Isaías 60:1 wan: «Kataya, wix, puskat, kamakgxkgakgenanti, xlakata mintaxkgakget minit. Xtalankit Jehová maxkgakgeman». Tuku lichuwinankan alistalh limasiya pi «puskat» wa Sion, uma wamputun Jerusalén, niku xtapakgsi Judá uma kilhtamaku (Is. 60:14; 62:​1, 2). Jerusalén kilhchanima putuminika kachikin Israel. Pero ¿tukuya kilhtamaku chu la tayalh Jerusalén chu tsukulh makgxkgakgenan? ¿Xatakgatsin kgantaxtukgonit tuku lichuwinalh Isaías o wijku tuku nakgantaxtu? Kalichuwinaw xtakgalhtin umakgolh akgtiy takgalhskinin.

¿Tukuya kilhtamaku chu la tayalh Jerusalén chu tsukulh makgxkgakgenan? Judíos kachilinka kBabilonia chu latamakgolh 70 kata anta. Uma kilhtamaku, Jerusalén chu templo xlakxlakgonit. Pero akxni medos chu persas akgchipakgolh Babilonia, putum israelitas tiku xlamakgo anta kamaxkika talakaskin nataspitkgo kxkachikinkan chu nalakkaxwiliparakgo xaxlikana takaknin (Esd. 1:​1-4). Kkata 537 akxni nina xmin Jesús, makgapitsi judíos tiku ni makgxtakgkgolh Dios, tiku xmakgtapakgsikgo kʼakgkutiy tribus, taspitkgolh (Is. 60:4). Tsukukgolh tlawanikgo tamakamastan Jehová, tsukukgolh tlawakgo paskua nema xlitlawatkan xwanit chu lakkaxtlawakgolh templo (Esd. 3:​1-4, 7-11; 6:​16-22). Chuna xlilanka Dios tsukupa makgxkgakgenan kJerusalén, nema wamputun xkachikin Dios. Xlakan na akgtum taxkgakget kalitaxtunikgolh makgapitsi kachikinin tiku ni xlakgapaskgo Dios.

Pero uma tuku xlichuwinanit Isaías ni xatakgatsin kgantaxtulh kJerusalén. Lhuwa israelitas nialh kgalhakgaxmatkgolh Jehová (Neh. 13:27; Mal. 1:​6-8; 2:​13, 14; Mat. 15:​7-9). Chu asta lakgmakgankgolh Mesías, Jesucristo (Mat. 27:​1, 2). Kkata 70, Jerusalén chu xtemplo xlimakgtiy kamalakgsputuka.

Jehová xlichuwinanita pi chuna xʼama la (Dan. 9:​24-27). Uma limasiya pi Jehová ni xkgalhkgalhima pi Jerusalén xmakgantaxtilh pulakatunu pulakatunu tuku lichuwinan Isaías capítulo 60.

¿Xatakgatsin kgantaxtunita tuku lichuwinalh Isaías o wijku tuku nakgantaxtu? Wijku tuku nakgantaxtu. Pero la uku, uma «puskat» atanu tuku kilhchanima: «Jerusalén xala talhman». ¿Chu tuku Jerusalén xala talhman? Wa xkachikin Dios nema wi kʼakgapun, niku makgtapakgsikgo ángeles tiku ni makgxtakgkgo Dios. Akxni apóstol Pablo lichuwinalh uma kachikin, wa: «Wa kintsekan» (Gál. 4:26). Xkamanan wa Jesús chu 144,000 tiku xatalaksakni, chu Pablo na anta makgtapakgsi. Xlakan kgalhkgalhimakgo nalatamakgo kʼakgapun. Xatalaksakni «akgtum xasanto kachikin» litaxtukgo, «xʼIsrael Dios» (1 Ped. 2:9; Gál. 6:16).

¿Tuku kilhchanima pi Jerusalén xala talhman tayalh chu tsukulh makgxkgakgenan? Chuna tlawalh akxni tsukulh kamaklakaskin tiku xatalaksakni unu kKatiyatni. Katamalakxtumiw tuku xlakan titaxtukgolh kxlatamatkan chu tuku lichuwinan Isaías capítulo 60.

Talakaskilh pi kstalaninanin Cristo tiku xatalaksakni xtayakgolh xlakata kxakapukswa xwilakgo lata kxliʼakgtiy siglo, xlakata akxni nialhti xlamakgo apóstoles xtamasiykan apóstatas talakgatumilh (Mat. 13:​37-43). Xatachin xwilakgo kxaLanka Babilonia, nema kilhchanima putum ni xaxlikana takanajla. Babilonia kaʼakgchipalh asta akxni chalh kilhtamaku nema lilakgapaskan “xlisputni kakilhtamaku,” chu uma kilhtamaku tsukulh kkata 1914 (Mat. 13:​39, 40). Titaxtulh kilhtamaku, kkata 1919, kalakgmaxtuka chu tunkun tsukukgolh makgxkgakgenankgo. ¿La tlawakgolh?  Tlakg lichuwinankgolh xtachuwin Dios. a Lata uma kilhtamaku, latamanin xalak lhuwa kachikinin putsakgonit uma taxkgakget. Asta tiku makgtapakgsikgo kxʼIsrael Dios, «mapakgsinanin» tiku kalichuwinankan kʼIsaías 60:​3, na putsakgonit uma taxkgakget (Apoc. 5:​9, 10).

Kkilhtamaku nema aku mima, kstalaninanin Cristo tiku xatalaksakni tlakg nalimakgxkgakgenankgo xtaxkgakget Jehová. Akxni putum kstalaninanin Cristo tiku xatalaksakni nikgo, makgtapakgsikgo “kxaSasti Jerusalén”, nema kilhchanima tsumat litatawilat, niku makgtapakgsikgo 144,000 mapakgsinanin chu sacerdotes (Apoc. 14:1; 21:​1, 2, 24; 22:​3-5).

Xasasti Jerusalén namakgantaxti tuku lu xlakaskinka nema lichuwinan Isaías 60:1 (katamalakxtupi Isaías 60:​1, 3, 5, 11, 19, 20 tuku wan Apocalipsis 21:​2, 9-11, 22-26). Chuna la kJerusalén xwi xtamapakgsin Israel, xasasti Jerusalén chu Cristo akgtum tamapakgsin nalitaxtukgo kxasasti kakilhtamaku. ¿Chu tuku wamputun Apocalipsis akxni wan pi xasasti Jerusalén «xtawilacha Dios pero alistalh makgxtakgli akgapun chu taktalh»? Uma wamputun pi namapakgsinan kKatiyatni. Biblia wan pi xmakgskgot uma kachikin “namaxkgakge xtijikan kachikinin” chu nakalakgmaxtukan ktalakgalhin chu klinin (Apoc. 21:​3, 4, 24). Chu chuna «natalakkaxwilipara putum tuku anan», chuna la lichuwinankgolh Isaías chu amakgapitsin palakachuwinanin (Hech. 3:21). Uma tuku xlichuwinankanit pi xʼama la, tsukulh akxni Cristo Mapakgsina litaxtulh chu nakgalhsputa asta akxni nasputa Tamapakgsin xaʼAkgtum Mil Kata.