Wi tuku kakinkamatlawin «limapakgsin xla talakgalhaman»
«XTALAKGALHAMANKAN natalan wa tuku kaks kimalakawanilh». Chuna wan chatum tala tiku wanikan Lisa * akxni lichuwinan tuku kaks malakawanilh akxni lakgapasli xaxlikana. Anne nachuna titaxtulh. Xla wan: «Akxni kkalakgapasli xtatayananin Jehová, tuku klakgatilh wa la tlan kilikatsinikgolh chu ni wa tuku xmasiyakgo». Maski la uku umakgolh natalan lu lipaxuwakgo akxni likgalhtawakgakgo chu lilakpuwankgo Biblia, tuku lu kamakgtayalh wa xtalakgalhamankan natalan.
Komo kamakgtayaputunaw amakgapitsin, ¿tuku tlan natlawayaw xlakata nakalimasiyaniyaw pi tlan kalikatsiniyaw? Kaʼakxilhwi pulaktiy la tlan natlawayaw: kkintachuwinkan chu tuku tlawayaw. Alistalh nalichuwinanaw tiku tlan nakalikatsiniyaw chu nakalimasiyaniyaw talakgalhaman.
«LIMAPAKGSIN XLA TALAKGALHAMAN» KAPULALILH KINTACHUWINKAN
Capítulo 31 xla Proverbios lichuwinan chatum puskat tiku lu skulujwa chu wan pi «ksimakgat kgalhi limapakgsin xla talakgalhaman» (Prov. 31:26). Xla masta talakaskin pi uma limapakgsin napulalin xlakata tuku wan chu la nawan. Natlatni na xlimastatkan talakaskin pi uma limapakgsin nakapulalin kxtachuwinkan. Lhuwa natlatni katsikgo pi, komo palha nakatachuwinankgo xkamanankan, nitlan katikamamakgkatsinikgolh. Komo ni kuenta nakatlawanikgo xkamanankan chu ni nakalimasiyanikgo tapaxkit, xkamanankan max ni katikakgalhakgaxmatniputunkgolh. Pero, komo nakalimasiyanikgo tapaxkit chu talakgalhaman, xkamanankan max nakakgalhakgaxmatnikgo.
Maski natlatni akinin o ni, ¿tuku tlan natlawayaw xlakata talakgalhaman napulalin kintachuwinkan? Xapulana tuku lichuwinan Proverbios 31:26 kinkawaniyan tuku tlan natlawayaw. Anta wan: «Akxni chuwinan limasiya liskgalala». Uma wamputun liwana nalaksakaw kintachuwinkan chu la nawanaw. Akxni titaxtumaw akgtum taʼakglhuwit, tlan nalilakpuwanaw uma takgalhskinin: «Uma tuku nakwan, ¿namastaka taʼakglhuwit o namakaksa?» (Prov. 15:1). Limasiyakan liskgalala akxni pulana lakpuwankan tuku wankan.
Atanu proverbio wan: «Akxni ni liwana lakapastakkan tuku wankan xtachuna la lilhtukunankan kgantum espada» (Prov. 12:18). Komo nalilakpuwanaw la nakamamakgkatsini amakgapitsin kintachuwinkan chu la nawanaw, max kuenta natlawayaw tuku nawanaw. Akxni mastayaw talakaskin pi nakinkapulalinan «limapakgsin xla talakgalhaman», ni maklakaskinaw tachuwin nema nitlan mamakgkatsininan chu ni palha chuwinanaw (Efes. 4:31, 32). Wata maklakaskinaw xatlan tachuwin chu xatlan talakapastakni chu lakgmakganaw nixatlan tachuwin chu nixatlan talakapastakni. Xlakata putum uma, Jehová kinkamaxkiyan lu tlan liʼakxilhtit. Akxni Elías, chatum kskujni Jehová, lu xpekuama, ángel tiku Jehová malakgachalh matliwakglhi akxni wanilh «akgtum xakakswa chu pixtsu tachuwin» (1 Rey. 19:12). Pero talakgalhaman ni kajwatiya limasiyakan ktachuwin. Uma tayat na xlitasiyat akxni wi tuku tlawayaw. Kaʼakxilhwi la natlawayaw.
