1. ¿Tuku wa mapakgsina Salomón anta kʼEclesiastés 7:20?

 MAPAKGSINA Salomón wa: «Ni anan kkatiyatni chixku tiku xaʼakgstitum chu kajwatiya natlawa tuku tlan chu ni nalakgalhinan» (Ecl. 7:20). ¡Uma lu xlikana! Putum akinin makglakgalhinanin (1 Juan 1:8). Wa xlakata kimputumkan maklakaskinaw pi Dios kakinkatapatin chu nachuna kakinkatapatikgon amakgapitsin.

2. ¿La makgkatsiyaw akxni chatum amigo kinkatapatiyan?

² ¿Minit kilhtamaku tlawaw tuku nitlan limamakgkatsiniw chatum tlan amigo? Putum chuna kinkaʼakgspulanitan. Chu, xlakata chuntiya kiʼamigojkan xwa, xliputum kinakujkan skiniw pi xkinkatapatin. ¿La makgkatsiw akxni kiʼamigojkan kinkatapatin? ¿Ni xlikana pi lu tlan limakgkatsiw chu lu paxuwaw? Xlikana pi chuna.

3. ¿Tuku nalichuwinanaw kʼuma artículo?

³ Kimputumkan lakaskinaw pi Jehová tlakg xatlan kiʼamigojkan nawan, pero makglhuwa wanaw chu tlawayaw tuku ni lakgati. Wa xlakata, ¿la liwana nakatsiyaw pi xla kinkatapatiputunan? ¿Tuku xlakata wanaw pi chuna la tapatinan Jehová ni xtachuna la tapatinankgo latamanin? Chu ¿tiku katapati Dios?

4. ¿Tuku xlakata liwana katsiyaw pi Jehová tapatinamputun?

⁴ Biblia kinkawaniyan pi Jehová tapatinamputun. Akgtum liʼakxilhtit, anta ksipi Sinaí, Jehová wanilh Moisés la likatsi. Jehová maklakaskilh chatum ángel chu wanilh: «Jehová, Jehová, chatum Dios tiku xalakgalhamana chu tiku tlan likatsi, ni lakapala sitsi chu kgalhi lhuwa tapaxkit nema ni makgxtakgnan chu xaxlikana, tiku chuntiya lhuwa mil kalimasiyani tapaxkit nema ni makgxtakgnan chu tapatinan akxni tlawakan tuku nitlan» (Éx. 34:6, 7). Jehová chatum Dios xapaxkina chu xalakgalhamanina, tiku katapatiputun tiku tlawakgonit talakgalhin chu nitlan limakgkatsikgo xtalakgalhinkan (Neh. 9:17; Sal. 86:15).

5. Chuna la wan Salmo 103:13, 14, ¿la kinkalikatsiniyan Jehová xlakata liwana kinkalakgapasan?

⁵ Xlakata Jehová kiMalakatsukinakan, xla liwana kinkalakgapasan. ¿Ni xlikana pi kaks kinkamalakawaniyan pi liwana kalakgapasa chatunu latamanin tiku lamakgolh kKatiyatni? (Sal. 139:15-17). Xla akxilha talakgalhin nema kinkamatitaxtinikgon xapulana kinatlatnikan. Pero ni kajwatiya uma. Xla katsi pi tuku titaxtunitaw kkilatamatkan makgtanu chuna la likatsiyaw. ¿La limaklakaskin Jehová putum tuku katsi? Xlakata liwana kinkalakgapasan tlawa pi nakinkalimasiyaniyan talakgalhaman (Sal. 78:39; kalikgalhtawakga Salmo 103:13, 14).

6. ¿La limasiyanit Jehová pi kinkatapatiputunan?

⁶ Jehová limasiyanita pi kinkatapatiputunan. Xla liwana akgatekgsa pi xlakata tuku tlawalh xapulana chixku, Adán, putum akinin makglakgalhinanin litaxtuyaw chu niyaw (Rom. 5:12). Chu ni anan tuku tlan natlawayaw akinin chu amakgapitsi latamanin xlakata ni natlawayaw talakgalhin chu ni naniyaw (Sal. 49:7-9). Pero Dios kinkalakgalhaman chu wi tuku tlawalh xlakata nakinkalakgmaxtuyan. Chuna la wan Juan 3:16, xlakata Jehová kinkapaxkin malakgachalh xachastum xKgawasa xlakata nani kimpalakatakan (Mat. 20:28; Rom. 5:19). Jesús nilh kimpalakatakan xlakata nakalakgmaxtu putum tiku nakanajlanikgo (Heb. 2:9). ¿Lilakpuwanaw la makgkatsilh Jehová akxni akxilhli la xKgawasa tiku lu paxki xpatinama chu makgnika? Komo Jehová ni xkinkatapatiputun,  ni xtimastalh talakaskin xmakgnika xKgawasa.

