1, 2. 1) ¿Tuku tlakg lilakgaputsakgo latamanin? 2) ¿Tuku xlakata lu xlakaskinka na’akgatekgsaw?

XPALAKATAKAN lhuwa latamanin, tuku tlakg xlakaskinka akxilhkgo wa tumin. Wa xlakata, lu lilakgaputsakgo nakgalhikgo lhuwa tumin o ni namakgatsankgakgo tuku kgalhikgo. Chu amakgapitsin, tuku tlakg xlakaskinka akxilhkgo wa familia, nina tatatlakgo o tuku x’akstukan tlawaputunkgo.

² Pero, anan tuku tlakg xlakaskinka nixawa umakgolh chu niukxni napatsankgayaw: natakatsi pi wa Jehová lakgchan namapakgsinan. Komo ni kuenta natlawayaw, max atanu tuku nalilakgaputsayaw tuku tlawayaw chali chali la kinta’akglhuwitkan, nema natlawa pi nialh xlakaskinka na’akxilhaw uma. Wa xlakata, akxni tlakg liwana katsiniyaw pi xlakaskinka pi wa Jehová tiku lakgchan namapakgsinan, tlakg tlan nalakkaxtlawayaw ta’akglhuwit nema natitaxtutilhayaw chu tlakg tlan natalalinaw Jehová.

3. ¿Tuku wan Satanás xlakata la mapakgsinan Dios?

³ Satanás tlawanit pi Jehová max ni lakgchan namapakgsinan.  Wan pi xtamapakgsin nixatlan, pi ni lakaskin tuku xatlan kimpalakatakan nachuna wan pi latamanin tlakg napaxuwakgo komo xakstukan nakamapakgsikan (Gén. 3:1-5). Nachuna lichuwinan pi putum latamanin namakgxtakgkgo Dios, chu putum nalakgmakgankgo xtamapakgsin komo lhuwa nakamapatinikan (Job 2:4, 5). Wa xlakata, Jehová mastama talakaskin pi tuku xaxlikana liwana natakatsi: lakgmakgankan xtamapakgsin Dios lu nitlan nakitaxtu.

4. ¿Tuku xlakata xlitalakkaxwilit ta’akglhuwit, pi wa Jehová lakgchan namapakgsinan?

⁴ Jehová katsi pi tuku wan Satanás nixlikana. Pero ¿tuku xlakata nina lakkaxtlawa uma ta’akglhuwit, chu mastama talakaskin pi natakatsi tuku xaxlikana? Max wa xpalakata tuku nalakpuwankgo ángeles chu latamanin (kalikgalhtawakga Salmo 83:18). Maski chuna, lhuwa lakgmakgankgonit xtamapakgsin Jehová, chuna la tlawakgolh xapulana latamanin. Uma max natlawa pi makgapitsi nalakpuwankgo pi xlikana tuku wan Satanás. Xlakata uma nina liwana talakkaxtlawa xpalakatakan ángeles chu latamanin, max nakgalhikgo ta’akglhuwit kachikinin, tiku tanu tanu xcolorkan, familias chu latamanin. Pero akxni natakatsi pi wa Jehová lakgchan namapakgsinan, putum xatapaxuwan nalatamayaw kxtamapakgsin chu putum tuku anan takaksni natawilakgo (Efes. 1:9, 10).

5. ¿La makgtayayaw pi wa Jehová lakgchan namapakgsinan?

⁵ Nalimasiyakan pi xtamapakgsin Jehová xa’akgstitum, chu xtamapakgsin Satanás chu latamanin kaj nitu litaxtu, wa xlakata namasputukan. Natlajanan xtamapakgsin Dios, xpalakata xtamapakgsin Mesías. Tiku ni makgxtakgkgo Dios nalimasiyakgo pi latamanin tlan tatayakgo pi wa Jehová lakgchan namapakgsinan (Is. 45:23, 24). ¿Lakgatiyaw pi na anta xtawilaw anta niku natawilakgo xlakskujnin Dios tiku ni makgxtakgkgo? Xlikana pi chuna. Xlakata chuna nala, kililakapastakatkan chu naʼakgatekgsniyaw tuku xlakata uma lu xlakaskinka.

6. ¿La xlilakaskinka pi wa Jehová lakgchan namapakgsinan?

