1. ¿Tuku tastakyaw kamaxkilh apóstol Pablo kstalaninanin Cristo tiku xatalaksakni xwankgonit?

APÓSTOL PABLO kawanilh kstalaninanin Cristo xalak pulana siglo: «Nialh kalakpuwantit la uma kakilhtamaku» (Rom. 12:2). ¿Tuku xlakata kamaxkilh uma tastakyaw lakchixkuwin chu lakpuskatin tiku xtamakamastanikgonit Dios chu xkalilaksakkanit espíritu santo? (Rom. 1:7).

2, 3. 1) ¿Tuku tlawa Satanás xlakata natamakgatliniyaw Jehová? 2) ¿La tlan nalakgmakganaw kkintalakapastaknikan «tuku tliwakglh wi»?

² Pablo lu xlilakgaputsa xlakata xliskgalala xkakilhtamaku Satanás xlaktlawanit xtalakapastaknikan makgapitsin kstalaninanin Cristo (Efes. 4:17-19). Akinin nachuna tlan nakinkaʼakgspulayan. Satanás, xdios uma kakilhtamaku, lhuwa tuku maklakaskin xlakata natamakgatliniyaw Jehová. Limaklakaskin tuku lakgatiyaw, tuku lhuwa nakgalhiputunaw o wi tuku nalitaxtuyaw kkakilhtamaku. Asta tlan maklakaskin tuku titaxtunitaw, kintalismaninkan o kintakgalhtawakgakan xlakata nalakapastakaw chuna la xla lakaskin.

³ ¿Tlan nalakgmakganaw kkintalakapastaknikan «tuku tliwakglh wi»? (2 Cor. 10:4). Kaʼakxilhwi tuku lichuwinalh Pablo: «Laktilhmaw talakapastakni chu putum tuku tlawa pi ni nalakgapaskgo Dios. Xtachuna la xkachiliw chu xkapulaliw xtalakapastaknikan latamanin xlakata nakgalhakgaxmatkgo Cristo» (2 Cor. 10:5). Chuna, xlakata Jehová kinkamakgtayayan,  tlan nalakgmakganaw nixatlan talakapastakni. Xtachuna la akgtum likuchun tlan namapaksa akgtum tajatat, xTachuwin Dios tlan nakinkamakgtayayan nalaktlawayaw tuku nixatlan anan kxkakilhtamaku Satanás.

4. ¿Tuku talakgpalit tlawaw akxni makgamakglhtinaw tuku xaxlikana xalak Biblia?

⁴ Kalakapastakwi tuku talakgpalit tlawaw akxni makgamakglhtinaw tuku xaxlikana xlakata xTachuwin Dios chu laksakwi naskujnaniyaw. Lhuwa akinin makgxtakgwi tuku nitlan xtlawayaw (1 Cor. 6:9-11). Lu paxtikatsiniyaw Dios pi kinkamakgtayan nalakgmakganaw putum uma nixatlan talismanin.

5. ¿Tuku pulaktiy lichuwinan Romanos 12:2 pi kilitlawatkan?

⁵ Pero talakaskin nikxni nalakpuwanaw pi ni talakaskin natalakgpaliyaw. Maski makgxtakgnitaw laklanka talakgalhin nema xtlawayaw makgasata, chuntiya talakaskin naliskujaw xlakata nalakgmakganaw putum tuku nakinkamatlawiputunan talakgalhin. ¿La natlawayaw? Pablo lichuwinan: «Nialh kalikatsitit chuna la latamanin xalak uma kakilhtamaku, wata katalakgpalitit, kamasastitit chuna la lakpuwanatit» (Rom. 12:2). Wa xlakata, talakaskin pulaktiy tuku natlawayaw. Pulana, talakaskin nialh nalikatsiyaw chuna la latamanin. Xlipulaktiy, nalakgpaliyaw chu namasastiyaw kintalakapastaknikan.

6. ¿Tuku kinkamasiyaniyan liʼakxilhtit nema lichuwinalh Jesús kMateo 12:43-45?

