1. ¿Tuku xlakata paxuwayaw?

LU LIPAXUWAYAW pi xkachikin Dios lu stakma. Uma masiya pi xlakskujnin Dios makaxkgakgema xmakgskgotkan. Kata nema titaxtulh, kamakgalhtawakgew liwaka akgkaw millones latamanin. Nachuna lhuwa millones atanu latamanin kilakgolh Akxni lakapastakka akxni tinilh Cristo chu katsinikgolh xlakata tapaxkit nema Dios limasiyalh akxni malakgachalh xKgawasa xlakata nakinkalakgmaxtuyan (1 Juan 4:9).

2, 3. 1) ¿Tuku ni laktlawa namaxkgakgenan kimakgskgotkan? 2) ¿Tuku naʼakxilhaw kʼuma artículo?

² Xkachikin Jehová chuwinankan tipalhuwa tachuwin. Pero uma ni tlawa pi nila namaxkiyaw kakni Jehová (Rev. 7:9). Maski tanu tachuwin chuwinanaw chu tanu niku lamaw, tlan «makaxkgakgananatit [...] nkatuxawat» (Filip. 2:15).

³ Xlakata tuku katsinitilhayaw, xlakata akxtum wilaw chu xlakata lakapala tlawayaw uma taskujut makgtayanan tlakg namalankiyaw Jehová chu tlawa pi latamanin nakatsiputunkgo tuku  xaxlikana. Kʼuma artículo, naʼakxilhaw la natlawayaw xlakata namaxkgakgenan kimakgskgotkan kʼuma pulaktutu tuku lichuwinaw (kalikgalhtawakga Mateo 5:14-16).

4, 5. 1) ¿Tuku atanu tlan natlawayaw xlakata namaxkgakgenan kimakgskgotkan chu ni kajwatiya akxni lichuwinanaw Dios? 2) ¿Tuku tlan kitaxtu akxni tlan likatsiyaw? (Kaʼakxilhti xapulana dibujo).

⁴ Revista Makatsinina 1 xla junio kata 1925 xaʼinglés kʼartículo «Luz en la oscuridad» lichuwinalh uma: «Niti la akgstitum naskujnani Dios kʼuma xaʼawatiya kilhtamaku [...] komo ni namastayaw talakaskin pi namaxkgakgenan kimakgskgotkan». Chu lichuwinampa: «Natlawaya uma akxni nalichuwinana xalakwan xalaksasti tamakatsinin kputum kachikinin chu nalilatapaya ktiji niku anan xkgakganat». Xlikana pi akxni lichuwinaw tamakatsinin xla Tamapakgsin chu kamakgalhtawakgeyaw latamanin limaxkgakgenanaw kimakgskgotkan (Mat. 28:19, 20). Nachuna kintayatkan limalankiyaw Jehová. Akxni lichuwinanaw Dios, latamanin akxilhkgo tuku tayat kgalhiyaw. Komo nakatalitsinaw chu liwana nakaxakgatliyaw tlan nakinkalichuwinankanan nachuna Dios tiku skujnanimaw.

⁵ Jesús kawanilh kstalaninanin: «Na akxni natanuyatit kchiki kasikulunatlawatit nti xala kchiki» (Mat. 10:12). Kkachikinin niku xlichuwinankgo Dios ama kilhtamaku, latamanin xlismanikgonit namanukgo kxchikkan latamanin tiku ni xlakgapaskgo. Xlikana, max nichuna anan talismanin niku akinin lamaw. Asta lhuwa latamanin pekuankgo o lisitsikgo akxni tlakga xmalakchakan tiku ni lakgapaskgo. Pero komo akinin liwana nakatachuwinanaw, max tlan namakgkatsikgo. Min kilhtamaku, tuku lu makgtayanan wa nalitsinaw. Nachuna akxni lichuwinanaw Dios niku lhuwa titaxtukan. Tiku chuna lichuwinankgo Dios akxilhkgonit pi lhuwa latamanin kgaxmatkgo akxni xatapaxuwan katalitsinkgo. Wi tiku talakatsuwikgo chu asta tiyakgo maktum likgalhtawakga chu kinkatachuwinankgoyan.

6. ¿Tuku tlawanit akgtum tamakgaxtokgat tiku linkgoya kata xlakata chuntiya namaxkgakgenan xmakgskgotkan?

