ARTÍCULO NEMA NATALIKGALHTAWAKGA 30
TAKILHTLIN 36 Kakuentajtlawa minaku
¿Tuku kinkamasiyaniyan tuku tlawakgolh mapakgsinanin xalak Israel?
«Wixin naʼakxilhatit tuku litalakgpali tiku xaʼakgstitum chu tiku lixkajni likatsi, tiku skujnani Dios chu tiku ni skujnani» (MAL. 3:18).
TUKU NAʼAKXILHAW
Naʼakxilhaw la xkalakputsanani Jehová mapakgsinanin xalak Israel. Chu uma nakinkamakgtayayan naʼakgatekgsaw tuku kilitlawatkan la uku xlakata tlan namakgapaxuwayaw Jehová.
1, 2. ¿Tuku wan Biblia xlakata makgapitsi mapakgsinanin xalak Israel?
BIBLIA kalichuwinan liwaka 40 lakchixkuwin tiku mapakgsinanin xalak Israel litaxtukgolh, chu lichuwinan tuku tlawakgolh kxlatamatkan makgapitsin. a Akgtum liʼakxilhtit, lichuwinan pi asta mapakgsinanin tiku tlan xlikatsikgo tlawakgolh tuku nitlan. Kalichuwinaw David. Katsiyaw pi xla chatum tlan mapakgsina litaxtulh, chu Jehová wa xpalakata: «Kistalanilh xliputum xnaku, xtlawa tuku xaʼakgstitum kkilakatin» (1 Rey. 14:8). Pero tatalakgxtumilh chatum puskat tiku xmakgaxtokga chu lakkaxwililh pi xmakgnika xchixku uma puskat kʼakgtum guerra (2 Sam. 11:4, 14, 15).
2 Pero na latamakgolh nixatlan mapakgsinanin tiku tlawakgolh tuku tlan. Kalichuwinaw Rehoboam. Katsiyaw pi Jehová ni xatlan mapakgsina liʼakxilhli, xlakata wa pi «tlawalh tuku nitlan» (2 Crón. 12:14). Pero akxni Jehová wanilh pi ni xkatalachipalh akgkaw tribus xalak Israel chu xmastalh talakaskin pi xlaksakkgolh xmapakgsinakan, xla kgalhakgaxmatli. Nachuna, lhuwa tuku tlawalh xlakata kachikin xkgalhilh tuku xlitamakgtayalh chu xtalatlawananin nitu xkatlawanikgolh (1 Rey. 12:21-24; 2 Crón. 11:5-12).
3. ¿Tuku takgalhskinin max nalilakpuwanaw, chu tuku naʼakxilhaw kʼuma artículo?
3 Komo putum mapakgsinanin xtlawakgo tuku tlan chu tuku nitlan, ¿tuku xlakata Jehová wa pi makgapitsin xaʼakgstitum xlikatsikgo chu amakgapitsin ni? ¿Tuku xlitalakgpalikgo? Xatakgalhtin umakgolh takgalhskinin nakinkamakgtayayan naʼakgatekgsaw tuku kilitlawatkan xlakata tlan namakgapaxuwayaw Jehová. Kʼuma artículo naʼakxilhaw pi akxni Jehová xkalakputsanani mapakgsinanin xalak Israel, pulaktutu tuku kuenta xtlawa: komo xpaxkikgo xliputum xnakujkan, komo xlikana xmakgxtakgkgonit xtalakgalhinkan chu komo xkakninanikgo chuna la xla xlakaskin.
XPAXKIKGO XLIPUTUM XNAKUJKAN
4. ¿Tuku xlitalakgpalikgo mapakgsinanin tiku xaʼakgstitum xwankgonit chu tiku ni?
