1. Chuna la wan Colosenses 2:4, 8, ¿tuku tlawa Satanás xlakata akgchipaputun kintalakapastaknikan?

SATANÁS lakaskin pi kamakgxtakgwi Jehová. Xlakata chuna natlawa, laktlawaputun kintalakapastaknikan. Akgchipaputun kintalakapastaknikan xlakata kinkamalakpuwaniputunan chuna la xla. Limaklakaskin tuku tlawaputunaw xlakata nakinkaʼakgskgawiyan chu wa nastalaniyaw (kalikgalhtawakga Colosenses 2:4, 8).

2, 3. 1) ¿Tuku xlakata talakaskin nakgalhakgaxmataw tastakyaw nema wi kColosenses 2:8? 2) ¿Tuku naʼakxilhaw kʼuma artículo?

² ¿Xlikana lu nitlan nakitaxtu komo Satanás nakinkaʼakgskgawiyan? Chuna. Kalakapastakwi pi Pablo ni wa katsokgnanilh tastakyaw nema wi kColosenses 2:8 tiku ni kstalaninanin Cristo, wata wa tiku xkalilaksakkanit espíritu santo (Col. 1:2, 5). Xlakan lu katuwa xtatakgskgo chu la uku akinin tlakg lu katuwa tatakgsaw (1 Cor. 10:12). ¿Tuku xlakata? Xlakata Satanás makaminka kKatiyatni chu kaʼakgskgawiputun xlakskujnin Dios (Rev. 12:9, 12, 17). Nachuna, lamaw kkilhtamaku niku latamanin tiku lu nitlan likatsikgo chuntiya «tlakg nitlan nalikatsikgo» (2 Tim. 3:1, 13).

³ Kʼuma artículo naʼakxilhaw la tlawa Satanás xlakata nalaktlawa kintalakapastaknikan akxni limaklakaskin «ni xaxlikana tapuwan» o talakapastakni nema nitu litaxtu. Naʼakxilhaw pulaktutu «xliʼakgsiyat» nema maklakaskin (Efes. 6:11; nota). Kʼatanu artículo naʼakxilhaw tuku tlan natlawayaw xlakata xliʼakgsiyat Satanás ni nalaktlawa kintalakapastaknikan. Pero  pulana kaʼakxilhwi la kaʼakgskgawilh Satanás israelitas akxni tanukgolh kTiyat nema xKawanikanit pi Nakamaxkikan chu tuku tlan nakatsiniyaw.

4-6. Chuna la wan Deuteronomio 11:10-15, ¿tukuya talakgpalit tlawakgolh israelitas xlakata chuna la xchananankgo akxni tanukgolh kTiyat nema xKawanikanit pi Nakamaxkikan?

⁴ Satanás xkaʼakgskgawiputun israelitas xlakata xkakninanikgolh atanu dioses. Xkatsi pi xlakan xlakaskinkgo liwat, wa xlakata xlimaklakaskimputun uma xlakata xtlawakgolh tuku xla xlakaskin. Akxni tanukgolh kTiyat nema xKawanikanit pi Nakamaxkikan, xtalakaskin pi xkatsinikgolh atanu la tlan xchananankgolh. Anta kʼEgipto, xlimunukgo xtachanankan chuchut nema xtiyakgo kkgalhtuchokgo Nilo. Pero kTiyat nema xKawanikanit pi Nakamaxkikan ni xʼanan akgtum kgalhtuchokgo niku tlan xtiyakgolh chuchut, wata kaj monkganat xkamakgtaya laktsu tuwan chu chuchut nema xmin akxni ksenan (kalikgalhtawakga Deuteronomio 11:10-15; Is. 18:4, 5). Wa xlakata, xtalakaskin pi israelitas xkatsinikgolh atanu la tlan xchananankgolh. Chu max tuwa xʼama kakitaxtuni, xlakata tiku lu xkatsinikgo la xchananankan xnikgonita.

⁵ Jehová kamaʼakxilhnilh pi xlatamatkan xtalakgpalinit. Alistalh kamaxkilh akgtum tastakyaw nema max pulana xtasiya pi ni xtatalakxtumi tachanan. Kawanilh: «Kuenta katlawatit xlakata max minakujkan natamakgatliputun, chu xlikana natamakgatli chu nakakninani atanu dioses chu nakatakilhputani» (Deut. 11:16, 17). ¿Tuku xlakata kawanilh pi ni xkakninanikgolh nixaxlikana dioses akxni xkamasiyanima la nachananankgo?