7. Kakalichuwinanti makgapitsi tiku kalichuwinankan kBiblia nema Jehová xatapaxuwan katapatilh.

⁷ Biblia kalichuwinan lhuwa latamanin tiku xatapaxuwan katapatilh Jehová (Efes. 4:32). ¿Lakapastaka tiku chuna tapatika? Max lilakpuwampat mapakgsina Manasés. Xla lu nitlan xlikatsi chu tlawalh laklanka talakgalhin kxlakatin Jehová. Tlawalh pi amakgapitsin xkakninanikgolh nixaxlikana dioses chu kalhkuyulh xkamanan xlakata nakamakamaxki nixaxlikana dioses. Biblia lichuwinan xpalakata: «Lhuwa tlawalh tuku nitlan kxlakatin Jehová xlakata xmakgasitsilh» (2 Crón. 33:2-7). Pero, akxni Manasés limasiyalh pi xlikana lu nitlan xlimakgkatsi xtalakgalhin, Jehová lu xatapaxuwan tapatilh chu maxkipa talakaskin pi mapakgsina xlitaxtupa (2 Crón. 33:12, 13). Atanu tiku max na lilakpuwanaw wa mapakgsina David, tiku tlawalh laklanka talakgalhin. Tatalakgxtumilh xpuskat atanu chixku chu makgninalh. Pero, akxni David lichuwinalh xtalakgalhin chu lu nitlan limakgkatsilh, Jehová na tapatilh (2 Sam. 12:9, 10, 13, 14). Uma kinkamasiyaniyan pi Jehová xlikana kinkatapatiputunan. Chu, chuna la naʼakxilhaw la uku, akxni Jehová tapatinan ni xtachuna la tapatinankgo latamanin.

8. ¿Tuku xlakata Jehová chatum Juez tiku niti xtachuna, chu la makgtanuma uma la tapatinan?

⁸ Jehová wa «Juez xlikalanka katiyatni» (Gén. 18:25). Chatum tlan juez liwana xlilakgapasat limapakgsin. Chu Jehová wa kiJuezkan xlakata liwana akgatekgsa limapakgsin chu wa Tiku masta limapakgsin (Is. 33:22). Ni anan tiku liwana katsi tuku tlan chu tuku nitlan chuna la Jehová. ¿Tuku atanu xlitlawat chatum tlan juez? Akxni wi tuku nalaksaka, kuenta xlitlawat putum tuku lanit. Wa xlakata, Jehová wa tiku tlakg xatlan Juez xlakata katsi putum tuku lanit.

9. ¿Tuku kuenta tlawa Jehová akxni laksaka komo wi tiku natapati o ni?

⁹ Jehová ni xtachuna la jueces xalak kakilhtamaku. Xla ankgalhin liwana katsi putum tuku lanit (Gén. 18:20, 21; Sal. 90:8). Ni kajwatiya kuenta tlawa tuku latamanin akxilhkgo chu kgaxmatkgo. Liwana akgatekgsa pi chuna la lakgnu, la makgastakkanit, tiku akxtum katala chu tuku makgkatsi chu la lakapastaknan chatum lataman, makgtanu la likatsi. Nachuna, Jehová katsi tuku wi kkinakujkan, uma wamputun pi akgatekgsa tuku xlakata wi tuku tlawayaw chu lakaskinaw. Ni anan tuku matsekgkan kxlakatin: putum akxilha (Heb. 4:13). Wa xlakata, akxni Jehová tapatinan chuna tlawa xlakata katsi putum tuku lanit.

10. ¿Tuku xlakata tlan wanaw pi tuku laksaka Jehová ankgalhin xaʼakgstitum? (Deuteronomio 32:4).

¹⁰ Tuku laksaka Jehová ankgalhin xaʼakgstitum. Xla nikxni laksakpaxkinan. Akxni wi tiku tapati ni wa kuenta tlawa la tasiya, la xlilhuwa tumin kgalhi, komo xlakaskinka litaxtu o komo wi tuku tlan tlawa uma lataman (1 Sam. 16:7; Sant. 2:1-4). Nila wanikan Jehová tuku xlitlawat chu na nila xokgonikan (2 Crón. 19:7). Chu tuku laksaka nichuna tlawa kaj xlakata tuku makgkatsi (Éx. 34:7). Xlikana pi Jehová wa tlakg xatlan Juez xlakata liwana kinkaʼakgatekgsniyan chu katsi putum tuku titaxtuyaw (kalikgalhtawakga Deuteronomio 32:4).

