1, 2. ¿Tiku xwanit Sadoc? (1 Crónicas 12:​22, 26-28).

 KALILAKPUWANTI uma: tamakxtumikgonit liwaka 340,000 lakchixkuwin xlakata mapakgsina xalak Israel nalimaxtukgo David. Akgtutu kilhtamaku lu pixlanka takgaxmata kkasipijni lakatsu kʼHebrón la kgalhchuwinamakgo tiku anta wilakgo, kilhtlimakgo chu litsimakgo (1 Crón. 12:39). Na anta wi chatum kgawasa tiku wanikan Sadoc, tiku max nipara tasiya niku wi kxlakgstipankan lhuwa latamanin. Pero Jehová akxilhli, chu matsokgwilininalh xpalakata uma kgawasa xlakata wi tuku xkatsiniw (kalikgalhtawakga 1 Crónicas 12:​22, 26-28). Pero ¿tiku xwanit Sadoc?

² Sadoc sacerdote xlitaxtu chu akxtum xtaskuja Abiatar, sacerdote tiku tlakg xkgalhi limapakgsin. Jehová na xmaxkinit Sadoc lhuwa liskgalala chu tlan xʼakgatekgsa xtalakaskin Jehová (2 Sam. 15:27). Latamanin xputsakgo xlakata kskinikgo tastakyaw. Nachuna, Sadoc ni xpekuan. Kʼuma artículo nalichuwinanaw la limasiyalh pi ni xpekuan.

3. 1) ¿Tuku xlakata talakaskin pi ni napekuanaw? 2) ¿Tuku nalichuwinanaw kʼuma artículo?

³ Kʼumakgolh xaʼawatiya kilhtamaku, Satanás tlakg talatlawama xkachikin Dios (1 Ped. 5:8). Xlakata nina chin kilhtamaku akxni Jehová namasputu Satanás chu xkakilhtamaku, talakaskin chuntiya ni napekuanaw (Sal. 31:24). Kalichuwinaw pulaktutu la tlan nastalaniyaw xliʼakxilhtit Sadoc chu ni napekuanaw.

KATATAYA XTAMAPAKGSIN DIOS

4. ¿Tuku xlakata wanaw pi talakaskin ni napekuanaw xlakata natatayayaw xTamapakgsin Dios? (Na kaʼakxilhti dibujo).

⁴ Kskujnin Jehová xliputum kinakujkan tatayayaw xTamapakgsin. Pero min kilhtamaku talakaskin ni napekuanaw xlakata chuna natlawayaw (Mat. 6:33). Kalakapastakwi pi lamaw kʼuma xalixkajni kakilhtamaku chu talakaskin ni napekuanaw  xlakata nakgalhakgaxmataw xlimapakgsin Jehová chu xlakata nalichuwinanaw xalaktlan tamakatsinin (1 Tes. 2:2). Na tuwa makgkatsiyaw ni namakgtanuyaw kʼuma kakilhtamaku niku chali chali tlakg anan tapapitsit (Juan 18:36). Chu lhuwa natalan lipatinankgonit xlakata ni kgalhikgo tumin, kawilinikanit o asta katamaknukanit kpulachin kaj xlakata ni makgtanukgo kpolítica o ni makgtlawakgo guerra.

5. ¿Tuku xlakata xtalakaskin pi Sadoc ni xpekualh xlakata tlan xtatayalh David?

⁵ Sadoc ni kajwatiya xʼanit makgpaskuajnan kʼHebrón xlakata David mapakgsina litaxtulh. Xla xtakaxnit chu xlinit tuku nalitalatlawanan komo xtalakaskilh (1 Crón. 12:38). Liwana xlakkaxwilinit nataʼan David niku xʼalh talatlawanan xlakata xmakgtayalh Israel. Sadoc ni soldado xwanit chu max ni lu xkatsini la xtalatlawanankan, pero ni xpekuan.

