Nicolas chu Céline talakgpalikgolh kʼatanu congregación xlakata sucursal xalak Francia chuna kawanilh. Uma tamakgaxtokgat kinkawanikgoyan tuku titaxtukgolh: «Xapulana lu xakpaxuwamaw, pero alistalh nialh chuna wa, xlakata lu xakkalakapastakaw kiʼamigoskan. Maski xakkalakgapasmaw natalan xalak congregación, nina lu tlan xakkatalalinaw». a Wa xlakata, ¿tuku namakgtayayan nasmaniya kxasasti congregación maski max wi tuku tuwa makgkatsiya? ¿La tlan namakgtayanankgo tiku xalak congregación xlakata tiku aku chimakgo nasmanikgo? ¿La tlan namatliwakglha mintakanajla chu la tlan nakamatliwakglhniya xtakanajlakan natalan kxasasti congregación?

PULAKTATI TUKU NAMAKGTAYAYAN NASMANIYA

1. Kalipawanti Jehová (Sal. 37:5). Kazumi, chatum tala puskat xalak Japón, 20 kata xwi kʼakgtum congregación. Pero xlakata lakgpalinika xtaskujut xchixku, talakaskilh pi xʼankgolh kʼatanu congregación. ¿Tuku tlawalh xlakata xlipawa Jehová? Xla wan: «Kwanilh Jehová putum tuku xakmakgkatsima, klitachuwinalh pi xaklipuwama, xaklakgaputsama chu xakpekuama. Xla ankgalhin kimaxkilh litliwakga akxni xakmaklakaskin».

¿Tuku namakgtayayan tlakg nalipawana Jehová? Kintakanajlakan xtachuna la akgatum kiwi nema maklakaskin chuchut xlakata tlakg nastaka chu tlakg tliwakga nawan. Nicolas, tiku lichuwinawa, lilakpuwa xliʼakxilhtitkan Abrahán, Jesús chu Pablo, tiku lhuwa tuku makgxtakgkgolh xlakata xmakgantaxtikgolh xtalakaskin Dios, chu uma makanajlilh pi Jehová na xʼama makgtaya. Komo nalakkaxwiliya miʼakstu nalikgalhtawakgaya Biblia, namakgtayayan  natayaniya tuku tuwa natitaxtuya, chu lhuwa tuku nakatsiniya nema tlan nakalimatliwakglhniya xtakanajlakan natalan xalak congregación niku talakgpalipat.

2. Ni katamalakxtupi congregación niku xlapat congregación niku la uku wila (Ecl. 7:10). Jules, chatum tala xalak Benín, wan pi akxni alh kʼEstados Unidos, akxilhli pi tanu talismanin xkgalhikan anta. Xla wan: «Xakmakgkatsi pi xtalakaskin nakkawani chatunu latamanin tiku xakkalakgapasma tuku xaktitaxtunit kkilatamat». Xlakata xla ni xlismani chuna natlawa chu nitlan xlimakgkatsi, tsukulh katamakgatlini natalan. Pero wan pi akxni tlakg kalakgapasli, lakgpalilh tuku xlakpuwan: «Kakxilhnit pi putum latamanin kilakxtumkan, tuku litalakgpaliyaw wa pi tanu tanu la kgalhchuwinanaw. Maski ni lakxtum la likatsiyaw, xlakaskinka tlan nalatalalinaw». Wa xlakata ni katamalakxtupi congregación niku xlapat congregación niku la uku wila. Chatum precursora tiku wanikan Anne-Lise, wa: «Ni kkalh kʼatanu congregación xlakata naktekgsa tuku xakmakgxtakgnit, wata ktalakgpalilh xlakata nakkatsini tuku xasasti».

Lakgkgolotsin na ni xlitamalakxtumitkan xamakgan xcongregacionkan congregación nema wilakgo la uku. Max wi tuku tanu tlawakan, pero ni wamputun pi nitlan. Talakaskin pi lakgkgolotsin liwana nalakgapaskgo xasasti congregación chu ni tunkun nawankgo tuku xlitatlawat (Ecl. 3:​1, 7b). Tlakg tlan nawan nawilikgo xaliʼakxilhtit xlakata tuku xlitatlawat chu ni xafuerza nalakaskinkgo pi katlawaka tuku xlakan lakpuwankgo (2 Cor. 1:24).