11. ¿Tuku xlakata chuna la tapatinan Jehová ni xtachuna la tapatinankgo latamanin?

¹¹ Tiku tsokgkgolh Tatsokgni xaHebreo xkatsikgo pi chuna la tapatinan Jehová ni xtachuna la tapatinankgo latamanin. Milh kilhtamaku maklakaskinkgolh tachuwin hebreo nema maktum libro lichuwinan pi «uma tatapatin  wa nema Dios masiyani chatum makglakgalhina». Uma libro wampara: «Nikxni limaklakaskinkan xlakata la chatum lataman tapati achatum» (Sinónimos del Antiguo Testamento, matitaxtilh Santiago Escuain). Kajwatiya Jehová tlan tapati chatum lataman tiku nitlan limakgkatsi xtalakgalhin. ¿Chu la makgkatsiyaw akxni Jehová kinkatapatiyan?

12, 13. 1) ¿Tuku lipaxuwa lataman tiku Jehová tapati? 2) ¿La xlimakgas makgapala la tapatinan Jehová?

¹² Akxni kanajlayaw pi Jehová kinkatapatinitan, lu tlan limakgkatsiyaw chu tlawa pi kintalakapastaknikan tlan namakgkatsi chu nakgalhi takaksni. Uma ni chuna makgkatsiyaw akxni kinkatapatikgoyan latamanin, kajwatiya chuna makgkatsiyaw akxni «Jehová» kinkatapatiyan (Hech. 3:19). Akxni xla kinkatapatiyan, kinkamaxkiparayan talakaskin xʼamigo nalitaxtuparayaw. Xtachuna la komo nikxni tlawaw akgtum talakgalhin.

¹³ Akxni Jehová tapati chatum lataman, nikxni limalakgaxokgepara tuku nitlan tlawalh (Is. 43:25; Jer. 31:34). Jehová tlawa pi xtalakgalhin natawila «chuna la xlimakgat lawilanikgolh niku taxtu chichini chu niku tatsekga» (Sal. 103:12). * Akxni lilakpuwanaw la xlilhuwa kinkatapatiyan tlawa pi napaxtikatsiniyaw chu namaxkiyaw kakni (Sal. 130:4). Pero ¿tiku chuna katapati Jehová?

14. ¿Tuku katsinitaw asta la uku xlakata la tapatinan Jehová?

¹⁴ Chuna la akxilhnitaw, akxni tapatinan Jehová ni wa akxilha la xlilanka talakgalhin tlawanitaw. Nachuna, katsininitaw pi akxni Jehová laksaka komo wi tiku natapati o ni, maklakaskin tuku katsi chuna la kiMalakatsukinakan, xmastana limapakgsin chu Juez. Wa xlakata, ¿tuku kuenta tlawa Jehová?

15. Chuna la wan Lucas 12:47, 48, ¿tuku kuenta tlawa Jehová akxni laksaka komo wi tiku natapati?

¹⁵ Pulaktum tuku Jehová kuenta tlawa wa komo tiku tlawalh talakgalhin xkatsi pi nitlan tuku xtlawama. Jesús liwana wa uma akxni lichuwinalh tuku wan Lucas 12:47, 48 (kalikgalhtawakga). Akxni chatum lataman tlawa tuku katsi pi Dios ni lakgati chu lu nitlan, tlawa akgtum lanka talakgalhin. Xtayat uma  lataman tlawa pi Dios ni natapati (Mar. 3:29; Juan 9:41). Pero min kilhtamaku katsiyaw pi tuku tlawaw nitlan. Akxni chuna la, ¿tlan nakinkatapatiyan Jehová tuku tlawaw? Xlikana pi chuna. Chu uma kinkamasiyaniyan tuku atanu kuenta tlawa Jehová akxni kinkatapatiyan.

16. ¿Tuku kilhchanima nitlan limakgkatsikan talakgalhin, chu tuku xlakata lu xlakaskinka chuna natlawayaw?

