasitsin Dios, chu kakgantaxtulh tasikulunalin nema malaknunit xpalakata Katiyatni chu latamanin. Komo nakalichuwinanaw umakgolh kkioracioneskan, nalimasiyayaw pi xtalakaskin Jehová wa tuku tlakg xlakaskinka kimpalakatakan.

5. ¿Kgaxmata Jehová kioracioneskan akxni skinaw kimpalakatakan?

⁵ Tuku wampara oración xla padrenuestro, Jesús masiyalh pi nitu wamputun naskinaw kimpalakatakan. Tlan naskiniyaw Jehová tuku nawayaw chali chali, pi kakinkatapatin kintalakgalhinkan, pi kakinkamakgtayan xlakata ni natlawayaw tuku nitlan chu kakinkamakgtayan xlakata Satanás nitu nakinkatlawaniyan (Mat. 6:11-13). Akxni waniyaw Jehová putum umakgolh, limasiyayaw pi maklakaskinaw xtamakgtay chu waniyaw pi lakaskinaw tlan kakinkaʼakxilhni.

6. ¿Kajwatiya naskinaw kkioracioneskan tuku lichuwinan oración xla padrenuestro?

⁶ Jesús ni xlakaskin pi kstalaninanin kajwatiya xwankgolh kxʼoracioneskan tachuwin nema tatekgsa kʼoración xla padrenuestro. Kʼatanu oraciones nema tlawalh lichuwinalh  amakgapitsi tuku xlilakgaputsama uma kilhtamaku (Mat. 26:39, 42; Juan 17:1-26). Akinin na tlan nawanaw kkioracioneskan tuku lilakgaputsayaw. Akgtum liʼakxilhtit, akxni wi tuku amaw laksakaw, tlan naskinaw liskgalala chu taʼakgatekgsni (Sal. 119:33, 34). Akxni wi tuku amaw lakgatayayaw nema tuwa makgkatsiyaw, tlan naskiniyaw Jehová liskgalala chu taʼakgatekgsni (Prov. 2:6). Natlatni tlan natlawakgo oración xpalakata xkamanankan, chu kamanan, xpalakata xnatlatnikan. Nachuna, kimputumkan tlan natlawayaw oración xpalakata tiku kamakgalhtawakgeyaw chu xpalakata latamanin tiku kalitachuwinanaw Dios. Pero, akxni tlawakan oración ni kajwatiya skinkan.

7. ¿Tuku xlakata kilimalankitkan Jehová akxni tlawayaw kioracioneskan?

⁷ Akxni tlawayaw kioracioneskan, na xlakaskina namalankiyaw Jehová. Xla lakgchan namalankiyaw. Chatum tiku tsokgli salmo wa: «Tlan likatsiya chu lu tapatinamputuna». Chu wampa: «Wix chatum Dios xalakgalhamanina chu kgalhkgalhinana chu litsamaya tapaxkit nema ni makgxtakgnan» (Sal. 86:5, 15). Pulaklhuwa tuku xlakata malankiyaw Jehová xlakata la likatsi chu xlakata putum tuku tlawa.

8. ¿Tuku makgapitsi nema tlan nalipaxtikatsininanaw akxni tlawayaw oración? (Salmo 104:12-15, 24).

⁸ Ni kajwatiya malankiputunaw Jehová, akxni tlawaniyaw oración na maxkiputunaw tapaxtikatsinit xlakata putum tuku tlan kinkamaxkiyan. Akgtum liʼakxilhtit, xlakata lakglilakgatit xanat, tipalhuwa xalakgkgama liwat chu xlakata kgalhiyaw lu laktlan amigos. Putum uma kinkamaxkiyan xapaxkina kinTlatkan xlakata xla lakaskin pi kapaxuwaw (kalikgalhtawakga Salmo 104:12-15, 24). Chu, tlakg paxtikatsiniyaw xlakata lhuwa taway xla kintakanajlakan nema kinkamaxkiyan chu xlakata xastlan takgalhkgalhin nema kgalhiyaw.

9. ¿Tuku kilitlawatkan xlakata ankgalhin napaxtikatsiniyaw Jehová? (1 Tesalonicenses 5:17, 18).

⁹ Max namin kilhtamaku napatsankgayaw namaxkiyaw tapaxtikatsinit Jehová xlakata putum tuku tlawa kimpalakatakan. ¿Tuku tlan natlawayaw xlakata nichuna nakinkaʼakgspulayan? Max tlan natsokgwiliyaw tuku skininitaw  chu ni xmakgasni naʼakxilhaw la Jehová kinkakgalhtinitan. Alistalh tlan natlawayaw oración xlakata napaxtikatsiniyaw xtamakgtay (kalikgalhtawakga 1 Tesalonicenses 5:17, 18). ¿Ni xlikana pi lu lipaxuwayaw akxni amakgapitsin lu kinkapaxtikatsinikgoyan? Na lu makgapaxuwayaw Jehová akxni paxtikatsiniyaw xlakata kgalhtilh kioracioneskan (Col. 3:15). Pero wi atanu tuku xlakata maxkiyaw paxtikatsinit Jehová, chu lu xlakaskinka. Kaʼakxilhwi tuku uma.