TUKU TLAWAYAW KAMAKGTAYA AMAKGAPITSIN
Stalanikan xliʼakxilhtit Jehová kilhchanima maklakaskinkan akgtum kakswa tachuwin chu tlan likatsikan (Efes. 4:32; 5:1, 2). Lisa, tiku lichuwinaw kxapulana párrafo, akxilhli la limasiyakgo talakgalhaman xtatayananin Jehová. Wan: «Akxni kifamilia chu akit kaj xalan kaw latamayaw alakatanu, akgtiy tamakgaxtokgat, tiku xtatayananin Jehová, skinkgolh permiso kxtaskujutkan xlakata xkinkamakgtayakgon nakmakaxaw tuku xakamaw linaw. Chu uma kilhtamaku akit nina xkilimakgalhtawakgekan Biblia». Xlakata tlan likatsinika tlawalh pi Lisa tlakg xkatsiputulh tuku xaxlikana.
Anne, tiku na lichuwinaw kxapulana párrafo, na akxilhli la tlan likatsikgo xtatayananin Jehová. Xla wan: «Xlakata kakilhtamaku lu nitlan wi, niti xaklipawan; tuwa xakmakgkatsi nakkalipawan latamanin». Wampara: «Akxni kkalakgapasli xtatayananin Jehová, tanu la xakkalakpuwani. Xaklakpuwan, “¿tuku xlakata lu tlan kilikatsinikgo?”. Pero tiku xkilimakgalhtawakge Biblia tlawalh pi naklipawan xlakata kakxilhli pi xlikana tlan xlikatsi». ¿Chu la makgtayalh uma? Anne wan: «Titaxtulh kilhtamaku, xlikana ktsukulh kuenta ktlawa tuku xakkatsinima».
Lu kaks malakawaninan pi chuna la kalikatsinika umakgolh chatiy natalan lakpuskatin wa tuku kamakgtayalh. Chu uma tlawalh, pi tlakg xkatsiputunkgolh tuku xaxlikana. Talakgalhaman chu la tlan kalikatsinikgolh natalan xalak congregación kalakgchanilh kxnakujkan.
KALIMASIYAW XTALAKGALHAMAN DIOS AKXNI KATALALINAW AMAKGAPITSIN
Makgapitsin ni tuwa makgkatsikgo nalakalitsinkgo chu tlan nakalikatsinikgo amakgapitsin xlakata xtalismaninkan chu xtayatkan. Chu uma lu tlan. Pero, komo kajwatiya chuna natlawayaw xlakata uma, max ni limasiyamaw nawan xtalakgalhaman Dios (katamalakxtupi Hechos 28:2).
Xaxlikana talakgalhaman chu tlan likatsikan wa tayat nema espíritu tlawa pi latamanin nakgalhikgo (Gál. 5:22, 23). Chu xlakata nakgalhiyaw umakgolh tayat chu nalikatsiyaw chuna la Jehová chu Jesús, lu xlakaskinka namastayaw talakaskin pi espíritu santo napulalin kintapuwankan chu tuku tlawayaw. Nachuna, xlakata kstalaninanin Cristo akinin, xlikana kalilakgaputsayaw amakgapitsin xlakata paxkiyaw Dios chu kintalatamankan. Akxni uma tapaxkit wa tuku kinkamakgpuwantiniyan, talakgalhaman nema limasiyayaw wa tayat nema lu makgapaxuwa Jehová.
