1. ¿Tuku xlakata xlakaskinka kuenta natlawayaw xtastakyaw Jesús?

AKXNI Jesús lichuwinalh tuku xʼama la kxaʼawatiya kilhtamaku, na wa: «Kuenta kakatlawakantit xlakata nikxni nalimatsamayatit minakujkan [...] taʼakglhuwit nema titaxtukan klatamat», kilhchanima tuku lilakgaputsayaw chali chali (Luc. 21:34). ¿Tuku xlakata xlakaskinka kuenta natlawayaw uma tastakyaw? Xlakata la uku nachuna titaxtuyaw taʼakglhuwit chu tapatin nema titaxtukgo latamanin.

2. ¿Tuku taʼakglhuwit titaxtukgolh kinatalankan?

² Min kilhtamaku, lilakgaputsaw lhuwa taʼakglhuwit. Kaʼakxilhwi makgapitsi liʼakxilhtit. Chatum xtatayana Jehová wanikan John, * tiku kgalhi tajatat nema wanikan esclerosis múltiple (akgtum tajatat nema laktlawa akskitit chu stipulukut, nachuna laktlawa tuku litamakgtlapakgonit células), lu nitlan makgkatsilh akxni xpuskat makgxtakgli maski 19 kata lata xmakgaxtokgkgo. Alistalh, chatiy xlaktsuman nialh skujnanikgolh Jehová. Bob chu Linda, akgtum tamakgaxtokgat, tanu taʼakglhuwit titaxtukgolh. Xchatiykan makgatsankgakgolh xtaskujutkan chu titaxtulh kilhtamaku makgatsankgakgolh xchikkan. Nachuna, Linda wanika pi xkgalhi akgtum tajatat kxnaku nema max xʼama makgni, nachuna akgtum tajatat nema xlaktlawa células nema makgtaya kimaknikan xlakata ni nakinkachipayan tajatat.

3. Chuna la wan Filipenses 4:6, 7, ¿tuku liwana katsiyaw?

³ Liwana katsiyaw pi Jehová, kiMalakatsukinakan chu xapaxkina kinTlatkan, akgatekgsa la kinkamakgapatinanan tuku nitlan titaxtuyaw. Chu kinkamakgtayaputunan xlakata  tlan natayaniyaw taʼakglhuwit (kalikgalhtawakga Filipenses 4:6, 7). Anta kxTachuwin, tekgsaw lhuwa liʼakxilhtit xlakata xlakskujnin Jehová tiku titaxtukgolh tuku tuwa chu kinkawaniyan la kamakgtayalh Jehová. Kaʼakxilhwi makgapitsi liʼakxilhtit.

4. ¿Tuku tuwa titaxtulh Elías chu la makgtayalh Jehová?

⁴ Elías skujnanilh Jehová kilhtamaku niku katuwa xwanit chu lhuwa tuku nitlan titaxtulh. Acab, chatum nixatlan mapakgsina xalak Israel, tatamakgaxtokgli Jezabel chatum puskat tiku xkakninani dios Baal. Xchatiykan limatsamakgolh Israel xtakaknin Baal chu makgnikgolh lhuwa xpalakachuwinanin Jehová. Pero Elías tsalalh. Nachuna, xla ni tsinksnilh xlakata lipawa Jehová (1 Rey. 17:2-4, 14-16). Nachuna, wa lipawa akxni kalakatakilh xpalakachuwinanin Baal chu tiku xkakninanikgo, chu kamakgpuwantinilh israelitas xlakata nakakninanikgo xaxlikana Dios (1 Rey. 18:21-24, 36-38). Elías makglhuwa akxilhli pi Jehová xkuentajtlawama chu xmakgtayama kʼuma xakatuwa kilhtamaku.

5, 6. Chuna la wan 1 Reyes 19:1-4, ¿la xmakgkatsi Elías, chu tuku tlawalh Jehová xlakata nalimasiyani xtapaxkit?