3. Kamakgtlawa tuku tlawakan kcongregación (Filip. 1:27). Xlikana pi talakaskin kilhtamaku chu litliwakga xlakata napina makgtayanana kʼatanu congregación, pero lu xlakaskinka pi lata xapulana napina ktamakxtumit kPukgalhtawakga. Komo natalan ni lu tsapu akxilhkgoyan o nikxni naʼakxilhkgoyan, nila katimakgtayakgon. Lucinda lichuwinan tuku xla chu chatiy xlaktsuman tlawakgolh akxni ankgolh kʼakgtum lanka kachikin xalak Sudáfrica: «Ktlawalh tuku kiwanika, ktsukulh kmakgtlawa putum taskujut nema xtlawakan kcongregación, xakkan katalichuwinan Dios tanu tanu natalan chu xakmasta kintakgalhtin ktamakxtumit. Na kmalaknuw kinchikkan xlakata anta xtamakxtumika xlakata xʼanka lichuwinankan Dios».

Komo lu naliskuja xlakata namakgtlawaya tuku natalan liskujkgo kcongregación niku talakgpali, namakgtayayan xlakata namatliwakglha mintakanajla chu nakamatliwakglhniya xtakanajlakan amakgapitsin. Anne-Lise, tiku lichuwinawa, wan pi lakgkgolotsin wanikgolh pi xkatalichuwinalh Dios putum natalan. Xla wan: «Kakxilhli pi uma kimakgtayalh lakapala naksmani». Chu komo natalaknuya xlakata namakgkaxakaya kPukgalhtawakga chu namakgtlawaya taskujut nema xlitatlawat, natalan naʼakxilhkgo pi wix makgtapakgsiyata kcongregación. Komo lu naliskuja xlakata namakgtlawaya putum tuku tlawakan kcongregación, natalan tlakg lakapala natasmanikgoyan chu wix napaxuwaya.

4. Kakaputsa xasasti amigos (2 Cor. 6:​11-13). Pulaktum tuku namakgtayayan nakatekgsa amigos wa pi nakalilakgaputsaya amakgapitsin. Wa xlakata, kalimaxtu kilhtamaku nakatachuwinana natalan akxni nina tsuku tamakxtumit chu akxni sputnita nawan chu kakalakgapasti. Kaliskujti xlakata nalakgapasa  chu nalakapastaka xtukuwanikan. Komo wix tlan nakalikatsiniya chu nalakapastaka xtukuwanikan, xlakan tlan namakgkatsikgo chu natalalimputunkgoyan.

Ni kalakgpali la likatsiya kaj xlakata amakgapitsin natalalimputunkgoyan, wata kalikatsi chuna la ankgalhin likatsiya. Katlawa chuna la tlawalh Lucinda: «Akinin kkawaniw natalan pi xminkgolh kkinchikkan. Chu xlakata chuna ktlawaw, la uku kkgalhiyaw xalaktlan amigos».

«XATAPAXUWAN KALAMAKGAMAKGLHTINANTIT»

Makgapitsi natalan tuwa makgkatsikgo natanukgo kʼakgtum Pukgalhtawakga niku niti lakgapaskgo. Wa xlakata, komo wi tiku nachan kmincongregación, ¿la tlan namakgtayaya? Apóstol Pablo wa: «Xatapaxuwan kalamakgamakglhtinantit chatunu chatunu, chuna la Cristo na xatapaxuwan kamakgamakglhtinan» (Rom. 15:7). Lakgkgolotsin tlan nastalanikgo xliʼakxilhtit Cristo chu nakamakgtayakgo tiku chankgo kcongregación xlakata tlan namakgkatsikgo (kaʼakxilhti recuadro « Tuku xlitatlawat akxni wi tiku talakgpali kʼatanu congregación»). Pero ni kajwatiya lakgkgolotsin tlan namakgtayanankgo, wata putum natalan, asta laktsu kamanan, tlan namakgtayanankgo xlakata tiku aku chimakgo kcongregación tlan namakgkatsikgo.

