1. 1) ¿Tuku takgalhkgalhin kinkamaxkinitan Jehová? 2) ¿Tuku kilhchanima nalipawanaw takgalhkgalhin nema kinkamaxkinitan Jehová? (Kaʼakxilhti nota).

 PUTUM akinin tiku paxkiyaw Jehová, kinkamaxkinitan akgtum lu stlan takgalhkgalhin. Nialh makgas namasputu tajatat, talipuwan chu linin (Apoc. 21:3, 4). Nakamakgtaya tiku tlan likatsikgo chu lipawankgo takgalhkgalhin nema xla kamaxkinit xlakata Katiyatni akgtum paraíso natlawakgo (Sal. 37:9-11). Nachuna, natlawa pi tlakg tlan natalalinaw nixawa la talalinaw la uku. ¡Lu stlan takgalhkgalhin! Pero ¿tuku xlakata tlan nakanajlayaw pi tuku malaknu Dios xlikana nakgantaxtu? Xlakata xla ankgalhin makgantaxti xtachuwin. Wa xlakata pulaklhuwa tuku likanajlayaw takgalhkgalhin nema kinkamaxkiyan Jehová (Sal. 27:14). * ¿Chu la limasiyayaw pi lipawanaw? Akxni xatapaxuwan kgalhkgalhiyaw pi namakgantaxti xtamalaknun (Is. 55:10, 11).

2. ¿Tuku tlawanita Jehová?

² Jehová limasiyanita pi makgantaxti xtachuwin. Kaʼakxilhwi akgtum lu stlan liʼakxilhtit. Klibro xla Apocalipsis Jehová malaknulh pi kkinkilhtamakujkan xʼama kamamakxtumi lhuwa latamanin xalak tanu tanu kachikinin chu tachuwin xlakata makxtum xkakninanikgolh Jehová. La uku, uma grupo kalilakgapasaw «lhuwa latamanin» (Apoc. 7:9, 10). Maski uma lhuwa latamanin likgatsikgo lakchixkuwin, lakpuskatin chu laktsu kamanan tiku tanu tanu xcolorkan, xtachuwinkan chu xkilhtsukutkan, xputumkan linatalan litaxtukgo chu makxtum  wilakgo (Sal. 133:1; Juan 10:16). Nachuna, xatapaxuwan lichuwinankgo Dios, ankgalhin kalitachuwinamputunkgo tiku kgaxmatputunkgo takgalhkgalhin nema kgalhikgo xlakata akgtum stlan latamat (Mat. 28:19, 20; Apoc. 14:6, 7; 22:17). Komo wix katatapakgsiya uma lhuwa latamanin, lu xtapalh liʼakxilha uma lu stlan takgalhkgalhin.

3. ¿Tuku tlawaputun Satanás?

³ Akgskgawini lakaskin pi nialh kakgalhiw takgalhkgalhin. Xla lakaskin pi kalakpuwaw pi Jehová ni kinkalilakgaputsayan chu pi ni katimakgantaxtilh xtamalaknun. Komo Satanás natlawa pi nialh nakgalhiyaw takgalhkgalhin, napekuanaw chu max asta nialh katiskujnaniw Jehová. Chuna la naʼakxilhaw, Akgskgawini xtlawaputun pi Job nialh xkgalhilh takgalhkgalhin xlakata chuna nialh xkakninanilh Jehová.

4. ¿Tuku nalichuwinanaw kʼuma artículo? (Job 1:9-12).

⁴ Kʼuma artículo, nalichuwinanaw tuku maklakaskilh Satanás xlakata xtlawalh pi Job xmakgxtakgli Jehová (kalikgalhtawakga Job 1:9-12). Na nalichuwinanaw tuku tlan nakatsiniyaw xlakata xliʼakxilhtit Job chu tuku xlakata lu xlakaskinka nalakapastakaw pi Dios kinkapaxkiyan chu pi namakgantaxti xtamalaknun.

