UMA libros xkalilakgapaskan set arcoíris. Laktlan li’akxilhtit nema xlimin libros, lu kimakgtayalh. Wa xlakata, lata aktsujku xakwanit, lu xakkatsiputun tuku xalak Biblia, chuna la xlichuwinan libros.

Akxni xlama xliʼAkgtiy Guerra xLikalanka Katiyatni anta kʼIndia, lu nitlan tuku xaktitaxtuma. Kinatlatni lamakgxtakgli. Ni xakʼakgatekgsa tuku xlakata tiku lu xakkapaxki ni lakxtum xtawilaputunkgo. Xakmakgkatsi pi kiʼakstu xakwi. Xlakata ni xakkgalhi kinatalan, niti la xkimaxki takgtsiyajni.

Kintse chu akit xaklamaw kKarachi. Akgtum kilhtamaku kinkalakgapaxialhnan Fred Hardaker, makuchina tiku xtatayana Jehová xwanit. Na xtatayana Jehová xwanit chuna la misionero tiku kamaxkilh libros kifamilia. Malaknunilh kintse akgtum takgalhtawakga xalak Biblia. Pero wanilh pi ni xlakaskin, pero akit xaklakaskin. Titaxtulh akgtum semana, tala Hardaker tsukulh kilimakgalhtawakge Biblia.

Makgapitsi semanas alistalh, ktsukulh kan ktamakxtumit nema xtatlawa kclínica niku kskuja  tala Hardaker. Anta xtamakxtumikgo kgalhkutiy xtatayananin Jehová tiku xlinkgoya kata. Xlakan kimakgtsiyajkgolh chu kinkuentajtlawakgolh. Tapaxuwan klakapastaka pi akxtum xkintatawilakgo chu xtakilhputakgo xlakata nakilaka’akxilhkgo chu xkintachuwinankgo. Wa uma tuku akit xaklakaskin.

Kaj ni makgas, tala Hardaker kiwanilh pi xakaw lichuwinanaw Dios. Kimasiyanilh la maklakaskinkan gramófono portátil xlakata latamanin tlan xkgaxmatkgolh taʼakgchuwin xalak Biblia. Makgapitsi ta’akgchuwin lu tliwakga tuku xlichuwinan chu makgapitsi ni xkgaxmatputunkgo. Pero akit lu xaklakgati xaklichuwinan Dios. Lu xaklakgati xakkatsini tuku xaxlikana xalak Biblia.

Chuna la soldados xalak Japón xlakkaxlamakgo xlakata natalatlawakgo India, mapakgsinanin xalak Gran Bretaña tlakg tsukukgolh talatlawakgo xtatayananin Jehová. Nachuna tsukuka kintalatlawakan julio kkata 1943. Director xalak escuela, chatum sacerdote anglicano, kintamakxtulh k’escuela xlakata tanu xakwanit. Wanilh kintse pi akit «nitlan li’akxilhtit» xakkawilini tiku xakkata’an k’escuela xlakata akxtum xakkatala xtatayananin Jehová. Nitlan akxilhli tuku wanika chu nialh kimaxkilh talakaskin akxtum nakkatala natalan. Alistalh kimalakgachalh niku xlama kintlat anta kPeshawar, akgtum kachikin nema 1,370 kilómetros xlilakgamakgat xwi. Anta taxlajwanilh kintakanajla, nila xakan ktamakxtumit chu ni xakkgalhi likgalhtawakga.

Kkata 1947, ktaspitli kKarachi xlakata naktekgsa taskujut. Akxni anta xakwi, kalh kclínica xla tala Hardaker chu tapaxuwan kimakgamakglhtinalh.

Kinkgalhskilh, ¿tuku katsaniyan? Xlakpuwan pi xaktatatla.

Kgalhtilh, tlan kwi, pero ktatatla xlakata kintakanajla. Klakaskin naklikgalhtawakga Biblia.

¿Chu tuku kilhtamaku matsukiputuna?

Komo wix matlaniya, la uku klakaskin.

Klipaxuwaw ama kilhtamaku xlakata klikgalhtawakgaw Biblia. Xakmakgkatsi pi klakgtaspitli kifamilia xaʼespiritual. Kintse lhuwa tuku tlawalh xlakata ni akxtum xakkatalalh xtatayananin Jehová, pero liwana xaklakpuwanit pi nakskujnani Jehová. Ktamunulh 31 xla agosto kata 1947 chu akxni xakkgalhi akgkutujun kata ktsukulh skuja la precursor regular.

