Jesús masiyalh pi ni nakatakgalhiyaw taʼakglhuwit amakgapitsin. Pero akgtum kilhtamaku kawanilh xʼapóstoles: «Ni kalakpuwantit pi kmilh wili takaksni kkatiyatni; ni kmilh wili takaksni, wata espada. Xlakata kmilh wili tapapitsit, xakgawasa nalakataki xtlat, chu xatsumat nalakataki xtse chu puwiti nalakataki xputiatse» (Mat. 10:34, 35). ¿Tuku wamputun umakgolh tachuwin?

Jesús ni xkamapapitsiputun familias, pero xkatsi pi xʼama min kilhtamaku xtamasiy chuna xʼama tlawa. Tiku kstalaninanin litaxtuputunkgo chu tamunuputunkgo xlikatsitkan pi xfamiliajkan max ni katilakgatikgolh tuku nalaksakkgo. Xlikana, max wi tiku lu tuwa nakitaxtuni xaʼakgstitum nastalani xtatukit Cristo, komo chatum tiku xalak xfamilia o max tiku tamakgaxtokga nalakatitayani.

Biblia kawani kstalaninanin Cristo: «Tlan kakatalalipitit putum latamanin» (Rom. 12:18). Pero xpalakata makgapitsi familias xtamasiy Jesús max nalitaxtu la kgantum «espada». Uma chuna lay akxni chatum xalak familia makgamakglhtinan xtamasiy Jesús, pero amakgapitsin lakgmakgankgo o asta lakatitayakgo. Tiku xalak xfamilia xtalamakgasitsin nalitaxtukgo xlakata katsinima tuku xaxlikana (Mat. 10:36).

Kstalaninanin Cristo tiku akxtum katawilakgolh tiku makgtapakgsikgo k’atanu takanajla min kilhtamaku lu tuwa tuku titaxtukgo xlakata katuwa tawila tapaxkit nema kgalhinikgo Jehová chu Jesús. Max tiku xalak xfamilia nakamatlawiputunkgo fiestas nema tlawakgo xtakanajlakan. Uma kilhtamaku, xlilaksakatkan tiku makgapaxuwaputunkgo. Jesús wa: «Tiku tlakg paxki xtlat o xtse nixawa akit, ni minini nakistalani» (Mat. 10:37). Xlikana, Jesús ni xkawaniputun kstalaninanin pi ni lu xlipaxkitkan xnatlatnikan xlakata tlan kstalanikgolh. Tuku xkamasiyanima wa pi liwana xlikatsinitkan xwanit tuku tlakg xlakaskinka kxlatamatkan. Komo chatum tiku xalak kifamiliajkan tiku ni xtatayana Jehová, nakinkalakatayaniyan xlakata skujnaniyaw Jehová, chuntiya paxkiyaw, pero katsiyaw pi tapaxkit nema kgalhiniyaw Jehová tlakg xlakaskinka.

Xlikana pi lu nitlan limakgkatsiyaw akxni tiku xalak kifamiliajkan kinkalakatitayanikgoyan. Pero kstalaninanin Jesús liwana lakapastakaw umakgolh tachuwin: «Tiku ni makglhtinamputun xkiwi nema makgapatinan chu nakistalani, ni minini kistalanina nalitaxtu» (Mat. 10:38). Liwana katsiyaw pi komo nastalaniyaw Jesús ni kililakpuwanatkan pi ni napatinanaw, ni natitaxtuyaw tuku tuwa o ni nakinkalakatayanikgoyan kifamiliajkan. Pero kgalhkgalhiyaw pi xatlan kintayatkan nakamakgtaya nalakgpalikgo tuku lakpuwankgo chu na nakatsiputunkgo xaxlikana (1 Ped. 3:1, 2).