⁶ Talakgpalit nema xlichuwinama Pablo ni kajwatiya xkilhchanima tuku tasiya. Kilhchanima chuna la likatsiyaw (kaʼakxilhti recuadro « ¿Talakgpalikan o kaj lilhakganankan?»). Talakaskin nalakgpaliyaw kintalakapastaknikan, kilhchanima tuku lakgatiyaw, kintayatkan chu tuku makgkatsiyaw. Wa xlakata talakaskin nakinkakgalhskinkanan: «¿Talakgpalit nema ktlawama xlakata kstalanina Cristo  naklitaxtu kajwatiya chuna la kiʼakxilhkgo amakgapitsin o xlikana talakgpalima kinaku chu kintalakapastakni? ¿Kajwatiya talakgpalima chuna la ktasiya? ¿O xlikana talakgpalima kintalakapastakni chu kinaku?». Lu xlakaskinka nalilakpuwanaw uma. Anta kMateo 12:43-45, tekgsaw akgtum liʼakxilhtit nema wililh Jesús chu kinkamasiyaniyan tuku kilitlawatkan (kalikgalhtawakga). Uma liʼakxilhtit wi tuku lu xlakaskinka kinkamasiyaniyan: ni kajwatiya talakaskin nalakgmakganaw nixatlan talakapastakni; talakaskin nalimatsamayaw kintalakapastaknikan tuku Dios lakaskin.

7. ¿La tlan nalakgpaliyaw kinakujkan chu kintalakapastaknikan?

⁷ ¿Xlikana tlan nalakgpaliyaw kinakujkan chu kintalakapastaknikan? Biblia kinkawaniyan: «Milikgalhitkan akgtum xasasti talakapastakni, chu kalilhakganantit xasasti tayat nema litlawaka xtalakaskin Dios, chu uma tayat xlikana xaʼakgstitum chu ni makgxtakgnan» (Efes. 4:23, 24). Chuna la akxilhaw, tlan natalakgpaliyaw pero max tuwa namakgkatsiyaw. Ni kajwatiya talakaskin namachokgoyaw tuku nitlan tlawaputunaw. Talakaskin nakgalhiyaw «xasasti talakapastakni». Uma wamputun nalakgpaliyaw tuku tlawaputunaw, tuku lismaninitaw tlawayaw chu tuku xlakata chuna tlawayaw. Wa xlakata talakaskin naliskujaw.

8, 9. ¿La kinkamasiyaniyan tuku titaxtulh chatum tala pi lu xlakaskinka nalakgpaliyaw kintalakapastaknikan chu kinakujkan?

⁸ Kaʼakxilhwi tuku titaxtulh chatum tala tiku lu xaluku xwanit, xkgota chu xtalatlawanan. Akxni tlawalh tuku xtaskini xlakata natamunu, latamanin xalak kachikin niku xlama lu kaks lilakawankgolh talakgpalit nema xtlawanit. Pero akgtum kilhtamaku akxni nina makgas la xtamununit, kintalakan titaxtulh tuku lu nitlan: chatum kgotni alh talatlawa kxchik. Xapulana, tala machokgolh xtasitsi chu nitu tlawanilh. Pero nialh tayanilh akxni uma chixku nitlan tsukulh lichuwinan Jehová. Wa xlakata taxtulh chu wilinilh. ¿Tuku xlakata chuna tlawalh? Maski Biblia xmakgtayanit namachokgo tuku lakapala xtlawaputun, xasasti talakapastakni nina xlakgchan xnaku. Nina xlakgpali xnaku chu xtalakapastakni.

⁹ Maski chuna, chuntiya liskujli (Prov. 24:16). Xlakata xtamakgtay lakgkgolotsin, chuntiya matliwakglhi xtakanajla chu alistalh makgatsilh tuku xtaskini xlakata kgolotsin nalitaxtu. Pero akgtum tsisni akxni xlaya kPukgalhtawakga, titaxtupa tuku xtitaxtunit makgasata: chatum kgotni xʼama wilini atanu tala. ¿Tuku tlawalh kintalakan? Xatapaxuwan chu liwana tachuwinalh, makaksalh chu lilh kxchik uma chixku. ¿Tuku xlakata chuna tlawalh? Xlakata xasasti talakapastakni xlakgpalinit xnaku. Chu la uku tlan likatsi chu xataktujun, nema tlawalh pi xmalankika xtukuwani Jehová.