Anta kQuetta niku pulana kimalakgachaka la precursor, anta niku makgasa xtawilakgo soldados xalak Gran Bretaña lakatsu k’Afganistán. Kkata 1947, ama país xtapitsinit k’India chu kPakistán. * Tapapitsit tlawalh pi x’analh ta’akglhuwit kputum takanajla chu lhuwa latamanin ankgolh latamakgo alakatanu kachikinin. Max akgkutati millones latamanin tsalakgolh. Musulmanes xalak India tsalakgolh kPakistán, hindúes chu sijes xalak Pakistán ankgolh k’India. Akxni xlama uma ta’akglhuwit, ktawakalh k’akgtum tren niku lhuwa xwakakgo latamanin anta kKarachi chu kaj tsinu xakchipaxnanit ktren asta kchalh kQuetta.

Anta kQuetta, klakgapasli George Singh, chatum precursor especial tiku xkgalhi tsinu liwaka akgpuxam kata. George kimaxkilh akgtum xamakgan bicicleta, xlakata tlan naklatama kkgastinin, maski lakgachunin akit xaktokglhlin o xakchipalin. Ankgalhin ki’akstu xaklichuwinan Dios. Akxni titaxtulh akgchaxan papa’ xakkamakgalhtawakge kgalhkutujun latamanin chu makgapitsi xtatayananin Jehová litaxtukgolh. Chatum wa tiku soldado xwanit wanikan Sadiq Masih. Wa kinkamakgtayan akit chu George xlakata xakmatitaxtiw ktachuwin urdu, makgapitsi likgalhtawakga tachuwin nema xchuwinankan kPakistán. Alh kilhtamaku Sadiq nachuna tsukulh lichuwinan Dios.

Ktaspitli kKarachi chu akxtum xakkataskujma Henry Finch chu Harry Forrest, tiku xalaksasti misioneros xwankgonit. ¡Lhuwa xtapalh kli’akxilha tuku kimasiyanikgolh! Makgtum kstalanilh tala Finch knorte xla Pakistán xlakata naklichuwinanaw Dios. Anta k’ama kgastinin kkatekgswi tiku chuwinankgo urdu tiku xkatsiniputunkgo tuku xaxlikana. Akgtiy kata alistalh kalh k’Escuela de Galaad, chu ktaspitli kPakistán la komo superintendente xla circuito. Xakwi k’akgtum chiki niku xwilakgolh kgalhtutu misioneros kLahore.

Lu nitlan, pero kkata 1954, misioneros tiku xlamakgo kLahore nialh tlan latalalinkgolh chu sucursal lakatanu niku kamalakgachakgolh. Akit ni ktayanilh, nachuna ktsukulh katalatlawa, wa xlakata tliwakga kistakyawaka. Nitlan xakmakgkatsi, xaklakpuwan pi nialh la tuku xaktlawa xpalakata kintakanajla. Ktaspitpa kKarachi chu alistalh kalh kLondres (Inglaterra) xlakata amakgtum nakmatsukipara kintaskujut.

Kcongregación niku xakwi lhuwa xwilakgolh betelitas xalak Londres. Pryce Hughes, tiku siervo de sucursal xwanit, chatum tala tiku lu xalakgalhamana xwanit chu lu kimakgtayalh. Akgtum kilhtamaku kilitachuwinalh pi nachuna tliwakga kstakyawanit tala Joseph Rutherford, tiku xpulalin taskujut la xlichuwinankan Dios xlikalanka Katiyatni. Tala Hughes xlimasiyaniputun pi nixlikana tuku xwanimaka, pero tala Rutherford tliwakga kilhnilh. Kaks klilakawa pi akxni tala Hughes lakapastakli uma, lakalitsilh. Wan pi nitlan limakgkatsilh tuku wanika, pero katsilh pi xmaklakaskin uma tastakyaw chu xlimasiyanimaka tapaxkit (Heb. 12:6). Tuku kiwanilh lakgchalh kinaku chu kimakgtayalh xatapaxuwan nakskujnanipara Jehová.

Ama kilhtamaku kintse alh latama kLondres chu makgamakglhtinalh takgalhtawakga xalak Biblia nema malaknunilh John Barr, tiku alistalh makgtapakgsilh Lakgkgolotsin tiku Pulalinkgo xtatayananin Jehová. Lakapala tatliwakgli xtakanajla chu tamunulh kkata 1957. Nachuna kkatsilh pi kintlat na makgamakglhtinalh takgalhtawakga xalak Biblia akxni nina xniy.