¹⁶ Atanu tuku kuenta tlawa Jehová wa komo tiku makglakgalhinalh xlikana nitlan limakgkatsi tuku tlawanit. ¿Tuku kilhchanima nitlan limakgkatsikan talakgalhin? Kilhchanima lakgpalikan tuku lakpuwankan, tuku tlawakan o tuku lakgchamputunkan. Nachuna, lataman tiku nitlan limakgkatsi xtalakgalhin nitlan limakgkatsi kxtalakapastakni tuku nitlan tlawanit chu lu lilipuwan xlakata tuku tlawalh o xlakata ni tlawalh tuku xkatsi pi xlitlawat xwanit. Ni kajwatiya nitlan limakgkatsi tuku nitlan tlawalh, wata xlakata nitlan xwi xtakanajla nema matlawilh tuku nitlan. Kakalilakpuwamparaw mapakgsina Manasés chu David. Maski tlawakgolh laklanka talakgalhin, Jehová katapatilh xlakata nitlan limakgkatsikgolh xtalakgalhinkan (1 Rey. 14:8). Wa xlakata Jehová kajwatiya tapati tiku limasiya pi nitlan limakgkatsi xtalakgalhin. Ni kajwatiya talakaskin nitlan nalimakgkatsiyaw talakgalhin nema tlawanitaw. Talakaskin wi tuku natlawayaw. * Chu uma tlawa nalilakpuwanaw atanu tuku Jehová kuenta tlawa akxni kinkatapatiyan.

17. ¿Tuku kilhchanima talakgpalikan, chu tuku xlakata lu xlakaskinka xlakata ni natlawaparayaw talakgalhin nema tlawaw makgasa? (Isaías 55:7).

¹⁷ ¿Tuku atanu kuenta tlawa Jehová? Talakgpalit. Talakgpalikan wa akxni taspitkan o talakgspitkan, uma wamputun, makgxtakgkan nixatlan tiji chu tsukukan latamakan chuna la Jehová lakgati (kalikgalhtawakga Isaías 55:7). Lataman tiku talakgpali xlilakgpalit xtalakapastakni xlakata wa Jehová napulalin (Rom. 12:2; Efes. 4:23). Xlimakgxtakgat nixatlan xtalakapastakni chu nixatlan xtayat (Col. 3:7-10). Pero ankgalhin kililakapastakatkan pi tuku tlawa pi Jehová nakinkatapatiyan chu nakinkamaskulunkiyan wa nakanajlaniyaw xtamakamastan Jesús. Akxni Jehová  akxilha pi lu liskujmaw nalakgpaliyaw kintayatkan, kinkatapatiyan xlakata xtamakamastan xKgawasa (1 Juan 1:7).

18. ¿Tuku katsininitaw xlakata la tapatinan Jehová?

¹⁸ Kalichuwinaw tsinu makgapitsi tuku lu xlakaskinka akxilhnitaw k’uma artículo. Xlikana pi ni anan kxlikalanka kakilhtamaku tiku tapatinan chuna la Jehová. ¿Tuku xlakata chuna wanaw? Pulana, xlakata xla ankgalhin kinkatapatiputunan. Xlipulaktiy, xlakata xla liwana kinkalakgapasan; liwana katsi kimpalakatakan chu kajwatiya xla tiku tlan akxilha komo xlikana nitlan limakgkatsiyaw kintalakgalhinkan. Chu, xlipulaktutu, akxni Jehová tapatinan xtachuna la komo nikxni tlawaw talakgalhin. Xlakata uma, tlan nakgalhiyaw tlan talakapastakni chu Jehová tlan nakinkaʼakxilhan.

19. ¿Tuku xlakata tlan napaxuwayaw maski namin kilhtamaku natlawayaw akgtum talakgalhin xlakata makglakgalhinanin akinin?

¹⁹ Xlikana pi xlakata makglakgalhinanin akinin, chuntiya natlawayaw talakgalhin. Pero lu tlan kinkamamakgkatsiniyan tuku wan Perspicacia para comprender las Escrituras, volumen 1, página 209: «Xlakata Jehová xalakgalhamanina, kuenta tlawa pi xlakskujnin makglakgalhinanin, chu ni talakaskin pi chuntiya nitlan nalimakgkatsikgo tuku nitlan kamatlawi xtalakgalhinkan nema talakachinkgonit (Sal. 103:8-14; 130:3). Komo naliskujkgo xlakata nalilatamakgo tuku Dios lakgati tlan napaxuwakgo (Filip. 4:4-6; 1 Juan 3:19-22)». ¡Lu tlan kinkamamakgkatsiniyan umakgolh tachuwin!

20. ¿Tuku naʼakxilhaw kʼatanu artículo?

²⁰ Lu paxtikatsiniyaw pi Jehová kinkatapatiputunan kintalakgalhinkan komo nitlan nalimakgkatsiyaw. Pero ¿la tlan nastalaniyaw xliʼakxilhtit? ¿Tuku tatalakxtumi chu tuku litalakgpali la tapatinan Jehová chu la tapatinanaw? ¿Chu tuku xlakata lu xlakaskinka naʼakgatekgsaw uma? Kʼartículo nema aku mima natekgsaw xatakgalhtin umakgolh takgalhskinin.