4 Jehová xaʼakgstitum xkaliʼakxilha mapakgsinanin tiku xpaxkikgo xliputum xnakujkan. b Akgtum liʼakxilhtit, mapakgsina Jehosafat “putsalh Jehová xliputum xnaku” (2 Crón. 22:9). Xpalakata Josías, Biblia wan: «Ni analh chatum mapakgsina la xla, tiku xlakgtaspitli Jehová xliputum xnaku» (2 Rey. 23:25). ¿Pero tuku tlan nawanaw xpalakata Salomón, tiku alistalh tlawalh tuku nitlan? Xla «ni xliputum xnaku kakninanilh Jehová» (1 Rey. 11:4). Chu xpalakata Abiyam, atanu ni xaʼakgstitum mapakgsina, Biblia wan: «Ni skujnanilh Jehová xDios xliputum xnaku» (1 Rey. 15:3).
5. ¿Tuku kilhchanima naskujnaniyaw Jehová xliputum kinakujkan?
5 ¿Tuku kilhchanima naskujnaniyaw Jehová xliputum kinakujkan? Kilhchanima pi kajwatiya xla nakakninaniyaw xlakata lu paxkiyaw, chu ni kaj xafuerza nakakninaniyaw o kaj xlakata chuna xlilat. Na kilhchanima pi ankgalhin napaxkiyaw Jehová.
6. ¿La nalimasiyayaw pi paxkiyaw Jehová xliputum kinakujkan? (Proverbios 4:23; Mateo 5:29, 30).
6 ¿La tlan napaxkiyaw Jehová xliputum kinakujkan chuna la tlawakgolh xaʼakgstitum mapakgsinanin? Kililakgmakganatkan putum tuku xtlawalh pi nialh xliputum kinakujkan kskujniw Jehová chu tuku xtlawalh pi nialh lu napaxkiyaw, chuna la ni xatlan lilakgastan, lhuwa tuku kgalhiputunkan chu katalalinkan tiku nitlan likatsikgo. Komo naʼakxilhaw pi tlawamaw pulaktum uma, tunkun kamakgxtakgwi (kalikgalhtawakga Proverbios 4:23; Mateo 5:29, 30).
7. ¿Tuku xlakata skgalalh kilitawilatkan chu kililakgmakganatkan tuku nitlan?
7 Ni kamastaw talakaskin pi wi tuku natlawa pi nialh xliputum kinakujkan naskujnaniyaw Jehová. Komo ni skgalalh natawilayaw, kiʼakstukan nataʼakgskgawiyaw chu nalakpuwanaw pi komo lhuwa tuku liskujmaw kxkachikin Jehová, nitu katilaktlawalh chuna la talalinaw. Xlakata tlakg liwana naʼakgatekgsaw, kalilakpuwanti pi lapulaya kkilhtin akxni lu lonkgnama chu lu unama. ¿Ni xlikana pi akxni chipina kminchik, lhakgaya misuéter chu malakchuwaya mimalakcha? Komo nichuna xtlawa, xtanulh lonkgni. Uma kinkamasiyaniyan pi xlakata ni natamakgatliniyaw Jehová, ni kajwatiya talakaskin lhuwa tuku natlawayaw kxkachikin. Na ni kilimastatkan talakaskin pi tuku nitlan anan kkakilhtamaku nema xtachuna la un, natanu kkinakujkan chu namakgawiwi tapaxkit nema kgalhiniyaw Jehová chu natlawa pi nialh xliputum kinakujkan naskujniyaw (Efes. 2:2).
MAKGXTAKGKGOLH XTALAKGALHINKAN
8, 9. ¿Tuku tlawakgolh mapakgsinanin David chu Ezequías akxni kastakyawaka? (Kaʼakxilhti dibujo).
8 Chuna la lichuwinawa, mapakgsina David tlawalh akgtum lanka talakgalhin. Pero akxni Natán tachuwinalh xlakata nitlan tuku xtlawanit, David taktujulh, limasiyalh pi nitlan xlimakgkatsi xtalakgalhin chu nialh tlawapa (2 Sam. 12:13). Tuku tsokgwililh kSalmo 51 limasiya pi xlikana lu nitlan xlimakgkatsi tuku xtlawanit. David ni kaj xlimasiyaputun kxlakatin Natán pi nitlan xlimakgkatsi xtalakgalhin chu na nichuna tlawalh kaj xlakata ni xmalakgaxokgeka (Sal. 51:3, 4, 17, tuku litsuku).