Kkata 1958, ktatamakgaxtokgli Lene, chatum tala puskat xalak Dinamarca tiku x’anit latama kLondres. Akgtum kata alistalh lakachilh Jane, xapulana lata kgalhkitsis kamanan kkgalhiw. Nachuna kilakgayawaka taskujut kcongregación xla Fulham. Pero xlakata lu nitlan xtajatat nema xkgalhi Lene, tlawalh pi xakaw latamayaw k’akgtum kachikin niku tlakg lhkaknan. Wa xlakata kkata 1967, kaw k’Adelaida (Australia).

Anta kcongregación xalak Adelaida xwilakgolh kgalhkutiy natalan tiku xlinkgoya kata chu xatalaksakni xwankgonit chu xwilikgo lu tlan li’akxilhtit akxni x’ankgo lichuwinankgo Dios. Lakapala tlan klakkaxwiliw kinkilhtamakujkan xlakata kintakanajlakan.

Kkata 1979, lakachilh xlikgalhkitsis kinkgawasakan, Daniel. Pero xkgalhi síndrome de Down. * Chu  lu tuwa xwanit xtajatat, wa xlakata makuchinanin xwankgo pi ni makgas kilhtamaku x’ama latama. Chuntiyaku tuwa kmakgkatsi klichuwinan tuku ktitaxtulh. Ktlawaw putum tuku kmatlaniw pero nachuna kuenta xakkatlawayaw amakgapitsi kinkamanankan. Daniel nitlan xwanit xnaku, wa xlakata lakgachunin tuwa xmakgkatsi najaxanan chu xtalakaskin lakapala naklinaw k’hospital. Pero maski xtatatla, skgalala chu xapaxkina xwanit, nachuna tliwakga xkgalhi xtakanajla. Akxni xaktlawayaw oración xlakata nakwayanaw, xla xmalakgstokga xmakan xtakilhputa chu xwan «chuna kalalh». Chu xtsuku wayan.

Akxni Daniel xkgalhi akgtati kata chipalh atanu tajatat wanikan leucemia aguda. Lene chu akit lu xaktlakgwanitaw chu lu xaklipuwanaw. Xakmakgkatsi pi naxakama tatatla xlakata kintalipuwan. Akxni lu katuwa xaktatekgsaw, kinkalakgapaxialhnan superintendente xla circuito Neville Bromwich. Ama katsisni, nachuna xtasama chu kinkaʼakgpixtin o kinkasnatni. Lakxtum ktasaw. Xtachuwin lu tlan kinkamamakgkatsinin. Taspitli max kamakgtum hora tsisa. Chu ni makgas, Daniel nilh. Wa uma tuku tlakg nitlan ktitaxtunitaw kkilatamatkan. Maski chuna, ktayaniw uma takatsanajwat xlakata kkatsiyaw pi niti la katimamakgaxtakgnilh tapaxkit nema Daniel kgalhini Jehová, ni para wa linin (Rom. 8:38, 39). ¡Lu kakxilhputunaw akxni nalakastakwanan chu akxtum naktatawilaparayaw kxasasti kakilhtamaku! (Juan 5:28, 29).

Maski makgtiya kpatilh derrame cerebral, chuntiyaku kliskujma la kgolotsin kcongregación. Tuku ktitaxtunit kimakgtayanit tlakg naklimasiya tapaxkit chu talakgalhaman chu tlakg liwaka tiku titaxtumakgolh tuku nitlan. Kliskuja xlakata ni nakkawani tuku nitlan. Wata klakpuwan: «¿La maxlajwaninit tuku titaxtunit, xtalakapastakni chu tuku makgkatsi? ¿La tlan nakkalimasiyani pi xlikana kkalilakgaputsa? ¿La tlan nakkamakgpuwantini xlakata nakgalhakgaxmatkgo Jehová?». Lu klipaxuwa kkalakgapaxialhnan natalan. Xlikana, akxni kkamaxki takgtsiyajni chu takgpuwantin amakgapitsin, nachuna akit kiʼakstu kimakgtsiyajkan chu kimakgpuwantinikan.

Chuna kmakgkatsi la salmista tiku wa: «Akxni snun [xaklipuwama], y ni xakkatsi tu naktlawa, wix kimakgtsiyajti y maxki tapaxawan kilistakni» (Sal. 94:19). Jehová kinkuentajtlawanit akxni kkgalhinit ta’akglhuwit kkifamilia, kintakanajla, talakgaputsit chu talipuwan. Lu xlikana pi Jehová chatum Tlat litaxtu kimpalakata.