⁵ (Kalikgalhtawakga 1 Reyes 19:1-4). Akxni mapakgsina Jezabel wa pi xʼama makgni, Elías lu pekualh. Wa xlakata tsalalh chu alh kBeer-seba. Lu xtaxlajwaninit chu asta skilh pi xnilh. ¿Tuku xlakata chuna makgkatsilh? Xlakata chatum chixku  tiku makglakgalhina xwanit, «chatum nchixku, lantla kintayatkan» (Sant. 5:17). Max xlakata lu xtlakgwanit chu xlakgaputsama, uma maxlajwanilh. Chuna la akxilhaw, xlakpuwan pi putum tuku xtlawanit xpalakata xtakaknin Jehová nitu xlitaxtu, pi Israel nitu xtalakgpalima chu pi kajwatiya xʼakstu tiku xlikana xkakninani Jehová (1 Rey. 18:3, 4, 13; 19:10, 14). Max kaks lilakawanaw tuku xmakgkatsi uma palakachuwina, pero Jehová liwana xʼakgatekgsni.

⁶ Dios ni kilhnilh Elías akxni wanilh tuku xmakgkatsi wata makgtayalh xlakata natatliwakglhpara (1 Rey. 19:5-7). Alistalh, limasiyanilh tapaxkit akxni stakyawalh chu limasiyanilh xlimakgatliwakga. Nachuna, masiyanilh pi xʼanan 7,000 israelitas tiku ni xkakninanikgo Baal (1 Rey. 19:11-18). Jehová lhuwa tuku limasiyanilh Elías pi lu xpaxki.

7. ¿Tuku xlakata tlan nakinkamamakgkatsiniyan nalilakpuwanaw la makgtayalh Jehová Elías?

⁷ ¿Titaxtumaw tuku lu tuwa chu lu lilakgaputsayaw? Akxni akxilhaw pi Jehová akgatekgsnilh tuku xmakgkatsi Elías, lu kinkamakgpuwantiniyan. Chu tlan limakgkatsiyaw pi xla akgatekgsa tuku makgkatsimaw. Liwana katsi tuku nila tlawayaw chu katsi tuku lakapastakaw chu tuku makgkatsiyaw (Sal. 103:14; 139:3, 4). Komo nalipawanaw Jehová chuna la tlawalh Elías, xla nakinkamakgtayayan xlakata natayaniyaw tuku tuwa titaxtumaw (Sal. 55:22).

8. ¿La kinkamakgtayayan Jehová xlakata natayaniyaw kintaʼakglhuwitkan?

⁸ Akxni wi tuku lu lilakgaputsayaw, max natlawa pi nitlan tuku nalakpuwanaw chu nakinkamaxlajwaniyan. Komo chuna nakinkaʼakgspulayan, kalakapastakwi pi Jehová nakinkamakgtayayan. ¿La natlawa? Xla kinkawaniyan pi kawaniw tuku lilakgaputsayaw chu kinkawaniyan pi nakgalhti kiʼoracioneskan (Sal. 5:3; 1 Ped. 5:7). Wa xlakata, ankgalhin kalitachuwinaw kintaʼakglhuwitkan. Maski la uku ni kinkatachuwinanan chuna la xtachuwinan Elías, limaklakaskin xTachuwin chu xkachikin xlakata nakinkatachuwinanan. Liʼakxilhtit nema tekgsaw kBiblia, tlan nakinkamakgoxamixiyan chu nakinkamaxkiyan akgtum takgalhkgalhin. Chu nachuna kinatalankan nakinkamakgpuwantinikgoyan (Rom. 15:4; Heb. 10:24, 25).

9. ¿La tlan nakinkamakgtayayan chatum amigo?