6. ¿La makgtayalh Sadoc xliʼakxilhtit David? (Salmo 138:3).

⁶ ¿Tuku makgtayalh Sadoc ni napekuan? Max lu makgtayalh xliʼakxilhtitkan lakchixkuwin tiku ni xpekuankgo chu lu lakgtliwakgan xwankgonit. Chatum max wa David. Xlakata David “xkapulalin Israel ktatalachipat” chu ni xpekuan, putum israelitas tatayakgolh xlakata mapakgsina xlitaxtulh (1 Crón. 11:​1, 2). David ankgalhin xlipawan Jehová chu xputsa xtamakgtay akxni xtalamakgasitsin xputsastalanikgo (Sal. 28:7; kalikgalhtawakga Salmo 138:3). Sadoc max na lu litamakgtayalh xliʼakxilhtitkan lakchixkuwin tiku ni xpekuankgo nema xlamakgo kxkilhtamaku, chuna la Jehoiadá chu xkgawasa, Benaya, tiku soldado xlitaxtu, chu puxamatiy lakchixkuwin tiku xanapuxkun xlitaxtukgo kʼakgatunu tribus nema tatayakgolh David (1 Crón. 11:​22-25; 12:​26-28). Putum umakgolh lakchixkuwin tatayakgolh David xlakata mapakgsina xlitaxtulh.

7. 1) ¿Tiku kinkawilinikgoyan tlan liʼakxilhtit xlakata ni pekuankgo? 2) ¿Tuku masiyaniyan video niku lichuwinankan tala Nsilu?

⁷ Komo nalilakpuwanaw xliʼakxilhtitkan  kskujnin Jehová tiku tatayakgonit xTamapakgsin, nakinkamakgtayayan ni napekuanaw chu nakinkamaxkiyan litliwakga. Kimapakgsinakan, Jesucristo, nipara tsinu makgtanulh kpolítica xalak uma kakilhtamaku (Mat. 4:​8-11; Juan 6:​14, 15). Xla ankgalhin lipawa pi Jehová xʼama makgtaya ni napekuan chu natlawa tuku tlan. Na kgalhiyaw xatlan xliʼakxilhtitkan lakgkgawasan xala uku tiku ni makgtanuputunkgonit kpolítica chu ni soldados litaxtukgonit. Tlan nalikgalhtawakgaya xliʼakxilhtitkan anta ksitio jw.org. a

KAKAMAKGTAYA NATALAN

8. ¿Tuku kilhtamaku talakaskin pi lakgkgolotsin ni napekuankgo xlakata tlan nakamakgtayakgo natalan?

⁸ Kskujnin Jehová lu lakgatiyaw lamakgtayayaw (2 Cor. 8:4). Pero min kilhtamaku talakaskin ni napekuanaw xlakata nalamakgtayayaw. Kalilakpuwaw akxni anan akgtum guerra. Lakgkgolotsin katsikgo pi natalan maklakaskinkgo pi nakamatliwakglhkan, maklakaskinkgo tamakgtay o asta max natalakaskin pi nakalinikan likgalhtawakga o Biblia, o atanu tuku maklakaskinkgo. Xlakata lu kapaxkikgo natalan, lakgkgolotsin xatapaxuwan kamaxkikgo tuku maklakaskinkgo, maski max kalipekua wilikgo xlatamatkan (Juan 15:​12, 13). Chuna stalanikgo xliʼakxilhtit Sadoc, tiku ni xpekuan.