TIKU TLAN NAKALIKATSINIYAW CHU NAKALIMASIYANIYAW TALAKGALHAMAN
Ankgalhin, tlakg ni tuwa tlan kalikatsiniyaw tiku kinkalimasiyanikgonitan talakgalhaman o kintalilakgapasnikan (2 Sam. 2:6). Pulaktum la tlan nalimasiyayaw pi tlan kalikatsiniyaw amakgapitsin, wa pi napaxtikatsininanaw (Col. 3:15). Pero ¿tuku kitaxtu komo nalakpuwanaw pi wi tiku ni lakgchan tlan nalikatsiniyaw?
Kalilakpuwaw uma: Jehová kalimasiyani talakgalhaman asta tiku ni kalakgchan, chu ni anan atanu tiku limasiya talakgalhaman chuna la xla. Biblia wi tuku lu xlakaskinka kinkamasiyaniyan xlakata uma. Anta kTatsokgni xaGriego makglhuwa maklakaskinkan tachuwin talakgalhaman nema ni anan xtachuna. ¿La limasiya Dios uma tayat?
Kalakapastakwi la xlilhuwa millones latamanin kalimasiyaninit Jehová talakgalhaman akxni kamaxki tuku maklakaskinkgo xlakata tlan nalatamakgo (Mat. 5:45). Asta akxni nina xlakgapasaw, xla xkinkalimasiyaninitana xtalakgalhaman (Efes. 2:4, 5, 8). Akgtum liʼakxilhtit, mastalh xpalakata putum latamanin tuku lu lhuwa xtapalh xkgalhi: xachastum xKgawasa. Apóstol Pablo lichuwinalh pi tlan nalitamakgtayayaw talakgmaxtut «xpalakata xtalakgalhaman [Dios] nema ni anan xtachuna» (Efes. 1:7). Nachuna, maski tlawayaw akgtum talakgalhin o makgalipuwanaw Jehová, xla chuntiya kinkapulalinan. Xtamasiy chu xtachuwin nema litsama xtalakgalhaman xtachuna «la akxni xwayaj min sen» (Deut. 32:2). Nikxnila katixokgoniw putum talakgalhaman nema kinkalimasiyaniyan. Chu katsiyaw pi komo Jehová ni xkinkalimasiyanin talakgalhaman ni xkgalhiw takgalhkgalhin xlakata kilhtamaku nema aku mima (katamalakxtupi 1 Pedro 1:13).
¿Ni xlikana pi xtalakgalhaman Jehová tlawa pi natalakatsuwiniyaw chu wi tuku kinkamatlawiyan? Wa xlakata, ni kajwatiya chatum o chatiy nakalimasiyaniyaw talakgalhaman chu tlan nakalikatsiniyaw. Wata kaliskujwi nakalikatsiniyaw amakgapitsin chuna la tlawa Jehová (1 Tes. 5:15). Komo putum kilhtamaku nalimasiyayaw talakgalhaman, nalitaxtuyaw la lhkuyat nema matsitsijwinan akxni lonkgnan. Kifamiliajkan, kinatalankan xalak congregación, tiku akxtum kataskujaw chu tiku kataʼanaw kʼescuela chu tiku kintalakatsukan tlan namakgkatsikgo akxni akxtum nakatatawilayaw.
¿Anan kmifamilia o kcongregación tiku tlan nalimakgkatsi komo tlan nalikatsiniya o komo nawaniya akgtum tachuwin nema limasiya talakgalhaman? Max chatum tala xalak congregación maklakaskin tamakgtay xlakata nakuentajtlawa xchik o xjardín o max xlakata naʼan tamawanan o naʼan alakatanu. ¿Chu la tlan nalimasiyayaw talakgalhaman akxni lichuwinanaw Dios? Max tlan namakgtayayaw tiku maklakaskin tamakgtay.
Kastalaniw xliʼakxilhtit Jehová, chu kkintachuwinkan chu tuku tlawayaw kapulalilh «limapakgsin xla talakgalhaman».
^ Makgapitsi tukuwani kalakgpalikanit.