10. ¿Tuku xlakata napaxtikatsiniyaw Jehová xlakata makamilh xKgawasa unu kKatiyatni? (1 Pedro 2:21).

¹⁰ (Kalikgalhtawakga 1 Pedro 2:21). Kilipaxtikatsinitkan Jehová xlakata makamilh xKgawasa tiku lu xpaxki xlakata xkinkamasiyanin. Akxni likgalhtawakgayaw xlakata xlatamat Jesús, lhuwa tuku katsiniyaw xpalakata Jehová chu tuku kilitlawatkan xlakata namakgapaxuwayaw. Komo nakanajlaniyaw xtamakamastan Cristo, tlan nalipaxuwayaw la talalinaw Jehová chu nakgalhiyaw takaksni (Rom. 5:1).

11. ¿Tuku xlakata tlawayaw oración kxtukuwani Jesús?

¹¹ Paxtikatsiniyaw Jehová xlakata tlan tlawaniyaw oración kxtukuwani xKgawasa. Jehová maklakaskin Jesús xlakata nakinkamaxkiyan tuku maklakaskinaw. Komo natlawayaw oración kxtukuwani xKgawasa, Jehová nakinkakgaxmatniyan chu nakinkakgalhtiyan. Jesús wa: «Putum tuku wixin naskinatit kkintukuwani, naktlawa, xlakata xaTlat nalimalankikan xpalakata xaKgawasa» (Juan 14:13, 14).

12. ¿Tuku atanu tlan nalipaxtikatsiniyaw Jehová xpalakata xKgawasa?

¹² Jehová kinkatapatiyan kintalakgalhinkan xpalakata xtamakamastan Jesús. Biblia wan pi Jesús wa «Sacerdote tiku tlakg kgalhi limapakgsin» chu «tawilanit kxpakgastakat kxpumapakgsin Dios kʼakgapun» (Heb. 8:1). Na wan pi «kgalhiyaw chatum makgtayana tiku akxtum tawi xaTlat: Jesucristo» (1 Juan 2:1). Lu paxtikatsiniyaw Jehová pi kinkamaxkinitan chatum Sacerdote tiku tlakg kgalhi limapakgsin chu kinkalakgalhamanan, akgatekgsa tuku nila tlawayaw chu «kinkapalakachuwinanan» (Rom. 8:34; Heb. 4:15). Komo Jesús ni xtamakamastalh, akinin, tiku kgalhiyaw talakgalhin, nila xtlawaniw oración Jehová. Lu paxtikatsiniyaw Jehová xlakata tamaskiwin nema kinkamaxkinitan: xKgawasa tiku paxki.

13. Katsisni akxni nina xni Jesús, ¿la limasiyalh pi xkapaxki kstalaninanin?

¹³ Katsisni akxni nina xni, Jesús tlawalh lu xalhman oración xpalakata kstalaninanin, chu skinilh xTlat pi xkakuentajtlawalh xlakata Akgskgawini nitu xkatlawanilh (Juan 17:15). ¡Chuna limasiyalh pi lu xkapaxki! Maski lu nitlan tuku xʼama titaxtu, kalilakgaputsalh xʼapóstoles.

14. ¿La limasiyayaw pi kapaxkiyaw kinatalankan?

¹⁴ Chuna la Jesús, ni kajwatiya lilakgaputsayaw tuku maklakaskinaw. Wata, lismaninitaw tlawayaw oración xpalakata kinatalankan. Chuna, kgalhakgaxmataw limapakgsin nema Jesús mastalh pi nalapaxkiyaw chatunu chatunu chu limasiyaniyaw Jehová la xlilhuwa kapaxkiyaw kinatalankan (Juan 13:34). Chu katsiyaw pi, akxni tlawayaw oración xpalakata amakgapitsin xlakskujnin Jehová, ni kaj makgatsankgamaw kilhtamaku. Biblia wan pi «xʼoración chatum tiku akgstitum likatsi kgalhi lhuwa litliwakga chu tlan kamakgtaya latamanin» (Sant. 5:16).

15. ¿Tuku xlakata kinatalankan maklakaskinkgo natlawayaw oración xpalakatakan?