⁶ Jehová xkatsi pi israelitas xkatsiniputunkgolh la xchananankgo kachikinin nema lakatsu xwilakgo, tiku xkakninanikgo nixaxlikana  dioses. Xlikana pi cananeos tlakg xkatsinikgo la xchananankgo nixawa xlakskujnin Dios pero israelitas tlan xkatsinikgolh la xchananankgo umakgolh latamanin. Pero wi tuku nitlan xkitaxtulh. Xtalakapastaknikan cananeos xlitatsamanit talismanin la xkakninanikgo Baal, tiku xliʼakxilhkgo la komo xmalana akgapun chu pi wa xmakamin sen. Jehová ni xlakaskin pi umakgolh talismanin xkaʼakgskgawilh israelitas. Pero xlakan makglhuwa kakninanikgolh Baal (Núm. 25:3, 5; Juec. 2:13; 1 Rey. 18:18). ¿La kaʼakgskgawilh Satanás israelitas? Kaʼakxilhwi.

7. ¿La kaliputsananika xtakanajlakan israelitas akxni tanukgolh kTiyat nema xKawanikanit pi Nakamaxkikan?

⁷ Satanás pulana maklakaskilh tuku israelitas xlakaskinkgo, pi ksenalh xlakata tlan xtawi xtachanankan. Anta kTiyat nema xKawanikanit pi Nakamaxkikan, ni lu ksenan papaʼ abril asta septiembre. Tlan xtawila tachanan akxni xtsuku sen, papaʼ octubre. Kachikinin nema lakatsu xwilakgo, xlakpuwankgo pi xtalakaskin natlawakan makgapitsi talismanin xlakata xdioseskan xmakaminkgolh sen. Satanás tlawalh pi israelitas xkanajlakgolh pi komo xtlawakgolh umakgolh talismanin, tlan xkakitaxtunilh chu ni xpatinankgolh. Tiku ni xkanajlanikgo Jehová kanajlakgolh pi komo chuna xtlawakgolh, nialh xlipatinankgolh xlakata ni ksenan, wa xlakata likakninanikgolh Baal xalixkajni talismanin.

8. ¿Tuku xlipulaktiy li’akgsiyat limaklakaskilh Satanás? Kalichuwinanti la maklakaskilh.

⁸ Satanás na limaklakaskilh tuku xtlawaputun xmaknikan israelitas. Talismanin nema xtlawakgo umakgolh kachikinin xlakata nakakninanikgo xdioseskan xmakgtanuma talakgxtumit xalimaxana, la komo lakchixkuwin chu lakpuskatin tiku kstakgo xmaknikan ktemplo. Umakgolh kachikinin ni kajwatiya xmastakgo talakaskin pi lakchixkuwin xtatalakgxtumikgolh xtachixkukan chu lakpuskatin xtapuskatkan, wata nachuna ni talakgalhin xliʼakxilhkgo (Deut. 23:17, 18; 1 Rey. 14:24). Xlakpuwankgo pi putum uma xtlawa pi xdioseskan xmakaminkgolh sen chu tlan xtawi tachanan. Lhuwa israelitas tlan tsukukgolh akxilhkgo umakgolh talismanin chu tsukukgolh kakninanikgo nixaxlikana dioses. Mastakgolh talakaskin pi Satanás xkaʼakgchipakgolh.

9. Chuna la wan Oseas 2:16, 17, ¿la makgtsekgli Satanás xtukuwani Jehová?

⁹ Xlipulaktutu li’akgsiyat nema maklakaskilh Satanás wa pi: makgtsekgli xtukuwani Jehová. Kxkilhtamaku palakachuwina Jeremías, Jehová lichuwinalh pi nixaxlikana palakachuwinanin xtlawamakgo pi israelitas nialh xlakapastakkgolh xtukuwani Jehová wata wa Baal xdioskan xlimaxtukgolh (Jer. 23:27). Chuna la akxilhaw, israelitas nialh xmaklakaskinkgo xtukuwani Jehová wata wa xtukuwani Baal xlakgxokgo wilikgolh, nema wamputun «malana» o «puxku». Chuna, israelitas nialh xkatsikgo tuku litalakgpali Jehová chu Baal, uma tlawalh pi lakgxtum xlalh chuna la xkakninanikgo Jehová chu chuna la tsukukgolh kakninanikgo Baal (kalikgalhtawakga Oseas 2:16, 17 chu nota).

10. ¿Tukuya liʼakgsiyat limaklakaskin Satanás la uku?