10. ¿Tuku kilhchanima nalakgpaliyaw kinakujkan chu kintalakapastaknikan?

¹⁰ Uma talakgpalit ni kaj lakapala chuna la. Max natalakaskin akglhuwa kata naliskujaw (2 Ped. 1:5). Maski lhuwata kata linaw kxkachikin Jehová chuntiya talakaskin naliskujaw nalakgpaliyaw kinakujkan chu kintalakapastaknikan. ¿Tuku nakinkamakgtayayan? Kaʼakxilhwi makgapitsi tuku tlan natlawayaw.

11. ¿La kinkamakgtayayan oración nakgalhiyaw xasasti talakapastakni?

¹¹ Tuku pulana kilitlawatkan wa oración. Nachuna talakaskin naskinaw tuku skilh tiku  tsokgli salmo: «Kimaxki akgtum xaskulunku naku, oh Dios, chu kimaxki xasasti espíritu, nema ni makgxtakgnan» (Sal. 51:10, TNM). Talakaskin liwana nakatsiyaw pi xlakaskinka nakgalhiyaw xasasti talakapastakni chu naskiniyaw xtamakgtay Jehová. ¿Tuku xlakata liwana katsiyaw pi nakinkamakgtayayan? Kaʼakxilhwi tuku malaknulh pi xʼama tlawa kxkilhtamaku Ezequiel xpalakatakan israelitas, kawanilh: «Nakkamaxki watiya akgtum naku, chu xasasti espíritu nakwili kxnakujkan, [...] chu nakkamaxki akgtum naku nema nakgalhakgaxmatnan» (Ezeq. 11:19). Umakgolh tachuwin lu kinkamakgpuwantiniyan. Jehová xkamakgtayaputun israelitas xlakata natalakgpalikgo chu nachuna nakinkamakgtayayan akinin.

12, 13. 1) Chuna la wan Salmo 119:59, ¿tuku talakaskin nalilakpuwanaw? 2) ¿Tuku takgalhskinin nakinkatlawanikanan?

¹² Xlipulaktiy, na lu xlakaskinka nalilakpuwanaw. Talakaskin pi chali chali nalikgalhtawakgayaw Biblia chu nalimaxtuyaw kilhtamaku xlakata nalilakpuwanaw tuku talakapastakni tlan nalakgpaliyaw (kalikgalhtawakga Salmo 119:59; Heb. 4:12; Sant. 1:25). Liwana kaʼakxilhwi talakapastakni nema kgalhiyaw komo akxtum talanit xtalakapastakni latamanin. Talakaskin nakatsiyaw tuku nitlan tlawaputunaw chu naliskujaw xlakata tlan nalakgmakganaw.

¹³ Xlakata tlan chuna natlawayaw talakaskin nakinkatlawanikanan umakgolh takgalhskinin: «¿Wi tuku klakgkatsalakan?» (1 Ped. 2:1). «¿Klitlankajwanan tuku ktitaxtunit makgasata, kintakgalhtawakga o tuku kkgalhi?» (Prov. 16:5). «¿Nitu kkalimaxtu tiku ni lhuwa tuku kgalhikgo o tanu la tasiyakgo?» (Sant. 2:2-4). «¿Klakglakatilakan tuku malaknu xkakilhtamaku Satanás?» (1 Juan 2:15-17). «¿Klakgati lilakgastan nema limin talakgxtumit xalimaxana chu niku lawilinikan?» (Sal. 97:10; 101:3; Amós 5:15). Max xtakgalhtin umakgolh takgalhskinin nakinkamasiyaniyan tuku tlan nalakgpaliyaw kkilatamatkan. Komo nalakgmakganaw umakgolh talakapastakni «tuku tliwakglh wi», namakgapaxuwayaw kinTlatkan xalak akgapun (Sal. 19:14).

14. ¿Tuku xlakata lu xlakaskinka nalaksakaw xatlan amigos?