⁶ Chuna la lichuwinawa, natakatsi pi wa Jehová lakgchan namapakgsinan wa tlakg xlakaskinka kxpalakatakan latamanin, nixawa kintapaxuwankan. ¿Wamputun uma pi kilakgtaxtutkan ni xlakaskinka o Jehová ni kinkalilakgaputsayan? Ni chuna. ¿Tuku xlakata?

7, 8. ¿Tuku tatalakxtumi pi wa Jehová lakgchan namapakgsinan chu xlakata xtamalaknun?

⁷ Xpalakata Jehová, akinin latamanin lanka xtapalh kinkaʼakxilhan. Xla lu kinkapaxkiyan, asta mastalh xkgalhni xKgawasa xlakata nakinkalakgmaxtuyan chu chuna tlan nakgalhiyaw latamat nema ni kgalhi xlisputni (Juan 3:16; 1 Juan 4:9). Komo Jehová ni namakgantaxti tuku malaknunit, Satanás max tlan nawan pi Jehová kaj xaʼakgsanina chatum mapakgsina tiku ni xaʼakgstitum chu ni kamaxki talakaskin pi latamanin wi tuku nalipaxuwakgo. Nachuna xkamaxkilh talakaskin pi xtalamakgasitsin tiku likgalhkgamanankgo chu kgalhskininankgo: «¿Tu akgspulalh xtamalaknun lantla wanit mpi namin? Sampi asta akxni yama nkilhtamaku, akxni nkinatlatnikan ntinikgolh, xlipaks xaliankgalhin chuna nkatuwaj, nitu ntalakgpaliy lantla asta akxni xakgasiyaj tikilhtsukulh nkatuxawat» (2 Ped. 3:3, 4). Wa xlakata, Jehová na kuentajtlawa pi  xlakgtaxtutkan latamanin tiku kgalhakgaxmatnankgo na nalitasiya pi wa Jehová lakgchan namapakgsinan (kalikgalhtawakga Isaías 55:10, 11). Nachuna, tapaxkit litasiya la mapakgsinan Jehová. Wa xlakata liwana katsiyaw pi ankgalhin na paxkinan chu na kalakgalhaman kskujnin tiku ni makgxtakgkgo (Éx. 34:6).

⁸ Katsikan pi lu xlakaskinka pi Jehová lakgchan namapakgsinan ni wamputun pi ni xlakaskinka akxilhaw kilakgtaxtutkan o kaj ni xlakaskinka litaxtuyaw kxlakatin Dios. Wata kaj putum makgtayayaw chuna la xlilat, pi wa lakgchan namapakgsinan chu xlakata lakgtaxtut. Xlakaskinka pi uma liwana nakatsiyaw, xlakata ni napatsankgayaw tuku tlakg xlakaskinka chu natatayayaw pi wa lakgchan namapakgsinan.

9. ¿Tuku wa Satanás xlakata Job? (Kaʼakxilhti xapulana dibujo).

⁹ Libro xla Job, nema tlakg xalakgmakgan tatsokgnit kBiblia, masiya pi xlakaskinka liwana nakatsiyaw tuku tlan chu tuku nitlan. Anta likgalhtawakgayaw pi Satanás wa pi Job xʼama makgxtakga Dios komo lhuwa xpatinalh. Skinilh Jehová pi wa xmakgapatinalh Job. Pero Dios ni chuna tlawalh, wata wa maxkilh talakaskin Satanás pi xputsananilh kskujni. Wanilh, «putum tuku kgalhi wi kmimakan» (kalikgalhtawakga Job 1:7-12). Ni makgas kilhtamaku Job makgatsankgalh putum kskujnin, tuku xlitamakgtakgalha, chu kgalhakaw xkamanan. Satanás tlawalh pi Dios xlitasiyalh pi wa xlin kuenta xlakata xpatinama (Job 1:13-19). Alistalh tlawalh pi Job xkgalhilh akgtum tajatat nema lu lixkajni chu nema xkatsani (Job 2:7). Chu tuku tlakg nitlan, xpuskat chu kgalhtutu kskujnin tiku xwankgo pi xʼamigos maxlajwanikgolh (Job 2:9; 3:11; 16:2).

10. 1) ¿La limasiyalh Job pi ni xmakgxtakga Dios? 2) ¿Tuku nitlan tlawalh?