5, 6. ¿La lakapala talakgpalilh xlatamat Job?

⁵ Job lu tlan xkitaxtunima kxlatamat: lu tlan xtalalin Jehová, xkgalhi akgtum lanka familia nema makxtum xwilakgo, chu lhuwa tumin xkgalhi (Job 1:1-5). Pero kaj akgtum kilhtamaku putum makgatsankgalh. Pulana makgatsankgalh tuku lhuwa xtapalh xkgalhi (Job 1:13-17). Chu alistalh nikgolh putum xkamanan, tiku lu xkapaxki. Kalilakpuwaw pi akinin chuna titaxtumaw. Natlatni lu patinankgo akxni niy chatum xkamanankan; kalilakpuwaw talipuwan, takatsanajwat chu talakgaputsit nema Job chu xpuskat makgkatsikgolh akxni katsikgolh pi kgalhakaw xkamanankan nikgolh. ¡Wa xlakata Job xtitli klhakgat nema xlimasiya talipuwan chu tatsokgostalh! (Job 1:18-20).

⁶ Alistalh, Satanás tlawalh pi Job xchipalh akgtum tajatat chu tlawalh pi nitu xlitaxtulh (Job 2:6-8; 7:5). Latamanin lu xmaxkikgo kakni Job, chu asta xputsakgo xlakata naskinikgo tastakyaw (Job 31:18). Pero la uku nialh xputsakgo chu xlakgmakgankgo. Xnatalan, xʼamigos chu asta kskujnin xlakgmakgankgo (Job 19:13, 14, 16).

7. 1) ¿Tuku xlakpuwan Job xlakata xtapatin, chu tuku ni tlawalh? 2) ¿Tuku xtachuna nema titaxtulh Job max tlan xtitaxtulh chatum kstalanina Cristo? (Kaʼakxilhti dibujos xla párrafo 7).

⁷ Satanás xlakaskin pi Job xlakpuwa pi xpatinama xlakata Jehová xlakgmakganit. Wa xlakata, akgtum kilhtamaku akxni kgalhakaw xkamanan Job xwayamakgo chu xpaxuwamakgo, Satanás limaklakaskilh akgtum tliwakga un xlakata chiki niku xwilakgolh xkaʼaktamalh (Job 1:18, 19). Na tlawalh pi kʼakgapun xtaktachi lhkuyat chu ni kajwatiya kamakgnilh xborregos Job, nachuna kamakgnilh kskujnin tiku xkakuentajtlawamakgo (Job 1:16). Liwana tasiya pi un chu lhkuyat wi tiku malakgachalh. Wa xlakata Job lakpuwa pi wa Jehová tiku xmalakgachanit, chu uma tlawalh pi xlakpuwa pi xtlawanit tuku Jehová ni xlakgati. Maski chuna, Job ni lixkajni wanilh xTlat xalak akgapun. Xkatsi pi chuna la xtitaxtunit kata Jehová xmaxkinit lhuwa tuku laktlan chu pi, chuna la xmakgamakglhtinanit tuku laktlan, na xlimakgamakglhtinat xwanit tuku ni laktlan. Wa xlakata wa: «Chuntiyaku katamalankilh xtukuwani Jehová» (Job 1:20, 21; 2:10).  Maski makgatsankgalh tuku xtapalh xkgalhi, chipalh tajatat chu nitlan limakgkatsilh, asta uma kilhtamaku Job nikxni makgxtakglhli Jehová. Pero Satanás chuntiyaku xʼama lakputsanani Job.

8. ¿Tuku atanu limaklakaskilh Satanás xlakata nalakputsanani Job?