⁶ Akgtum tamakgaxtokgat tiku linkgoya kata xalak Inglaterra nila ankgo lichuwinankgo Dios akgatunu chiki xlakata tatatlakgo. Pero komo xlakan limakaxkgakgenamputunkgo xmakgskgotkan, lichuwinankgo Dios kxlakatin xchikkan. Wa xlakata wilikgo likgalhtawakga kʼakgtum mesa chu maxtukgo akxni titaxtukgo natlatni tiku ankgo tiyakgo xkamanankan kʼescuela nema anta lakatsu wi. Lhuwa tiku tiyakgo akgtiy volúmenes xla libro Los jóvenes preguntan chu makgapitsi folletos. Chatum precursora xalak congregación tsukulh kalitachuwinan Dios uma tamakgaxtokgat niku xlakan xtawilakgo. Xlakata uma tala tlan likatsi chu nachuna uma tamakgaxtokgat, chatum tlat tsukulh makglhtinan akgtum takgalhtawakga xalak Biblia.

7. ¿La nakamakgtayayaw tiku kaputsastalanimaka?

⁷ Kʼuma xaʼawatiya kata, lhuwa países akxilhkgonit pi minkgonit tiku kaputsastalanimaka. ¿Tuku natlawayaw xlakata nakamakgtayayaw nalakgapaskgo Jehová chu xtalakaskin? Tuku pulana natlawayaw wa pi nakatsiniyaw katachuwinanaw kxtachuwinkan. Max tlan nalimaklakaskinaw aplicación JW Language. Na tlan nakatsiniyaw makgapitsi tachuwin nema lakgatikgo. Chu alistalh tlan nakalitachuwinanaw sitio xla Internet jw.org chu nakamasiyaniyaw videos chu likgalhtawakga nema anan kxtachuwinkan (Deut. 10:19).

8, 9. 1) ¿Tuku tamakgtay makglhtinanaw ktamakxtumit nema kgalhiyaw kxitat semana? 2) ¿La nakamakgtayakgo natlatni xkamanankan xlakata namastakgo xtakgalhtinkan ktamakxtumit?

⁸ Jehová kinkamaxkinitan tamakxtumit xla  Xlatamat chu xtaskujut kstalanina Cristo xlakata tlan liwana nalichuwinanaw Dios. Tastakyaw nema masta kinkamakgtayayan liwana namakgalhtawakgenanaw.

⁹ Latamanin tiku minkgo kPukgalhtawakga kaks lilakawankgo xlakata kamanan mastakgo xtakgalhtinkan ktamakxtumit. Wa xlakata, natlatni tlan tuku tlawakgo akxni kamasiyanikgo xkamanankan namastakgo xtakgalhtinkan kxtachuwinkan chu chuna kamaxkikgo talakaskin namaxkgakgenan xmakgskgotkan. Xtakgalhtinkan kamanan nema tlawakgo xliputum xnakujkan, tlawa pi makgapitsi latamanin nakatsikgo pi xaxlikana niku wilakgolh (1 Cor. 14:25).

10. ¿La makgtayanan takaknin Dios kfamilia xlakata akxtum natawilakan?

¹⁰ Atanu tuku tlan natlawayaw xlakata namaxkgakgenan kimakgskgotkan wa namatliwakglhaw la akxtum wilaw kfamilia chu kcongregación. Akgtum liʼakxilhtit, lu xlakaskinka pi natlatni ankgalhin nakakninanikgo Dios kfamilia. Lhuwa tiku akxilhkgo programa xa akgatunu papaʼ xla JW Broadcasting. Akxni akxilhkgonita, xlakaskinka nalichuwinankgo la nalilatamakgo tuku katsinikgolh. Xatlat tiku pulalin takaknin kfamilia nalakapastaka pi laktsu kamanan chu tiku lakgkgawasan tanu tanu tuku maklakaskinkgo. Wa xlakata xlakaskinka naputsa tuku nakalimakgtaya putum xfamilia (Sal. 148:12, 13).

11-13. ¿La tlan kimputumkan namatliwakglhaw congregación xlakata makxtum natawilakgo chu nakamakgtayayaw amakgapitsi namaxkgakgekgo xmakgskgotkan?