9 Mapakgsina Ezequías na tlawalh talakgalhin kxlakatin Jehová. Biblia wan pi «xnaku tlankajwa makgkatsilh, chu uma tlawalh pi Dios ksitsinilh chu na xkasitsinilh Judá chu Jerusalén» (2 Crón. 32:25). ¿Tuku xlakata tlankajwa makgkatsika? Max xlakata Jehová lhuwa tuku xmaxkinit, xmakgtayanit nakamakgatlaja asirios o xlakata xmapaksanit. Max xlakata tlankajwa xmakgkatsikan, wa tuku tlawalh pi xkamasiyanilh babilonios tuku lhuwa xtapalh xkgalhi. Wa xlakata, palakachuwina Isaías stakyawalh (2 Rey. 20:12-18). Xtachuna la David, Ezequías taktujulh chu limasiyalh pi nitlan xlimakgkatsi tuku xtlawanit (2 Crón. 32:26). Chu akxni Jehová akxilhli putum tuku xtlawanit kxlatamat, liʼakxilhli la chatum xaʼakgstitum mapakgsina. Biblia wan: «Xla xtlawa tuku tlan» (2 Rey. 18:3).
Mapakgsina David chu mapakgsina Ezequías taktujukgolh akxni kastakyawa, limasiyakgolh pi nitlan xlimakgkatsikgo xtalakgalhinkan chu nialh chuna tlawakgolh (Kaʼakxilhti párrafos 8 chu 9).
10. ¿Tuku tlawalh mapakgsina Amasías akxni stakyawaka?
10 Mapakgsina Amasías xalak Judá tlawalh tuku tlan, «pero ni xliputum xnaku chuna xtlawa» (2 Crón. 25:2). ¿Tuku nitlan tlawalh? Akxni Jehová xmakgtayanita xlakata xkamakgatlajalh edomitas, Amasías tsukulh kakakninani xdioseskan. c Chu akxni chatum xpalakachuwina Jehová alh stakyawa, mapakgsina tlankajwa makgkatsika chu ni kgaxmatniputulh (2 Crón. 25:14-16).
11. Chuna la wan 2 Corintios 7:9, 11, ¿tuku kilitlawatkan xlakata Jehová nakinkatapatiyan? (Na kaʼakxilhti dibujos).
11 ¿Tuku kinkamasiyaniyan xliʼakxilhtitkan umakgolh mapakgsinanin? Pi talakaskin nalimasiyayaw pi nitlan limakgkatsiyaw kintalakgalhinkan chu naliskujaw xlakata nialh natlawaparayaw. ¿Chu tuku tlan natlawayaw komo lakgkgolotsin nakinkastakyawakgoyan, maski akinin nalakpuwanaw pi uma ni lu xlakaskinka? Ni kililakpuwanatkan pi Jehová nialh kinkapaxkiyan o pi lakgkgolotsin kaj kinkasitsinikgoyan. Asta mapakgsinanin xalak Israel tiku xaʼakgstitum xwankgonit na kastakyawaka (Heb. 12:6). Wa xlakata, komo nakinkastakyawakanan, ¿tuku kilitlawatkan? 1) Nataktujuyaw, 2) nalakgpaliyaw tuku natalakaskin chu 3) chuntiya naskujnaniyaw Jehová xliputum kinakujkan. Komo nalimasiyayaw pi nitlan limakgkatsiyaw kintalakgalhinkan chu namakgxtakgaw, Jehová nakinkatapatiyan (kalikgalhtawakga 2 Corintios 7:9, 11).