⁸ Satanás atanu tuku limaklakaskilh xlakata nalakputsanani Job. Tlawalh pi kgalhtutu tiku xwankgo pi xʼamigo xlitaxtukgo xmalakpuwanikgolh Job pi nitu xlitaxtu. Umakgolh lakchixkuwin wankgolh pi Job xpatinama xlakata xtlawanit tuku lu nitlan (Job 22:5-9). Na xmalakpuwaniputunkgo pi maski ni xtitlawalh tuku nitlan, nikxnila xʼama makgapaxuwa Jehová, maski lu tlan xlikatsilh (Job 4:18; 22:2, 3; 25:4). Xmakanajliputunkgo Job pi Dios ni xpaxki, pi ni xʼama kuentajtlawa chu pi nitu litaxtu skujnanikan. Xtachuwinkan tlawalh pi Job xlakpuwa pi tuku xtitaxtuma nialh xʼama lakkaxla.

9. ¿Tuku makgtayalh Job xlakata chuntiya xtayanilh?

⁹ Kalilakpuwaw tuku lama. Job wi xlakni lhkaka, chu takatsanajwat makgapati kakuwani chu katsisni (Job 2:8). Xʼamigos chuntiya katuwa wanikgo chu lhuwa tuku tlawakgo xlakata namaxkajwanikgo xtukuwani. Xlakata lhuwa taʼakglhuwit kgalhi, Job nitlan limakgkatsi, chu xlakata nikgolh xkamanan lu katsani xnaku. Xapulana nitu wan (Job 2:13–3:1). Komo xʼamigos lakpuwankgo pi xlakata Job nitu wan wamputun pi ama makgxtakga xMalakatsukina, ni xlikana tuku lakpuwankgo. Akgtum kilhtamaku, Job kalakaʼakxilha xʼamigos chu kawani: «¡Asta nakni, nikxni ktimakgatsankgananilh Dios!» (Job 27:5). ¿Tuku xlakata Job chuntiya tayanilh akxni xtitaxtuma tuku lu tuwa? Xlakata nikxni makgatsankgalh takgalhkgalhin pi xapaxkina xDios xʼama makgtaya. Xkatsi pi, maski xnilh, Jehová xʼama malakastakwani (Job 14:13-15).

10. ¿Tuku kinkamasiyaniyan xliʼakxilhtit Job?

¹⁰ Xliʼakxilhtit Job kinkamasiyaniyan pi Satanás nila kinkamafuerzajliniyan xlakata namakgxtakgaw Jehová chu pi Jehová katsi putum tuku titaxtuyaw. Tuku titaxtulh Job na kinkamasiyaniyan atanu tuku lu xlakaskinka. La uku kaʼakxilhwi makgapitsi.

11. ¿Tuku liwana kilikatsitkan komo ankgalhin nalipawanaw Jehová? (Santiago 4:7).

¹¹ Job limasiyalh pi, komo ankgalhin nalipawanaw Jehová, natayaniyaw kaxatukawa taputsan chu tlan nalakatitayayaw Satanás. ¿Chu tuku nakitaxtu? Biblia kinkawaniyan pi Akgskgawini nakinkatsalaniyan (kalikgalhtawakga Santiago 4:7).

12. ¿La matliwakglhi Job takgalhkgalhin xla talakastakwanat?

¹² Ni kilimakgatsankgatkan takgalhkgalhin nema kgalhiyaw xlakata talakastakwanat. Chuna la lichuwinaw kʼartículo nema titaxtulh, Satanás limaklakaskin tapekua nema kgalhiniyaw linin xlakata namakgxtakgaw Jehová. Kalilakpuwaw tuku titaxtulh Job. Satanás wa pi Job katuwa tuku xʼama tlawa xlakata nalakgmaxtu xlatamat, chu pi asta xʼama makgxtakga Jehová. ¡Pero ni xlikana tuku xlakpuwan! Maski xtitaxtuma tuku lu tuwa, chu asta xlakpuwan pi xʼama niy, Job ni makgxtakgli Jehová. ¿Tuku makgtayalh natayani? Xlakata xlipawan pi Jehová tlan likatsi chu xlakata xkanajla pi chuna la xtitaxtulh kilhtamaku, xMalakatsukina xʼama lakkaxtlawa xtaʼakglhuwit. Xkanajla pi, maski Dios ni xmakgtayalh akxni xlamajku, kkilhtamaku nema aku xʼama min, Dios wi tuku xʼama tlawa chu xʼama maxkipara latamat. Job liwana xkanajla pi xʼama anan talakastakwanat. Chu komo akinin nachuna kanajlayaw, nikxni katimakgxtakgwi Dios maski nakinkawanikanan pi nakinkamakgnikanan.