¹¹ Kimputumkan, asta tiku lakgkgawasanku tlan namatliwakglhaw xlakata akxtum natawilakan kcongregación chu chuna tlan nakamatliwakglhaw amakgapitsi namaxkgakgenankgo xmakgskgotkan. Akgtum liʼakxilhtit, lakgkgawasan tlan nakamakgtayakgo tiku linkgoya kata. Tlan nawanikgo pi kakalitachuwinalh tuku titaxtukgonit lata skujnanimakgolh Jehová. Chuna xlakan chu natalan tiku linkgoya kata natatliwakglhkgo chu chuntiya natlawakgo pi kamakaxkgakgenalh makgskgot xaxlikana. Kimputumkan tlan naliskujaw xlakata tlan nakamakgamakglhtinanaw tiku minkgo kPukgalhtawakga. Tlan nakatalitsinaw chu nakamakgtayayaw natekgskgo niku natawilakgo, nakawaniyaw pi kalakgapaskgolh makgapitsi natalan. Chuna tlan namakgkatsikgo.

¹² Tiku pulalinkgo tamakxtumit xlakata ankan lichuwinankan Dios tlan nakamakgtayakgo natalan tiku linkgoya kata xlakata chuntiya namaxkgakgenankgo xmakgskgotkan. Wa  xlakata, xlakaskinka kuenta natlawakgo pi uma natalan anta nalichuwinankgo Dios niku ni tuwa namakgkatsikgo. Lakgachunin tlan nawanikgo pi kataʼalh chatum kgawasa xlakata nakamakgtaya. Nachuna nakaʼakgatekgsnikgo tiku nila makgas lichuwinan Dios xlakata tatatlakgo o kgalhikgo atanu taʼakglhuwit. Komo nakatsinikgo la natlawakgo, nakamakgtayakgo kamanan o tiku linkgoya kata, tiku xalaksasti o tiku lu katsinikgoya la lichuwinankan Dios xlakata xatapaxuwan natlawakgo (Lev. 19:32).

¹³ Tiku tsokgli salmos lichuwinalh: «¡Ka’akxilhtit, snun tlan y lan tamakglhkatsi akxni ti tatapakgsini Dios akxtum tarapaxki la litakam akxni, chatum talaj!» (kalikgalhtawakga Salmo 133:1, 2). Israelitas lu xkamatliwakglha akxtum xkakninanikgo Dios. Salmista tamalakxtumilh aceite nema xlilaksaknankan xlakata lu tlan xwanit. ¿Tlan naliskujaw xlakata tlan nakalikatsiniyaw natalan chu naliskujaw xlakata akxtum natawilayaw? Komo chuna tlawamaw, max talakaskin nakinkawanikanan lakwan tachuwin. Pero ¿tlan tlakg nakatalinaw chu nakalakgapasaw natalan? (2 Cor. 6:11-13).

14. ¿Tuku tlan natlawayaw xlakata chuntiya namaxkgakgenan kimakgskgotkan niku wilaw?

¹⁴ ¿Tlan wi tuku natlawayaw xlakata makgskgot nema xaxlikana namaxkgakgenan niku wilaw? Komo tlan kalikatsiniyaw tiku lakatsu katawilaw, max na nakatsiputunkgo tuku xaxlikana. Kakinkakgalhskinkan: «¿Tuku wankgo kimpalakata tiku lakatsu kkatawi? ¿La tasiya kinchik chu tuku atanu kkgalhi? ¿Makgtayanan xlakata tlan nalichuwinankan? ¿Kliskuja xlakata nakkamakgtaya amakgapitsin?». Akxni katachuwinanaw natalan, kakakgalhskiw la kamakgtayananit xtayatkan tiku lakatsu katawilakgolh, xfamiliajkan, tiku kataʼankgo kʼescuela chu tiku kataskujkgo. Max lu tlan tuku nakinkawanikgoyan (Efes. 5:9).

15. ¿Tuku xlakata talakaskin skgalalh natawilayaw?

¹⁵ Komo lakaskinaw pi kimakgskgotkan chuntiyaku namaxkgakgenan, talakaskin nakatsiyaw tukuya kilhtamaku wilaw. Jesús makglhuwa kawanilh kstalaninanin: «Skgalalh katawilatit» (Mat. 24:42; 25:13; 26:41). Komo lakpuwanaw pi lhuwa kilhtamaku tsankga xlakata natsuku «lanka takatsanajwat» chu max lakpuwanaw pi namin pero akinin ni katiʼakxilhwi, max ni lu xlakaskinka katiʼakxilhwi nalichuwinanaw Dios (Mat. 24:21). Kimakgskgotkan max nialh tliwakga katimaxkgakgenalh chu asta max namixa.

16, 17. ¿Tuku tlan natlawayaw xlakata skgalalh natawilayaw?