¹⁰ ¿Xlikana tuku xwan Satanás? Ni, xlakata Job ni makgxtakgli Dios (Job 27:5). Xlikana, milh kilhtamaku Job patsankgalh tuku tlakg xlakaskinka. Tsukulh limasiya pi xaʼakgstitum xwanit chu xlakaskin pi xwanika tuku xlipatinama (Job 7:20; 13:24). Max nalakpuwanaw pi xlakata xpatinama, xlilat tuku xlakpuwama pero Dios akxilhli pi xtalakaskin nastakyawa. ¿Tuku wanilh?

11, 12. 1) ¿Tuku akgatekgsli Job xlakata makgtayalh Jehová? 2) ¿La kgalhtinalh Job?

¹¹ Tekgsaw xtachuwin anta klibro xla Job capítulos 38 asta 41, pero ni wan komo wanilh tuku xlakata xpatinama. Pero ni wa uma  tuku tlakg lichuwinalh Jehová, komo xʼama stakyawa. Dios xmakgtayaputun Job naʼakgatekgsa pi ni lu xlakaskinka xlitaxtu nixawa xlilanka. Chu makgtayalh naʼakgatekgsa tuku tlakg xlakaskinka (kalikgalhtawakga Job 38:18-21). Xlakata uma, Job lakgpalilh tuku xlakpuwan.

¹² ¿Jehová tliwakga stakyawalh Job, maski lu xpatinama? Ni, chu Job na ni chuna akxilhli. Maski lu nitlan tuku xtitaxtunit, alistalh tsukulh akgatekgsa tuku xlakata. Asta wa: «Xlikana lu nitlan klimakgkatsi kpokgxni chu lhkaka». Wa xlakata xtachuwin Jehová tlan mamakgkatsinilh (Job 42:1-6). Xapulana, chatum kgawasa wanikan Elihú na kstakyawanita (Job 32:5-10). Jehová akxilhli la Job liwana makgamakglhtinalh chu lichuwinalh pi tlan xʼakxilha xlakata ni makgxtakgli (Job 42:7, 8).

13. ¿La chuntiya makgtayalh Job xtachuwin Jehová akxni sputli xtapatin?

¹³ Xtachuwin Jehová chuntiya xmakgtayama Job asta akxni ksputnita xtapatin. Xlikana pi Jehová «alistalh tlakg sikulunatlawalh Job nixawa la xapulana», pero ni kaj lakapala chuna lalh. Titaxtulh kilhtamaku asta akxni «kgalhilh kgalhatujun lakgkgawasan chu kgalhatutu xlaktsuman» (Job 42:12-14). Max Job xlakapastaka xkamanan tiku xkamakgatsankganit xlakata xkuenta Satanás. Asta max milh kilhtamaku xlakapastaka putum tuku patilh. Asta katsilh tuku xlakata xputsananimaka. Maski tuku titaxtulh, tlan lilakpuwa tuku Dios xwaninit. Uma xmakgtayalh xlakata liwana xlakapastakli chu tlan xmamakgkatsinilh (Sal. 94:19).

14. ¿Tuku katsiniyaw xlakata tuku titaxtulh Job?

¹⁴ Xliʼakxilhtit Job na tlan nakinkamakgtayayan xlakata liwana nakatsiyaw tuku tlan chu tlan nakinkamamakgkatsiniyan. Wa xlakata Jehová wililh «lakimpi wa lantla nalikgalhiyaw ntapaxuwanaliyan, chu nali’akpuwantiyaw ntatsokgnun, nalikgalhiyaw ntakgalhkgalhitin» (Rom. 15:4). Wa tuku kilikatsinitkan wa pi ni lu nalilakgaputsayaw tuku titaxtuyaw akinin chu nialh xlakaskinka naʼakxilhaw tuku tlakg xlakaskinka: pi wa Jehová lakgchan namapakgsinan. Kalakapastakwi pi limasiyayaw pi tatayayaw xtamapakgsin Dios akxni ni makgxtakgaw maski tuwa tuku titaxtuyaw, chuna la Job.

15. ¿Tuku kitaxtu komo ni makgxtakgnanaw akxni titaxtuyaw tuku tuwa?