9. Chuna la wan 2 Samuel 15:​27-29, ¿tuku wanilh David sacerdote Sadoc pi xtlawalh? (Na kaʼakxilhti dibujo).

⁹ Xlatamat David kalipekua xwi. Xkgawasa, Absalón, xmakglhtiputun xtamapakgsin (2 Sam. 15:​12, 13). Wa xlakata, David lakapala tsalataxtulh kJerusalén. Kawanilh kskujnin: «¡Kaʼaw, katsalataxtuw o nipara chatum akinin tlan katitsalanilh Absalón!» (2 Sam. 15:14). Akxni xtaxtukgonita, David akxilhli pi xtalakaskin pi wi tiku xtamakgxtakgli kJerusalén xlakata xkatsilh tuku xlakpuwama natlawa Absalón chu xmakatsinilh David. Wa xlakata kawanilh Sadoc chu amakgapitsi sacerdotes  pi xtaspitkgolh xlakata kskgalakgolh Absalón (kalikgalhtawakga 2 Samuel 15:​27-29). Xtalakaskin lu kuenta xtlawakgolh tuku x’amakgo tlawakgo xlakata taskujut nema xkalakgayawakanit lu tuwa xwanit; kalipekua xwilimakgo xlatamatkan. Absalón xʼakstu xpaxkikan, xaluku xwanit chu nila xlipawankan. Kalilakpuwanti tuku xkatlawanilh Absalón umakgolh lakchixkuwin komo xkatsilh pi kskgalamakgo xlakata namakgtayakgo David.

10. ¿Tuku tlawakgolh Sadoc chu amakgapitsin sacerdotes xlakata xmakgtayakgolh David?

¹⁰ David lakkaxwililh tuku xʼama tlawa chu kaskinilh tamakgtay Sadoc chu Husái, atanu tlan xʼamigo (2 Sam. 15:​32-37). Husái tlawalh tuku David wanilh, akgskgawilh Absalón chu limasiyanilh pi xtataya chu wanilh la tlan xtalatlawalh David. Pero uma maxkilh kilhtamaku David xlakata xmakaxli tuku xtalakaskin xlakata xtalatlawanalh. Alistalh, Husái litachuwinalh Sadoc chu Abiatar tuku xlakkaxwilinit Absalón (2 Sam. 17:​8-16). Umakgolh chatiy lakchixkuwin malakgachanikgolh tamakatsinin David (2 Sam. 17:17). Xlakata Jehová kamakgtayalh, Sadoc chu amakgapitsin sacerdotes lakgmaxtukgolh xlatamat David (2 Sam. 17:​21, 22).

11. Komo nakinkawanikanan pi kakamakgtayaw natalan, ¿la nalimasiyayaw pi chuna la Sadoc ni pekuanaw?

¹¹ Komo nakinkaskinikanan pi kakamakgtayaw natalan tiku kalipekua wi xlatamatkan, ¿la tlan nalimasiyayaw pi chuna la Sadoc ni pekuanaw? 1) Katlawaw tuku nakinkawanikanan. Akxni lama tuku kalipekua wili kilatamatkan, lu xlakaskinka pi nakgalhakgaxmatnanaw xlakata ni naʼanan tapapitsit. Wa xlakata, katlawaw tuku nakinkawaniyan sucursal (Heb. 13:17). Talakaskin pi lakgkgolotsin ankgalhin naʼakxilhkgo tuku wan sucursal xlakata nakatsikgo tuku xlitlawatkan akxni nina min tuku masputunan chu tuku natlawakgo komo wi tuku masputunalh (1 Cor. 14:​33, 40). 2) Ni kapekuaw, pero ni akglakgwa tuku katlawaw (Prov. 22:3). Pulana kalilakpuwaw tuku natlawayaw. Komo ni talakaskin, ni katlawaw  tuku kalipekua nawili kilatamatkan. 3) Kalipawaw Jehová. Xla kinkalilakgaputsayan kimputumkan chu ni lakaskin pi wi tuku nakinkaʼakgspulayan. Xla tlan nakinkamakgtayayan xlakata nakamaxkiyaw kinatalankan tuku maklakaskimakgo, chu ni kalipekua nawiliyaw kilatamatkan.

12, 13. ¿Tuku masiyaniyan xliʼakxilhtitkan Víktor chu Vitali? (Na kaʼakxilhti dibujo).