13. ¿Tuku xlakata kuenta kilitlawatkan tuku maklakaskilh Satanás akxni putsananilh Job?

¹³ Tlan kitaxtu akxni kuenta tlawayaw tuku Satanás maklakaskilh akxni lakputsananilh Job, xlakata xtachuna tuku maklakaskin la uku. Kaʼakxilhwi tuku limawakalh Job, chu uma na kalimawaka putum latamanin. Wa: «Putum tuku kgalhi chatum chixku namasta xlakata nalilakgmaxtu xlatamat» (Job 2:4, 5). Satanás xwamputun pi ni xlikana paxkiyaw Jehová chu pi komo kilatamatkan kalipekua wi, namakgxtakgaw kiDioskan. Na wan pi Jehová ni kinkapaxkiyan chu pi ni xtapalh akxilha tuku tlawayaw xlakata namakgapaxuwayaw. Putum tiku lipawanaw, katsiyawa tuku maklakaskin Satanás, wa xlakata ni kinkaʼakgskgawiyan.

14. ¿Tuku natasiya akxni titaxtuyaw akgtum taputsan, chu tuku liʼakxilhtit tlan nakinkamakgtayayan xlakata naʼakgatekgsaw uma?

¹⁴ Kiliʼakxilhatkan taputsan la tuku nakinkamakgtayayan liwana nakinkalakgapaskanan. Tuku titaxtulh Job makgtayalh naʼakxilha pi wi tuku xtalakaskin nalakgpali. Akgtum liʼakxilhtit, akxilhli pi tlakg xtalakaskin nalimasiya tataktujut (Job 42:3). Na tlan lhuwa tuku nakatsiniyaw kimpalakatakan akxni natitaxtuyaw akgtum taputsan. Wa uma tuku titaxtulh Nikolái, * tiku tamaknuka kpulachin maski lu xtatatla. Xla wan: «Natamaknukana kpulachin xtachuna la tlawanikana akgtum radiografía: masiya tayat nema kgalhi chatum kstalanina Cristo». Akxni akxilhaw pi wi tuku talakaskin nalakgpaliyaw, liskujaw xlakata chuna natlawayaw.

15. ¿Tiku kilikgalhakgaxmatatkan chu tuku xlakata?

¹⁵ Kilikgalhakgaxmatatkan Jehová, chu ni wa kintalamakgasitsinkan. Job lu kuenta tlawalh akxni Jehová tachuwinalh. Xlakata  xmalakpuwanilh, Jehová wanilh uma: «¿Akxilhnita kilimakgatliwakga xlakata tuku kmalakatsukinit? Akit kakxilhma putum tuku titaxtupat. ¿Lakpuwana pi nila ktikuentajtlawan?». Job tataktujulh chu paxtikatsinilh Jehová xlakata tlan xlikatsi, Job wanilh: «Kaj xakkgaxmatnit mimpalakata, pero la uku xlikana kilakgastapu kliʼakxilhman» (Job 42:5). Akxni Job wa umakgolh tachuwin, max antiyaku xwi xlakni lhkaka, xmakni xlitsama tsitsi chu xlilipuwama xlakata xkamanan xnikgonit. Maski chuna xtitaxtuma, Jehová wanilh pi xpaxki chu pi xmakgapaxuwa (Job 42:7, 8).