¹⁰ Satanás limaklakaskin la uku watiya liʼakgsiyat nema xmaklakaskin makgasa. Kaliʼakgskgawi latamanin tuku maklakaskinkgo o makgkatsikgo, limaklakaskin talakgxtumit xalimaxana chu makgtsekga xtukuwani Jehová. Kalichuwinaw la makgtsekga xtukuwani Dios.

11. ¿La makgtsekgnit Satanás xtukuwani Jehová?

 ¹¹ Satanás makgtsekga xtukuwani Jehová. Akxni nikgolh xʼapóstoles Jesús, makgapitsi tiku xwankgo pi kstalaninanin Cristo xlitaxtukgo tsukukgolh malakgatumikgo nixaxlikana tamasiy (Hech. 20:29, 30; 2 Tes. 2:3). Umakgolh latamanin tsukukgolh makgtsekgkgo xtukuwani xaxlikana Dios. Akgtum liʼakxilhtit, nialh wilikgolh xtukuwani Jehová anta kBiblia chu kaj wilikgolh «Malana» o tanu. Xlakata chuna tlawakgolh, tiku xlikgalhtawakgakgo Biblia nila liwana xʼakxilhkgo tuku litalakgpali Jehová chu amakgapitsin «malananin» nema kalichuwinankan kxaSanto Tatsokgni (1 Cor. 8:5). Watiya tachuwin maklakaskinkgolh, «Malana», xlakata nalimapakuwikgo Jehová chu Jesús, tuku tlawalh pi nila liwana xʼakgatekgska pi Jehová chu Jesús ni lakxtum chu tanu tanu taskujut lakgayakgo (Juan 17:3). Uma tlawalh pi xkilhtsukulh tamasiy xla trinidad, akgtum tamasiy nema Biblia ni lichuwinan. Chu nachuna tlawalh pi lhuwa latamanin nalakpuwankgo pi nila lakgapaskan Dios chu pi nila katsikan xtukuwani. ¡Akgtum lanka taʼakgsanin! (Hech. 17:27).

12. 1) ¿Tuku malakgatuminit nixaxlikana takanajla? 2) Chuna la wan Romanos 1:28-31, ¿tuku kitaxtunit?

¹² Satanás limaklakaskin tuku tlawaputun kimaknikan. Kxkilhtamaku xamakgan Israel, Satanás limaklakaskilh nixaxlikana takanajla xlakata namalakgatumi talakgxtumit xalimaxana. La uku nachuna tlawa. Nixaxlikana takanajla masta talakaskin natlawakan talakgxtumit xalimaxana chu ni talakgalhin liʼakxilhkgo. Wa xlakata, lhuwa tiku wankgo pi skujnanikgo Dios lakgmakgankgonit tastakyaw nema masta Biblia. ¿Tuku kitaxtunit? Apóstol Pablo lichuwinalh ktatsokgni nema kamalakgachanilh romanos (kalikgalhtawakga Romanos 1:28-31). «Tuku ni xlilat» nema lichuwinan Biblia makgtanuma talakgxtumit nema ni xlitatlawat, chu tiku tatalakgxtumi xtachixku o xtapuskat (Rom. 1:24-27, 32; Rev. 2:20). Xlikana, lu xlakaskinka pi nakgalhakgaxmataw tastakyaw nema masta Biblia.

13. ¿Tuku atanu liʼakgsiyat limaklakaskin Satanás?

¹³ Satanás limaklakaskin tuku maklakaskinaw o tuku makgkatsiyaw. Ni talakgalhin pi kimputumkan naputsayaw tuku maklakaskinaw chu tuku maklakaskinkgo kifamiliajkan. Chu talakaskin pi nakatsiniyaw la tlan  natlawayaw (1 Tim. 5:8). Max kinkamasiyanikanan la natlawayaw akxni anaw kʼescuela. Pero talakaskin kuenta natlawayaw. Klhuwa kachikinin, escuelas ni kajwatiya masiyakgo tuku nakinkamakgtayayan kkilatamatkan, wata na masiyakgo xliskgalalakan latamanin. Tiku ankgo kʼescuela kamasiyanikan pi nixlikana lama Dios chu pi ni kakanajlanikgolh Biblia. Kawanikan pi kajwatiya tlan kanajlakan pi latamat kilhtsukulh xlakata evolución (Rom. 1:21-23). Umakgolh talakapastakni lakatsalakgo “xliskgala Dios” (1 Cor. 1:19-21; 3:18-20).