¹⁴ Xlipulaktutu, na lu xlakaskinka nalaksakaw xatlan amigos. Putum tiku katalalinaw natlawa pi nachuna natsukuyaw lakpuwanaw o likatsiyaw chuna la xlakan (Prov. 13:20). Kʼescuela o niku skujaw, wilakgolh latamanin tiku ni kinkamakgtayakgoyan nalakpuwanaw chuna la Jehová. Pero anta ktamakxtumit tlan nakatekgsaw xalaktlan amigos tiku nakinkamakgtayakgoyan nalimasiyayaw tapaxkit chu tlan nalikatsiyaw (Heb. 10:24, 25).

15, 16. ¿La laktlawaputun kintalakapastaknikan Satanás?

¹⁵ Kalakapastakwi pi Satanás lakgpaliputun kintalakapastaknikan. Xla maklakaskin putum tamasiy xlakata nialh natlawayaw tuku xatlan kinkamasiyaniyan xTachuwin Dios.

¹⁶ Satanás chuntiya limaklakaskin takgalhskinin nema tlawanilh Eva anta kjardín xaʼEdén: «¿Lu xlikana Dios kawaninitan pi...?» (Gén. 3:1). Xkakilhtamaku Satanás limaklakaskin takgalhskinin nema laktlawaputun tuku lakpuwanaw, la umakgolh: «¿Lu xlikana pi Dios lakgmakgan tiku tatamakgaxtokga xtachixku o xtapuskat? ¿Lu xlikana pi Dios ni kamaxkiyan talakaskin namakgtlawayatit Navidad chu akxni makgatsikan kata? ¿Lu xlikana pi miDioskan ni lakaskin pi namakglhtinanatit kgalhni? ¿Lu xlikana pi chatum Dios xapaxkina ni kamaxkiyan talakaskin pi nakatachuwinanatit  tiku katamakxtukanit kcongregación?».

17. 1) ¿Tuku natlawayaw akxni nakinkatlawanikanan takgalhskinin nema nalaktlawa kintalakapastaknikan? 2) Chuna la wan Colosenses 2:6, 7, ¿tuku nakitaxtu komo chuna natlawayaw?

¹⁷ Talakaskin liwana nakatsiyaw tuku kanajlayaw. Takgalhskinin nema ni liwana kgalhtiyaw max natamakgxtakga kkintalakapastaknikan chu alistalh max nalaktlawa kintapuwankan chu namaxlajwani kintakanajlakan. Wa xlakata, ¿tuku kilitlawatkan? Biblia kinkawaniyan pi kalakgpaliw kintalakapastaknikan xlakata liwana naʼakxilhaw xtalakaskin Dios «nema xatlan, nema xa’akgstitum, chu nema xla tlan akxilha» (Rom. 12:2). Komo ankgalhin nakgalhtawakgayaw nakinkamakgtayayan liwana nakatsiyaw pi tuku katsininitaw kBiblia xaxlikana. Nachuna, liwana nakatsiyaw pi xtastakyaw Jehová lu tlan kitaxtu. Chu akinin nalitaxtuyaw la kgantum kiwi nema tliwakga xtankgaxekg kgalhi «chu tliwakglh [natawilayaw]» (kalikgalhtawakga Colosenses 2:6, 7).

18. ¿Tuku nakinkamakgtayayan nalakgmakganaw tuku nixatlan kxkakilhtamaku Satanás?

¹⁸ Niti katimatliwakglhi kintakanajlakan; talakaskin pi akinin chuna natlawayaw. Wa xlakata, chuntiya kakgalhiw xasasti talakapastakni. Ankgalhin katlawaniw oración Jehová chu kaskiniw pi kakinkamaxkin xʼespíritu santo. Ankgalhin kalilakpuwaw tuku tlawayaw, kaʼakxilhwi la lakpuwanaw chu tuku xlakata chuna tlawaputunaw. Kaputsaw xalaktlan amigos; wa kakatalaliw latamanin tiku nakinkamakgtayakgoyan nalakgpaliyaw kintalakapastaknikan. Komo chuna natlawayaw, tlan nalakgmakganaw tuku nixatlan kxkakilhtamaku Satanás chu nalaktlawayaw «talakapastakni chu putum tuku tlawa pi ni [nalakgapaskan] Dios» (2 Cor. 10:5).