¹² Kalichuwinaw xliʼakxilhtitkan Víktor chu Vitali, chatiy lakgkgolotsin xalak congregación tiku xkalinikgo liwat chu chuchut natalan k’Ucrania. Víktor wan: «Xakkanaw putsatapuliyaw liwat. Xmin kilhtamaku xakkgaxmataw la xmapankganamaka lakatsu niku xaklamaw. Chatum tala xatapaxuwan maskiwinalh liwat nema xmakinit, chu uma makgtayanalh xlakata lhuwa publicadores xkgalhikgolh tuku nawakgo makgapitsi kilhtamaku. Klakapastaka pi akxni xakmawakamaw liwat kputlaw, akgtum bomba tamachi akgpuxam metro xlilakatsu niku xakyaw, pero ni pankgli. Tantaku ktasaskinilh Jehová pi xkimakgtayalh xlakata ni xakpekualh chu chuntiya xakkamakgtayalh natalan».

¹³ Vitali wan: «Xtalakaskin pi ni xakpekualh. Akxni xapulana wi niku kkilalh, 12 horas kmatlawanilh putlaw. Putuminika uma kilhtamaku ktlawanilh oración Jehová». Talakaskilh pi Vitali ni xpekualh, pero na ni akglakgwa tuku xtlawa. Xla wan: «Ankgalhin xakskini Jehová pi xkimaxkilh liskgalala chu xkimakgtayalh nakʼakgatekgsa pi ni putum tlan xaktlawa. Kajwatiya xakkan ktiji niku mapakgsinanin xmastakgonit talakaskin natitaxtukan. Kintakanajla lu tatliwakglhli akxni kakxilhli pi natalan makxtum kskujkgo. Xmapanukgo tuku xlakgatalanit tiji, xmastokgkgo liwat chu xmawakakgo kputlaw chu Víktor chu akit xkinkamaxkikgoyan liwat chu niku xaklakgtunkuwiw o xaklhtataw».

NI KAMAKGXTAKGTI JEHOVÁ

14. ¿La makgkatsiyaw akxni chatum tiku lu paxkiyaw makgxtakga Jehová?

¹⁴ Pulaktum tuku lu kinkamakgalipuwanan wa akxni chatum tiku xalak kifamiliajkan o kiʼamigojkan makgxtakga Jehová (Sal. 78:40; Prov. 24:10). Chu komo lu tlan xtalalinaw, tlakg tuwa makgkatsiyaw. Komo wix chuna titaxtunita, xliʼakxilhtit Sadoc lu namakgtayayan.

15. ¿Tuku xlakata wanaw pi xtalakaskin pi Sadoc ni xpekualh xlakata ni xmakgxtakgli Jehová? (1 Reyes 1:​5-8).

¹⁵ Akxni David kgolota xwanit chu xʼamaja niy, xkgawasa, Adonías, xmakglhtiputun xtamapakgsin, pero Jehová xlakaskin pi Salomón wa mapakgsina xlitaxtulh (1 Crón. 22:​9, 10). Sadoc ni makgxtakgli Jehová, pero xʼamigo, Abiatar, tatayalh Adonías (kalikgalhtawakga 1 Reyes 1:​5-8). Chuna Abiatar limasiyalh pi xmakgxtakgma David chu xmakgxtakgma Jehová. Kalilakpuwanti la makgkatsilh Sadoc. Liwaka 40 kata sacerdotes xlitaxtukgonit chu akxtum kskujkgonit(2 Sam. 8:17). Akxtum xkuentajtlawakgonit “Arca nema xtapakgsini xaxlikana Dios” (2 Sam. 15:29). Xmakgtayakgonit David chu lhuwa tuku xtitaxtukgonit xlakata akxtum kskujnanimakgo Jehová (2 Sam. 19:​11-14).

16. ¿Tuku makgtayalh Sadoc ni namakgxtakga Jehová?