 ¹⁵ Kinatalankan maklakaskinkgo natlawayaw oración xpalakatakan xlakata tuwa tuku titaxtukgo. Tlan naskiniyaw Jehová pi kakamakgtayalh natayanikgo tuku tuwa titaxtukgo la tajatat, akxni la tuku masputunan, guerras o taputsastalanit. Na tlan natlawayaw oración xpalakatakan natalan tiku makgtayanankgo niku wi tuku masputunan. Max wix lakgapasa tiku chuna titaxtuma. ¿Tlan xmapakuwi akxni tlawaya mioración? Akxni skiniyaw Jehová pi kakamakgtayalh kinatalankan chuntiya natayanikgo, limasiyamaw pi xlikana kapaxkiyaw.

16. ¿Tuku xlakata na natlawayaw oración xpalakata natalan tiku kinkapulalinkgoyan?

¹⁶ Natalan tiku pulalinkgo congregación lu paxtikatsininankgo pi tlawayaw oración xpalakatakan, chu umakgolh oraciones lu kamakgtaya. Chuna makgkatsilh apóstol Pablo. Tsokgli: «Na katlawatit oración kimpalakata, xlakata akxni nakchuwinan nakilakgchin tachuwin nema xlilat, xlakata ni nakpekuan akxni naklichuwinan tuku tsekg wi xla Dios xpalakata xatlan tamakatsinin» (Efes. 6:19). La uku na wilakgolh natalan tiku kinkapulalinkgoyan chu lu palha skujkgo. Akxni skiniyaw Jehová pi kasikulunatlawalh putum tuku tlawakgo, limasiyayaw pi kapaxkiyaw.

17, 18. ¿Tuku kilhtamaku max nakinkawanikanan pi katlawaw oración kxlakatinkan amakgapitsin, chu tuku kuenta kilitlawatkan?

¹⁷ Max namin kilhtamaku nakinkawanikanan pi katlawaw oración kxlakatinkan amakgapitsin. Akgtum liʼakxilhtit, max chatum tala puskat tiku makgalhtawakgenama nawani achatum tiku taʼanit pi katlawalh akgtum oración. Max tala tiku anit makgmakgalhtawakgenan ni liwana lakgapasa tiku makgalhtawakgemaka, chu max nalaksaka natlawa xaʼawatiya oración. Chuna tlan naskin tuku namakgtaya tiku makgalhtawakgemaka.

¹⁸ ¿Chu komo nawanikan chatum tala pi katlawalh akgtum oración nema tlawakan akxni ankan lichuwinankan Dios o ktamakxtumit? Natalan tiku kgalhikgo uma talakgatay xlilakapastakatkan tuku xlakata tlawamaka uma tamakxtumit. Ni xlitamaklakaskinat oración  xlakata nakastakyawakan natalan o xlakata namastakan akgtum tamakatsinin. Ktamakxtumit mastakan akgkitsis minuto xlakata nakilhtlikan chu natlawakan oración. Wa xlakata tala tiku natlawa oración ni “lu lhuwa tachuwin nawan”, liwaka akxni aku ama tsuku tamakxtumit (Mat. 6:7).

19. ¿Tuku nakinkamakgtayayan ni kaj xalan nakinkalakgchinan xkilhtamaku Jehová?

¹⁹ Xlakata xkilhtamaku Jehová talakatsuwima, tlakg xlakaskinka kiliʼakxilhatkan oración. Akxni Jesús lichuwinalh uma, xla wa: «Skgalalh katawilatit, chu chuntiya kaskinitit Dios xliputum minakujkan, xlakata tlan nalakgtaxtuniyatit putum tuku xlikgantaxtut» (Luc. 21:36). Komo ankgalhin natlawayaw oración, kintakanajlakan tliwakglh natawila chu skgalalh natawilayaw akxni nachin xkilhtamaku Jehová.

20. ¿Tuku tlan natlawayaw xlakata kioracionkan nalitaxtu la xamuksun incienso?

²⁰ ¿Tuku lichuwinanitaw kʼuma artículo? Lu xtapalh akxilhaw pi tlan tlawaniyaw oración Jehová. Tuku lu xlakaskinka nema tlan nawanaw kkioracioneskan wa tuku tatalakxtumi xtalakaskin Jehová. Na paxtikatsiniyaw xlakata xKgawasa Dios chu xTamapakgsin, chu na tlawayaw oración xpalakata kinatalankan. Chu na tlan nawaniyaw Jehová, pi kakinkamaxkin tuku maklakaskinaw chu tuku xla kintakanajlakan. Akxni liwana lilakpuwanaw tuku nawanaw kkioracioneskan, limasiyayaw pi lhuwa xtapalh liʼakxilhaw uma talakgalhaman. Xpalakata Jehová, kintachuwinkan nalitaxtu la akgtum xamuksun incienso nema tlan mamakgkatsininan chu “lu makgapaxuwanan” (Prov. 15:8).