Komo nakinkastakyawakanan: 1) kilitaktujutkan, 2) kililakgpalitkan tuku natalakaskin chu 3) chuntiya kiliskujnanitkan Jehová xliputum kinakujkan (Kaʼakxilhti párrafo 11). f
KAKNINANIKGOLH JEHOVÁ CHUNA LA XLA XLAKASKIN
12. ¿Tuku xlitalakgpalikgo mapakgsinanin tiku xaʼakgstitum xwankgonit chu tiku ni?
12 Mapakgsinanin tiku Jehová xaʼakgstitum kaliʼakxilhli, xkakninanikgo chuna la xla xlakaskin chu xkamakgpuwantinikgo amakgapitsin nachuna xtlawakgolh. Xlikana pi xmin kilhtamaku xtlawakgo tuku nitlan. Pero kajwatiya Jehová xkakninanikgo chu lu liskujkgolh xlakata xmasputukgolh ni xaxlikana takanajla kkachikin. d
13. ¿Tuku xlakata Jehová ni xaʼakgstitum liʼakxilhli mapakgsina Acab?
13 ¿Chu tuku tlan nawanaw xpalakata mapakgsinanin tiku ni xaʼakgstitum kaliʼakxilhli Jehová? Xlikana pi na tlawakgolh tuku tlan. Asta mapakgsina Acab milh kilhtamaku taktujulh chu nitlan limakgkatsilh akxni katsilh pi wa xkuenta xmakgnikanit Nabot (1 Rey. 21:27-29). Nachuna, kalakkaxwililh kachikinin chu kamakgatlajalh xtalamakgasitsin Israel (1 Rey. 20:21, 29; 22:39). Pero xpuskat matlawilh tuku lu nitlan nema Acab nikxni makgxtakgli: kakakninanilh atanu dioses chu makgpuwantinilh kachikin nachuna natlawa (1 Rey. 21:25, 26).
14. 1) ¿Tuku xlakata Jehová ni xaʼakgstitum liʼakxilhli mapakgsina Rehoboam? 2) ¿Tuku tlawakgolh lhuwa mapakgsinanin tiku ni xaʼakgstitum xwankgonit?
14 Atanu mapakgsina tiku Jehová ni xaʼakgstitum liʼakxilhli wa Rehoboam. Chuna la lichuwinawa, xla tlawalh tuku tlan. Pero akxni xtamapakgsin tatliwakglhli, xla makgxtakgli xLimapakgsin Jehová chu tsukulh kakakninani ni xaxlikana dioses (2 Crón. 12:1). Lata ama kilhtamaku, makgatunu xkakninani Jehová chu makgatunu xkakakninani ni xaxlikana dioses (1 Rey. 14:21-24). Ni kajwatiya mapakgsinanin Rehoboam chu Acab ni kakninanikgolh Jehová chuna la xla xlakaskin. Atsinu ni putum mapakgsinanin tiku Jehová ni xaʼakgstitum kaliʼakxilhli tatayakgolh ni xaxlikana takaknin. Uma limasiya pi tuku xtlawa pi Jehová xaʼakgstitum xliʼakxilhli chatum mapakgsina, wa komo xkakninanima chuna la xla xlakaskin.
15. ¿Tuku xlakata Jehová lu xlakaskinka xliʼakxilha pi mapakgsinanin kajwatiya xla xkakninanikgolh?
15 ¿Tuku xlakata Jehová lu xlakaskinka xliʼakxilha pi mapakgsinanin kajwatiya xla xkakninanikgolh? Xlakata mapakgsinanin xlimakgtayatkan xwanit kachikin nakakninanikgo Jehová chuna la xla xlakaskin. Nachuna, akxni mapakgsinanin nialh xkakninanikgo Jehová, xtsukukgo tlawakgo tuku ni xaʼakgstitum chu atanu laklanka talakgalhin (Os. 4:1, 2). Chu ni kajwatiya uma, mapakgsinanin chu israelitas xtamakamastanikgonit Jehová. Wa xlakata akxni xkakakninanikgo ni xaxlikana dioses, Biblia wan pi xtachuna xkitaxtu la akxni akgskgawikan tiku tamakgaxtokgkan (Jer. 3:8, 9). Chatum lataman tiku akgskgawi tiku tamakgaxtokga lu nitlan tuku tlawani chu lu makgalipuwan. Xtachuna la uma, akxni chatum tiku tamakamastaninit Jehová tsuku kakninani ni xaxlikana dioses, lu nitlan mamakgkatsini Jehová chu lu makgalipuwan (Deut. 4:23, 24). e
16. ¿Tuku litalakgpali kxlakatin Jehová chatum tiku xaʼakgstitum chu chatum tiku lixkajni likatsi?