Atanu la tlan xatapaxuwan nakamakgamakglhtinanaw tiku aku chimakgo kcongregación wa pi nakawaniyaw pi kaʼankgolh kkinchikkan chu asta wi tuku nakalimakgtayayaw. Akgtum liʼakxilhtit, chatum tala puskat limaxtulh kilhtamaku xlakata xmalakgapasnilh kkachikin atanu tala puskat tiku aku xchinit, chu masiyanilh niku chinkgo chu niku taxtukgo putlaw. Tala tiku aku xchinit kʼuma kachikin wa pi lu tlan limakgkatsilh uma chu makgtayalh tlakg lakapala nasmani.

NAMAKGTAYAYAN NATATLIWAKGLHA MINTAKANAJLA

Kalilakpuwanti uma liʼakxilhtit: akxni tantum aktsu tsiktsi ninapara makgtum kgosa, pekuan nakgosa, pero akxni nialh pekuan chu tsuku kgosa, talhman tachayawa. Xtachuna la uma, akxni wix natalakgpaliya kʼatanu congregación max wi tuku nalipekuana, pero komo namakgatlajaya mintapekua, xtachuna la  natsukuya kgosa chu tlan napina makgtayanana alakatanu. Nicolas chu Céline wankgo: «Akxni ankan makgtayanankan kʼatanu congregación lhuwa tuku katsinikan. Akgtum liʼakxilhtit, akinin la uku kkgalhiyaw tayat nema ni xakkgalhiyaw xapulana xlakata kkalakgapasnitaw amakgapitsin latamanin chu kkilatamanitaw kʼatanu kachikinin». Jean-Charles, tiku lichuwinawa, wan la litamakgtayanit xfamilia: «Xlakata ktalakgpaliw kʼatanu congregación kamakgtayanit kinkamanankan namatliwakglhkgo xtakanajlakan. Ni lhuwa papaʼ titaxtulh, kintsumatkan tsukulh matitaxti liʼakxilhtit ktamakxtumit xaʼitat semana chu kinkgawasakan publicador litaxtulh».

¿Chu komo nila pina makgtayanana kʼatanu congregación niku tlakg talakaskin tamakgtay? Maski chuna, wix tlan natlawaya tuku lichuwinaw kʼuma artículo. Komo chuna natlawaya, namakgkatsiya xtachuna la aku chitampat kxasasti congregación maski kmincongregación wila. Kalipawanti Jehová, kalakkaxwili akxtum nakatalichuwinana Dios natalan, kakaputsa xalaksasti amigos o tlakg tlan kakatalalipi tiku miʼamigos litaxtukgoya. ¿Wi atanu tuku tlan xtlawa xlakata xkamakgtaya tiku aku chimakgo kcongregación o tiku tlakg maklakaskinkgo tamakgtay? Kalakapastakti pi tapaxkit wa tuku litalakgapaskgo xaxlikana kstalaninanin Cristo. Komo wix nalimasiyaya tapaxkit, namakgtayayan tlakg natalakatsuwiniya Jehová (Juan 13:35). Liwana kakatsi pi putum uma tuku natlawaya «makgapaxuwa Dios» (Heb. 13:16).

Maski tuwa kakitaxtuninit, lhuwa kstalaninanin Cristo smanikgonit kxasasti xcongregacionkan chu paxuwakgo. ¡Wix na tlan chuna natlawaya! Anne-Lise wan: «Xlakata ktalakgpalinit kʼatanu congregación, kimakgtayanit tlakg lanka nakmalakki kinaku». Kazumi wan pi la uku liwana katsi «pi akxni ankan makgtayanankan kʼatanu congregación, Jehová tipalhuwa la namakgtayayan chuna la nikxni xʼakxilhnita». ¿Chu tuku lakpuwan Jules? Xla wan: «Kkakgalhi lhuwa amigos chu nialh kmakgkatsi pi ni unu ktapakgsi. La uku lu ksmaninit kxasasti kincongregación chu lu tuwa xakmakgkatsilh nakmakgxtakga».