¹⁵ ¿Tuku xlakata tlan limakgkatsiyaw akxni lilakpuwanaw la xlilakaskinka ni namakgxtakgnanaw? Xlakata kinkamalakapastakayan pi ni kaj chunata patinanaw. Tuku litasiya ni wamputun pi Dios kinkasitsininitan, wata  kinkamaxkikgoyan talakaskin nalimasiyayaw pi lakaskinaw pi wa kakinkamapakgsin (Prov. 27:11). Komo natayaniyaw, Jehová tlan nakinkaʼakxilhan chu kintakgalhkgalhinkan tlakg tliwakga nawan (kalikgalhtawakga Romanos 5:3-5). Tuku titaxtulh Job limasiya pi «nkimPuchinakan, chu kgayaj katsani, na lakgalhamanan» (Sant. 5:11). Wa xlakata, liwana katsiyaw pi nakasikulunatlawa putum tiku tatayakgo xtamapakgsin. Akxni katsiyaw uma kinkamakgtayayan xatapaxuwan natayaniyaw tuku tuwa (Col. 1:11).

16. ¿Tuku xlakata lu xlakaskinka nalakapastakaw pi natatayayaw xtamapakgsin Jehová?

¹⁶ Xlikana, tuwa natayayaw xtamapakgsin Jehová, liwaka akxni kgalhiyaw ta’akglhuwit. Asta maski laktsu ta’akglhuwit natlawa pi lu nalilakgaputsayaw. Wa xlakata lu xlakaskinka pi ankgalhin nalakapastakaw pi natatayayaw xtamapakgsin Jehová akxni titaxtuyaw tuku tuwa.

17. ¿Tuku xlakata akxni tlawayaw taskujut nema Jehová kinkamaxkinitan kinkamakgtayayan ni napatsankgayaw pi wa lakgchan namapakgsinan?

¹⁷ Akxni tlawayaw taskujut nema Jehová kinkamaxkinitan tlan nakinkamakgtayayan ni napatsankgayaw pi wa lakgchan namapakgsinan. Ka’akxilhwi akgtum li’akxilhtit. Chatum xtatayana Jehová wanikan Renee kgalhilh akgtum derrame cerebral, ankgalhin xkatsani chu nachuna xkgalhi cáncer. Akxni x’an kpumakuchin xkalitachuwinan Dios tiku kskujkgo k’hospital, chu amakgapitsi tiku xlakgapaxialhnankgo. Akgtum kilhtamaku, liwaka 80 horas lichuwinalh Dios kaj akgtiy semana aitat lata xwi k’hospital. Nikxni patsankgalh pi wa Jehová lakgchan namapakgsinan asta maski akxni x’amaja niy. Uma tlawalh pi tlan xlimakgkatsilh maski xpatinama.

18. ¿Tuku kinkamasiyaniyan akxni tlan kitaxtu komo tatayayaw xtamapakgsin Jehová chuna la tlawalh chatum tala?

¹⁸ Xlikana pi ankgalhin titaxtuyaw ta’akglhuwit nema tlakg xalaktsu, nachuna akxni chuna titaxtuyaw masiyaputunaw pi wa tatayayaw xtamapakgsin Jehová. Jennifer akgtutu kilhtamaku xwi k’aeropuerto xkgalhkgalhima akgtum avión nema xlilh kxchik. Pero putum aviones ni xkamaxkikan talakaskin na’ankgo. Max lakapala xtlakgwalh chu akstu xmakgkatsika. Pero ni chuna lalh. Skinilh Jehová pi xpulalilh xlakata tlan xkalitachuwinankgolh xtachuwin Dios, tiku na xtlakgwankgonita. ¿La kitaxtunilh? Lhuwa tiku kalitachuwinalh Dios chu mastalh lhuwa likgalhtawakga. Xla wan: «Maski lu tuwa tuku ktitaxtulh kmakgkatsilh pi Jehová kisikulunatlawalh chu kimaxkilh litliwakga xlakata tlan liwana naklichuwinan xtukuwani». Xlikana, ni patsankgalh xtamalaknun Jehová.

19. ¿La akxilhkgo xkachikin Jehová xlakata wa lakgchan namapakgsinan?

¹⁹ Xkachikin Jehová ankgalhin tatayakgonit chu xlakaskinka akxilhkgo xtamapakgsin Dios. Uma tlawa pi ni natatalakxtumi nixaxlikana takanajla. Kinchatunukan nachuna kilitlawatkan, xlakata tatayayaw xaxlikana takaknin.

20. ¿La akxilha Jehová tuku tlawayaw akxni tatayayaw xtamapakgsin?

²⁰ Liwana katsiyaw pi Jehová lanka xtapalh akxilha la tatayayaw xtamapakgsin chu la akgstitum skujnaniyaw (Sal. 18:25). Kʼatanu artículo, nalichuwinanaw tuku xlakata xtamapakgsin Jehová xlakaskinka natatayayaw chu la natlawayaw.