¹⁶ Sadoc ni makgxtakgli Jehová maski Abiatar chuna tlawalh, chu David ankgalhin lipawa Sadoc. Akxni makatsinika David tuku xtlawama Adonías, xla kaskinilh xtamakgtaykan Sadoc, Natán chu Benaya xlakata mapakgsina xlimaxtukgolh Salomón (1 Rey. 1:​32-34). Sadoc max lu makgpuwantinilh xliʼakxilhtitkan amakgapitsi kskujnin Jehová, chuna la Natán, tiku nikxni makgxtakgli Dios chu tatayalh mapakgsina David (1 Rey. 1:​38, 39). Akxni Salomón mapakgsina litaxtulh, wililh Sadoc «xlakgxokgo Abiatar» xlakata sacerdote tiku tlakg kgalhi limapakgsin xlitaxtulh (1 Rey. 2:35).

17. ¿La tlan nastalaniya xliʼakxilhtit Sadoc komo chatum tiku lu paxkiya namakgxtakga Jehová?

 ¹⁷ ¿La tlan nastalaniya xliʼakxilhtit Sadoc? Komo chatum tiku lu xpaxkiya namakgxtakga Jehová, liwana kalimasiya pi wix tatayaya Jehová (Jos. 24:15). Xla namaxkiyan litliwakga nema maklakaskina chu namakgtayayan ni napekuana. Ankgalhin katlawani oración chu ni kakatamakgatlini tiku ni makgxtakgkgo. Jehová lu xtapalh liʼakxilha xlakata ni makgxtakga chu nasikulunatlawayan (2 Sam. 22:26).

18. ¿Tuku masiyaniyan xliʼakxilhtitkan Marco chu Sidse?

¹⁸ Kalichuwinaw tuku titaxtukgonit Marco chu xpuskat, Sidse. Chatiy xlaktsumankan makgxtakgkgolh Jehová akxni laklankata xwankgonit. Marco wan: «Lata akxni lakachin chatum aktsu skgata, xnatlatni lu tsukukgo paxkikgo. Natlawakgo putum tuku natalakaskin xlakata nakuentajtlawakgo. Wa xlakata, akxni kamanan makgxtakgkgo Jehová, lu makgalipuwanan». Xla wampara: «Pero Jehová ankgalhin kinkamakgtayanitan. Akxni akit lu klipuwan, xla matliwakglha Sidse xlakata nakimakgtaya, chu akxni xla lu lipuwama, akit kimatliwakglha xlakata tlan nakmakgtaya Sidse». Chu Sidse wan: «Ktayaninitaw xlakata Jehová kinkamaxkinitan litliwakga. Lu nitlan xakmakgkatsi xlakata xaklakpuwan pi akit xaklin kuenta xlakata kilaktsuman xmakgxtakgkgonit Jehová. Wa xlakata klitachuwinalh Jehová. Ni lhuwa kilhtamaku titaxtulh, chatum tala puskat tiku makgasata ni xakakxilha kilakgtalakatsuwilh, kimpakgachipalh chu kiwanilh: “Sidse, kalakapastakti pi uma ni minkuenta”. Xlakata Jehová kinkamakgtayanitan, tlan chuntiya xatapaxuwan kskujnanimaw».

19. ¿Tuku lakpuwanita natlawaya?

¹⁹ Jehová lakaskin pi putum kskujnin, chuna la Sadoc kalitaxtuw: ni napekuanaw (2 Tim. 1:7). Pero xla ni lakaskin pi kiʼakstukan nakinkalipawankanan, wata lakaskin pi wa nalipawanaw. Wa xlakata, akxni natitaxtuya tuku tuwa niku natalakaskin pi ni napekuana, kaskini xtamakgtay Jehová. Liwana kakatsi pi xla namakgtayayan nastalaniya xliʼakxilhtit Sadoc chu ni napekuana (1 Ped. 5:10).