¹⁶ Chuna la talhuwitilhama tuku nitlan niku lamaw, tlakg talakaskin pi skgalalh natawilayaw. Jehová natlawa tuku lakpuwanit kkilhtamaku nema akxni lakkaxwilinit, chu xlikana pi chuna nala (Mat. 24:42-44). Xlakata nina min ama kilhtamaku, talakaskin pi akinin xakgalhkgalhinanin nawanaw chu ankgalhin skgalalh natawilayaw. Chali chali kalikgalhtawakgaw xTachuwin Dios chu ankgalhin skgalalh «natawilayaw xpalakata oración» (1 Ped. 4:7). Kuenta katlawaw xliʼakxilhtitkan natalan tiku skgalalh wilakgolh chu limaxkgakgenamakgolh xmakgskgotkan. Tekgsaw akgtum lu tlan liʼakxilhtit krevista La Atalaya 15 xla abril kata 2012, páginas 18 asta 21.

¹⁷ Ankgalhin kaliskujwi natlawayaw tuku lakaskin Jehová, katlawaw tuku tlan xpalakatakan amakgapitsin chu akxtum kakatalaw kinatalankan. Chuna tlakg napaxuwayaw chu naʼakxilhaw pi kilhtamaku lakapala titaxtu (Efes. 5:16). Siglo nema titaxtulh, kinatalankan lu lhuwa skujnanikgolh Jehová. Pero la uku xlakata kinkapulaliman Jehová kinkamaxkiyan talakaskin tlakg lhuwa tuku tlan natlawayaw. Kimakgskgotkan tlakg makaxkgakgenama nixawa la xlakpuwanaw.

18, 19. ¿La tlan namakgtayanankgo lakgkgolotsin xlakata ankgalhin skgalalh natawilayaw? Kawili akgtum liʼakxilhtit.

 ¹⁸ Maski min kilhtamaku tlawayaw tuku nitlan, Jehová chuntiyaku kinkamaxkiyan talakaskin naskujnaniyaw. Chu xlakata nakinkamakgtayayan skgalalh natawilayaw «kinkamaxkinitan lakchixkuwin», kilhchanima lakgkgolotsin xalak congregación (kalikgalhtawakga Efesios 4:8, 11, 12). Wa xlakata, akxni nakinkalakgapaxialhnanan chatum kgolotsin skgalalh katawilaw xlakata nakgaxmataw xatlan xtastakyaw.

¹⁹ Anta kʼInglaterra, chatiy natalan xkgalhikgo taʼakglhuwit kxtamakgaxtokgatkan chu skinikgolh tamakgtay lakgkgolotsin. Tala puskat kawanilh pi xmakgkatsi pi ni lakxtum xkgalhikgo xtakanajlakan. Chu xachixku kawanilh pi nitlan makgalhtawakgena xlitaxtu chu ni ankgalhin xpulalin takaknin kxfamilia. Lakgkgolotsin kalitachuwinankgolh xlakata Jesús tiku liwana xkakuentajtlawa kstalaninanin chu kuenta xtlawa tuku xmaklakaskinkgo. Xachixku wanika pi xmakglhkatilh xliʼakxilhtit Jesús chu xapuskat wanika tlakg xakgalhkgalhina xwa. Nachuna kawanika la tlan nalamakgtaya xlakata nakatakakninanikgo Dios kfamilia chatiy xkamanan (Efes. 5:21-29). Alistalh wanika ama chixku pi lu tlan tuku tsukulh tlawa. Makgpuwantinika pi ankgalhin nalipawan espíritu santo xlakata tlan napulalin xfamilia. Tapaxkit chu tamakgtay nema mastakgo lakgkgolotsin tlawanit pi xmakgskgotkan uma familia chuntiya namaxkgakgenan.

20. ¿Tuku nakitaxtu komo nalimaxkgakgenanaw kimakgskgotkan?

²⁰ Salmo 128:1 wan: «Snun paxawa lama ama ti lipawan y lakapuwani Kintikukan Dios, ama ti tlawama nak ixtiji Dios, la xla lakaskin». Kʼuma artículo akxilhnitaw pulaklhuwa la natlawayaw xlakata kimakgskgotkan namaxkgakgenan: nakawaniyaw amakgapitsi latamanin pi kaskujnanikgolh Dios, naliskujaw xlakata akxtum natawilayaw chu skgalalh natawilayaw. Komo chuna natlawayaw, tlakg napaxuwayaw chu amakgapitsin naʼakxilhkgo tuku tlawayaw chu namaxkiputunkgo kakni Jehová (Mat. 5:16).