⁹ Jehová wanilh Elías pi xlakgayawalh taskujut Eliseo. Chuna, maxkilh chatum amigo tiku tlan xmakgtayalh akxni xtaxlajwanilh. Nachuna akinin, komo kgalhiyaw chatum amigo tiku tlan lipawanaw xla nakinkamakgtayayan akxni titaxtumaw tuku tuwa (2 Rey. 2:2; Prov. 17:17). ¿Chu komo ni kgalhiyaw chatum amigo tiku tlan nalitachuwinanaw kintaʼakglhuwitkan? Kaskiniw Jehová pi natekgsaw chatum amigo tiku tliwakga xtakanajla chu nakinkamakgtayayan akxni namaklakaskinaw.

10. 1) ¿La kinkamakgtayayan tuku titaxtulh Elías? 2) ¿La kinkamakgtayayan tamalaknun nema tekgsaw kʼIsaías 40:28, 29?

¹⁰ Jehová makgtayalh Elías xlakata natayani tuku xlilakgaputsama chu chuntiya naskujnani. Tuku titaxtulh uma palakachuwina lu kinkamakgtayayan. Max natitaxtuyaw tuku lu tuwa nema kinkamakgatlakgwanan chu kinkamaxlajwaniyan. Pero komo nalipawanaw Jehová, xla nakinkamaxkiyan litliwakga xlakata chuntiya naskujnaniyaw (kalikgalhtawakga Isaías 40:28, 29).

11-13. ¿Tuku titaxtukgolh kgalhtutu xlakskujnin Dios xala makgasa?

¹¹ Anta kBiblia tekgsaw atanu xlakskujnin Dios tiku na lu patinankgolh. Akgtum liʼakxilhtit, Ana patinalh xlakata nila xkgalhi kamanan chu xlakata atanu xpuskat xchixku, Elqaná, ankgalhin xlikgalhkgamanan (1 Sam. 1:2, 6). Xlakata lu xlakgaputsama, milh kilhtamaku lu tsukulh tasa chu nialh xwayan (1 Sam. 1:7, 10).

¹² Mapakgsina David na titaxtulh tuku lu tuwa. Kaʼakxilhwi makgapitsi. Lu xlilakgaputsa xlakata xtlawanit lhuwa talakgalhin (Sal. 40:12). Xkgawasa, Absalón, lakatakilh chu alistalh nilh xlakata tuku nitlan xtlawama (2 Sam. 15:13, 14; 18:33). Nachuna, chatum xʼamigo tiku lu xlipawan akgskgawilh (2 Sam. 16:23-17:2; Sal. 55:12-14). Lhuwa textos nema tsokgwililh ksalmos limasiyalh takatsanajwat nema xmakgkatsima pero nachuna xlimasiya pi lu xlipawan Jehová (Sal. 38:5-10; 94:17-19).

¹³ Titaxtulh kilhtamaku, chatum salmista tiku kskuja ktemplo xla Jerusalén, tiku max xtalilakgapasni Asaf xwanit, lu taxlajwanilh. Xlakgkatsalakan tiku nitlan xlikatsikgo, chu uma tlawalh pi nialh xpaxuwalh. Chu asta lakpuwa pi ni tlakg lhuwa xtapalh kgalhi tasikulunalin nema Dios kamaxki xlakskujnin (Sal. 73:2-5, 7, 12-14, 16, 17, 21).

14, 15. ¿Tuku kinkamasiyaniyan umakgolh pulaktutu liʼakxilhtit xalak Biblia?

¹⁴ Uma kgalhtutu xlakskujnin Jehová lipawankgolh chu skinikgolh xtamakgtay. Wanikgolh tuku xmakgkatsikgo. Liwana wanikgolh tuku xlakata xlakgaputsamakgolh. Chu chuntiya xʼankgo niku xkakninanikan Jehová (1 Sam. 1:9, 10; Sal. 55:22; 73:17; 122:1).

