KIMPUTUMKAN katsiyaw pi Jehová pulalin chu kuenta tlawa xtakanajlakan xkachikin kʼuma «xaʼawatiya kilhtamaku» (2 Tim. 3:1). Pero chatunu akinin kinkalakgchanan komo nakgalhakgaxmataw o ni. Tatakgsaw chuna la israelitas tiku xlamakgo kxakaskakni tiyat. Xtalakaskin pi xkgalhakgaxmatkgolh akxni xmatasikan akgtum trompeta.

Jehová wanilh Moisés pi xlimaklakaskilh martillo xlakata xtlawalh akgtiy trompeta xla plata «xlakata nakamamakxtumi kachikin chu xlakata namalakgxtukan campamentos» (Núm. 10:2). Xtalakaskin pi sacerdotes tanu tanu la xmatasikgolh trompetas xlakata israelitas xkatsikgolh tuku natlawakgo (Núm. 10:3-8). La uku, xlakskujnin Dios nachuna kinkamakatsinikanan xtachuna la «tanu tanu matasikan trompeta». Kalichuwinaw pulaktutu liʼakxilhtit nema tatalakxtumi la xmatasikan trompeta makgasa: akxni kinkawanikanan naʼanaw klaklanka tamakxtumit, akxni kamasiyanikan la tlakg tlan natlawakgo xtaskujutkan lakgkgolotsin chu akxni wi tuku talakgpali anta kcongregación.

Akxni Jehová xlakaskin pi «putum kachikin» xtamakxtumikgolh anta kxkilhtin tabernáculo, sacerdotes xmatasikgo umakgolh trompetas (Núm. 10:3). Putum tribus, tiku xwilakgolh kxkilhpanin tabernáculo lata pulaktati xtapitsinit, xkgaxmatkgo akxni xmatasikan trompeta. Max israelitas tiku tlakg lakatsu xwilakgolh tlakg lakapala xchankgo. Pero max tiku tlakg lakgamakgat xwilakgolh tlakg xmakgapalakgo nachankgo. Maski chuna, Jehová xlakaskin pi putum xtamakxtumikgolh chu xlakaskin pi putum xkgaxmatkgolh xtastakyaw.

La uku, akinin na kinkawanikanan pi kaʼaw klaklanka tamakxtumit. Pero ni anaw kʼakgtum tabernáculo, wata anaw klaklanka tamakxtumit chu kʼatanu xlakaskinka tamakxtumit niku makglhtinanaw tastakyaw chu tuku xlakaskinka kilitlawatkan. Xlikalanka katiyatni, xlakskujnin Dios tiku kgaxmatkgo umakgolh tamakxtumit litamakgtayakgo tuku lakkaxwilikanit. Xlakata tlan naʼankgo kʼumakgolh tamakxtumit, makgapitsi makgat niku minkgoyacha nixawa amakgapitsin. Pero putum tiku ankgo makgkatsikgo pi lu tlan kitaxtu tuku tlawakgo.

¿Nachuna litamakgtayakgo tiku tlakg lakgamakgat wilakgolh chu nila ankgo niku tlawakan umakgolh tamakxtumit? Xlakata la uku anan lhuwa tuku tlan limaklakaskinkan, putum lipaxuwakgo watiya umakgolh tamakxtumit. Akgtum liʼakxilhtit, akxni chatum representante xalak central mundial kilalh ksucursal xla Benín, programa matitaxtika kʼArlit (Níger), akgtum aktsu kachikin nema wi kxakaskakni tiyat xla Sahara. Kilakgolh 21 natalan chu amakgapitsin latamanin. Maski lu lakgamakgat xwilakgolh niku tamakxtumikgolh 44,131 makgkatsikgolh pi na anta xwilakgolh kʼuma tamakxtumit.  Chatum tala tsokgwililh: «Lu kpaxtikatsiniyaw pi matitaxtika uma tamakxtumit. Uma kinkalimasiyaninitan pi putum natalan lu kinkapaxkikgoyan».

Akxni sacerdotes kaj akgtum trompeta xmatasikgo, kajwatiya «tiku xpulalinkgo akgtum mil israelitas» xʼankgo ktabernáculo (Núm. 10:4). Anta, Moisés xkamaxki lhuwa tamakatsin chu lhuwa tastakyaw nema xkamakgtaya tlan natlawakgo xtaskujutkan nema xkalakgayawakanit kʼakgatunu xtribuskan. Komo akinin xlitaxtuw tiku xpulalin akgtum tribu, ¿ni xlikana pi xtlawaw putum tuku xmatlaniw xlakata anta xtawilaw chu xlitamakgtayaw uma tamakxtumit?