16. Chuna la wan Isaías 49:15, 16, ¿tuku kililakapastakatkan akxni titaxtuyaw akgtum taputsan?

¹⁶ La uku, max latamanin lixkajni tuku nakinkawanikgoyan chu nakinkalikatsinikgoyan la komo nitu litaxtuyaw. Max namaxkajwiputunkgo kintukuwanikan o xtukuwani xkachikin Jehová chu “tipalhuwa tuku lixkajni nawankgo kimpalakatakan” (Mat. 5:11). Xliʼakxilhtit Job masiya pi Jehová lipawan pi ni katimakgxtakgwi akxni natitaxtuyaw akgtum taputsan. Jehová kinkapaxkiyan chu ankgalhin nakalakapastaka tiku lipawankgo (kalikgalhtawakga Isaías 49:15, 16). Ni kuenta kakatlawaniw taʼakgsanin nema wankgo xtalamakgasitsin Dios. Kaʼakxilhwi tuku wa James, chatum tala xalak Turquía tiku xla chu xfamilia titaxtukgonit tuku lu tuwa. Xla wan: «Kakxilhwi pi komo kuenta xaktlawaw taʼakgsanin nema xwankan xlakata xkachikin Dios, xakamaw taxlajwaniyaw. Wa xlakata kliskujwi naklilakpuwanaw takgalhkgalhin nema nalimin xTamapakgsin Dios chu lu kliskujwi  naklichuwinanaw Dios, chu chuna ni kmakgatsankgaw tapaxuwan». Kastalaniw xliʼakxilhtit Job chu kakgaxmatniw Jehová. ¡Ni kamastaw talakaskin pi taʼakgsanin nema wankgo kintalamakgasitsinkan natlawa pi nialh nakgalhiyaw takgalhkgalhin!

17. ¿Tuku katsiniyaw xpalakata lakchixkuwin chu lakpuskatin tiku ni makgxtakgkgolh Dios nema talichuwinan kcapítulo 11 xla Hebreos?

¹⁷ Job ni kajwatiya kskujni Dios tiku tayanilh chu ni pekualh akxni tayanilh tuku lu tuwa. Kcarta nema apóstol Pablo katsokgnanilh kstalaninanin Cristo tiku hebreos xwankgonit, kalichuwinalh lhuwa amakgapitsi xlakskujnin Dios chu wa pi «lanka puklhni» xlitaxtukgo (Heb. 12:1). Maski lu tuwa tuku titaxtukgolh, xputumkan limasiyakgolh pi ni makgxtakgkgolh Jehová (Heb. 11:36-40). ¿Tlan tuku kitaxtulh xlakata tayanikgolh? Chuna. Xlikana pi ni akxilhkgolh la kgantaxtulh putum tuku xmalaknunit Dios, pero chuntiya lipawankgolh pi xʼama kgantaxtu. Chu xlakata liwana xkatsikgo pi Jehová tlan xkaʼakxilha, xkanajlakgo pi xʼamakgo akxilhkgo la xkgantaxtulh xtamalaknun Jehová (Heb. 11:4, 5). Akxni lilakpuwanaw xliʼakxilhtitkan, kinkamaxkiyan litliwakga xlakata ankgalhin nalipawanaw xtamalaknun Jehová.

18. ¿Tuku kilitlawatkan maski kaxatukawa tuku nala? (Hebreos 11:6).

¹⁸ Kakilhtamaku lu nitlan la wi (2 Tim. 3:13). Chu Satanás chuntiya kalakputsananima xlakskujnin Dios. Kaxatukawa tuku nala kkilhtamaku nema aku mima, chuntiya kaskujnaniw Jehová xliputum kilatamatkan, chu liwana kakanajlaw pi «lipawanaw xastakna Dios» (1 Tim. 4:10). Kalakapastakwi pi xaʼawatiya tuku talichuwinan xlakata tuku titaxtulh Job masiya pi «Jehová lu xapaxkina chu xalakgalhamana» (Sant. 5:11). Chuna la Job, nikxni kamakgxtakgwi Jehová, chu kakanajlaw pi xla nakasikulunatlawa «tiku xatapaxuwan tlawaputunkgo xtalakaskin» (kalikgalhtawakga Hebreos 11:6).