14. ¿Tuku tlawa xliskgalalakan latamanin?

¹⁴ Xliskgalalakan latamanin ni kuenta tlawakgo chu lakatsalakgo xtastakyaw Biblia. Ni makgpuwantininan pi nakgalhikan tayat nema litatlawanit xtawakat xʼespíritu Dios, wata wa «xtatlawaputu ntiyatliwa» (Gál. 5:19-23). Tlawa pi kaʼanalh tatlankit, wa xlakata latamanin xʼakstukan kapaxkikan (2 Tim. 3:2-4). Umakgolh tayat ni wa tuku Jehová lakaskin kakgalhiw, xla lakaskin pi kataktujuw chu xalakkakswa nawanaw (2 Sam. 22:28). ¿Tuku kaʼakgspulanit makgapitsi kstalaninanin Cristo tiku kgalhtawakgakgonit kʼuniversidad? Pi xtalakapastaknikan lakchixkuwin laktlawakgonit o akgchipakgonit xtalakapastaknikan. Kaʼakxilhwi akgtum liʼakxilhtit.

15, 16. ¿Tuku katsiniyaw xlakata tuku titaxtulh chatum tala?

¹⁵ Chatum tala tiku liwaka akgkukitsis kata lata skujnanima Dios xliputum kilhtamaku lichuwinan: «Akit xaktamununita, chu xakkgaxmatnit pi lu tuwa kitaxtu kgalhtawakgakan kʼuniversidad. Pero ni kuenta ktlawalh. Klakpuwa pi uma tastakyaw ni xkilakgchan». ¿Tuku taʼakglhuwit titaxtulh? Xla lichuwinan. «Xtalakaskin litliwakga chu lhuwa kilhtamaku xaklimaxtulh  xlakata kintakgalhtawakga, chu nialh xkimaxki kilhtamaku naktlawani oración Jehová chuna la xaktlawa xapulana, lu xaktlakgwan chu asta nialh xaklipaxuwa akxni xakan lichuwinan Dios, chu ni xkimaxki kilhtamaku xlakata liwana xaklakkaxwililh tuku xʼama talichuwinan ktamakxtumit. Kakxilhli pi universidad xlaktlawama la xaktalalin Jehová. Lu tlan pi uma kilhtamaku kakxilhli pi xtalakaskin nakmakgxtakga kintakgalhtawakga. Chu chuna ktlawalh».

¹⁶ ¿Tuku nitlan kitaxtunilh? Xla wan: «Klimaxanan kwan pi universidad kimasiyanilh nitlan nakkalichuwinan amakgapitsin, liwaka natalan; nakkaskinikgo pi katlawakgolh tuku nila tlawakgo chu nakkatamakgatlini. Lhuwa kilhtamaku talakaskilh xlakata xakmakgxtakgli umakgolh talakapastakni. Uma kimasiyanilh pi nitlan kitaxtu komo ni nakgalhakgaxpata tastakyaw nema kinkamaxkiyan xkachikin xapaxkina kinTlatkan. Jehová tlakg liwana xkilakgapasa nixawa la akit. ¡Ni xaktikgalhilh lhuwa taʼakglhuwit komo xaktikgaxmatli!».

17. 1) ¿Tuku liwana kililakkaxwilitkan natlawayaw? 2) ¿Tuku nakinkamasiyaniyan atanu artículo?

¹⁷ Liwana kalakkaxwiliw pi niti nakinkaliʼakgchipayan «xliskgalala uma kakilhtamaku chu nixaxlikana tapuwan» nema anan kxkakilhtamaku Satanás. Kuenta katlawaw xlakata ni nakinkaliʼakgskgawiyan xliʼakgsiyat (1 Cor. 3:18; 2 Cor. 2:11). Ni kamastaw talakaskin pi xla natlawa nialh kalakapastakwi tiku Jehová chu la lakaskin nakakninaniyaw. Ankgalhin kakgalhakgaxmatwi xatlan xtastakyaw. Chu ni kamastaw talakaskin pi akgskgawini natlawa ni kuenta natlawayaw xlimapakgsin. Pero, ¿tuku tlan natlawayaw komo naʼakxilhaw pi xtalakapastakni kakilhtamaku tanunit kkintalakapastaknikan? Atanu artículo nakinkamasiyaniyan la tlan nakinkamakgtayayan xTachuwin Dios nalakgmakganaw talakapastakni chu talismanin «tuku tliwakglh wi» (2 Cor. 10:4, 5).