La uku, lakgkgolotsin ni «pulalinanin» litaxtukgo kcongregación chu ni xmalananin natalan litaxtukgo nema Dios kalakgayawanit nakuentajtlawakgo (1 Ped. 5:1-3). Pero lu liskujkgo xlakata nakakuentajtlawakgo natalan. Wa xlakata xatapaxuwan ankgo akxni kawanikan pi tlakg nakamasiyanikan, chuna la kʼEscuela niku ankgo putum Lakgkgolotsin chu Siervos Ministeriales. Chuna kamasiyanikan la tlakg tlan natlawakgo xtaskujutkan kcongregación. Xlakata tlan tastakyaw nema kamaxkikan, lakgkgolotsin chu putum natalan xalak congregación tlakg talakatsuwinikgo Jehová. Maski akinin nitu anitaw kʼumakgolh escuelas, tlan litamakgtayayaw tuku katsinikgonit lakgkgolotsin.

Xmin kilhtamaku, sacerdotes xalak Israel makglhuwa chu pajtsunin xmatasikgo xtrompetaskan. Chuna xmakatsininankan pi Jehová xlakaskin pi putum kachikin xʼankgolh alakatanu (Núm. 10:5, 6). Uma xlimasiya la liwana xkalakkaxwilikanit, pero nachuna xtalakaskin pi putum lu xliskujkgolh. Max makgapitsin tuwa xmakgkatsikgo. ¿Tuku xlakata?

Max makgapitsi xlakpuwankgo pi lu putsunin xmatasikan trompetas xlakata natalakxijkgo chu kaj lakapala. Biblia lichuwinan pi lakgachunin «puklhni kajwatiya xtachokgo akgtum tsisni asta akxni kxkgakga» chu lakgachunin «akgtiy kilhtamaku xmakgapala, akgtum papaʼ o liwaka» asta akxni puklhni xtalakxijpara (Núm. 9:21, 22). ¿Chu la makglit talakxijkgolh israelitas? Kcapítulo 33 xla Números lichuwinan pi max 40 la xlimakglhuwa talakxijkgolh.

Max lakgachunin israelitas xtekgskgo niku kaskgekga xwanit, uma lu tlan xwanit xlakata xlamakgolh «kxakaskakni tiyat chu lu xalipekuanit» xwanit (Deut. 1:19). Wa xlakata max xlakpuwankgo pi komo xtalakxijparakgolh lu nitlan xkakitaxtunilh.

Akxni makglhuwa chu pajtsunin xmatasikan trompetas, putum tribus xkgaxmatkgo, pero ni lakxtum xtsukukgo talakxijkgo. Max makgapitsin israelitas xtalakaskin xkgalhkgalhikgolh asta akxni xkalakgchalh chu uma ni xlakgatikgo. Akxni chuna xmatasikan trompetas, xmakatsininan pi xapulana tribus xtalakaskin xtalakxijkgolh nema xwilakgolh kʼeste: Judá, Isacar chu Zabulón (Núm. 2:3-7; 10:5, 6). Akxni umakgolh tribus xtalakxijkgo, sacerdotes xmatasiparakgo xtrompetaskan xlakata namakatsininankgo pi la uku xkalakgchan natalakxijkgo tribus nema xwilakgolh ksur. Chu chuntiya xmatasikgo xtrompetaskan asta akxni putum kachikin xtalakxijkgo.

Max tuwa makgkatsinitaw namakgamakglhtinanaw akxni wi tuku talakgpali kxkachikin Jehová. Max nalakpuwanaw pi lu lhuwa tuku lakapala talakgpali chu asta nalilakgaputsayaw. O max lu tlan xlimakgkatsiyaw chuna la xtatlawa taskujut xapulana chu ni xlakaskinaw pi wi tuku xtalakgpalilh. Maski chuna, max lakpuwaw pi tuwa xʼamaw makgkatsiyaw namakgantaxtiyaw uma chu lhuwa kilhtamaku titaxtulh xlakata nalismaniyaw tuku xasasti talakgpalilh. Pero liwana katsiyaw pi chuna kilitlawatkan. Komo lu naliskujaw, xlikana pi Jehová lu nakinkasikulunatlawayan.

Kxkilhtamaku Moisés, Jehová kapulalilh lhuwa lakchixkuwin, lakpuskatin chu lakkamanan akxni xlamakgolh kxakaskakni tiyat. Nila xtilakgtaxtukgolh komo ni wa Jehová xtikapulalilh chu kuenta xtikatlawalh. Kʼuma xaʼawatiya kilhtamaku, Jehová nachuna kinkapulalinan chu kinkamakgtayayan xlakata tliwakga natawila kintakanajlakan. Wa xlakata, katlawaw putum tuku matlaniyaw xlakata nakgalhakgaxmatnanaw chuna la israelitas kgalhakgaxmatnankgolh akxni xmatasikan trompetas.