16 ¿Tuku kinkamasiyaniyan tuku lichuwinanitaw? Pi nikxni kilikakninanitkan ni xaxlikana dioses. Chu ni kajwatiya uma, talakaskin nakakninaniyaw Jehová chuna la xla lakaskin chu ankgalhin chuna natlawayaw. Palakachuwina Malaquías liwana lichuwinalh tuku litalakgpali kxlakatin Jehová chatum tiku xaʼakgstitum chu chatum tiku lixkajni likatsi. Xla wa: «Naʼakxilhatit tuku litalakgpali tiku xaʼakgstitum chu tiku lixkajni likatsi, tiku skujnani Dios chu tiku ni skujnani» (Mal. 3:18). Lakaskinaw pi Jehová xaʼakgstitum nakinkaliʼakxilhan, wa xlakata ni kilimastatkan talakaskin pi kintalakgalhinkan chu tuku nitlan tlawayaw, nakinkamaxlajwaniyan chu natlawa pi nialh naskujnaniyaw Dios. Komo xmakgxtakgwi Jehová, akgtum lanka talakgalhin xkitaxtulh.
17. ¿Tuku kuenta militlawat akxni nalaksaka tiku natatamakgaxtokga?
17 ¿Lakpuwampat natamakgaxtokga? Xtachuwin Malaquías namakgtayayan liwana nalaksaka tiku natatamakgaxtokga. Kalilakpuwanti uma: chatum lataman max kgalhi laktlan tayat, pero komo ni skujnima Jehová, ¿lakpuwana pi Jehová xaʼakgstitum liʼakxilha? (2 Cor. 6:14). Komo natatamakgaxtokga, ¿namakgtayayan tlakg tlan natalalipina Jehová? Kalakapastakti pi maski xlakpuskatin mapakgsina Salomón max xkgalhikgo laktlan tayat, ni kskujnikgo Jehová. Chu tsinu tsinu tlawakgolh pi Salomón na xkakakninanilh atanu dioses (1 Rey. 11:1, 4).
18. ¿Tuku talakaskin nakamasiyanikgo natlatni xkamanankan?
18 Natlatni, kakalitachuwinantit minkamanankan xlatamatkan mapakgsinanin xlakata nakamakgpuwatiniyatit naskujnaniputunkgo Jehová. Lu xlakaskinka naʼakgatekgskgo pi Jehová xaʼakgstitum xliʼakxilha chatum mapakgsina komo kajwatiya xla xkakninani chu xmakgpuwantini kachikin nachuna natlawa. Kakawani chu katlawa tuku nalimasiya pi tuku xla kintakanajlakan wa tuku tlakg xlakaskinka xliwanat kkilatamatkan, chuna la nalikgalhtawakgayaw Biblia, naʼanaw ktamakxtumit chu nalichuwinanaw Dios (Mat. 6:33). Komo nichuna natlawaya, minkamanan nalakpuwankgo pi xtatayananin Jehová xliwanatkan kaj xlakata wix xtatayana Jehová. Chu chuna la natitaxtu kilhtamaku, max nialh xlakaskinka katiʼakxilhkgolh naskujnanikgo Jehová o asta namakgxtakgkgo xaxlikana.
19. Komo wi tiku nialh skujnanima Jehová, ¿wamputun uma pi nialhla xʼamigo nawampara? (Na kaʼakxilhti recuadro « Wix tlan nalakgtaspita Jehová»).