 ¹⁵ Xapaxkina kiDioskan kgalhtilh xʼoracioneskan. Ana tlan makgkatsilh kxnaku (1 Sam. 1:18). David tsokgwililh: «Chatum tlan chixku, lhuwa [takatsanajwat titaxtu] nakʼixlatamat, pero kintikukan Dios wakg nalilakgmaxtu» (Sal. 34:19, SXP). Chu salmista makgkatsilh pi Jehová xmakgachipanit chu xlipulalima xtastakyaw. Lichuwinalh: «Pero akit, tlan kinkitaxtuni klakgtalakatsuwini Dios. Kimputatsekgni ktlawanit Malana Jehová» (Sal. 73:23, 24, 28, SXP). ¿Tuku kinkamasiyaniyan umakgolh liʼakxilhtit? Pi namin kilhtamaku lu nalilakgaputsayaw taʼakglhuwit. Pero tlan natayaniyaw komo nalilakpuwanaw la kamakgtayanit Jehová amakgapitsin, natlawaniyaw oración chu ankgalhin nakgalhakgaxmataw (Sal. 143:1, 4-8).

16, 17. 1) ¿Tuku xlakata ni nakatamakgatliniyaw Jehová chu natalan? 2) ¿Tuku nakinkamakgtayayan natatliwakglhaw?

¹⁶ Kalichuwinaw tuku atanu tlan kinkamasiyaniyan umakgolh pulaktutu liʼakxilhtit: ni kakatamakgatliniyaw Jehová chu xlakskujnin (Prov. 18:1). Nancy lu patinalh akxni xchixku makgxtakgli. Xla lichuwinan: «Lhuwa  kilhtamaku niti xakʼakxilhputun. Pero chuna la kiʼakstu xaktawila tlakg xaklipuwan». Pero uma talakgpalilh akxni tsukulh putsa la tlan nakamakgtaya tiku xtitaxtumakgolh taʼakglhuwit. Lichuwinan: «Liwana xakkakgaxmatni akxni xkiwanikgo la xmakgkatsikgo. Kakxilhli pi, akxni xakliskuja nakmakgkatsi tuku xlakan xmakgkatsikgo ni kiʼakstu xkililakgaputsakan».

¹⁷ Tlan natatliwakglhaw akxni anaw ktamakxtumit. Akxni ankgalhin anaw, maxkiyaw talakaskin Jehová pi nakinkamakgtayayan chu tlan nakinkamakgoxamixiyan (Sal. 86:17). Anta, kinkalimatliwakglhan xʼespíritu santo, xTachuwin chu amakgapitsin xlakskujnin. Nachuna, anta ktamakxtumit tlan namakglhtinanaw chu namastayaw takgpuwantin (Rom. 1:11, 12). Chatum tala wanikan Sofía lichuwinalh: «Jehová chu Jesús kimakgtayakgolh ni naktaxlajwani. Tamakxtumit wa tuku tlakg xlakaskinka xakliʼakxilha. Kakxilhnit pi akxni tlakg klichuwinan Dios chu akxni wi tuku tlakg ktlawa kcongregación, tlakg ni tuwa kmakgkatsi ktatayani tuku tuwa ktitaxtu chu tuku klilakgaputsa».

18. ¿Tuku nakinkamaxkiyan Jehová xlakata ni nataxlajwaniyaw?

¹⁸ Akxni taxlajwaninitaw kalakapastakwi pi Jehová ni kajwatiya malaknu pi namalakgsputu tapatin kkilhtamaku nema aku mima, wata kinkawaniyan pi nakinkamakgtayayan la uku. Xla kinkamaxkiyan litliwakga xlakata ni nataxlajwaniyaw (Filip. 2:13).

19. ¿Tuku liwana kinkawaniyan Romanos 8:37-39?

¹⁹ (Kalikgalhtawakga Romanos 8:37-39). Apóstol Pablo liwana kinkawaniyan pi nitu kintikamamakgatlinin xtapaxkit Dios. Pero, ¿la tlan nakamakgtayayaw natalan tiku makgxtakgputunkgo tajatat xla talipuwan? Kʼatanu artículo naʼakxilhaw la tlan nakalimasiyaniyaw talakgalhaman chu la tlan nakamakgtayayaw, chuna la tlawa Jehová.