¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku pulaktati kilitlawatkan xlakata stlan nakilhtliyaw?

Liwana natayayaw chu liwana nachipayaw libro xla takilhtlin, liwana najaxananaw, liwana natakgalhpitsiyaw chu pixlanka nakilhtliyaw (w17.11, pág. 5).

¿Tuku kinkamasiyaniyan chuna la xlakkaxwilikanit kachikinin xla putatsekgni k’Israel chu chuna la xtatekgskgo tiji nema xlinan?

X’anan akgchaxan kachikin xla putatsekgni xlikalanka kachikin Israel chu tiji nema xlinan tlan xwanit. Uma, xtlawa pi lakapala chu ni tuwa xchankgolh (w17.11, pág. 14).

¿Tuku xlakata talakgmaxtut wa akgtum lu xatlan tamaskiwin?

Xlakata tlan nalatamayaw putum kilhtamaku chu nialh katikgalhiw talakgalhin chu linin. Dios makamastalh xKgawasa xlakata kinkapaxkiyan (wp17.6-S, págs. 6-7).

¿Tuku xlakata wanaw pi Salmo 118:22 lichuwinan xlakata xtalakastakwanat Jesús?

Lakgmakgankgolh Jesús xlakata Mesías xlitaxtu chu makgnikgolh. Xtalakaskin pi xmalakastakwanika xlakata tlan xlitaxtulh «xapuxku chiwix» (w17.12, págs. 9-10).

¿Xlakaskinka xwanit pi xapuxku xlitaxtuka xlakata tlan xmakgtapakgsika niku xʼama min Mesías?

Ni xtalakaskin xapuxku xlitaxtukgolh. Judíos liwana xkatsikgo pi Cristo anta x’ama min kxkilhtsukut David, xa’awatiya xkgawasa Jesé (w17.12, págs. 14-15).

¿Tuku tastakyaw tekgsaw kBiblia xlakata likuchun?

Limapakgsin xlichuwinan pi makgat xkawilikan tatatlanin, namakgachakgana akxni naxamaya nin chu niku xlitawilat kgatsasa. Nachuna xwan pi xlitacircuncidarlit xwanit chatum aktsu kgawasa, akxni xtakgatsi akgtsayan kilhtamaku la xlakachinit, takatsi pi xkgalhnikan lakgskgatan lakapala tachokgo komo wi niku kachukukan akxni takgatsi akgtum semana lata lakachilh (wp18.1, pág. 7).

¿Tuku xlakata talakaskin x’akstu napaxkikan kstalanina Cristo?

Nakapaxkiyaw amakgapitsin chuna la ki’akstukan kinkapaxkikanan (Mar. 12:31). Lakchixkuwin tiku makgaxtokgkgo «xlipaxkitkan xlakpuskatinkan chuna la paxkikgo xmaknikan» (Efes. 5:28). Xlikana, tapaxkit nema kinkakgalhinikanan tlan nalakxla (w18.01, pág. 23).

¿Tuku kilitlawatkan xlakata namatliwakglhaw kintakanajlakan?

Talakaskin nalikgalhtawakgayaw Biblia, nalilakpuwanaw chu nalilatamayaw. Namastayaw talakaskin pi espíritu santo nakinkapulalinan, nakapaxtikatsiniyaw chu namakgamakglhtinanaw xtamakgtaykan amakgapitsin (w18.02, pág. 26).

¿Tuku xlakata ni namaklakaskinaw astrología chu taskgoyun xlakata nakatsiyaw tuku aku nala?

Lhuwa tuku xlakata, pero wa tuku tlakg xlakaskinka wa pi Biblia lakgmakgan uma talismanin (wp18.2, págs. 4-5).

Akxni chatum tala nakinkawaniyan pi ka’aw kxchik chu nalikgalhtinanaw, ¿tuku kilitlawatkan?

Komo likgalhtinaw talakaskin namakgantaxtiyaw kintachuwinkan (Sal. 15:4). Ni nawanaw alistalh pi ni naʼanaw kaj xlakata natlawayaw tuku ni lu xlakaskinka. Tala tiku kinkawanin max lhuwa tuku tlawalh xlakata nakaxtlawa liwat (w18.03, pág. 18).

¿Tuku tlan nakatsinikgo natalan tiku wi tuku lakgayakgo kcongregación xliʼakxilhtit Timoteo?

Timoteo xlikana xkalilakgaputsa amakgapitsin chu pulana wililh tuku xla xtakanajla. Lhuwa skujli xlakata Jehová chu liskujli tuku katsinilh. Chuntiya liskujli xlakata namatliwakglha xtakanajla chu lipawa pi espíritu santo napulalin. Ni kaj xman wa lakgkgolotsin, nachuna putum natalan tlan namakglhkatikgo xli’akxilhtit (w18.04, págs. 13-14).