19 Komo wi tiku nialh skujnanima Jehová, ¿wamputun uma pi nialhla xʼamigo nawampara? Nichuna, xla tlan namakgxtakga xtalakgalhin chu tlan xʼamigo Jehová nawampara. Xlakata tlan chuna natlawa, xlitaktujut chu xlimakgamakglhtinat xtamakgtaykan lakgkgolotsin (Sant. 5:14). Putum tuku natlawa ni kaj paxkat katiwa, xlakata tlan natalalimpara Jehová.
20. Komo natlawayaw chuna la xaʼakgstitum mapakgsinanin, ¿la nakinkaʼakxilhan Jehová?
20 ¿Tuku katsininitaw xpalakatakan mapakgsinanin xalak Israel? Tlan nalitaxtuyaw chuna la xaʼakgstitum mapakgsinanin tiku ni makgxtakgkgolh Jehová, komo napaxkiyaw Jehová xliputum kinakujkan. Nachuna, komo wi tuku nitlan tlawanitaw, kalistaktayaw, kamakgxtakgwi chu kalakgpaliw tuku natalakaskin. Chu kalakapastakwi pi lu xlakaskinka kajwatiya nakakninaniyaw xaxlikana Dios. Komo ni namakgxtakga Jehová, wix na xaʼakgstitum nalitaxtuya kxlakatin.
TAKILHTLIN 45 Tuku lilakpuwan kinaku
a Kʼuma artículo, akxni kalichuwinanaw mapakgsinanin xalak Israel kalichuwinamaw putum mapakgsinanin tiku mapakgsinankgolh kxkachikin Jehová. Makgapitsi mapakgsinankgolh kʼakgtiy tribus nema litalakgapasli xtamapakgsin Judá, amakgapitsin mapakgsinankgolh kʼakgkaw tribus nema litalakgapasli xtamapakgsin Israel, chu amakgapitsi mapakgsinankgolh kʼakgkutiy tribus.
b TUKU LU XLAKASKINKA: Akxni Biblia maklakaskin tachuwin naku maklakaskin xlakata nalichuwinan putuminika la likatsi chatum lataman. Chuna la tuku tlawaputun, tuku lakpuwan, tuku lakgati, la likatsi, tuku katsini tlawa, tuku xlakata wi tuku tlawa chu tuku lakgchamputun.
c Makgasa, mapakgsinanin xalak atanu kachikinin tiku ni israelitas xwankgonit, xlismanikgo nakakninanikgo xdioseskan kachikinin nema xkaʼakgchipakgo.
d Mapakgsina Asá tlawalh laklanka talakgalhin (2 Crón. 16:7, 10). Pero Biblia wan pi Jehová xaʼakgstitum liʼakxilhli. Xlikana pi xapulana, Asá ni makgamakglhtinalh tastakyaw, pero max alistalh makgxtakgli tuku nitlan xtlawama. Jehová tlakg xlakaskinka liʼakxilhli tuku tlan tlawalh nixawa tuku nitlan xtlawanit. Asá kajwatiya Jehová kakninanilh chu lu liskujli xlakata xmasputulh tamakanitlaw o tatlawamakgxtu kxtamapakgsin (1 Rey. 15:11-13; 2 Crón. 14:2-5).
e Xapulana akgtiy limapakgsin nema xmin kLimapakgsin nema maxkika Moisés limasiya pi Jehová lu xlakaskinka xliʼakxilha pi kajwatiya xla nakakninanikan (Éx. 20:1-6).
f TUKU TASIYA KDIBUJO: Chatum kgawasa tiku kgolotsin xalak congregación litaxtu, tachuwinama chatum tala chu wanima pi lilakgaputsa xlakata akxilha pi lhuwa wa kuchu. Uma tala taktuju, makgamakglhtinan tastakyaw, lakgpali tuku talakaskin chu chuntiya skujnani Jehová.
